“I No Taim Yet Bilong Mi Long i Dai”
Draiva bilong wanpela bikpela trak bilong karim pipia i no stiaim gut trak bilong em. Trak i abrusim rot, na bamim tupela marit na wanpela yangpela man i gat 23 krismas, em ol i bin wokabaut long arere bilong rot. Ripot bilong wanpela niuspepa bilong New York City i tok, wantu tupela marit i dai na yangpela man i hap indai. Taim em i kisim bek tingting na lukim ol samting i bin kamap, namba wan tingting bilong em i olsem: ‘Mi no inap bilip long dispela samting i kamap. Plis, God, larim mi i stap laip.’ Em i tok, “I no taim yet bilong mi long i dai.”
ATING yu harim pinis ol kain stori olsem. Taim wanpela i abrusim bagarap, ol man i save tok, ‘I no taim yet bilong em long i dai,’ tasol sapos wanpela i dai long wanpela eksiden, ol i save tok, ‘Taim bilong em long i dai i bin kamap’ o ‘Em laik bilong God.’ Planti man i ting, God i makim pinis ol samting i kamap long laip bilong ol, na ol i no inap mekim wanpela samting bilong senisim dispela. Ol i gat dispela tingting long planti samting, i no long samting bilong indai o eksiden tasol, nogat; na tu, dispela tingting i bin kamap long bipo yet.
Olsem: Ol Babilon bilong bipo, ol i bilip olsem ol sta na wokabaut bilong ol sta i stiaim ol samting long sindaun bilong ol man. Olsem na ol i lukluk i go long skai bilong painim ol sain na ol mak bilong stiaim ol. Ol Grik na ol Rom i bin lotuim ol god meri em ol i gat strong long makim ol gutpela samting na ol samting nogut bai painim ol man, na sampela taim i luk olsem strong bilong ol i winim strong bilong ol nambawan god bilong ol, em Sus na Jupita.
Long Esia, ol Hindu na Budis i bilip olsem ol samting i painim ol man long nau, as bilong dispela em ol samting man i bin mekim long narapela laip paslain long dispela laip nau em i gat, na ol samting em i mekim long nau bai stiaim ol samting bai painim em long laip bihain. Sampela narapela lotu—na planti lotu bilong Kristendom tu—ol tu i gat dispela kain bilip olsem God i makim pinis ol samting i kamap.
Olsem na yumi no ken kirap nogut olsem long nau, long dispela taim we ol man i bilip tasol long ol samting tru tru i kamap, planti man i bilip olsem God i makim pinis ol samting i kamap long laip bilong ol, na i painim ol long ol wan wan de, na bai painim ol long bihain, na ol i no inap mekim wanpela samting bilong senisim dispela. Olsem wanem? Yu gat dispela kain tingting long laip bilong yu? Yu ting God i makim pinis ol samting i kamap long laip bilong man, ol gutpela samting na ol samting nogut—na de mama i karim man na de bilong i dai? Orait, nau yumi ken tingim olsem wanem Baibel i ken helpim yumi long bekim ol dispela askim.
[Piksa Kredit Lain long pes 3]
Ken Murray/New York Daily News