Stap Gut Long God Long Taim Bilong Hevi

LONG Epril 1951, strongpela gavman Soviet i kirap mekim nogut long wanpela lain Kristen long hap wes bilong Soviet Yunion​—em ol Witnes Bilong Jehova. Planti tausen famili​—ol liklik pikinini, ol meri i gat bel, ol lapun tu​—ol i putim ol insait long ol kago tren bilong kisim ol i go long Saibiria, na ol i stap long tren inap 20 de. Ol i bilong i stap olgeta long dispela hap nogut we i no gat ol samting bilong helpim sindaun bilong ol.

Long Epril 2001, em 50 yia bihain long dispela taim, ol i kamapim wanpela vidio long Moscow bilong makim bikpela hevi ol Witnes Bilong Jehova i bin kisim long Soviet Yunion inap planti yia. Long dispela vidio, ol saveman na ol man i bin lukim ol dispela samting i bin kamap, ol i stori long olsem wanem ol Witnes i bin abrusim bagarap na ol i kamap strong long dispela hap, maski ol i bin kisim bikpela hevi tru.

Planti milion manmeri long Rasia na long ol narapela hap ol i lukim pinis dispela vidio, Faithful Under Trials​—Jehovah’s Witnesses in the Soviet Union, na ol manmeri na ol saveman i litimapim tru dispela vidio. Nau yumi ken lukim tupela tok bilong ol saveman bilong Rasia ol i sindaun long hap em bipo gavman Soviet i bin salim planti famili Witnes i go long en:

“Mi amamas tru long lukim dispela vidio. Mi save laikim ol lain bilong lotu bilong yupela, tasol taim mi lukim pinis vidio, mi laikim yupela moa yet. Ol i bin wokim gut tru dispela vidio! Mi laikim pasin bilong yupela long kamapim stori bilong ol wan wan manmeri. Mi bilong lotu Otodoks na mi no gat tingting long senisim lotu bilong mi, tasol mi amamas long ol Witnes. Mi laik bai skul bilong mipela i ken holim wanpela kopi bilong dispela vidio. Mi wantaim ol wanwok bilong mi i pasim tok pinis long soim long ol sumatin bilong mipela na putim wantaim ol samting ol sumatin i save lain long en.”​—Profesa Sergei Nikolayevich Rubtsov, het-tisa long hap ol i lainim histori long State Pedagogical University, Irkutsk, Rasia.

“Mi amamas taim dispela vidio i kamap. Taim yumi wokim vidio bilong sampela lain ol gavman i bin strong long daunim, i hatwok long kamapim gut dispela stori na bai ol man inap kisimgut. Tasol yupela i bin mekim olsem. Plis mi laik kisim sampela vidio moa bilong yupela.”​—Profesa Sergei Ilyich Kuznetsov, het-tisa long hap ol i lainim histori long Irkutsk State University, Rasia.

Ol Witnes Bilong Jehova i sindaun long Saibiria ol tu i amamas tru long dispela vidio. Orait nau yumi ken lukim sampela tok i kamapim tingting bilong ol:

“Taim ol samting i bin kamap olsem dispela vidio i stori long en, planti manmeri bilong Rasia i bin kisim ol tok kranki long wok bilong ol Witnes Bilong Jehova. Tasol taim ol i lukim pinis dispela vidio, ol inap save olsem oganaisesen bilong yumi i no wanpela liklik lain nating bilong lotu olsem ol i bin ting. Sampela manmeri em nau tasol ol i kamap Witnes ol i tok: ‘Mipela i no bin tingting liklik olsem mipela i sindaun na wok klostu long ol brata Kristen em ol i bin karim bikpela hevi tru!’ Taim wanpela Witnes i lukim pinis vidio, em i tokaut olsem em i laik kamap wanpela painia i wok fultaim long autim tok.”​—Anna Vovchuk, ol i bin rausim em i go long Saibiria.

“Taim mi lukim ol polis i paitim dua long haus bilong wanpela Witnes, skin bilong mi i guria. Mi tingim taim ol polis i kam paitim dua bilong mipela, na mama i tok: ‘Nogut wanpela haus samting i paia.’ Na tu, vidio i kirapim mi long tingim bek olsem planti Witnes i bin kisim bikpela pen na hevi moa, winim mi. Ol dispela tok nau mipela i harim, em i strongim na kirapim tru mipela long mekim yet wok bilong Jehova.”​—Stepan Vovchuk, ol i bin rausim em i go long Saibiria.

“Mi pikinini man bilong ol Witnes em ol i bin rausim i go long Saibiria. Olsem na mi ting mi harim pinis planti stori bilong ol samting i bin kamap long dispela taim. Tasol taim mi lukim dispela vidio, mi pilim olsem mi no gat save liklik long ol samting i bin kamap. Taim mi harim ol Witnes i kamapim stori bilong ol, aiwara i pulap long ai bilong mi. Nau mi tingim ol samting i bin painim ol, em i no stori tasol​—em samting tru tru i painim ol. Dispela vidio i strongim mi long pas gut moa wantaim God na i helpim mi long redi long karim olgeta hevi bai kamap bihain.”​—Vladimir Kovash, Irkutsk.

“Long tingting bilong mi, dispela vidio i gat bikpela strong, winim stori bilong en ol i raitim long buk. Taim mi lukim na harim ol brata i kamapim stori bilong ol, mi pilim olsem mi bin stap wantaim ol na karim ol dispela hevi. Pasin bilong dispela brata i bin wokim ol liklik piksa long kat na salim i go long ol liklik pikinini meri bilong em taim em i stap kalabus, em i kirapim mi long wok strong long putim ol tok i tru bilong Baibel i go daun long bel bilong ol pikinini bilong mi yet. Tenkyu tru! Dispela vidio i mekim na ol Witnes Bilong Jehova long Rasia ol i pilim moa yet olsem ol i insait long oganaisesen bilong Jehova i stap long olgeta hap.”​—Tatyana Kalina, Irkutsk.

“I gat wanpela tok olsem, ‘Sapos yu lukim wanpela samting inap wanpela taim tasol, em i winim pasin bilong harim wanpela samting inap wan handet taim.’ Dispela tok i stret tru long dispela vidio. Em i olsem yumi lukim tru tru ol samting i bin kamap na i makim stret yumi! Taim mi lukim pinis, mi mas i gat bikpela haptaim bilong tingim. Dispela vidio i helpim mi long pilim tru i stap bilong ol dispela Witnes ol i bin rausim ol i go long Saibiria. Orait nau taim mi skelim i stap bilong mi wantaim i stap bilong ol, mi kisim narapela kain tingting long ol hevi bilong yumi long nau.”​—Lidia Beda, Irkutsk.

Ol i wokim dispela vidio, Faithful Under Trials, long 25 tok ples na long olgeta hap ol manmeri i amamas long lukim.a Dispela vidio olgeta i bin kamap long ol televisen stesin long St. Petersburg, Omsk, na long sampela taun bilong Rasia, na long ol taun bilong Yukren, olsem Vynnytsya, Kerch, Melitopol na long hap bilong Lviv. Na ol lain bilong skelim ol film bilong olgeta hap ol i litimapim tru dispela vidio.

Stori bilong dispela vidio i gat strong, na dispela i kamap klia long pasin bilong planti tausen manmeri em ol i kamapim olsem ol i gat strongpela bel tru na bikpela strong long ol samting bilong spirit insait long ol dispela planti yia ol man i bin mekim nogut long ol. Tru tumas, ol Witnes Bilong Jehova long Soviet Yunion i kamapim klia tru olsem ol i bin stap gut long God long taim bilong hevi. Sapos yu laik lukim dispela vidio, ol Witnes Bilong Jehova bai amamas long kisim wanpela bilong yu. Plis toksave long wanpela Witnes i stap long hap bilong yu.

[Futnot]

[Piksa Kredit Lain long pes 8]

Stalin: U.S. Army photo

[Piksa Kredit Lain long pes 9]

Stalin: U.S. Army photo