Wanpela Video Bilong Givim Save na Kirapim Yu!
Em mun Epril bilong yia 1951. Ol i bungim planti tausen Witnes Bilong Jehova—ol famili olgeta—na putim ol long ol tren bilong karim kago na bringim ol i go kalabus long Saibiria. I gat wanem as na strongpela gavman Soviet i wok strong long bagarapim dispela lain? Olsem wanem ol brata bilong yumi i bin abrusim bagarap maski ol birua i mekim nogut tru long ol inap planti yia? Bai yu kisim bekim bilong ol dispela askim long video Faithful Under Trials—Jehovah’s Witnesses in the Soviet Union. Lukim dispela video, na ol tok bilong en i ken kirapim yu long holimpas pasin bilong i stap gut long Jehova maski wanem wanem ol samting i kamap!
Yu inap bekim ol dispela askim? (1) Wanem namba wan taim gavman i bin orait long ol Witnes Bilong Jehova long Rasia? (2) Paslain na bihain long Namba Tu Pait, olsem wanem planti tausen moa famili Witnes i kamap long Soviet Yunion? (3) Olsem wanem bilip bilong ol Witnes i pait wantaim tingting bilong Lenin? (4) Operesen Not i wanem samting, na long rot bilong dispela samting Stalin i bin tingting long mekim wanem? (5) Pasin ol i mekim bilong bringim ol Witnes i go longwe lusim ples bilong ol, dispela i mekim wanem long ol, na ol birua i tokim ol long mekim wanem na bai dispela samting i no ken painim ol? (6) Taim ol i stap long tren na bihainim longpela rot i go long Saibiria, olsem wanem ol brata sista bilong yumi i strongim narapela narapela na mekim ol birua i kirap nogut? (7) Ol Witnes i karim wanem ol hevi long Saibiria? (8) Lain bilong Jehova i tingim tru wanem samting bilong strongim ol long ol samting bilong spirit, na bilong wanem ol i mekim olsem? (9) I gat wanem as na ol brata bilong yumi i redi long lusim laip bilong ol bambai ol inap kisim ol buk na nius samting, na olsem wanem ol i kisim ol dispela samting maski ol birua i wok strong long pasim ol? (10) Khrushchev i mekim wanem bilong birua yet long lain bilong God? (11) Ol gavman i mekim wanem bilong bagarapim bilip bilong ol pikinini Witnes? (12) Ol brata bilong yumi i gat wanem stretpela save long as na ol man i mekim nogut long ol? (2002 Yearbook, p. 203-204) (13) Olsem wanem ol samting ol birua i mekim bilong bagarapim lain bilong God i kamapim gutpela samting? (2002 Yearbook, p. 220-221) (14) Wanem ol samting i bin kamap, na em ol samting ol Witnes long Soviet Yunion bilong bipo ol i bin laik tru long lukim tasol ol i no ting ol bai kamap tru tru? (15) Wanem samting i bin helpim ol brata bilong yumi long sanap strong na karim ol hevi, na olsem wanem laspela hap bilong video i kamapim klia olsem tok bilong Jeremaia 1:19 i tru olgeta? (16) Stori long ekspiriens bilong wanpela brata o sista em pasin bilong em long i stap gut long God long taim bilong hevi i kirapim yu tru.