Ol i Laikim Ol Buk Bilong Baibel Long Ol Kantri Bipo Soviet Yunion i Bosim
Wanpela man long Rasia i raitim dispela stori bilong Kirap!
LONG 1991 Rasia na 14 provins moa i insait long Soviet Yunion. Kirap long dispela yia i kam inap nau ol dispela provins i kisim independens na ol i kamap kantri. Tasol ol man i stap long Rasia i planti, winim ol man bilong ol narapela 14 kantri sapos yumi bungim olgeta wantaim. Na sapos yumi bungim graun bilong dispela 14 kantri, graun bilong Rasia i winim ol inap 3-pela taim. Long Septemba 1994, i gat 117,276 Witnes Bilong Jehova i stap long ol kantri bipo Soviet Yunion i bosim, em ol man i save autim tok bilong Baibel long ol narapela man.
Long nau long olgeta mun, ol i save prinim planti nius Wastaua na Kirap! long tok Rasia na ol Witnes long ol dispela kantri inap mekim wok long en. Na tu, ol Witnes i wok long tilim planti liklik nius na ol buk. Ol pas i kam long ofis bilong ol Witnes Bilong Jehova klostu long Sen Pitasbek, long Rasia, i kamapim klia olsem ol man i laikim ol dispela nius na buk bilong Baibel.
Ol i Laikim Ol Nius i Gat Kala Kala
Long pas wanpela man bilong sentral Saibiria i tok: ‘Mi lukim wanpela wanwok i holim wanpela Wastaua na mi askim em long soim long mi. Pastaim mi lukim ol piksa i gat kala kala, bihain mi kaunim i go i go. Man! Mi kirap nogut, long wanem, kwiktaim mi kaunim nius olgeta! Ol askim i kamap long nius i gutpela tru bilong kirapim tingting bilong man.’
Narapela man bilong Saibiria i tok: ‘Mi kisim wanpela nius bilong yupela. Mi no laik grisim yupela, tasol mi no bin kaunim wanpela nius olsem nius bilong yupela na em i stori gut tru long bilip.’
Wanpela nes bilong Sen Pitasbek, em namba 2 biktaun bilong Rasia, em i raitim pas na tok: ‘Tenkyu tru long ol gutpela stori long Kirap! [tok Inglis] bilong Janueri 8, 1995, i stori long skin i les. Mi bin wok long painim rot bilong helpim mi long karim hevi bilong mi long dispela samting. Ol stori long nius i no tekewe hevi bilong mi, tasol i helpim mi na strongim mi.’
Wanpela sumatin i gat 17 krismas i raitim pas olsem: ‘Mi laik tenkyu long ol man i save wokim ol dispela gutpela nius. Mi wantaim ol pren bilong mi i laik lusim wanpela haus piksa na mipela i lukim sampela nius i stap nating long wanpela sia. Mipela kisim. Taim mi kaunim Wastaua mi kirap nogut tru. Olsem wanem? Bihain bai yumi kisim gutpela sindaun olsem nius i tok? Nau mi kaunim Fopela Gutnius na traim long kisim save long en. Ol nius bilong yupela i stori gut tru long tok bilong Baibel.’
Wanpela man i gat 26 krismas i tok: ‘Mi amamas long stori “Is Suicide the Answer?” long Kirap! [tok Inglis] bilong Epril 8, 1994. Planti taim mi tingting long kilim i dai skin bilong mi, long wanem, sampela taim mi save bel hevi na mi save pilai long sem bilong mi. Tasol Baibel na ol beten mi mekim long Jehova i helpim mi na mi no kilim i dai skin bilong mi. Dispela stori i strongim bilip bilong mi long marimari bilong God na God bai helpim mi long winim ol hevi bilong mi. Em i save mi tanim bel. Na em i laik mi kisim laip. Mi tenkyu tru long em, long wanem, em i helpim mi long rot bilong dispela stori.’
Wanpela yangpela meri i gat 15 krismas i stori long dispela wankain stori long Kirap! olsem: ‘Dispela nius i mekim bikpela wok long i stap bilong mi. Taim mi gat 8-pela krismas mi kirap na ting i no gat wanpela man i laikim mi. Papamama i no gat taim bilong toktok wantaim mi, na mi wanpela i bin wok long stretim hevi bilong mi. Mi laik stap wanpis tasol. Na olgeta taim mi tok pait wantaim ol wanblut. Bihain mi tingting long kilim i dai skin bilong mi. Mi amamas tru mi bin bungim ol Witnes Bilong Jehova!’
Wanpela meri bilong hap bilong Yurop em Rasia i bosim, em i tok: ‘Wanpela taim mi harim tupela yangpela man i stori wantaim long Baibel taim ol i sanap long bas-stop. Mi laikim ol samting mi harim, olsem na mi toktok wantaim ol. Tupela yangpela man i givim wanpela Wastaua long mi. Mi amamas tru long kaunim na mi laik save long sampela tok moa bilong Baibel. Mi laik save long yupela long rot bilong ol nius bilong yupela, na olgeta taim mi laik kisim save long Baibel.’
Laikim Ol Buk Tu
Wanpela yangpela meri bilong hap bilong Kokesas i tok: ‘Wanpela meri i kam long ofis bilong mipela na stori long wanpela kain kibung. Mi lukim em i amamas tru, olsem na mi laik save wanem samting i mekim na em i amamas olsem. Long de bihain em i givim buk Yu Inap i Stap Oltaim Long Paradais Long Graun long mi. Mi kaunim kaunim ol tok bilong dispela buk. Man! Em narapela kain buk. Taim mi kaunim, mi pilim olsem mi bin wokabaut long tudak, tasol nau mi painim dua bilong kisim mi i go long lait. Inap longpela taim mi bin wok long painim bekim bilong ol askim bilong mi, na nau long wanpela buk tasol mi painim ol dispela bekim. Mi no inap stori long amamas bilong mi—amamas bilong mi i bikpela tru.’
Wanpela man bilong Sentral Esia i tok: ‘Mi save lotu long Misin Gutnius na mipela i sot tru long ol buk bilong Baibel. Mipela i askim yupela long salim kwik long mipela ol buk, na ol liklik buk, na ol buklet, na mipela inap stadi long en na givim long ol narapela man.’
Wanpela man bilong Amenia, klostu long solwara Blaksi, em i raitim pas na i tok: ‘Mi kaunim liklik buk Tru God i Save Tingim Yumi?, na i swit tru long mi olsem mi pulim gutpela klinpela win. Em nau, mi painim pinis wanpela buk bilong helpim mi long stadi long Baibel. Mi askim yupela long salim sampela buk long mi na mi ken stadi long Baibel.’
Wanpela meri bilong Saibiria i tok: ‘Wanpela Witnes Bilong Jehova i kam long haus bilong mipela na em i lusim buk Nambawan Man Tru i Winim Olgeta Narapela Man. Taim mi skul i kam inap long nau mi no bin bilip long God. Tasol ol tok mi kaunim long buk i kirapim mi long tingim gut ol samting na long stadi long Baibel.’
Wanpela meri i gat tupela pikinini i tok amamas long dispela wankain buk i stori long i stap bilong Krais Jisas, na em i tok: ‘Ol pikinini i no hatwok long kisim save long en, na tok bilong en i save kirapim tingting bilong ol. Na buk i save kirapim man long laik tru long stadi long Baibel na kaunim ol buk bilong Baibel. Lain bilong wokim dispela buk i wokim gutpela tru.’
Long 1994, inap 34,608 manmeri bilong ol kantri em bipo Soviet Yunion i bosim, ol i kisim baptais. Dispela i kamapim amamas bilong ol long ol samting ol i lain long en. Mipela i laik planti man moa long ol dispela kantri i kisim ol nius na buk em Baibel i as bilong en na ol Witnes Bilong Jehova i wokim. Na mipela i laik bai planti tausen man moa i kisim tok i tru bilong Baibel ol dispela buk i save kamapim!