Laip Stori
Mipela i Mekim Wok Long Ol Senis i Kamap Long Sindaun Bilong Mipela Long Autim Tok Long Ol Longwe Ples
Stori bilong Ricardo Malicsi
Taim mi lusim wok bilong mi, long wanem, mi no laik insait long ol samting bilong graun, mi na famili bilong mi i askim Jehova long helpim mipela long stretim ol samting bilong mipela long bihain. Long beten bilong mipela, mipela i tokaut long laik bilong mipela long insait moa long wok autim tok. Bihain liklik, mipela i kirap raun long 8-pela kantri long hap bilong Esia na Afrika. Dispela i mekim na mipela inap long autim tok long ol longwe ples.
MAMA i karim mi long Filipins long 1933, na famili bilong mipela i save bung wantaim Independen Misin Bilong Filipin. Mipela 14 olgeta long famili i insait long dispela lotu. Taim mi gat 12-pela krismas, mi beten askim God long stiaim mi i go long bilip tru. Wanpela tisa bilong mi i putim mi long wanpela klas bilong lotu, na mi kamap wanpela strongpela Katolik. Mi save go long konpesio long olgeta Sarere na Misa long olgeta Sande. Tasol bihain, isi isi mi no amamas moa na mi no bilip tumas long ol samting. Mi tingting planti long wanem samting i save painim ol man taim ol i dai na long helpaia na long God Triwan. Ol bekim ol bikman bilong lotu i kamapim i no gat as bilong en na mi no amamas long en.
Kisim Ol Gutpela Bekim
Taim mi skul long kolis, mi bung wantaim wanpela lain na dispela i mekim na mi insait long ol pait, pilai laki, smok, na ol narapela pasin i no stret. Wanpela nait, mi bungim wanpela mama bilong wanpela wanklas bilong mi. Em i wanpela Witnes Bilong Jehova. Mi givim ol wankain askim long em olsem mi bin givim long ol tisa long lotu bilong mi. Em i bekim olgeta askim bilong mi long rot bilong Baibel, na mi bilip tru olsem ol tok em i mekim i tru.
Mi baim wanpela Baibel na kirap stadi wantaim ol Witnes. I no longtaim bihain na mi kirap go long olgeta miting bilong ol Witnes Bilong Jehova. Mi bihainim gutpela tok bilong Baibel long “ol man nogut, bai ol i bagarapim gutpela pasin bilong yumi,” na mi no bung moa wantaim ol dispela pren nogut bilong mi. (1 Korin 15:33) Dispela i helpim mi long kamap strong long ol samting bilong spirit na bihain mi dediket long Jehova. Bihain long mi kisim baptais long 1951, mi kirap mekim wok autim tok fultaim (painia) inap liklik taim. Long Disemba 1953, mi maritim Aurea Mendoza Cruz, em i kamap poroman na gutpela wanwok bilong mi long autim tok.
Bekim Bilong Beten Bilong Mipela
Mipela i laik mekim wok painia. Tasol dispela laik bilong mipela long mekim wok bilong Jehova i no kamap kwiktaim. Maski i olsem, mipela i no lusim pasin bilong askim Jehova long opim rot bilong mipela long mekim wok bilong em. Tasol sindaun bilong mipela i gat hatwok bilong en. Maski i olsem, mipela i tingim yet ol mak bilong spirit mipela i laik winim, na long taim mi gat 25 krismas, ol i makim mi long mekim wok olsem wasman bilong kongrigesen, em wok olsem siaman long wanpela kongrigesen bilong ol Witnes Bilong Jehova.
Taim mi kisim save moa long Baibel na mi kliagut long ol stiatok bilong Jehova, mi luksave olsem wok skin bilong mi i no stret wantaim maus bilong bel bilong mi olsem wanpela Kristen i no insait long ol samting bilong dispela graun. (Aisaia 2:2-4) Mi lusim dispela wok. Dispela i traim bilip bilong mipela. Olsem wanem mi inap lukautim famili bilong mi? Olsem mipela i bin mekim bipo, long beten mipela i kamapim dispela hevi bilong mipela long God Jehova. (Song 65:2) Mipela i tokim em long ol samting mipela i tingting long en na ol samting mipela pret long en, na mipela i tokim em tu long laik bilong mipela long mekim wok bilong em long ol hap we ol i sot long ol man bilong autim tok bilong Kingdom. (Filipai 4:6, 7) Mipela i no save olsem bai i gat kain kain rot i op long mipela i autim tok!
Kirap Bilong Raun Bilong Mipela
Long Epril 1965, mi kisim wok olsem wanpela supavaisa bilong paia dipatmen long ples balus bilong Vientiane Intenesenel Ples Balus, long Laos, na mipela i go sindaun long dispela hap. I gat 24 Witnes i stap long biktaun Vientiane, na mipela i amamas long autim tok wantaim ol misineri na sampela brata asples. Bihain, ol i salim mi i go long Udon Thani Ples Balus, long Tailan. I no gat wanpela Witnes long Udon Thani. Mipela famili i save mekim ol 5-pela miting long olgeta wik. Mipela i save autim tok long ol haus, mekim ol gobek, na kirapim ol Baibel stadi.
Mipela i tingim tok Jisas i givim long ol disaipel bilong em olsem ol i mas “karim planti kaikai.” (Jon 15:8) Olsem na mipela i strong long bihainim pasin bilong ol na wok long autim gutnius. I no longtaim bihain na mipela i kisim gutpela blesing. Wanpela yangpela meri bilong Tailan i kisim tok i tru na em i kamap wanpela sista bilong mipela long spirit. Tupela man bilong Not Amerika i kisim tok i tru na bihain tupela i kamap elda Kristen. Winim 10-pela yia mipela i autim tok long hap not bilong Tailan. Mipela i amamas tru long save olsem nau i gat wanpela kongrigesen long Udon Thani! Sampela pikinini kaikai bilong tok i tru mipela i planim i wok yet long karim kaikai.
Tasol sori tru, mipela i mas lusim dispela ples na i go long narapela hap, na mipela i beten olsem “Papa bilong gaden” bai helpim mipela long insait yet long wok bilong autim tok. (Matyu 9:38) Ol i salim mipela i go long Tehran, em nambawan biktaun bilong Iran. Long dispela taim Shah i bosim Iran.
Autim Tok Long Ol Hap i Gat Hatwok Long En
Taim mipela i go kamap long Tehran, kwiktaim mipela i painim ol brata bilong mipela long spirit. Mipela i bung wantaim liklik grup bilong ol Witnes em ol i bilong 13 narapela narapela kantri. Mipela i mas mekim sampela senis bambai mipela inap autim tok long Iran. Tru ol i no mekim nogut long mipela, tasol mipela i mas was gut.
Sediul bilong wok mani bilong ol man i gat laik long harim tok i mekim na sampela taim mipela i mas stadi wantaim ol long 12 klok long biknait o bihain long en i go inap long bikmoning. Tasol mipela i amamas long lukim kaikai i kamap long dispela wok mipela i mekim! Sampela famili bilong Filipin na Korea i kisim tok i tru na dediketim laip bilong ol long Jehova.
Orait nau ol i salim mipela i go long Dhaka, long Banglades. Mipela i kamap long hap long Disemba 1977. Dispela kantri em narapela hap we i hatwok long autim tok. Tasol mipela i tingim olsem mipela i mas wok strong oltaim long autim tok. Long rot bilong helpim i kam long holi spirit bilong Jehova, mipela inap bungim planti famili bilong ol lain i tok ol i Kristen. Sampela bilong ol i laik kisim gutpela wara bilong tok i tru i stap long Baibel. (Aisaia 55:1) Dispela i mekim na mipela i kirapim planti Baibel stadi.
Mipela i tingim olsem laik bilong God em olsem “olgeta manmeri, bai ol i ken save long as bilong tok tru.” (1 Timoti 2:4) Gutpela tru olsem i no gat wanpela i givim hevi long mipela. Bilong pasim ol man long tingting nogut long mipela, mipela i save toktok wantaim ol long gutpela pasin. Olsem aposel Pol, mipela i traim long “kisim pasin bilong olgeta kain man.” (1 Korin 9:22) Taim ol i askim mipela long as na mipela i kam lukim ol, long gutpela pasin mipela i save stori long wok bilong mipela, na planti man i amamas long harim tok bilong mipela.
Long Dhaka mipela i bungim wanpela Witnes asples na mipela i kirapim em long bung wantaim mipela long ol miting na autim tok wantaim mipela. Bihain liklik, meri bilong mi i stadi wantaim wanpela famili long Baibel na singautim ol i kam long ol miting bilong mipela. Long rot bilong gutpela-pasin-sori bilong Jehova, olgeta insait long dispela famili i kam insait long tok i tru. Bihain, tupela pikinini meri bilong ol i helpim wok bilong tanim tok bilong Baibel i go long tok ples Bengali, na planti wanblut bilong ol tu i kisim save long Jehova. Planti narapela Baibel sumatin i kisim tok i tru. Planti bilong ol i mekim wok olsem elda o painia long nau.
Planti manmeri i sindaun long Dhaka, olsem na mipela singautim sampela long famili bilong mipela long i kam helpim mipela long autim tok. Sampela i kam na bung wantaim mipela long autim tok long Banglades. Mipela i amamas tru na tenkyu long Jehova long mipela inap autim gutnius long dispela kantri! Pastaim i gat wanpela Witnes tasol, nau i gat tupela kongrigesen long Banglades.
Long Julai 1982, mipela i lusim Banglades. Taim mipela i lusim ol brata, aiwara i pulap long ai bilong mipela. I no longtaim bihain, mi kisim wok long Entebbe Intenesenel Ples Balus, long Yuganda. Long dispela hap mipela bai i stap inap 4-pela yia na 7-pela mun. Bai mipela inap mekim wanem bilong litimapim nem bilong Jehova long dispela kantri?
Mekim Wok Bilong Jehova Long Is Afrika
Taim mipela i kamap long Entebbe Intenesenel Ples Balus, wanpela draiva i kam kisim mi na meri bilong mi long ka i go long haus bilong mipela. Taim mipela lusim ples balus, mi kirap long autim tok long draiva long Kingdom Bilong God. Em i askim mi: “Yu wanpela Witnes Bilong Jehova?” Taim mi tok yes, draiva i tok: “Wanpela brata bilong yupela i save wok long kontrol taua.” Mi tokim em long kisim mipela i go long dispela haus. Mipela i bungim dispela brata, na em i amamas tru long bungim mipela, na mipela i stretim rot bilong go long ol miting na autim tok.
Long dispela taim i gat 228 pablisa bilong Kingdom long Yuganda. Mipela i wok wantaim tupela brata long Entebbe, na long namba wan yia mipela i planim ol pikinini kaikai bilong tok i tru. Ol manmeri long dispela hap i save amamas long rit, olsem na mipela i tilim planti buk, na planti handet magasin. Mipela i singautim ol brata bilong nambawan biktaun Kampala long helpim mipela long autim tok long teritori bilong Entebbe long ol wiken. Long taim mi mekim namba wan pablik tok, faipela man tasol i bung bilong harim tok—mi tu i insait long dispela namba.
Insait long tripela yia bihain, mipela kisim bikpela amamas tru long lukim olsem ol lain mipela i skulim, ol i wok long kamap strong hariap. (3 Jon 4) Long wanpela kibung sekit, sikspela Baibel sumatin bilong mipela i kisim baptais. Planti bilong ol i tok ol i laik mekim wok autim tok fultaim, long wanem, ol i lukim mitupela i mekim wok painia maski mipela i mekim wok skin fultaim.
Mipela i luksave olsem ples wok bilong mipela i gutpela hap bilong autim tok long en. Wanpela taim mi toktok wantaim wanpela paiaman i save wok long ples balus long tok promis bilong Baibel long Paradais bai kamap long graun. Mi soim em long Baibel bilong em yet olsem ol man i bihainim tok bilong God ol bai stap bel isi na wanbel, ol bai i no stap rabis, ol bai i gat haus bilong ol yet, no gat pait, sik, o dai. (Song 46:9; Aisaia 33:24; 65:21, 22; KTH 21:3, 4) Taim em i ritim dispela tok long Baibel bilong em yet, dispela i kirapim laik bilong em long harim tok. Long dispela taim yet mi kirapim stadi wantaim em long Baibel. Em i kam long olgeta miting. I no longtaim bihain, em i dediket long Jehova na kisim baptais. Bihain em i kirap autim tok fultaim wantaim mipela.
Taim mipela i stap long Yuganda, tupela taim pait i kamap insait long kantri, tasol dispela i no stopim ol wok bilong mipela long spirit. Ol i salim ol famili bilong ol man i wok long gavman em ol i bilong narapela kantri i go long Nairobi, Kenya, bilong i stap 6-pela mun long hap. Mipela ol lain i stap yet long Yuganda i save mekim yet ol miting na autim tok, tasol mipela i mas was gut.
Long Epril 1988, wok bilong mi long Yuganda i pinis na mipela i go long narapela hap. Taim mipela i lusim Kongrigesen Entebbe, bel bilong mipela i amamas tru, long wanem, kongrigesen i kamap strong long ol samting bilong spirit. Long Julai 1997, mipela i go lukim gen Entebbe. Long dispela taim, sampela Baibel sumatin bilong mipela long bipo ol i mekim wok olsem elda. Mipela i amamas tru long lukim 106 manmeri i kam long Pablik Miting!
Go Long Hap We Ol i No Autim Tok Yet Long En
Olsem wanem? Bai i gat sampela nupela rot i op bilong mipela i ken autim tok? Yes, ol i salim mi i go wok long Mogadishu Intenesenel Ples Balus, long Somalia. Mipela i tingting strong long mekim gutpela wok long dispela hap em ol i no bin autim tok yet long en.
Mipela i autim tok tasol long ol lain i wok long embasi, ol wokman Filipino, na ol man bilong ol narapela kantri. Planti taim mipela i save bungim ol long maket. Mipela i save go lukim ol tu long haus bilong ol. Long rot bilong bihainim savepasin, na traim kain kain rot, tingim gut ol samting, na bilip tru long Jehova, mipela inap long tokim ol narapela long tok i tru bilong Baibel, na dispela wok bilong mipela i karim kaikai namel long ol lain bilong ol narapela kantri. Bihain long tupela yia, mipela lusim Mogadishu—paslain liklik long bikpela pait i kamap long dispela hap.
Orait nau lain International Civil Aviation Organization i salim mi i go long Yangon, Mianma. Long dispela hap tu, rot i op long mipela i ken helpim ol man i gat gutpela bel long kisim save long laik bilong God. Bihain long Mianma, ol i salim mipela i go long Dar es Salaam, Tansania. Wok bilong autim tok long ol haus long dispela ples i isi moa, long wanem, i gat planti manmeri i mekim tok Inglis.
Long olgeta kantri mipela i autim tok long en, mipela i no kisim bikpela hevi maski i gat tambu long wok bilong ol Witnes Bilong Jehova long planti bilong ol dispela kantri. Planti taim wok bilong mi i aninit long gavman o wanpela intenesenel kampani, olsem na ol man i no save tingting planti long wok mipela i mekim.
Wok skin bilong mi i mekim na inap 30 yia mi na meri bilong mi i raun olsem tripman. Tasol mipela i tingim wok bilong mi olsem wanpela rot bilong winim mak mipela i putim. Namba wan mak mipela i putim em long olgeta taim mipela i laik helpim wok bilong Kingdom Bilong God. Mipela i tenkyu long Jehova long helpim mipela long mekim gutpela wok long ol senis i kamap long sindaun bilong mipela na long insait long wok bilong autim gutnius long ol longwe hap.
Go Bek Long Ples
Taim mi gat 58 krismas, mi ritaia long wok skin na mipela i go bek long Filipins. Taim mipela i go bek, mipela i beten askim Jehova long stiaim mipela. Mipela i kirap mekim wok wantaim wanpela kongrigesen long taun Trece Martires City, long provins Cavite. Taim mipela i kamap long dispela hap, i gat 19 manmeri tasol i autim tok bilong Kingdom Bilong God. Mipela i stretim rot bilong autim tok long olgeta de, na mipela i kirapim planti stadi. Kongrigesen i wok long i go bikpela. Long wanpela taim, meri bilong mi i gat 19 Baibel sumatin, na mi gat 14.
I no longtaim na Haus Kingdom i pulap tru. Mipela i beten long Jehova long dispela samting. Wanpela brata bilong spirit na meri bilong em ol i givim hap graun long kongrigesen, na brens ofis i orait long givim dinau bilong wokim nupela Haus Kingdom. Dispela nupela haus i mekim bikpela samting long wok autim tok, na long olgeta wan wan wik namba bilong ol lain i kam long ol miting i wok long i go antap. Long nau, mipela i save raun inap wanpela aua i go na wanpela aua i kam bilong helpim wanpela kongrigesen i gat 17 pablisa.
Mi na meri bilong mi i amamas tru long mipela inap autim tok long planti narapela narapela kantri. Taim mipela i tingim bek laip bilong mipela olsem ol tripman, mipela i amamas tru olsem mipela i bin mekim gutpela wok long en—em bilong helpim ol narapela long kisim save long Jehova!
[Mep long pes 24, 25]
(Bilong save ol dispela rait i stap we long pes, lukim buk o magasin)
TANSANIA
YUGANDA
SOMALIA
IRAN
BANGLADES
MIANMA
LAOS
TAILAN
FILIPINS
[Piksa long pes 23]
Mi na meri bilong mi, Aurea