Tok Bilong Jisas Krais i Mekim Wanem Long Yu?

YUMI tingim stori i kamap paslain long dispela na yumi ken tok tru olsem, ol tok bilong Jisas i bin mekim bikpela samting tru long ol man bilong olgeta hap, a? Tasol yumi mas askim yumi yet olsem: “Ol tok bilong Jisas i mekim wanem long mi yet?”

Ol tok Jisas i skulim ol man long en i stori long ol kain kain samting. Ol samting yu lainim long ol dispela tok em inap stiaim yu long olgeta samting yu mekim. Orait nau yumi ken stori long ol tok bilong Jisas long makim wanem ol samting i bikpela samting long i stap bilong yumi, na wok long kamap pren bilong God, na wok long i stap isi wantaim ol man, na stretim ol hevi, na no ken pait na bagarapim man.

Makim Ol Samting i Bikpela Samting

Nau long dispela taim i gat planti samting tru i wok long pulim taim na strong bilong yumi, olsem na yumi no gat taim bilong tingim ol samting bilong spirit. Yumi ken stori long wanpela man i gat 25 krismas samting, em yumi ken kolim em Jerry. Em i save amamas long toktok long ol samting bilong spirit na em i save tingim tru ol samting em i lainim long ol dispela tok. Tasol em i tok: “Mi no gat taim bilong toktok wantaim ol narapela long ol samting bilong spirit. Mi save wok mani inap 6-pela de long olgeta wik. Long Sande tasol mi gat malolo. Na taim mi mekim pinis olgeta samting mi mas mekim, skin bilong mi i save les.” Sapos kain samting olsem i painim yu, samting Jisas i bin lainim long Bikpela Tok Long Maunten inap helpim yu.

Jisas i tokim bikpela lain i bung bilong harim ol tok bilong em: “Yupela i no ken tingting planti long laip bilong yupela na tok, ‘Bai yumi kaikai wanem samting? Bai yumi dring wanem samting?’ Na yupela i no ken tingting planti long bodi bilong yupela na tok, ‘Bai yumi pasim wanem laplap?’ Ating laip em i winim kaikai, na bodi em i winim ol laplap samting. Yupela lukim ol pisin. Ol i no save planim kaikai, na ol i no save bungim na putim long haus kaikai. Tasol Papa bilong yupela i stap long heven em i save givim kaikai long ol. Ating yupela i no winim tru ol pisin, a? . . . Yupela i no ken tingting planti na tok, ‘Bai yumi kaikai wanem samting? Bai yumi dring wanem samting?’ Nogat. Ol haiden i save wari long painim olgeta dispela samting. Tasol Papa bilong yupela i stap long heven em i save pinis, yupela i mas kisim dispela olgeta kain samting. Tasol namba wan samting yupela i mas mekim i olsem. Yupela i mas larim God i stap king bilong yupela [“wok pastaim long painim kingdom,” NW ], na kisim stretpela pasin bilong em, na bai em i givim dispela olgeta arapela samting tu long yupela.” (Matyu 6:​25-33) Dispela tok i lainim yumi long wanem samting?

Jisas i no laik tok olsem yumi no ken lukautim yumi yet na famili bilong yumi long ol samting bilong skin. Baibel i tok: “Sapos wanpela man i no lukautim ol wanblut tru bilong em yet na ol arapela wanlain tu, orait dispela man i lusim pinis bilip bilong em, na em i man nogut tru. Ol haiden yet i no save mekim dispela kain pasin nogut.” (1 Timoti 5:8) Tasol Jisas i tok promis olsem sapos yumi putim ol bikpela samting i go pas na putim ol samting bilong spirit i stap nambawan, God bai wokim rot bilong yumi ken kisim ol samting bilong skin yumi mas kisim. Tok bilong Jisas i skulim yumi long ol samting yumi mas putim i go pas. Sapos yumi bihainim dispela tok bilong em, bai yumi stap amamas, long wanem, “ol manmeri i save, ol i stap rabis tru long ol samting bilong God, em ol i ken amamas.”​—Matyu 5:3.

Wok Long Kamap Pren Bilong God

Ol manmeri i save ol i sot long ol samting bilong spirit, ol i save ol i mas kisim pasin bilong kamap pren bilong God. Yumi save mekim wanem bilong kamap pren bilong wanpela man o meri? Yumi wok long save gut long em, a? Yumi mas lusim haptaim bilong kisim save long ol tingting, na pasin, na save bilong em, na ol wok em i bin mekim, na ol samting em i laikim na i no laikim. Na i wankain tu long taim yumi laik kamap pren bilong God. Yumi mas kisim stretpela save long em. Taim Jisas i beten long God long helpim ol disaipel, em i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” (Jon 17:3) Tru tumas, bilong kisim pasin bilong pas gut wantaim God, yumi mas save gut long em. I gat wanpela rot tasol bilong kisim dispela save​—em Tok Bilong God, olsem Baibel. (2 Timoti 3:16) Yumi mas makim haptaim bilong stadi long ol tok bilong Baibel.

Tasol dispela save yet i no inap. Long dispela beten bilong em, Jisas i tok: “Ol [disaipel] i bin bihainim gut tok bilong yu.” (Jon 17:6) Taim yumi kisim save long God, yumi mas mekim ol samting i stret wantaim dispela save. I no gat narapela rot bilong kamap pren bilong God. Yu ting yumi inap kamap pren tru bilong wanpela man sapos long laik bilong yumi yet yumi mekim ol pasin i narapela kain long ol tingting na stiatok em i save bihainim? Em nau, ol tingting na stiatok bilong God i mas stiaim wokabaut bilong yumi long olgeta taim na long olgeta samting yumi mekim. Yumi ken tingim tupela stiatok bilong em, na olsem wanem yumi ken bihainim bilong kamap pren bilong ol man.

Wok Long Kamap Pren Bilong Ol Narapela

Wanpela taim Jisas i kamapim wanpela stori bambai em i ken skulim ol disaipel long pasin bilong i stap gut wantaim ol narapela man. Em i stori long wanpela king i laik stretim dinau bilong ol wokboi bilong em. Tasol wanpela wokboi i gat bikpela dinau tru na em i no gat mani bilong bekim dinau. King i tok long ol i mas kisim dispela man wantaim meri pikinini bilong em na salim long ol man olsem wokboi nating na givim dispela mani long king bilong bekim dinau. Tasol wokboi i brukim skru na i krai long king olsem: “Yu mas sori long mi na wetim mi. Bai mi bekim olgeta dinau mi bin kisim long yu.” King i sori long wokboi na lusim dinau bilong em. Tasol nau dispela wokboi i go ausait na i lukim wanpela wanwok em i gat liklik dinau tasol long em, na em i strong long wanwok i mas bekim dinau. Wanwok i krai long em i mas sori long em, tasol dispela namba wan wokboi i putim em i stap long kalabus inap long taim em i bekim dinau. Taim king i harim dispela samting em i belhat. Em i tokim wokboi: “Mi bin sori long yu. Olsem na watpo yu no sori tu long wanwok bilong yu?” Orait king i tok na ol i putim wokboi long kalabus inap long taim em i bekim olgeta dinau bilong em. Jisas i laik skulim ol disaipel long wanpela bikpela samting bilong dispela stori na em i tok: “Papa bilong mi i stap long heven, em bai i mekim wankain pasin tasol long yupela sapos yupela i no lusim tru ol rong ol brata i mekim long yupela.”​—Matyu 18:​23-35.

Yumi ol sinman na yumi gat planti pasin kranki. Planti taim yumi bin brukim lo bilong em, so yumi gat bikpela dinau tru long em na yumi no inap bekim dispela dinau. I gat wanpela samting tasol yumi ken mekim, em bilong askim em long lusim ol dispela rong. God Jehova i redi long lusim ol rong bilong yumi sapos yumi lusim rong ol brata i bin mekim long yumi. Em nau, em strongpela skul Jisas i givim long yumi! Jisas i skulim ol disaipel long beten olsem: “Yu ken lusim ol rong bilong mipela, olsem mipela i save lusim ol rong ol arapela i mekim long mipela.”​—Matyu 6:12.

Stretim As Bilong Hevi

Jisas i gat save tru long pasin bilong yumi ol man. Taim em i mekim ol tok long pasin bilong stretim ol hevi, em i tingim as bilong hevi​—em dispela samting yet yumi mas stretim. Tingim tupela stori em i kamapim:

Jisas i tok: “Yupela i harim pinis dispela tok ol tumbuna i bin kisim, ‘Yupela i no ken kilim i dai ol arapela manmeri. Na sapos wanpela man i kilim man i dai, em i mas kamap long kot.’ Tasol mi tokim yupela olsem, man i kros nogut long brata bilong en, em i mas kamap long kot.” (Matyu 5:​21, 22) Jisas i kamapim as tru bilong pasin bilong kilim man i dai. As bilong dispela pasin em kain tingting i wok long kamap long bel bilong dispela kilman. Sapos ol man i no larim pasin bilong bel nogut o belhat i kamap long bel bilong ol, bai ol i no tingting long kilim man i dai. Man! Sapos ol man i bihainim dispela tok bilong Jisas, ol inap abrusim pasin bilong kapsaitim planti blut bilong man, a?

Orait nau Jisas i kamapim as bilong narapela hevi i save givim bikpela bel hevi tru long ol man. Em i tokim bikpela lain manmeri olsem: “Yupela i harim pinis bipo ol i tok olsem, ‘Yupela ol marit, yupela i no ken mekim pasin pamuk.’ Tasol mi tokim yupela olsem, sapos wanpela man i lukim wanpela meri na i gat mangal nogut long em, dispela man i mekim pasin pamuk pinis long bel bilong em. Sapos ai long han sut bilong yu i pulim yu long mekim sin, orait yu mas kamautim na tromoi.” (Matyu 5:​27-29) Jisas i kamapim as tru bilong pasin pamuk​—em samting i kamap paslain long en, olsem ol laik nogut bilong bel. Sapos man i no tingim tingim ol laik nogut bilong bel na em i “kamautim” long tingting bilong em na “tromoi,” em inap abrusim pasin pamuk.

‘Putim Bainat i Go Bek Long Paus’

Long nait Judas i kamapim Jisas long ol birua na ol soldia i kam holim em, wanpela disaipel i kamautim bainat bilong em bilong helpim Jisas. Tasol Jisas i tokim em: “Putim bainat bilong yu i go bek long paus bilong en. Olgeta man i pait long bainat, bainat bai i bagarapim ol.” (Matyu 26:52) Long moningtaim bihain long en, Jisas i tokim Pontius Pailat: “Kingdom bilong mi em i no bilong dispela graun. Sapos kingdom bilong mi em i bilong dispela graun, orait inap ol wokman bilong mi i pait, na i no gat wanpela man inap putim mi long han bilong ol Juda. Tasol kingdom bilong mi em i no bilong dispela graun.” (Jon 18:36) Yu ting em i savetingting long bihainim dispela tok?

Ol Kristen bilong pastaim i gat wanem tingting long dispela tok bilong Jisas olsem yumi no ken pait? Buk The Early Christian Attitude to War i tok: “Ol [tok Jisas i skulim ol man long en] i tambuim olgeta kain pasin bilong pait na bagarapim man, olsem na ol dispela tok i makim klia tru olsem i tambu long go insait long ol pait . . . Ol Kristen bilong pastaim ol i bihainim stret tok bilong Jisas na ol i tingim ol tok bilong em long mekim pasin isi na no ken pait em tok ol i mas bihainim tru. Ol i bilip olsem lotu bilong ol em samting bilong pasin sekan na bel isi; ol i tambu tru long go insait long pait, em samting bilong kapsaitim blut bilong ol man.” Em nau, ol lain i tok ol i Kristen, sapos ol i bihainim dispela tok bilong Jisas, ol bikpela pait bilong bipo na i kam inap nau ol i no ken kamap!

Olgeta Tok Bilong Jisas Inap Helpim Yu

Ol tok bilong Jisas yumi bin skelim ol i gutpela tru na i no hatwok long kisim gut, na ol i gat strong. Sapos ol man i kisim save long ol tok bilong em na bihainim, dispela inap helpim ol tru.a

Ol Witnes Bilong Jehova long hap bilong yu ol bai amamas long helpim yu na bai yu ken save long olsem wanem yu ken kisim helpim long ol tok bilong Jisas i gat gutpela save na tingting tru long en, winim bilong olgeta narapela man. Mipela laik bai yu painim ol o raitim pas i go long wanpela atres i stap long pes 2 bilong dispela nius.

[Futnot]

[Piksa long pes 5]

“Papa bilong yupela i stap long heven em i save givim kaikai long ol”

[Piksa long pes 7]

Ol tok bilong Jisas inap givim gutpela tingting long yu bilong stiaim wokabaut bilong yu