Askim
Bilong wanem ol i no kilim i dai Devit na Batseba taim ol i mekim pasin pamuk, tasol pikinini man bilong ol i dai?
Lo Bilong Moses i tok: “Sapos yupela i lukim wanpela man i slip wantaim meri bilong narapela man, orait kilim i dai tupela wantaim. Olsem tasol bai yupela i pinisim dispela kain pasin nogut.” (Lo 22:22) Sapos God Jehova i bin larim ol man i bihainim Lo na skelim kot bilong Devit na Batseba, kot bai tok tupela i mas i dai. Ol man i no inap lukim bel na tingting bilong narapela, nogat, ol i ken skelim ol samting ol man i mekim rong i bin mekim. Lo i tok man i slip wantaim meri bilong narapela man i mas i dai. Ol jas bilong Israel i no gat namba long lusim dispela kain sin.
Tasol trupela God inap lukim bel na tingting bilong ol man na lusim sin bilong ol sapos em i lukim i gat as bilong mekim olsem. God i bin mekim kontrak bilong Kingdom wantaim Devit, olsem na Jehova yet i makim wanem samting em bai mekim bilong stretim dispela rong. (2 Samuel 7:12-16) I stret “Jas bilong olgeta graun” i mekim kain kot olsem.—Stat 18:25.
Jehova i lukim wanem samting taim em i skelim bel na tingting bilong Devit? Het tok bilong Song 51 i stori olsem dispela song i tokaut long bel hevi bilong Devit ‘taim Natan i kam sutim tok long em bihain long em i bin trabel long Batseba.’ Song 51:1-4 i tok: “God, yu as bilong sori, yu ken marimari long mi. Yu gat bikpela marimari tru, olsem na mi laik bai yu rausim olgeta pasin nogut bilong mi. Yu mas wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin. Mi save mi mekim rong pinis. Mi no inap lusim tingting long sin bilong mi. Mi mekim sin long yu wanpela tasol. Mi mekim pasin nogut long ai bilong yu.” Jehova i mas lukim dispela bel hevi bilong Devit olsem wanpela samting i kamapim klia olsem em i tanim bel tru na i gat as long marimari long tupela. Na tu, Devit yet em man bilong marimari, na Jehova i save marimari long ol man i marimari long ol arapela. (1 Samuel 24:4-7; Matyu 5:7; Jems 2:13) Olsem na taim Devit i tokaut long sin bilong em, Natan i bekim tok long em olsem: “Bikpela i rausim dispela sin bilong yu na yu no inap i dai.”—2 Samuel 12:13.
Devit na Batseba i no inap ranawe long ol hevi bilong sin tupela i bin mekim. Natan i tokim Devit: “Pasin nogut bilong yu i bin mekim ol birua bilong Bikpela i bikhet long em. Olsem na dispela pikinini bilong yu Batseba i karim, em bai i dai.” Pikinini bilong ol i kisim sik na i dai maski inap 7-pela de Devit i tambu long kaikai na em i krai sori.—2 Samuel 12:14-18.
Sampela i hatwok long save wanem as na dispela pikinini man i mas i dai, long wanem, Lo 24:16 i tok: “Sapos papamama i mekim rong yupela i no ken kilim i dai ol pikinini bilong ol.” Tasol yumi mas tingim, sapos ol man i mekim dispela kot, orait papamama na pikinini i stap yet long bel bilong mama bai dai. Taim pikinini man i dai, ating dispela i helpim Devit long luksave gut olsem Jehova i no amamas liklik long rong em i mekim. Yumi ken bilip tru olsem samting Jehova i mekim i stret, long wanem, “pasin bilong God i gutpela na i stret olgeta.”—2 Samuel 22:31.
[Piksa long pes 31]
Devit i kamapim klia tru olsem em i tanim bel