Ripot Long Wok Bilong Kingdom
Man i Bihainim Stretpela Pasin i Litimapim Nem Bilong Jehova
LONG olgeta hap bilong graun, ol Witnes Bilong Jehova—ol yangpela na lapun—i gat nem olsem ol man i save bihainim stretpela pasin. Tingim tripela stori i bin kamap long Afrika, Saut Amerika na Esia.
Yangpela meri Olusola i gat 17 krismas na em i save stap long Naijiria. Wanpela taim em i wokabaut i go long haus bihain long skul na em i painim wanpela paus long graun. Em i kisim i go long hetmasta, na hetmasta i kaunim mani na em inap olsem 133 kina samting. Hetmasta i givim bek paus mani i go long tisa husat i bin lusim. Tisa i amamas long stretpela pasin bilong Olusola na i givim em 21 kina samting, na tokim em long baim skulfi bilong em long dispela mani. Taim ol arapela sumatin i harim dispela samting, ol i tok bilas long Olusola. Sampela wik bihain, wanpela sumatin i tokim ol tisa olsem wanpela i stilim mani bilong em, olsem na ol tisa i mekim wok painimaut long olgeta sumatin. Tisa i tokim Olusola, “Yu sanap long hia. Mi save olsem yu wanpela Witnes Bilong Jehova, olsem na yu no inap stil.” Ol i painim mani long tupela bilong ol mangi i bin tok bilas long Olusola, na dispela tupela mangi i bin kisim bikpela strafe. Olusola i tok: “Mi amamas tru long mi gat nem olsem wanpela Witnes Bilong Jehova i no save stil, na long dispela rot mi givim biknem long Jehova.”
Marcelo, man bilong Ajentina, i bin lusim haus na i go, na em i painim wanpela paus i stap klostu long dua baksait long haus bilong em. Em i kisim paus i kam insait long haus, na em wantaim meri bilong em i opim dispela paus. Tupela i kirap nogut tru long lukim planti mani stret i stap, ol kredit kat na sampela sek ol i bin sainim, wanpela bilong ol sek em inap olsem 885,000 kina. Long wanpela pepa invois ol i painim wanpela telefon namba. Tupela i ringim papa bilong dispela paus na ol i stretim rot long bringim paus wantaim ol samting i stap insait long en long ples wok bilong Marcelo. Taim papa bilong paus i kam kamap long ples wok bilong Marcelo, em i guria liklik na tingting planti. Bos bilong Marcelo i tokim em long no ken pret, long wanem, Marcelo i wanpela Witnes Bilong Jehova. Papa bilong paus i givim Marcelo 18 kina samting olsem presen long em i bin painim paus. Bos i pilim tru stretpela pasin bilong Marcelo na bos i belhat stret long papa bilong paus i bin givim liklik mani tasol long em. Long dispela rot Marcelo inap stori olsem em i wanpela Witnes Bilong Jehova na em i laik mekim stretpela pasin long olgeta taim.
Narapela ekspiriens i kam long Kirgistan. Rinat, wanpela mangi i gat 6-pela krismas, i painim wanpela paus bilong wanpela meri i stap klostu. Dispela paus i gat 74 kina samting. Taim Rinat i bringim paus i go long meri, em i kaunim mani pinis na i tokim mama bilong Rinat olsem 15 kina samting i no stap. Rinat i tok em i no bin kisim sampela mani. Nau olgeta i go painim dispela mani i lus na ol i painim long hap we Rinat i painim paus long en. Meri i kirap nogut na i tok tenkyu long Rinat na mama bilong em long bringim mani i kam bek long em, na tu, long gutpela pasin bilong mama bilong Rinat long skulim Rinat long kamap wanpela Kristen.