Samting i Winim Tru Mani

WANPELA MAN LONG KANADA I RAITIM DISPELA STORI BILONG KIRAP!

“[Em] i givim wanpela gutpela presen tru long pikinini meri bilong em, winim tru mani.” Em tok bilong wanpela stori bilong niuspepa The Monitor bilong Bristaun, long Nova Skosia. Wanem dispela presen? Em pasin bilong mama long “i stap olsem gutpela piksa long bihainim stretpela pasin.”

Anna na pikinini meri bilong em Tanya, ol i bin baim wanpela waitpela paus bilong putim Baibel bilong Tanya insait long en. Taim tupela i kam kamap long haus, Tanya i opim wanpela hap bilong paus i gat sipa, na em i kirap nogut tru long lukim ol pepa mani inap olsem 1,000 dola i stap insait. Kwiktaim tupela i go bek long hap ol i bin baim paus long en na givim bek dispela mani long meri i bin salim dispela paus. Dispela paus i bilong mama bilong dispela meri, em i wanpela lapun i gat sik alsaima, na i no longtaim i go pinis em i dai. Mama i no bin mekim wok long dispela paus planti taim, na meri i no bin sekim gut na em i salim. Dispela meri i amamas tru na em i tok: “Dispela samting i mekim na mi inap bilip gen long ol manmeri . . . Mi amamas tru long save, i gat ol manmeri bilong mekim stretpela pasin, ol i stap yet.”

Niuspepa i kamapim stori bilong dispela samting long namba wan pes na i kamapim tok bilong Anna olsem: “Em pasin bilong mipela ol Witnes Bilong Jehova. Baibel i bin skulim maus bilong bel bilong mipela. Na tu, mipela i laik skulim Tanya long bihainim stretpela pasin.” Dispela nupela waitpela paus bai kirapim tingting bilong Tanya long bihainim stretpela pasin long olgeta taim.