Jehova i Save Lukautim Ol Man i Wetim Em i Helpim Ol
“Yu save laikim mi na bihainim tok tru bilong yu, na long dispela pasin yu save lukautim mi oltaim.”—SONG 40:11.
1. King Devit i askim Jehova long mekim wanem long em? Olsem wanem Jehova i save bekim dispela askim long nau?
KING DEVIT bilong lain Israel bilong bipo “i wetim Bikpela i helpim” em na i tok Jehova i “marimari long [em] na i harim prea bilong [em].” (Song 40:1) Planti taim em i bin lukim ol samting Jehova i mekim bilong lukautim ol manmeri i laikim Em. Olsem na Devit inap askim Jehova long lukautim em oltaim. (Song 40:11) Long nau, Devit i stap long tingting bilong Jehova—em i wanpela bilong ol gutpela man na meri ol i bilong kisim “kirap bek . . . i gutpela moa.” (Hibru 11:32-35) Em nau, i gat wanpela gutpela samting tru i wetim Devit. Nem bilong em i stap long “buk” bilong Jehova bilong tingim ol man.—Malakai 3:16.
2. Baibel i tok wanem na yumi ken save pasin bilong Jehova long lukautim ol wokboi bilong em i makim wanem samting?
2 Maski ol gutpela manmeri long Hibru sapta 11 i bin stap paslain long taim Jisas Krais i bin stap long graun, pasin ol i bin bihainim i stret wantaim tok bilong Jisas em i tok: “Sapos wanpela man i laikim tumas laip bilong em yet, laip bilong en bai i lus. Tasol sapos wanpela man i givim baksait long laip bilong en long dispela graun, orait em bai i holimpas laip bilong en inap oltaim oltaim.” (Jon 12:25) Olsem na taim Baibel i tok Jehova i save lukautim ol wokboi bilong em, dispela i no makim olsem ol i no inap kisim hevi o ol birua i no inap mekim nogut long ol, nogat. Samting dispela i makim i olsem: God bai lukautim ol long samting bilong spirit bambai ol inap stap gut yet long ai bilong em.
3. Wanem samting i soim olsem Jehova i bin lukautim Krais Jisas? Wanem samting i kamap long dispela?
3 Jisas yet i bin kisim hevi long han bilong ol birua—ol i bin tok nogut na mekim nogut tru long em, na bihain ol i kilim em i dai olsem wanpela man nogut long pasin i givim bikpela pen tru long em. Tasol God i no brukim promis bilong em long lukautim Mesaia, nogat. (Aisaia 42:1-6) Kirap bek bilong Jisas bihain long namba 3 de i soim olsem Jehova i bin harim singaut bilong Jisas long kisim helpim—olsem Em i bin harim singaut bilong Devit. Jehova i harim singaut bilong Jisas na i givim strong long Jisas long stap gut long em. (Matyu 26:39) Jehova i bin lukautim Jisas long dispela samting, olsem na Jisas i kisim laip long heven na em i no inap i dai moa, na planti milion manmeri i bilip long ofa bilong Jisas, ol i gat rot long kisim laip oltaim.
4. Ol Kristen God i makim ol na ol “arapela sipsip,” ol inap bilip long wanem tok promis?
4 Yumi ken bilip tru, Jehova i gat laik na em inap tru long lukautim ol wokboi bilong em long nau olsem em i bin mekim long taim bilong Devit na Jisas. (Jems 1:17) Liklik hap lain brata bilong Jisas em God i bin makim ol long holi spirit na ol i stap yet long graun, ol inap bilip long promis bilong Jehova i tok: “Em i makim [yupela] pinis bilong kisim gutpela laip bilong heven. . . . Yupela i bilip long Krais, olsem na God i save lukautim yupela long strong bilong em, bai yupela i stap gut. Em i laik kisim bek yupela na mekim yupela i stap gut tru, na dispela samting em i laik mekim, em bai i kamap ples klia long las de.” (1 Pita 1:4, 5) Ol “arapela sipsip,” em ol i wet long kisim laip oltaim long graun, ol tu inap bilip long God na long tok promis em i bin mekim long maus bilong man bilong raitim song: “Ol manmeri bilong God, yupela i mas laikim em tru. Em i save lukautim gut ol manmeri i bihainim em.”—Jon 10:16; Song 31:23.
God i Lukautim Ol Long Samting Bilong Spirit
5, 6. (a) Olsem wanem God i bin lukautim ol manmeri bilong em long nau? (b) Ol Kristen God i makim, ol i stap olsem wanem wantaim Jehova? Na olsem wanem long ol man i wet long kisim laip long graun?
5 Long nau, Jehova i bin stretim rot bilong lukautim ol manmeri bilong em long samting bilong spirit. Tru, em i no bin pasim ol birua long mekim nogut long ol na ol narapela kain hevi long painim ol, nogat; tasol oltaim em i bin helpim na strongim bel bilong ol na bai ol inap pas gut yet wantaim em. Ol i bilip long rot God i bin wokim bilong baim bek ol man, em ofa bilong Jisas, na dispela bilip i as bilong pasin bilong ol long pas gut wantaim Em. Spirit bilong God i bin makim sampela bilong ol dispela Kristen long kamap king wantaim Krais long heven. God i bin kolim ol stretpela man na ol i kamap pikinini spirit bilong em, na dispela tok i stret long ol: “Yumi bin i stap aninit long strong bilong tudak, na em i bin kisim bek yumi na putim yumi insait long lain bilong Pikinini bilong en, em dispela Pikinini em i save laikim tru. Pikinini Bilong God em i bin baim bek yumi na lusim ol sin bilong yumi.”—Kolosi 1:13, 14.
6 Planti milion Kristen moa i stap gut long God, ol tu bai kisim helpim long dispela rot God i bin wokim bilong baim bek ol man. Baibel i tok: “Pikinini Bilong Man . . . i kam bilong helpim ol [man], na bilong givim laip bilong em yet bilong baim bek planti manmeri.” (Mak 10:45) Ol dispela Kristen i wet long kamap “pikinini bilong God.” (Rom 8:21) Tasol taim ol i wet i stap, ol i save pilim tru pasin bilong ol long stap pren bilong God na ol i wok long strongim dispela pasin.
7. Jehova i save mekim wanem long nau bilong lukautim ol manmeri bilong em na bai ol i ken stap gut long ai bilong em?
7 Wanpela samting Jehova i mekim bilong lukautim ol manmeri bilong em na bai ol i ken stap gut long ai bilong em, i olsem: Em i save skulim ol. Dispela skul i helpim ol long kisim sampela stretpela save moa long tok i tru. Na tu, Jehova i wok long stiaim ol long rot bilong Baibel, holi spirit, na oganaisesen bilong em. “Wokboi i gat gutpela tingting” i stiaim ol manmeri bilong God na ol i olsem wanpela famili i stap long olgeta hap. Dispela lain wokboi i save lukautim ol long ol samting bilong spirit, na long ol samting bilong skin tu taim i gat wok long mekim olsem—maski ol i bilong wanem lain o sindaun.—Matyu 24:45.
8. Jehova i bilip tru olsem ol man i stap gut long em ol bai mekim wanem? Em i mekim wanem tok promis long ol?
8 Jehova i no bin pasim ol birua long mekim nogut long Jisas, na olsem tasol Em i no save pasim ol birua long mekim nogut long ol Kristen long nau. Tasol dispela i no makim olsem God i no amamas long ol. Nogat tru! Em i makim olsem God i bilip tru ol bai sambai long wok king bilong em. (Jop 1:8-12; Sindaun 27:11) Jehova i no ken lusim ol man i stap gut long em, long wanem, “God i save laikim tumas stretpela pasin. Em i no inap larim ol manmeri bilong en i lus. Oltaim Bikpela i save lukautim ol manmeri i wokabaut stret.”—Song 37:28.
Gutpela-Pasin-Sori na Bihainim Tok Tru i Lukautim Yumi
9, 10. (a) Olsem wanem ol tok tru bilong Jehova i save lukautim ol manmeri bilong em? (b) Olsem wanem Baibel i soim olsem Jehova i save lukautim ol man i stap gut long em long rot bilong gutpela-pasin-sori bilong em?
9 Long beten bilong Devit long Song 40, em i tok em i laik bai gutpela-pasin-sori bilong Jehova na pasin bilong bihainim tok tru bilong Em i ken lukautim em. Pasin bilong Jehova long bihainim tok tru na laikim stretpela pasin i mekim na em i save tokaut klia long ol stretpela lo bilong em. Taim ol man i bihainim ol dispela lo, dispela i save lukautim ol na ol i no kisim ol pen na hevi na pret i save painim ol man i sakim ol dispela lo. Olsem: Taim yumi abrusim pasin bilong kisim drak, dring planti alkohol, pasin pamuk, na pait na bagarapim man, yumi save helpim yumi yet na famili bilong yumi long abrusim planti hevi. Na ol man i lusim rot bilong bihainim ol tok tru bilong Jehova—olsem Devit i bin mekim sampela taim—ol tu i ken bilip olsem God i stap yet “ples hait” bilong ol man i mekim rong na tanim bel. Kain man olsem i ken amamas na singaut: “Yu save lukautim mi na hevi i no ken daunim mi.” (Song 32:7) Em gutpela-pasin-sori tru God i mekim, a?
10 God i mekim gutpela-pasin-sori tu taim em i tokim ol wokboi bilong em long stap longwe long ol pasin nogut bilong dispela graun klostu nau em bai pinisim. Baibel i tok: “Yupela i no ken laikim ol pasin bilong graun na olgeta samting bilong graun. Sapos wanpela man i laikim ol pasin bilong graun, orait em i no save laikim tru Papa. Yumi save, olgeta pasin bilong ol man bilong graun, em pasin bilong bel kirap na aigris na bikhet, ol dispela pasin i no kam long Papa. Nogat. Ol i pasin bilong graun tasol.” Long rot bilong bihainim dispela tok lukaut, yumi inap lukautim laip bilong yumi i go inap oltaim oltaim bihain, olsem Baibel i tok moa: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”—1 Jon 2:15-17.
Wokim Gut Tingting, Skelim Gut Ol Samting, na Savetingting Inap Lukautim Yumi
11, 12. Stori long olsem wanem pasin bilong wokim gut tingting, skelim gut ol samting, na savetingting inap lukautim yumi.
11 Pikinini bilong Devit, Solomon, i tokim ol man i laik bai God i ken orait long ol, olsem: “Pasin bilong tingting gut bai i banisim yu na gutpela save bai i was long yu.” Em i tok tu: “Yu mas kisim gutpela tingting na gutpela save. . . . Yu no ken lusim gutpela tingting. Nogat. Yu mas laikim em tumas na bai em i lukautim yu gut.”—Sindaun 2:11; 4:5, 6.
12 Yumi save tingting gut, olsem wokim gut tingting, taim yumi tingim tingim long bel ol tok yumi lainim long Baibel. Taim yumi mekim olsem, dispela i save helpim yumi long kisim pasin bilong skelim gut ol samting na bai yumi inap putim ol bikpela samting i go pas. Em i bikpela samting yumi mekim olsem, long wanem, olsem planti bilong yumi i save pinis—ating long rot bilong ol samting i bin painim yumi yet—hevi inap kamap taim ol man i popaia o long laik bilong ol yet ol i makim samting i no gutpela long putim i go pas. Ol lain bilong dispela graun bilong Satan i laik kirapim yumi long kisim planti mani kago na biknem na namba, tasol Jehova i laik bai yumi tingim ol samting bilong spirit. Sapos yumi no putim ol samting bilong spirit i go pas long ol dispela samting, orait dispela inap mekim na famili i bruk, na pasin pren namel long yumi na ol arapela inap lus, na yumi no tingim moa ol mak bilong spirit yumi laik winim. Na nau tok bilong Jisas inap kamap tru long yumi, em i tok: “Sapos wanpela man i kisim olgeta samting bilong graun, tasol laip bilong em yet i lus, orait dispela olgeta samting bai i helpim em olsem wanem?” (Mak 8:36) Gutpela tingting na save, olsem savetingting, i kirapim yumi long bihainim dispela tok bilong Jisas: “Yupela i mas wok pastaim long painim kingdom bilong God wantaim stretpela pasin bilong em. Na bihain bai em i givim dispela olgeta arapela samting tu long yupela.”—Matyu 6:33, Nupela Testamen na Ol Sam.
No Ken Tingim Yumi Yet Tasol
13, 14. Man i tingim em yet tasol em i wanem kain man? Bilong wanem i no pasin bilong gutpela tingting sapos man i tingim em yet tasol?
13 Em pasin bilong yumi ol man long tingim yumi yet. Tasol taim ol laik bilong yumi yet i kamap olsem nambawan bikpela samting long laip bilong yumi, hevi i save kamap. Olsem na bilong lukautim pasin bilong yumi long pren gut wantaim em, Jehova i tokim yumi long abrusim pasin bilong tingim yumi yet tasol. Man i tingim em yet tasol, em i save tingim ol laik na ol tingting bilong em wanpela tasol. Planti man long nau i kain olsem, a? Baibel i tok profet olsem long “las de” bilong pasin nogut bilong Satan, “ol man bai i laikim ol yet tasol,” olsem tingim ol yet tasol.—2 Timoti 3:1, 2.
14 Ol Kristen i save em pasin bilong gutpela tingting sapos ol i bihainim tok bilong Baibel i tok yumi mas tingim ol narapela na laikim ol olsem yumi laikim yumi yet. (Luk 10:27; Filipai 2:4) Ating planti man i ting dispela samting i no inap helpim ol, tasol em samting yumi mas mekim sapos yumi laik bai marit bilong yumi i ken stap gut, na famili i stap amamas, na yumi gat ol gutpela pren. Olsem na yumi ol wokboi bilong Jehova i no ken larim pasin bilong yumi ol man long tingim yumi yet i kamap samting i bosim laip olgeta bilong yumi na yumi no tingim ol samting i bikpela samting tru. Nambawan bikpela samting, em ol wok yumi mekim bilong lotu long God bilong yumi, Jehova.
15, 16. (a) Pasin bilong tingim yumi yet tasol inap kirapim yumi long mekim wanem? Husat i bin mekim olsem? (b) Taim narapela i kirap kwik na sutim tok long narapela, dispela i mekim wanem long em yet?
15 Pasin bilong tingim yu yet tasol inap kirapim man long tingim em yet i stretpela man, na dispela inap mekim na man i hambak na i ting olsem tingting bilong em tasol i stret. Baibel i tok: “Yupela olgeta man i save sutim tok long ol arapela, mi tokim yupela wan wan, yu no inap tok olsem yu yet yu no gat rong. Harim. Taim yu sutim tok long ol arapela man, yu sutim tok tu long yu yet, long wanem, yu yet yu save mekim wankain pasin olsem ol i mekim.” (Rom 2:1; 14:4, 10) Ol bikman bilong lotu long taim bilong Jisas i save tingim ol yet i stretpela man, olsem na ol i ting ol inap tru long krosim Jisas na ol disaipel. Taim ol i mekim olsem, ol i putim ol yet olsem jas. Ol i no luksave long ol krankipasin bilong ol yet, olsem na taim ol i sutim tok long ol arapela, i olsem ol i sutim tok tu long ol yet.
16 Judas, em disaipel i bin kamapim Jisas long ol birua, em i bin larim em yet i kamap jas bilong ol arapela. Long Betani, taim Maria, susa bilong Lasarus, i kisim sanda na welim het bilong Jisas, Judas i gat tok long dispela. Em i tok: “Bilong wanem yumi no larim ol man i baim dispela sanda na yumi kisim 300 mani silva long en, na yumi givim long ol rabisman?” Tasol “Judas i no wari long ol rabisman na em i tok olsem. Nogat. Em i stilman. Em i gat wok bilong bosim bokis mani bilong ol lain bilong Jisas, na em i save stilim mani ol i putim long en.” (Jon 12:1-6) Nogut yumi kamap kain olsem Judas o ol bikman bilong lotu, em ol i hariap long sutim tok long ol arapela, tasol long dispela pasin bilong ol ol i sutim tok long ol yet.
17. Stori long wanpela man em pasin bilong hambak na tingim tumas em yet i bin nogutim em.
17 Sori tru, sampela Kristen bilong pastaim, maski ol i no stilman olsem Judas, ol i bin kisim pasin bilong hambak na tingim tumas ol yet. Jems i tok long ol olsem: “Yupela i save litimapim nem bilong yupela yet na tokaut long ol bikpela wok yupela i laik mekim.” Na em i tok moa: “Kain hambak pasin olsem, em i pasin nogut tru.” (Jems 4:16) Sapos yumi litimapim nem bilong yumi yet long ol samting yumi bin mekim o long ol wok bilong Jehova yumi holim, dispela inap nogutim yumi. (Sindaun 14:16) Yumi save pinis long samting i bin kamap long aposel Pita, em i tok: “Maski sapos ol arapela i lukim samting i kamap long yu na bilip bilong olgeta i pundaun na ol i lusim yu, mi bai i no inap lusim yu. . . . Maski sapos mi mas i dai wantaim yu, mi no inap tok olsem mi no save long yu. Nogat tru.” Tru tumas, i no gat wanpela samting yumi holim em yumi ken litimapim nem bilong yumi yet long en. Olgeta samting yumi holim, yumi holim, long wanem, Jehova i bin mekim gutpela-pasin-sori long yumi. Taim yumi tingim dispela samting, dispela bai helpim yumi long abrusim pasin bilong tingim tumas yumi yet.—Matyu 26:33-35, 69-75.
18. Jehova i gat wanem tingting long pasin bilong hambak?
18 “Pasin bilong hambak na litimapim nem bilong yu yet bai i mekim yu i pundaun na bagarap.” Bilong wanem? Jehova i tok: “Mi no laik tru long pasin bilong bikhet na pasin bilong man i litimapim nem bilong em yet.” (Sindaun 8:13; 16:18) Olsem na yumi ken save i gat as na Jehova i kros long pasin bilong king bilong Asiria “em i ting em i moa yet na em i litimapim nem bilong em yet”! (Aisaia 10:12) Jehova i mekim save long dispela king. Klostu nau, em bai mekim save tu long olgeta lain bilong dispela graun em Satan i bosim, wantaim ol bikman bilong en—na ol spirit nogut i bosim dispela graun—em ol i hambak na ting ol i moa yet. Nogut yumi kirap na bihainim pasin bilong ol birua bilong Jehova em ol i strong long bihainim laik bilong ol yet tasol!
19. Ol manmeri bilong God i ken amamas long wanem samting? Tasol wanem samting i mekim na ol i mas bihainim pasin daun?
19 I gat as na ol Kristen tru i ken amamas long ol i stap wokboi bilong Jehova. (Jeremaia 9:24) Tasol ol i mas bihainim pasin daun tu. Bilong wanem? Long wanem, “yumi olgeta man yumi bin mekim sin.” (Rom 3:23) Olsem na bilong i stap wokboi yet bilong Jehova, yumi mas i gat wankain tingting olsem aposel Pol, em i tok “Krais Jisas i bin kam long graun bilong kisim bek yumi manmeri bilong mekim sin,” na em i tok moa: “Mi yet mi bin mekim sin moa yet na mi stap olsem namba wan man bilong mekim sin.”—1 Timoti 1:15.
20. Olsem wanem Jehova i save lukautim ol manmeri bilong em long nau? Olsem wanem em bai lukautim ol long bihain?
20 Ol manmeri bilong Jehova i save amamas long putim ol samting bilong ol yet i stap namba tu na bai ol inap putim ol samting bilong God i stap namba wan, olsem na yumi ken bilip tru olsem Jehova bai wok yet long lukautim ol, olsem helpim ol long stap gut long ai bilong em. Na tu, yumi ken bilip olsem, long taim bilong bikpela hevi tru, Jehova bai lukautim lain bilong em long samting bilong skin na i no long samting bilong spirit tasol. Taim ol i go insait long nupela taim God bai kamapim, ol bai inap singaut: “Bikpela, em i God bilong yumi. Yumi bin bilip na wet long em wanpela bai i kisim bek yumi. Em tasol i Bikpela, na em i bin helpim yumi. Olsem na yumi amamas moa yet, long wanem, em i kisim bek yumi pinis.”—Aisaia 25:9.
Yu Inap Tingim?
• Olsem wanem Jehova i bin lukautim King Devit na Jisas Krais?
• Olsem wanem Jehova i save lukautim ol manmeri bilong em long nau?
• Bilong wanem yumi no ken tingim tumas yumi yet?
• Yumi ken amamas long wanem samting, tasol i gat wanem as na yumi mas daunim yumi yet?
[Ol Piksa long pes 9]
Jehova i mekim wanem bilong lukautim Devit na Jisas?
[Ol Piksa long pes 10, 11]
God i save mekim wanem long nau bilong lukautim lain bilong em long samting bilong spirit?
[Ol Piksa long pes 12]
Yumi amamas yumi mekim wok bilong Jehova, tasol oltaim yumi mas bihainim pasin daun