Long Marimari Bilong God Em i Kisim Bek Yumi na i No Long Ol Samting Yumi Yet i Mekim
“Yupela i bilip long Krais, na . . . God i kisim bek yupela. . . . Em i no olsem pe bilong wok yupela i mekim. Olsem na i no gat wanpela man em inap litimapim nem bilong em yet.”—EFESUS 2:8, 9.
1. Olsem wanem ol Kristen i narapela kain long ol man bilong graun long ol samting ol yet i bin mekim? Bilong wanem i olsem?
OL MAN bilong graun i save amamas long wok bilong ol taim dispela wok i kamap gutpela na ol i save tokaut kwiktaim long en na litimapim nem bilong ol yet. Tasol ol Kristen i narapela kain. Ol i no save tokaut tumas long ol samting ol yet i bin mekim, na ol wok ol i bin mekim bilong helpim lotu i tru tu. Tru, ol i save amamas long ol samting lain bilong Jehova i mekim, tasol samting ol wan wan yet i mekim insait long ol dispela wok, ol i no stori stori long dispela. Ol i save olsem long wok bilong Jehova, stretpela tingting i kirapim ol long mekim wok bilong em, dispela i winim ol samting ol yet i bin mekim. Olgeta man i kisim laip oltaim, ol bai kisim long bilip bilong ol long Krais na long marimari bilong God, na i no long ol samting ol yet i bin mekim.—Luk 17:10; Jon 3:16.
2, 3. Pol i amamas moa yet long wanem samting? Bilong wanem em i amamas olsem?
2 Aposel Pol i save gut long dispela samting. Taim em i beten 3-pela taim pinis long Jehova i ken rausim ‘samting i olsem nil i sutim skin,’ Jehova i tokim em: “Marimari bilong mi em inap long yu. Long wanem, strong bilong mi em i save kamap strong tru long man i no gat strong.” Long pasin daun Pol i orait long dispela tok bilong Jehova, na em i tok: “Bikpela i tok olsem, olsem na nau mi save amamas moa yet long stap olsem man i no gat strong. Olsem bai strong bilong Krais i ken i stap long mi.” Dispela pasin daun bilong Pol em wanpela pasin yumi mas i gat laik long bihainim.—2 Korin 12:7-9.
3 Pol i bin mekim planti wok Kristen, tasol em i save em i no bin mekim long strong na save bilong em yet. Long pasin daun em i tok: “Mi aninit tru long olgeta arapela manmeri bilong God, tasol em i marimari long mi na givim dispela wok long mi, em wok bilong autim gutnius long ol arapela lain.” (Efesus 3:8) Pol i no hambak o ting em yet i stretpela man, nogat. “God i save daunim ol man bilong litimapim nem bilong ol yet, tasol em i save marimari na mekim gut long ol man i daunim ol yet.” (Jems 4:6; 1 Pita 5:5) Olsem wanem? Yumi save bihainim pasin bilong Pol na daunim yumi yet na ting yumi aninit long ol brata bilong yumi?
‘Mas Ting Olsem Ol Arapela i Winim Yu’
4. I gat wanem as na sampela taim ating yumi hatwok long ting ol arapela i winim yumi?
4 Aposel Pol i tokim ol Kristen: “Yupela i no ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela.” (Filipai 2:3) Ating dispela i hatwok long mekim, na moa yet sapos yumi holim wanpela bikpela wok. Sapos i hatwok long mekim, ating dispela i olsem, long wanem, pasin bilong resis long winim ol arapela i bin stiaim tingting bilong yumi, em wanpela pasin planti man long nau i save bihainim. Taim yumi pikinini, ating yumi bin lain long resis wantaim ol bratasusa bilong yumi o ol wanklas bilong yumi long skul. Ating ol tisa i bin strong long kirapim yumi long kisim nem long pilai spot o long kamap nambawan sumatin bilong skul. Tru, pasin bilong givim bel long mekim wok—em ol wok i stret long mekim—dispela i gutpela samting. Tasol taim ol Kristen i mekim olsem, i no bilong litimapim nem bilong ol yet, nogat; ol i laik bai dispela wok i ken helpim gut ol na ating ol arapela tu. Tasol sapos oltaim yumi laik bai ol arapela i litimapim nem bilong yumi olsem wanpela man i stap nambawan, dispela inap nogutim yumi. Olsem wanem i olsem?
5. Sapos man i no was gut, pasin bilong resis long winim ol arapela inap kirapim em long mekim wanem?
5 Sapos man i no was gut, pasin bilong resis wantaim ol arapela o tingim em yet i winim ol arapela, dispela inap kirapim em long hambak na mekim pasin i daunim narapela. Em inap mangal long ol save na wok ol narapela i holim. Sindaun 28:22 i tok: “Man bilong pasim ol samting bilong em yet, em i save wok strong tumas long kamap maniman kwiktaim. Em i no save olsem em bai i kamap rabis tru.” Kain man olsem inap strong long kisim ol wok i no stret em i holim. Bilong kamapim olsem i stret em i mekim dispela samting, ating em bai kirap na toktok planti long ol arapela na sutim tok long ol—em ol pasin ol Kristen i mas givim baksait long en. (Jems 3:14-16) Man i mekim olsem, em i wok long kisim pasin bilong tingim em yet tasol.
6. Baibel i tok wanem long pasin bilong resis long winim ol arapela?
6 Olsem na Baibel i tokim ol Kristen: “Yumi no ken litimapim nating nem bilong yumi yet, na yumi no ken sutim bel bilong ol arapela long kirapim pait, na yumi no ken mangal long ol samting bilong ol arapela.” (Galesia 5:26) Aposel Jon i stori long wanpela Kristen i bin mekim olsem. Em i tok: “Mi raitim pinis sampela tok long ol manmeri bilong sios. Tasol Diotrefes em i laik i stap namba wan bilong ol, na em i no save harim tok bilong mipela. Olsem na sapos mi kam long yupela, mi bai tokaut long dispela pasin em i mekim. Em i save toktok nabaut long mipela long ol kain kain tok nogut.” Sori tru sapos wanpela Kristen i kirap mekim olsem!—3 Jon 9, 10.
7. Ol Kristen i mas abrusim wanem kain pasin i save kamap long nau long ples wok we ol bisnis i save resis resis?
7 Tru, i no olsem Kristen inap abrusim olgeta kain pasin bilong resis, nogat. Olsem: Long wok skin bilong em, ating em i mas resis wantaim ol bisnis o ol man i maketim wankain samting. Tasol taim Kristen i mekim olsem, em i mas mekim long pasin bilong rispek, na pasin laikim, na tingim gut ol arapela. Em i no ken brukim lo bilong gavman o mekim sampela pasin i no stret long Kristen na kisim nem olsem wanpela man i tingim em yet tasol. Em i no ken ting pasin bilong stap nambawan—long wanem wanem samting em i mekim—em i nambawan bikpela samting long laip bilong em. Orait sapos Kristen i mas holim kain tingting olsem long wok skin bilong em, bai i stret moa yet em i holim dispela kain tingting long ol samting bilong lotu, a?
‘No Ken Skelim Yu Yet Wantaim Narapela’
8, 9. (a) Bilong wanem i no gat as na ol elda Kristen i ken resis wantaim ol arapela? (b) Bilong wanem 1 Pita 4:10 i stret long olgeta wokboi bilong God?
8 Long wok lotu bilong ol, ol Kristen i mas holim dispela tingting: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man.” (Galesia 6:4) Ol elda long kongrigesen, ol i save olsem ol i no ken resis wantaim, olsem na ol i save wok gut wantaim olsem wanpela lain. Ol i amamas long ol wok em ol wan wan inap mekim bilong helpim kongrigesen. Long dispela rot ol i abrusim pasin bilong resis wantaim na ol i stap olsem gutpela piksa long pasin bilong i stap wanbel em ol arapela long kongrigesen i ken bihainim.
9 Krismas na save bilong ol elda inap mekim, na ating sampela i mekim bikpela wok moa, winim ol arapela, o ating sampela i gat gutpela tingting moa. Olsem na wok ol elda i holim insait long oganaisesen bilong Jehova i narapela narapela. Ol i no skelim wok bilong ol wantaim wok bilong ol arapela, nogat; ol i save tingim dispela tok: “God i bin marimari long yupela olgeta wan wan na givim ol kain kain presen long yupela. Olsem na yupela wan wan i mas i stap gutpela wokboi bilong God, na yusim ol dispela presen bilong helpim ol arapela manmeri bilong God.” (1 Pita 4:10) Dispela tok i stret long olgeta wokboi bilong Jehova, long wanem, olgeta i bin kisim stretpela save, em wanpela presen i kam long God, na olgeta inap insait long wok Kristen bilong autim tok.
10. Long wanem rot tasol bai Jehova i orait long ol wok bilong em yumi mekim?
10 Bilong Jehova i ken amamas long ol wok bilong em yumi mekim, pasin bilong laikim em i mas kirapim yumi long mekim na yumi no ken mekim bilong apim yumi yet, winim ol arapela. Olsem na i bikpela samting yumi holim stretpela tingting long ol wok yumi mekim bilong helpim lotu i tru. Maski i no gat wanpela man inap skelim stret samting i kirapim narapela long mekim wok, Jehova “i save skelim gut olgeta tingting.” (Sindaun 24:12; 1 Samuel 16:7) Olsem na sampela taim, yumi mas askim yumi yet, ‘Wanem samting i kirapim mi long mekim wok bilong Jehova?’—Song 24:3, 4; Matyu 5:8.
Holim Stretpela Tingting Long Wok Bilong Yumi
11. I stret yumi kamapim wanem ol askim long wok bilong yumi long autim tok?
11 Sapos samting i kirapim yumi long mekim wok em i bikpela samting bilong Jehova i ken orait long yumi, orait yumi mas i gat wanem tingting long ol wok bilong bilip yumi mekim? Sapos stretpela laik i kirapim yumi long mekim wok autim tok, orait bilong wanem yumi mas raitim ripot bilong ol samting yumi mekim? Em ol gutpela askim, long wanem, yumi no laik putim ol aua samting i go pas long ol wok bilong bilip o larim wok bilong kisim gutpela ripot i kamap olsem nambawan bikpela samting long wok Kristen bilong yumi.
12, 13. (a) Wanem sampela as na yumi save putim ripot bilong wok autim tok bilong yumi? (b) Wanem sampela as na yumi ken amamas taim yumi lukim ripot bilong yumi bilong olgeta hap?
12 Buk Oganaisesen Bilong Mekim Laik Bilong Jehova i tok: “Ol disaipel bilong Jisas Krais long bipo ol i tingim ol ripot bilong wok autim tok. (Mak 6:30) Buk Aposel long Baibel i tok i gat 120 manmeri i bung taim holi spirit i kam daun long ol disaipel long Pentikos. I no longtaim na namba bilong ol disaipel i go bikpela inap 3,000 na bihain i gat 5,000. . . . (Aposel 1:15; 2:5-11, 41, 47; 4:4; 6:7) Taim ol disaipel i harim ol dispela ripot long lain bilong Jehova i go bikpela, dispela i mas strongim tru bel bilong ol!” Long wankain as, ol Witnes Bilong Jehova long nau i save raitim ripot bilong ol samting ol i mekim long olgeta hap long truim dispela tok bilong Jisas: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Ol ripot i helpim yumi long save long wok bilong autim tok long olgeta hap. Ol ripot i kamapim klia wanem ol hap i mas i gat helpim na i mas i gat wanem kain buk na hamas bilong ol dispela buk bilong helpim wok autim tok i go bikpela.
13 Olsem na taim yumi putim ripot bilong wok autim tok, dispela i helpim yumi long mekim gut moa wok bilong yumi long autim gutnius bilong Kingdom. Na tu, taim yumi kisim save long ol wok ol brata i mekim long ol narapela hap bilong graun, dispela i save strongim bel bilong yumi. Taim yumi harim tok olsem wok bilong yumi i go bikpela long olgeta hap, dispela i mekim yumi amamas, na i kirapim yumi long mekim bikpela wok moa, na yumi inap save olsem Jehova i blesim dispela wok. Na yumi ken amamas long save olsem ripot bilong yumi yet i insait long dispela bikpela ripot bilong olgeta hap! Ripot bilong yumi yet i liklik tasol taim yumi skelim wantaim ripot bilong olgeta hap, tasol Jehova i tingim ol wok yumi mekim. (Mak 12:42, 43) Tingim, sapos yu no putim ripot bilong yu yet, ripot bilong olgeta hap bai i sot.
14. Yumi autim tok na lainim ol man, na wanem samting moa i insait long lotu bilong Jehova yumi mekim?
14 Tru, planti samting em Witnes i mekim bilong inapim wok bilong em olsem wokboi bilong Jehova i dediket pinis, dispela i no stap long ripot bilong em. Long ripot yumi no save putim stadi yumi yet i mekim long Baibel, na long go long ol miting na bekim sampela tok, na ol wok bilong kongrigesen yumi mekim, na ol wok bilong helpim ol wanbilip i mas i gat helpim, na mani yumi tromoi bilong helpim wok bilong Kingdom long olgeta hap, na ol narapela samting olsem, nogat. Olsem na maski ripot bilong yumi bilong autim tok i gat wok bilong en—em i helpim yumi long givim bel yet long wok autim tok na abrusim pasin bilong les—yumi mas holim stretpela tingting long en. Yumi no ken tingim ripot i kain olsem wanpela laisens o setifiket samting bilong kisim laip oltaim, nogat.
“Wok Strong Long Mekim Olgeta Kain Gutpela Pasin”
15. Maski ol wok tasol i no inap kisim bek yumi, bilong wanem yumi mas mekim?
15 Em i klia tru olsem maski ol wok bilong bilip tasol i no inap kisim bek yumi, ol i samting yumi mas mekim. Long dispela as Baibel i tok ol Kristen i “stap lain manmeri bilong em yet, na [ol i] wok strong long mekim olgeta kain gutpela pasin,” olsem wok, na ol “i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol.” (Taitus 2:14; Hibru 10:24) Narapela man bilong raitim Baibel, em Jems, i tokaut klia: “Bodi i no gat spirit i stap long en, em i dai pinis. Olsem tasol, sapos man i bilip nating na bilip bilong en i no kamapim gutpela pasin tu, orait bilip bilong dispela man i olsem em i dai pinis.”—Jems 2:26.
16. Wanem samting i bikpela samting moa, winim ol wok? Yumi mas was gut, nogut yumi mekim wanem?
16 Ol gutpela wok yumi mekim ol i bikpela samting, tasol samting i kirapim yumi long mekim ol dispela wok em i bikpela samting moa. Olsem na sampela taim i gutpela yumi skelim as na yumi mekim ol dispela wok. Tasol i no gat wanpela man i save tru tru long samting i kirapim ol arapela long mekim wok, olsem na yumi mas was gut, nogut yumi kirap skelim pasin bilong ol. “Yu husat na yu skelim pasin bilong wokboi bilong narapela man?” Bekim bilong dispela i olsem: “Sapos em i sanap strong long wok bilong en, o sapos em i pundaun, dispela em i samting bilong Bikman bilong em yet.” (Rom 14:4) Jehova, Bikman bilong olgeta man, na Jas em i bin makim, Jisas Krais, ol bai skelim yumi, tasol i no long ol wok yumi mekim na em tasol, nogat; ol bai tingim tu samting i kirapim yumi long mekim ol dispela wok, na ol rot i bin op long yumi, na pasin bilong yumi long laikim tru ol arapela na givim bel olgeta long God. Jehova na Krais Jisas tasol inap skelim stret olsem yumi bin mekim ol samting ol Kristen i mas mekim o nogat, olsem aposel Pol i tok: “Yu mas wok strong long kamap wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.”—2 Timoti 2:15; 2 Pita 1:10; 3:14.
17. Taim yumi wok strong tru, bilong wanem yumi mas tingim tok bilong Jems 3:17?
17 Jehova i save isi long yumi, em i no tokim yumi long mekim ol samting yumi no inap mekim, nogat. Jems 3:17 i tok, “gutpela tingting na save i kam long God . . . i save isi long [man].” Em nau, yumi bihainim pasin bilong gutpela tingting na save, na yumi mekim wanpela gutpela wok tu, taim yumi bihainim pasin bilong Jehova long dispela samting. Olsem na taim yumi putim sampela mak long yumi yet o long ol brata bilong yumi, yumi no ken putim ol mak i antap tumas o i hatwok tumas long winim.
18. Yumi ken wet long kisim wanem samting taim yumi holim stretpela tingting long marimari bilong Jehova na long ol samting yumi yet i mekim?
18 Sapos yumi holim stretpela tingting long ol wok bilong bilip yumi mekim na long marimari bilong Jehova, bai yumi amamas. Dispela amamas em wanpela mak bilong ol trupela wokboi bilong Jehova. (Aisaia 65:13, 14) Yumi ken amamas long ol blesing Jehova i save givim long lain bilong em, maski yumi wan wan inap mekim wanem wok. Oltaim yumi mas “prea long God na tok tenkyu long em, na askim em long helpim [yumi]” na bai yumi inap wok strong tru. Orait nau “bel isi God i save givim yumi, . . . bai i mekim [yumi] i stap bel isi tru, na long dispela pasin [yumi] bai i pas gut wantaim Krais Jisas, na bel na tingting bilong [yumi] bai i stap gut tru.” (Filipai 4:4-7) Yes, yumi ken kisim strong long save olsem God bai kisim bek yumi long marimari bilong em, na i no long ol wok tasol yumi mekim!
Yu Inap Stori, Bilong Wanem Ol Kristen
• i no save hambak long ol samting ol yet i bin mekim?
• i no save resis wantaim ol arapela?
• i save putim ripot bilong wok Kristen bilong ol long autim tok?
• i no save skelim ol wanlain Kristen?
[Piksa long pes 15]
“Marimari bilong mi em inap long yu”
[Ol Piksa long pes 16, 17]
Ol elda i amamas long ol samting ol wan wan inap mekim bilong helpim kongrigesen
[Ol Piksa long pes 18, 19]
Sapos yu no putim ripot, ripot bilong olgeta hap bai sot