Stap Bel Isi Namel Long Ol Man i Resis Long Winim Ol Narapela

JISAS i tokim ol aposel: “Sapos wanpela man i laik i stap namba wan, orait em i mas i stap las tru, olsem wokman bilong helpim olgeta man.” Long dispela taim ol aposel i bin tok pait long husat i namba wan bilong ol. Ol i save, Jisas i nolaik tru long dispela pasin. Em i no bin kirapim pasin namel long ol olsem resis long winim narapela na bai ol i ken kamap strong long spirit, nogat.​—⁠Mak 9:​33-37.

Taim Jisas i no kam daun yet long graun, em i helpim God long wokim namba wan man na meri, na em i save olsem wanem God i bin wokim tupela. (Kolosi 1:​15, 16) God i bin wokim tupela bilong kamapim gutpela wok​—⁠ol i no gat wok long resis wantaim ol narapela. Ol man i no gat wok long tok pait long husat bai stap namba wan, na ol i no gat wok long resis wantaim ol animal long kisim kaikai samting bambai ol i ken i stap laip.​—⁠Stat 1:26; 2:​20-24; 1 Korin 11:⁠3.

Dispela Pasin i Kirap We?

Dispela pasin bilong resis long winim narapela, em i bin kamap strong olsem wanem? Yumi ken tingim namba wan taim wanpela man i bin kilim i dai man. Kein, em namba wan pikinini bilong namba wan man na meri, em i bin kisim dispela kain pasin, na dispela i kirapim em long kilim i dai brata bilong em, Abel. Kein i mekim olsem, long wanem, God i laikim ofa bilong Abel, na em i no laikim ofa bilong Kein. Na Baibel i tok, Kein “em i man bilong Satan, na em i kilim i dai brata bilong en.”​—⁠1 Jon 3:12; Stat 4:​4-8.

Em nau, dispela man nogut, em Satan, em i kirapim pasin bilong resis long winim narapela. Bipo em i wanpela pikinini bilong God na em i holim bikpela namba, tasol em i laikim bikpela namba moa. (Esekiel 28:​14, 15) Dispela laik bilong em i kamap ples klia taim em i pulim Iv. Em i tok, sapos Iv i kaikai pikinini bilong diwai tambu, em bai “kamap wankain olsem God.” (Stat 3:​4, 5) Tasol Satan yet i laik kamap olsem God. Em i resis long winim Jehova, na dispela i kirapim em long bikhet long Jehova.​—⁠Jems 1:​14, 15.

Dispela pasin i save kalap long ol narapela. Satan i mekim na bel isi God i bin givim long namba wan famili em i pinis. (Stat 3:​6, 16) Taim Satan i bikhet long God, em i kirap bosim ol man, na kirapim pasin bilong resis long winim narapela. Na em i giamanim ol manmeri na bai ol i ting, pasin bilong resis wantaim ol narapela em rot bilong helpim ol tru. Tasol Baibel i tok: “Ol man i save bel nogut long ol arapela man, na oltaim ol i save painim rot bilong apim nem bilong ol yet, ol dispela man i no save sindaun gut, na ol i save mekim olgeta kain pasin nogut.” (Jems 3:​14-16) Olsem na Satan i bagarapim amamas na bel isi bilong ol man.

Stap Gutpela, Maski Resis

Baibel i stori long sampela ol i bin kisim gutpela samting long wok bilong ol, tasol ol i no bin resis wantaim ol narapela. Nambawan man bilong mekim olsem, em Krais Jisas. Em i kain olsem God, tasol em i no tingting long kamap olsem God yet. Em i kamap olsem wokboi nating na kam long graun. Na em i daunim em yet na bihainim tok bilong God i go inap long em i dai long diwai. Em i no tingting long kamap olsem God. Olsem na “God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem.” (Filipai 2:​5-9) No gat narapela gutpela samting moa wanpela man o ensel inap kisim, a? Jisas i bin amamasim tru Papa bilong em​—⁠winim olgeta man na ensel, na em i no bin bihainim pasin bilong resis long winim narapela bilong mekim olsem.​—⁠Sindaun 27:11.

Na ol planti gutpela ensel long heven i gat wankain pasin. Jisas em i nambawan bilong ol, na taim em i kam daun long graun em i bin stap aninit long ol. Tasol maski em i bin stap olsem, ol ensel i amamas long helpim em, ol i no tingting liklik long kisim namba bilong em, olsem Nambawan Ensel.​—⁠Matyu 4:11; 1 Tesalonaika 4:16; Hibru 2:⁠7.

Na ol ensel i nolaik tru long pasin bilong resis long winim narapela, long wanem, ol i amamas long laik bilong God long kisim sampela sinman bilong kisim laip oltaim long heven, na ol i no ken i dai moa. Na taim ol i stap long heven ol bai “skelim pasin bilong ol ensel.” (1 Korin 6:⁠3) Ol ensel i gat save pinis long mekim wok bilong Jehova, winim ol sinman bilong graun. Tasol ol ensel i amamas long helpim ol dispela man God i makim ol na ol i stap yet long graun. Ol ensel i no bel nogut long ol gutpela samting ol dispela man bai kisim long bihain. (Hibru 1:14) Dispela gutpela tingting bilong ol ensel i save helpim ol long sanap yet long pes bilong sia king bilong Nambawan Bikpela, Jehova.

Na tingim ol gutpela wokboi bilong God bilong bipo, em ol bai kirap bek long graun. Abraham i win tru long bilip na ol i kolim em “namba wan tumbuna bilong olgeta man . . . i bilip long God.” (Rom 4:​9, 11) Jop em i gutpela piksa long pasin bilong strongim bel na sanap strong. (Jems 5:11) Moses “em i man bilong daunim em yet, na i no gat wanpela man long dispela graun i save daunim em yet inap olsem Moses.” Olsem na Moses i gat wok long kisim lain Israel long Isip. (Namba 12:⁠3) Husat namel long olgeta sinman i bin winim ol dispela man long pasin bilong bilip na sanap strong na daunim ol yet? Tasol ol dispela bilipman bai kisim laip long graun aninit long Kingdom bilong God. (Matyu 25:34; Hibru 11:​13-16) Ol i wankain olsem Jon Bilong Baptais​—⁠ol bai stap aninit long “man i stap liklik tru long kingdom bilong heven.” (Matyu 11:11) Olsem wanem? Ol bai toktok planti olsem bilip, na pasin bilong ol long sanap strong, na daunim ol yet, i wankain o i winim bilong ol man i kisim laip long heven? Nogat tru! Ol bai amamas long stap laip long graun aninit long Kingdom bilong God.

Long nau i gutpela long stap wantaim ol man i no laik resis long winim ol narapela. Yasuo, em man pastaim yumi bin stori long em, em i bin mekim wok bisnis long gol, tasol em i lusim olgeta samting bilong em na em i gat bikpela dinau. Olgeta “pren” i lusim em. Meri bilong em i bin kirap na stadim Baibel wantaim ol Witnes Bilong Jehova, olsem na Yasuo i kirap na go wantaim em long ol miting. Em i mekim olsem, long wanem, em i bel hevi long pasin em i bin mekim na famili i kisim hevi long en. Bihain em i lusim pasin bilong resis long winim ol narapela na em i kamap wanpela Witnes. Nau em i amamas long stap wantaim ol planti pren Kristen, em ol pren i amamas long helpim em taim em i gat hevi.

Rot Bilong Stap Bel Isi

Em i hatwok long stap bel isi taim planti man i bilip tru long pasin bilong resis long winim ol narapela. Baibel i kamapim klia olsem “pasin birua na belhat na kros na bel nogut na mangal na pasin bilong ting long yu yet tasol na tok pait na brukim lain, na pasin bilong bel kaskas long ol man i stap gut” em ol “pasin bilong olpela bel.” Olgeta man i mekim ol dispela kain pasin i save resis long winim ol narapela man, na ol i no inap i go insait long Kingdom bilong God. Olsem na aposel Pol i tok: “Yumi no ken litimapim nating nem bilong yumi yet, na yumi no ken sutim bel bilong ol arapela long kirapim pait, na yumi no ken mangal long ol samting bilong ol arapela.”​—⁠Galesia 5:​19-21, 26.

Tasol Pol i tok, bikpela samting bilong daunim laik long winim narapela, em ‘pasin bilong laikim tru ol arapela, na amamas, na stap bel isi, na no ken belhat kwik, na helpim ol man, na mekim gutpela pasin long ol, na wokabaut stret oltaim, na stap isi, na daunim laik bilong olpela bel. I no gat wanpela lo i tambuim ol dispela kain pasin.’ (Galesia 5:​22, 23) Ol gutpela pasin bilong spirit holi i save helpim yumi long lusim tru pasin bilong resis long winim ol narapela. Tingim gutpela pasin bilong laikim narapela. Pol i tok, man i gat dispela pasin ‘em i no save bel nogut na litimapim nem bilong em yet, na hambak na bikhet nabaut. Em i no save tingting tumas long em yet. Em i no save belhat kwik.’ (1 Korin 13:​4-7) Sapos yumi givim bel moa long laikim narapela, yumi no ken bel nogut​—⁠em as bilong pasin bilong resis long winim ol narapela. Na ol narapela pasin bilong spirit holi i ken helpim yumi sapos pasin bilong resis long winim narapela i stap liklik yet long tingting na bel bilong yumi. Sampela i tingting long win tasol na ol i no tingim tumas ol narapela samting bai kamap, tasol sapos yumi bosim gut skin dispela bai helpim yumi long daunim pasin bilong resis long winim narapela.​—⁠Sindaun 17:27.

Tasol bilong givim bel moa long kamapim ol dispela gutpela pasin, yumi mas larim spirit bilong God i helpim yumi. Na spirit holi bai helpim yumi sapos yumi strong long beten na askim God. (Luk 11:13) Na taim God i harim beten bilong yumi, em bai givim wanem samting long yumi? Baibel i tok: ‘Yupela i mas prea long em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.’​—⁠Filipai 4:​6, 7.

Dispela samting i kamap tru long ol aposel bilong Jisas. Long laspela apinun Jisas i stap wantaim ol aposel, em i bin kirapim wanpela bung olsem Kaikai Bilong Bikpela. Na long dispela taim ol i wok yet long tok pait long husat i stap namba wan. (Luk 22:​24-27) Planti taim Jisas i bin wok long helpim ol long stretim tingting bilong ol long dispela samting, tasol pasin bilong resis long stap namba wan i pas strong yet long bel bilong ol. (Mak 9:​34-37; 10:​35-45; Jon 13:​12-17) Tasol 50 de bihain long dispela tok pait ol i bin kisim spirit holi na tingting bilong ol i senis. Ol i no tok pait long husat i mas kamap mausman bilong ol long de Pentikos taim ol manmeri i bung bilong harim tok bilong ol.​—⁠Aposel 2:​14-21.

Wanpela man i no inap bosim kongrigesen Kristen. Hevi i bin kamap long pasin bilong katim skin, olsem na ol i bung bilong stretim. Jems em i no wanpela disaipel taim Jisas i dai, tasol em yet i bosim dispela bikpela miting bilong lain bilong bosim kongrigesen Kristen. Ol i no tok pait long dispela samting. Tasol bipo ol aposel i bin resis long stap olsem namba wan! Spirit holi i helpim ol long tingim ol samting Jisas i bin lainim ol long en na dispela i helpim ol long save gut long as bilong tok.​—⁠Jon 14:26.

Dispela inap kamap long yumi tu. Sapos yumi laik resis long winim narapela bilong kamapim gutpela wok bilong helpim sindaun bilong yumi yet, spirit holi i ken helpim yumi long daunim dispela kain tingting, na kisim bel isi. Baibel i tok klostu nau Satan, em as bilong pasin bilong resis long winim ol narapela, em bai go daun long hul i no gat as na bai em i no inap mekim wanpela samting. (KTH 20:​1-3) Pasin bilong man i resis wantaim narapela man bai pinis. Tasol olsem wanem? Ol man bai stap tasol na ol i no ken wok long kamap gutpela moa? Nogat! Bihain ol man bai kamap gutpela olgeta. Tasol ol i no ken kamap olsem long pasin bilong resis long winim narapela, nogat. Ofa bilong Jisas bai opim rot bilong helpim ol.​—⁠1 Jon 2:​1, 2.

Yumi bin stori pinis long Keinosuke, em man i bin baim planti ka i go long ol man, olsem na kampani i litimapim nem bilong em. Tasol skin na tingting bilong em i no gat strong moa, na bihain em i lusim wok. Em i tok: ‘Nau mi amamas tru long i stap bilong mi.’ Keinosuke i kisim save long ol samting i mekim na Jisas i stap amamas tru. Nau em i amamas long mekim wok insait long oganaisesen bilong God. Nau wok em i mekim i redim em bilong i stap long nupela taim God bai kamapim, na long dispela taim ol man i no ken tru resis long winim ol narapela. Yu inap lukim dispela lain bilong nupela taim sapos yu go long wanpela Haus Kingdom long hap bilong yu na bung wantaim ol Witnes Bilong Jehova.

[Piksa long pes 7]

Long nupela taim God bai kamapim, olgeta man bai stap bel isi na wok gut wantaim