Resis Long Win i Bikpela Samting?
“PASIN bilong winim ol narapela i nambawan samting.” Long nau planti man i bihainim dispela tok, em sampela i ting Vince Lombardi i kamapim, em wanpela kosa bilong kikbal long Amerika. Ol kantri bipo ol i aninit long gavman Komyunis, nau ol tu i ting, resis long winim narapela em bikpela samting bilong helpim ol wok bisnis na kampani bilong ol long kamap bikpela. Long hap bilong Is, planti papamama i subim pikinini long resis long winim ol narapela long skul, olsem na ol i salim pikinini i go long wanpela kain skul i save lainim pikinini long pasin bilong winim ol tes. Papamama i tingting strong—sapos pikinini i go long wanpela skul i gat nem, bihain bai em i kisim bikpela wok mani na namba.
Planti man i bilip tru olsem resis long winim narapela em i rot bilong kisim wok i gat namba na bikpela pe. Ol i ting dispela i bin helpim ol man long kamapim gutpela wok i helpim sindaun bilong ol. Wanpela lain long Japan (Federation of Economic Organizations) i skelim tingting bilong ol man i holim bikpela wok long ol kampani, na planti (olsem 65.9 pesen) i tok, ‘Resis long kisim bikpela namba insait long kampani i kirapim ol wokman long givim bel tru long wok bilong ol kampani long Japan.’ Tasol yu ting resis long win em i rot bilong kisim gutpela wok mani o sindaun samting?
Em i Helpim Tru Yumi?
Ol man i resis long winim narapela ol i save tingim ol yet tasol. Ol i amamas taim wok bilong ol narapela i no kamap gutpela—ol i ting dispela bai mekim na i olsem wok bilong ol yet i gutpela. Na ating ol bai mekim ol samting bilong nogutim ol narapela. Tasol pasin bilong resis long winim ol narapela long wok samting, em inap kamapim wanem samting nogut? Yasuo i bin resis long kisim bikpela namba insait long kampani. Em i tingim dispela na em i tok: ‘Mi tingting tasol long resis long winim bikpela namba long wok. Mi ting mi winim tru ol narapela long kampani. Taim ol i kisim bikpela namba, winim mi, mi save bel hevi stret na toktok planti long ol bos. Mi no gat sampela pren tru.’
Taim man i resis long winim ol narapela, dispela inap mekim na em i dai taim em i no lapun yet. Wanpela nius bilong Japan (Mainichi Daily News) i tok, pasin bilong tingting oltaim long wok na no ken lusim nating taim, na resis long winim narapela, na bel nogut long narapela, dispela i save bagarapim man na em i dai hariap. Tupela dokta bilong sik bilong klok, em Friedman na Rosenman bilong Amerika, ol i tok, dispela pasin i save kamapim sik bilong klok. Tru tumas, resis long win em inap bagarapim man.
Na taim man i resis long winim ol wanwok, em inap kisim ol narapela sik bilong skin na tingting. Yumi ken tingim Keinosuke, em i holim bikpela wok long bikpela kampani bilong ol ka long Japan. Em i bin baim 1,250 ka bilong kampani i go long ol man—em i winim olgeta narapela bilong kampani. Ol i hangamapim piksa bilong em long ofis bilong lain dairekta long hetkota bilong kampani. Em i no laik resis wantaim ol wanwok long kisim biknem, tasol kampani i subim ol wokman long mekim. Olsem na long wanpela yia, tupela sua i kamap insait long bel bilong em. Na sik i kisim 15 bikman bilong kampani na ol i mas slip long haus sik, na wanpela i kilim i dai skin bilong em yet.
Sampela man i save resis wantaim ol wantok long kisim planti samting bilong skin, na oltaim ol i laik winim ol narapela. (1 Jon 2:16) Tasol dispela i save helpim tasol ol kampani na bisnisman long kisim bikpela mani.—Lukim KTH 18:11.
Tru, ating pasin bilong resis long winim ol wanwok i save kirapim man long mekim bikpela wok, tasol King Solomon i tok: “As bilong dispela i olsem. Ol i ting long ol wantok i gat biknem na planti samting. Na ol i mekim planti wok bilong kamap wankain olsem ol wantok. Dispela em i longlong pasin tru. I olsem man i ran i go bilong holimpas win.” (Saveman 4:4) Orait, olsem wanem yumi ken i stap bel isi namel long ol man i resis long winim ol narapela? Pastaim yumi mas save, pasin bilong resis long winim narapela em i bin kirap we.