No Ken Les Long Mekim Gutpela Pasin
APOSEL Pita i tok: “Yupela i mas wokabaut stret namel long ol haiden.” (1 Pita 2:12) Tok Grik ol i tanim olsem “gutpela,” em i makim samting i “naispela tru, i gat gutpela nem, i stret tru, i nambawan olgeta.” Nau long dispela taim, i luk olsem yumi no inap tingting long painim ol dispela kain gutpela pasin namel long ol man. Tasol lain bilong Jehova long nau i wok strong long bihainim dispela tok bilong Pita. Long olgeta hap ol i gat nem long mekim gutpela pasin.
Dispela em i narapela kain tru taim yumi tingim ol hevi i save painim yumi nau long dispela taim bilong “planti hevi nogut tru.” (2 Timoti 3:1) Ol hevi i save painim yumi long olgeta de, na planti man i save birua long pasin ol Kristen i bihainim. Na tu, sampela hevi i save stap sotpela taim, tasol sampela hevi i save stap longtaim na i go bikpela moa. Tasol aposel Pol i tok: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru.” (Galesia 6:9) Olsem wanem yumi inap mekim gutpela pasin—na mekim i go i go—maski ol bikpela hevi nogut tru i painim yumi na ol man i birua yet long yumi?
Ol Samting Inap Helpim Yumi
Ol pasin “i gat gutpela nem, i stret tru, i nambawan olgeta,” em ol pasin i stap insait long bel bilong yumi. Olsem na pasin bilong holimpas gutpela pasin oltaim maski ol hevi i painim yumi, em i no samting yumi kirap nating na mekim, nogat—yumi mekim, bikos yumi bin bihainim ol stiatok bilong Baibel long olgeta de na long olgeta samting i kamap long i stap bilong yumi. Orait wanem sampela samting inap helpim yumi long holimpas gutpela pasin long taim bilong hevi? Tingim ol dispela samting:
Kisim tingting bilong Krais. Yumi mas i gat pasin daun bilong karim hevi long taim yumi ting ol i mekim pasin i no stret long yumi. Sapos man i ting em i samting tru, ating taim ol man i mekim nogut long em bai em i no ken karim dispela hevi. Tasol Jisas “i daunim em yet na i bihainim tok bilong God, i go inap long em i dai.” (Filipai 2:5, 8) Sapos yumi bihainim pasin bilong em, bai yumi no “les” long mekim wok bilong God. (Hibru 12:2, 3) Wok gut wantaim ol elda insait long kongrigesen bilong yu na long dispela rot yu mekim pasin daun na bihainim tok. (Hibru 13:17) Lain long ting olsem pasin bilong ol narapela “i winim” pasin bilong yu, na tingting long helpim ol long i stap gut, na no ken lukautim ol samting bilong yu yet tasol.—Filipai 2:3, 4.
No ken lusim tingting olsem Jehova i laikim yu tru. Yumi mas bilip strong olsem Jehova “i stap, na em . . . i save mekim gut tru long ol man i wok long painim em.” (Hibru 11:6) Em i save tingim tru yumi na em i laik bai yumi kisim laip i stap oltaim oltaim. (1 Timoti 2:4; 1 Pita 5:7) Sapos yumi tingting olsem i no gat wanpela samting inap mekim na bai God i lusim pasin bilong laikim tru yumi, bai yumi no les long mekim gutpela pasin taim hevi i painim yumi.—Rom 8:38, 39.
Bilip strong long Jehova. Em i bikpela samting long yumi mas bilip long Jehova, na yumi mas mekim moa yet long taim i olsem ol hevi i no gat pinis bilong en o ol inap bagarapim laip bilong yumi. Yumi mas bilip strong olsem Jehova i no inap larim wanpela hevi i painim yumi ‘em i winim strong bilong yumi,’ nogat. Oltaim em bai ‘wokim rot bilong helpim yumi.’ (1 Korin 10:13) Na maski ol i tok long kilim yumi i dai, yumi inap strongim bel na karim dispela hevi taim yumi bilip tru long Jehova.—2 Korin 1:8, 9.
Beten long olgeta taim. Beten em i bikpela samting. (Rom 12:12) Taim yumi beten na yumi no giaman, dispela em i wanpela rot bilong yumi long go klostu long Jehova. (Jems 4:8) Ol samting i painim yumi i lainim yumi pinis olsem, sapos “yumi beten na askim [God] long wanpela samting, orait em i save harim beten bilong yumi.” (1 Jon 5:14) Sapos Jehova i larim wanpela hevi bilong yumi i stap bilong traim pasin bilong yumi long i stap gut long em, yumi beten askim em long helpim yumi long karim dispela hevi. (Luk 22:41-43) Beten i save skulim yumi olsem yumi no stap wanpis, na sapos Jehova i stap wantaim yumi, long olgeta taim bai yumi inap winim ol hevi.—Rom 8:31, 37.
Mekim Gutpela Pasin—Bai Yu Kisim “Biknem” Long En
Sampela taim “kain kain traim” i save painim olgeta Kristen na “givim pen” long ol. Tasol yumi “no ken les long mekim gutpela pasin.” Taim yu gat sampela hevi, kisim strong long save olsem, pasin bilong yu long stap gut long God bai mekim na bihain God ‘bai i amamas tru long yu na givim biknem long yu.’ (1 Pita 1:6, 7) Mekim wok long olgeta samting Jehova i save givim long yu bilong strongim bilip bilong yu. Sapos yu mas kisim sampela helpim, orait go long ol brata i mekim wok olsem wasman, tisa, na man bilong givim tok long yumi insait long kongrigesen Kristen. (Aposel 20:28) Go long olgeta miting bilong kongrigesen, em samting i save ‘kirapim yumi long laikim ol arapela na mekim ol gutpela pasin.’ (Hibru 10:24) Makim taim bilong ritim Baibel long olgeta de na mekim stadi na dispela bai helpim yu long was i stap na stap strong long ol samting bilong spirit, na pasin bilong mekim wok Kristen bilong autim tok long olgeta wik, dispela tu bai helpim yu.—Song 1:1-3; Matyu 24:14.
Sapos planti taim yu lukim olsem Jehova i save laikim yu tru na tingim yu, bai yu gat bikpela laik moa long “wok strong long mekim olgeta kain gutpela pasin.” (Taitus 2:14) No ken lusim tingting, “ol manmeri i stap strong inap long las de, God bai i kisim bek ol.” (Matyu 24:13) Tru tumas, yu mas tingting strong olsem yu “no ken les long mekim gutpela pasin”!
[Rait long pes 29]
Yumi mas bilip strong olsem Jehova i no inap larim wanpela hevi i painim yumi ‘em i winim strong bilong yumi,’ nogat. Oltaim em bai ‘wokim rot bilong helpim yumi’
[Ol Piksa long pes 30]
Taim yumi mekim planti wok tiokratik, dispela inap strongim yumi long karim ol hevi i painim yumi