Yu Save Bihainim Gut Tok Long Olgeta Samting?
“Sapos wanpela man i save lukaut gut long ol liklik samting, orait em bai i lukaut gut long ol bikpela samting tu.”—LUK 16:10.
1. Wanem wanpela rot bilong Jehova long bihainim tok bilong em?
SAMPELA taim yu bin lukim wanem samting i kamap long mak bilong sedo bilong diwai i stap long graun, kirap long moningtaim i go inap long apinun? Sais na ples bilong sedo i wok long senis senis! Planti wok na tok promis bilong ol man i save senis senis olsem sedo. Tasol God Jehova i no save senis. Disaipel Jems i kolim em “Papa i bin mekim kamap olgeta lait bilong skai,” na em i tok moa: “Papa em i no save senisim nabaut pasin bilong en. Em i no olsem tewel [“sedo,” NW ] bilong wanpela samting san i mekim i kamap, na em i go longpela na bihain em i go sotpela gen. Nogat.” (Jems 1:17) Jehova i save stap wankain na yumi inap bilip long em, na em i stap olsem long ol liklik samting tu. Em i “save bihainim tok bilong en.”—Lo 32:4.
2. (a) Bilong wanem yumi mas skelim yumi yet bilong save yumi bihainim gut tok o nogat? (b) Bai yumi skelim wanem ol askim long pasin bilong bihainim gut tok?
2 Long pasin bilong bihainim gut tok, God i ting olsem wanem long ol man i lotuim em? Em i gat wankain tingting olsem Devit husat i tok long ol olsem: “Mi laikim ol man i bihainim God na ol tasol i ken i stap wantaim mi long haus bilong mi. Na ol man i save mekim gutpela pasin oltaim, ol dispela man tasol i ken mekim wok bilong mi.” (Song 101:6) Em nau, Jehova i amamas long ol wokman bilong em i bihainim gut tok bilong em. I gat as tru na aposel Pol i tok: “Man i mekim wok bilong wanpela man, em i mas bihainim gut tok bilong bikman bilong en.” (1 Korin 4:2) Wanem samting i insait long pasin bilong bihainim gut tok? Yumi mas bihainim gut tok long wanem ol samting? Wanem ol gutpela samting i kamap taim yumi “mekim gutpela pasin oltaim”?
Mining Bilong Pasin Bilong Bihainim Gut Tok
3. Wanem samting i makim yumi gat pasin bilong bihainim gut tok?
3 Hibru 3:5 i tok: “Moses em i stap olsem wokman bilong God, na em i bihainim tru tok bilong God.” Wanem samting i mekim na profet Moses i bihainim gut tok? Long wok bilong sanapim haus lotu sel, “Moses i harim dispela tok na em i mekim olgeta samting olsem Bikpela i bin tokim em.” (Kisim Bek 40:16) Yumi ol man i lotuim Jehova, na yumi bihainim gut tok bilong em long rot bilong mekim wok bilong em. Dispela i makim olsem yumi stap gut long Jehova taim ol bikpela traim na hevi i painim yumi. Tasol sapos yumi sanap strong taim ol bikpela traim i painim yumi, dispela samting tasol i no makim olsem yumi gat pasin bilong bihainim gut tok. Jisas i tok: “Man i save lukaut gut long ol liklik samting, orait em bai i lukaut gut long ol bikpela samting tu. Na man i save mekim pasin i no stret long ol liklik samting, em bai i mekim pasin i no stret long ol bikpela samting tu.” (Luk 16:10) Yumi mas bihainim gut tok long ol liklik samting tu.
4, 5. Pasin bilong yumi long bihainim tok long “ol liklik samting” i kamapim klia wanem samting?
4 I gat tupela as na em i bikpela samting long yumi bihainim tok long “ol liklik samting” long olgeta de. Namba wan, em i kamapim ples klia yumi gat wanem tingting long wok bos bilong Jehova. Tingim samting God i bin mekim long namba wan man na meri, Adam na Iv, bilong traim pasin bilong ol long bihainim gut tok. Dispela traim em i wanpela lo i no putim hevi liklik long ol. Ol inap kisim planti kain kain kaikai long gaden Iden, tasol ol i no ken kisim kaikai bilong wanpela diwai tasol—em “diwai bilong givim gutpela save long wanem samting i gutpela na wanem samting i nogut.” (Stat 2:16, 17) Sapos namba wan man na meri i bin bihainim dispela tok, dispela bai kamapim klia olsem ol i laik sapotim wok king bilong Jehova. Taim yumi bihainim tok bilong Jehova long olgeta wokabaut bilong yumi, dispela i soim olsem yumi sapotim wok king bilong Jehova.
5 Namba tu, samting yumi mekim long “ol liklik samting” i makim ol samting yumi bai mekim taim “ol bikpela samting” i painim yumi. Tingim samting i bin painim Daniel na tripela gutpela poroman bilong em—Hanania, Misael, na Asaria. Ol Babilon i kisim ol i go kalabus long 617 B.C.E. Taim ol i yangpela yet, ating 15 krismas samting, ol dispela fopela yangpela i stap long haus king bilong King Nebukatnesar. King i makim olsem “long olgeta de ol i mas kisim wankain kaikai na dring olsem ol lain man long haus bilong king i save kisim. Ol bai i kisim dispela skul inap long tripela yia na bihain ol bai i kamap wokman bilong king.”—Daniel 1:3-5.
6. Wanem traim i painim Daniel na tripela poroman Hibru bilong em long haus king bilong Babilon?
6 Tasol kaikai bilong king bilong Babilon i putim hevi long dispela fopela yangpela Hibru. Ating sampela gutpela kaikai bilong king em ol kaikai Lo Bilong Moses i tambuim. (Lo 14:3-20) Ating ol i no bin rausim gut blut bilong ol animal ol i kilim i dai, na sapos ol Hibru i kisim kain abus olsem ol i brukim Lo Bilong God. (Lo 12:23-25) Na tu, nogut ol Babilon i bin givim dispela kaikai olsem ofa long ol imis, olsem em pasin bilong ol long mekim paslain long ol i bung wantaim bilong kaikai.
7. Pasin bilong Daniel na tripela poroman bilong em long bihainim tok i kamapim klia wanem samting?
7 Ol lo i tambuim sampela kaikai i no bikpela samting long ol man long haus king bilong Babilon. Tasol Daniel na ol poroman bilong em i tingting strong long ol i no ken kamap doti long rot bilong kisim kaikai em Lo Bilong God long lain Israel i tambuim. Dispela em i wanpela bikpela samting long pasin bilong ol long stap gut long God na bihainim gut tok. Olsem na ol i askim wasman i lukautim ol long givim kaikai bilong gaden na wara long ol, na wasman i orait long dispela. (Daniel 1:9-14) Sampela man long nau inap ting ol samting dispela fopela yangpela man i mekim i no bikpela samting. Tasol pasin bilong ol long bihainim tok bilong God i kamapim klia ol i stap olsem wanem long wok king bilong Jehova.
8. (a) Wanem bikpela traim i bin painim tripela Hibru, olsem ol bai bihainim gut tok o nogat? (b) Wanem samting i kamap long dispela traim? Dispela i kamapim klia wanem samting?
8 Pasin bilong bihainim gut tok long samting i olsem liklik samting, i redim tripela poroman bilong Daniel long winim wanpela bikpela traim. Opim Baibel long sapta 3 bilong Buk Daniel, na ritim samting tripela Hibru i bin mekim taim King Nebukatnesar i tok ol bai dai sapos ol i no brukim skru na lotu long piksa gol king i bin sanapim. Taim ol man i bringim ol i kam long ai bilong king, ol i kamapim strong tingting bilong ol: “Mipela i save lotu long God tru. Sapos yu mekim long mipela olsem yu tok, orait God bilong mipela em inap long helpim mipela long abrusim paia na strong bilong yu, na em bai i helpim mipela. Tasol sapos em i no helpim mipela, maski, mipela i no inap lotu long ol god bilong yu, na tu mipela i no inap brukim skru long dispela piksa gol yu bin sanapim.” (Daniel 3:17, 18) Olsem wanem? Jehova i bin helpim ol long abrusim bagarap? Ol man i tromoi tripela yangpela man insait long paia ol i dai, tasol tripela gutpela Hibru i no dai—hat bilong paia i no bin bagarapim liklik skin bilong ol! Ol i kisim pinis pasin bilong bihainim gut tok na dispela i redim ol long bihainim tok long taim bilong bikpela hevi. Dispela i kamapim klia olsem em i bikpela samting long bihainim gut tok long ol liklik samting.
Bihainim Gut Tok Long Ol Samting Bilong “Mani Nogut”
9. Jisas i tok wanem long ol ves i stap klostu long Luk 16:10?
9 Paslain long Jisas i kamapim stiatok long man i lukaut gut long ol liklik samting em bai lukaut gut long ol bikpela samting tu, em i tokim ol man: “Long mani nogut bilong dispela graun yupela i mas mekim ol manmeri i kamap pren bilong yupela. Na bihain, taim dispela taim bilong holim mani em i pinis, orait ol i ken kisim yupela i go long ol haus i stap gut oltaim oltaim.” Orait nau Jisas i toktok long pasin bilong lukaut gut long ol liklik samting. Bihain em i tok: “Sapos yupela i no save lukaut gut long mani nogut bilong dispela graun, orait husat bai i givim samting tru long yupela bilong lukautim? . . . I no gat wanpela wokboi inap i stap aninit long tupela bosman wantaim. Bai em i laikim wanpela na bel nogut long narapela. Bai em i harim tok bilong wanpela na givim baksait long narapela. Yupela i no inap i stap aninit long God na long mani wantaim.”—Luk 16:9-13.
10. Olsem wanem yumi ken soim olsem yumi lukaut gut taim yumi yusim “mani nogut” bilong yumi?
10 Olsem ol ves i stap klostu i kamapim, pastaim tok bilong Jisas long Luk 16:10 i makim pasin bilong yusim “mani nogut,” em ol samting bilong skin yumi gat. Jisas i kolim dispela samting olsem mani nogut, long wanem, ol samting bilong skin—na moa yet mani—i stap aninit long strong bilong ol man i gat sin. Na tu, laik bilong kisim planti samting bilong skin inap kirapim man long mekim ol pasin i no stret. Yumi kamapim pasin bilong lukaut gut long rot bilong bihainim savetingting taim yumi yusim ol mani samting bilong yumi. Yumi no laik yusim ol dispela samting bilong inapim laik bilong yumi yet tasol, nogat, yumi laik yusim bilong helpim wok bilong Kingdom na helpim ol man i sot long ol samting. Taim yumi mekim olsem, yumi kamap pren bilong God Jehova na Jisas Krais, em ol papa bilong “ol haus i stap gut oltaim oltaim.” Ol bai kisim yumi i go insait long ol dispela haus, ol bai givim yumi laip oltaim long heven o long Paradais long graun.
11. Bilong wanem yumi no ken surik long tokim ol man bilong haus olsem yumi amamas long kisim kontribiusen bilong helpim wok ol Witnes Bilong Jehova i mekim long olgeta hap?
11 Yumi save tilim ol Baibel na ol buk na nius bilong Baibel long ol manmeri taim yumi autim gutnius bilong Kingdom na tokim ol olsem yumi amamas long kisim ol kontribiusen bilong helpim wok em lain bilong Jehova i save mekim long olgeta hap. Taim yumi tokim ol olsem, yumi opim rot long ol i ken mekim gutpela wok long mani samting bilong ol. Pastaim tok bilong Luk 16:10 i toktok long pasin bilong yusim mani samting, tasol stiatok i stap long dispela ves i stret long ol narapela samting tu long sindaun bilong man.
Stretpela Pasin i Bikpela Samting
12, 13. Long wanem ol samting yumi ken kamapim pasin bilong stap stret?
12 Aposel Pol i tok: “Mipela i pilim olsem bel bilong mipela i stap stret long ai bilong God. Na mipela i laik wokabaut stret long olgeta taim.” (Hibru 13:18) Wok bilong lukautim mani samting, dispela tu i insait long pasin bilong stap stret long “olgeta taim.” Yumi mas bekim dinau na baim takis bilong yumi hariap na no ken giaman. Bilong wanem? Long wanem, yumi no laik bai maus bilong bel i kotim yumi, na yumi laikim tru God na yumi laik bihainim ol tok bilong em. (Rom 13:5, 6) Yumi save mekim wanem taim yumi painim sampela samting i no bilong yumi? Yumi laik bringim i go bek long papa bilong dispela samting. Dispela bai litimapim tru nem bilong Jehova taim yumi tokim man long wanem samting i kirapim yumi long givim samting bilong em i go bek long em!
13 Pasin bilong bihainim gut tok na mekim stretpela pasin long olgeta taim i makim tu olsem yumi stap stret long ples wok. Pasin bilong mekim stret ol wok i kamapim klia yumi save mekim wok bilong wanem kain God. Yumi no lesman na long dispela rot yumi “stilim” taim bilong wok. Nogat. Yumi wok strong, olsem yumi mekim wok bilong Jehova. (Efesus 4:28; Kolosi 3:23) Ol i tok long wanpela kantri long Yurop, ol wokman i tok ol i sik na ol i askim dokta long raitim pepa long ol i no inap wok, inap 33 pesen bilong ol dispela wokman i no sik tru tru. Ol wokman tru bilong God i no save giaman na painim eskius bilong ol i no ken go long wok. Sampela taim ol bos i laik givim gutpela wok moa long ol Witnes Bilong Jehova, long wanem, ol i lukim pasin bilong ol long stap stret na ol i wok strong.—Sindaun 10:4.
Bihainim Gut Tok Long Mekim Wok Kristen
14, 15. Long wanem ol rot yumi ken kamapim klia olsem yumi bihainim gut tok long mekim wok Kristen?
14 Olsem wanem yumi bihainim gut tok long mekim wok Kristen yumi bin kisim? Baibel i tok: “Oltaim yumi mas givim biknem long God long nem bilong Jisas, na dispela pasin i mas i stap olsem ofa yumi save givim long God. Yes, oltaim maus bilong yumi i mas litimapim nem bilong en.” (Hibru 13:15) Nambawan rot bilong soim pasin bilong bihainim gut tok long wok autim tok, em long rot bilong mekim oltaim dispela wok. I no gat as na yumi larim wanpela mun i lus na yumi no bin autim tok bilong Jehova na ol samting em i tingting pinis long mekim. Taim yumi mekim oltaim wok autim tok, dispela i helpim yumi long mekim gut moa dispela wok.
15 Narapela gutpela rot bilong soim pasin bilong bihainim gut tok long wok autim tok, em yumi bihainim ol tok i stap long Wastaua na Wok Kingdom Bilong Yumi. Taim yumi redim o bihainim ol dispela tok o sampela narapela tok, wok autim tok bilong yumi i karim gutpela kaikai, a? Olsem wanem? Taim yumi bungim wanpela man i laik harim tok bilong Kingdom, yumi save go hariap lukim em gen? Na olsem wanem long ol Baibel stadi yumi bin kirapim wantaim ol man i laik harim tok? Yumi save go oltaim na stadi wantaim ol? Taim yumi bihainim gut tok long mekim wok autim tok, dispela inap bringim yumi na ol man i harim tok yumi autim i go long laip oltaim.—1 Timoti 4:15, 16.
Yumi No Bilong Dispela Graun
16, 17. Long wanem ol rot yumi inap soim olsem yumi no bilong dispela graun?
16 Long beten Jisas i mekim long God em i tok long ol disaipel bilong em: “Tok bilong yu, mi givim pinis long ol. Na ol manmeri bilong dispela graun ol i save birua long ol, long wanem, ol manmeri bilong mi ol i no bilong dispela graun, olsem mi tu mi no bilong dispela graun. Mi no askim yu long kisim ol i go aut long dispela graun. Nogat. Mi beten long yu long yu ken lukautim ol, na man nogut i no ken bagarapim ol. Ol i no bilong dispela graun, olsem mi yet mi no bilong dispela graun.” (Jon 17:14-16) Ating yumi strong long yumi no bilong dispela graun long ol bikpela samting, olsem yumi no insait long wok politik, yumi no tingim ol bikpela de na kastam bilong lotu, na yumi no mekim pasin pamuk. Tasol olsem wanem long ol liklik samting? Ating sampela pasin bilong dispela graun i stiaim yumi na yumi no luksave long dispela? Olsem: Sapos yumi no was gut, yumi inap kirap werim ol klos na bilas i no stret! Pasin bilong bihainim gut tok i makim olsem yumi “no ken hambak” long ol samting bilong klos na bilas. (1 Timoti 2:9, 10) Em nau, ‘yumi no laik bai ol man i tok nogut long dispela wok bilong yumi, olsem na yumi no save mekim wanpela samting i save sutim lek bilong ol dispela man na ol i pundaun. Nogat. Yumi stap wokman bilong God, olsem na oltaim yumi save soim gutpela pasin bilong yumi long olgeta manmeri.’—2 Korin 6:3, 4.
17 Yumi laik litimapim nem bilong Jehova, olsem na yumi werim ol klos i stret long ol miting bilong kongrigesen. Yumi save mekim wankain pasin taim yumi bung wantaim bikpela lain long ol kibung. Klos bilong yumi i mas stret na gutpela long werim. Dispela i litimapim nem bilong God long ai bilong ol man i lukluk long yumi. Ol ensel tu i save lukim ol samting yumi mekim, olsem ol i bin mekim long Pol na ol wanbilip Kristen bilong em. (1 Korin 4:9) Klos na bilas bilong yumi i mas stret long olgeta taim. Sampela inap ting pasin bilong bihainim gut tok long wanem kain klos yumi laik werim i liklik samting, tasol long ai bilong God em i bikpela samting.
Ol Blesing Bilong Pasin Bilong Bihainim Gut Tok
18, 19. Ol man i bihainim gut tok ol bai kisim wanem ol blesing?
18 Baibel i tok ol trupela Kristen i ‘stap gutpela wokboi bilong God, na ol i yusim ol presen bilong helpim ol arapela manmeri bilong God.’ Ol i mekim “dispela wok long strong God i save givim.” (1 Pita 4:10, 11) Olsem wokboi yumi bin kisim samting i no bilong yumi yet—ol presen bilong God long helpim ol manmeri, olsem wok autim tok. Bilong kamapim klia olsem yumi gutpela wokboi, yumi bilip olsem God bai givim “bikpela strong” long yumi. (2 Korin 4:7) Dispela i helpim yumi long redi long winim wanem wanem traim inap painim yumi long bihain!
19 Man bilong raitim song i tok: “Ol manmeri bilong God, yupela i mas laikim em tru. Em i save lukautim gut ol manmeri i bihainim em.” (Song 31:23) Gutpela sapos yumi tingting strong long bihainim gut tok, na bilip olsem Jehova em i “man bilong kisim bek olgeta manmeri, na em i kisim bek tru yumi manmeri i bilip long em.”—1 Timoti 4:10.
Yu Inap Tingim?
• Bilong wanem yumi mas “lukaut gut long ol liklik samting”?
• Olsem wanem yumi ken soim olsem yumi bihainim gut tok long
pasin bilong stap stret?
wok autim tok?
yumi no bilong dispela graun?
[Ol Piksa long pes 26]
Man i bihainim gut tok long ol liklik samting, em bai bihainim gut tok long ol bikpela samting tu
[Piksa long pes 29]
‘Yumi mas wokabaut stret long olgeta taim’
[Piksa long pes 29]
Wanpela gutpela rot long soim pasin bilong bihainim gut tok em yumi redi gut long mekim wok autim tok
[Piksa long pes 30]
Werim ol klos na bilas i stret