Laip Stori
Stap Strong Olsem Soldia Bilong Krais
Stori bilong Yurii Kaptola
“Nau mi bilip tru olsem yu gat bilip!” Dispela tok i kam long wanpela man em mi no ting em bai mekim kain tok olsem—em wanpela ofisa long ami bilong Rasia—na dispela tok i strongim mi long taim stret. Mi bai go kalabus inap longpela taim na mi wok long beten long Jehova i ken strongim mi. Mi bai kisim bikpela hevi inap longtaim na bilong karim dispela hevi mi mas i gat pasin bilong sanap strong na karim hevi.
MAMA i karim mi long Oktoba 19, 1962, na mi kamap bikpela long hap wes bilong Yukren. Long dispela yia, papa bilong mi, nem bilong em tu Yurii, i bungim ol Witnes Bilong Jehova. I no longtaim na em i kamap namba wan man i lotuim Jehova long ples bilong mipela. Ol man i save birua long ol Witnes Bilong Jehova i luksave long wok em i mekim.
Tasol planti man i sindaun klostu long mipela i save rispektim pasin bilong papamama bilong mi long tingim ol narapela na long ol gutpela pasin Kristen bilong tupela. Kirap long taim mipela i liklik yet, papamama i mekim wok long olgeta kain rot long putim pasin bilong laikim God long bel bilong mi na tripela susa bilong mi, na dispela i helpim mi long karim ol hevi i painim mi long skul. Wanpela hevi olsem i kamap taim ol i tok long mipela olgeta wan wan sumatin i mas pasim wanpela kat i makim olsem mipela i insait long lain Lenin’s October Children. Mi bihainim pasin Kristen na mi no pasim dispela kat, olsem na mi stap narapela kain.—Jon 6:15; 17:16.
Bihain, taim mi stap long gret 3, mipela olgeta pikinini i mas insait long wanpela lain bilong ol yangpela Komiunis, nem bilong en Young Pioneers. Wanpela de ol i kisim klas bilong mipela i go ausait bilong mekim bung bilong insait long dispela lain. Mi pret long ol bai tok bilas na krosim mi. Olgeta skul mangi—mi tasol no gat—i kisim wanpela retpela hankisip i kam long skul, na olgeta i sanap long lain long fran bilong hetmasta, ol tisa, na ol bikpela skul mangi. Taim ol i tokim ol bikpela mangi long pasim ol hankisip long nek bilong mipela, mi daunim het bilong mi na lukluk i go daun, mi no laik bai wanpela i lukim olsem mi stap.
Ol i Putim Mi Long Kalabus i Stap Longwe
Taim mi gat 18 krismas, ol i putim mi long kalabus inap 3-pela yia, long wanem, mi no laik insait long pait. (Aisaia 2:4) Namba wan yia mi stap long kalabus long taun Trudovoye, long distrik Vinnitskaya long Yukren. Taim mi stap long dispela hap, mi bungim 30 narapela Witnes Bilong Jehova. Ol i makim mipela tupela tupela long mekim wanpela wok, long wanem, ol i no laik bai mipela i bung wantaim.
Long Ogas 1982, ol i salim mi na Eduard—em wanpela Witnes—na sampela narapela kalabusman long tren i go long hap not bilong ol maunten Ural. Inap 8-pela de olgeta mipela i stap insait long wanpela rum bilong tren i hat na mipela i pas pas stret i go inap mipela i kamap long Haus Kalabus Bilong Solikamsk, long distrik Permskaya. Ol i makim Eduard na mi long i stap long narapela narapela sel. Tupela wik bihain, ol i kisim mi i go longwe long hap not long Vels, long hap Krasnovishersky.
Trak i kam long biknait na kisim mipela i go. Maski ples i tudak stret, wanpela ofisa i tokim mipela long kalap long wanpela bot na brukim wara. Mipela i no inap lukim wara na bot i stap long wanem hap! Tasol mipela i putim han i go na traim traim long painim bot i go inap mipela i painim bot, na maski mipela i pret, mipela i go kamap gut long hapsait bilong wara. Taim mipela i kamap pinis long hapsait bilong wara, orait mipela i wokabaut i go bihainim wanpela lait em mipela i lukim i stap klostu long wanpela liklik maunten, na taim mipela i kamap long dispela hap, mipela i lukim ol haus sel. Dispela hap i kamap nupela ples bilong mipela. Mi stap long wanpela bikpela haus sel wantaim 30 narapela kalabusman. Long taim bilong kol, ples i save kol nogut tru (-40°C) na haus sel tu i kol stret. Ol kalabusman i save katim ol diwai, tasol mi save wokim haus bilong ol kalabusman.
Kisim Kaikai Bilong Spirit Long Ples i Stap Longwe
Mi wanpela tasol i Witnes long dispela hap; tasol maski i olsem, Jehova i no lusim mi. Wanpela taim mama—em i stap yet long hap wes bilong Yukren—i salim wanpela karamap i kam long mi. Taim woda i opim dispela karamap, namba wan samting em i lukim em wanpela liklik Baibel. Em i kisim Baibel na sekim wan wan pes bilong en. Mi wok long tingim wanem kain tok mi bai mekim bambai ol i no ken kisim dispela gutpela samting bilong spirit. Woda i askim olsem: “Em wanem samting?” Paslain long mi mekim wanpela tok, wanpela ofisa i sanap klostu i tok: “O! Em wanpela dikseneri.” Mi no mekim wanpela tok. (Saveman 3:7) Ofisa i sekim olgeta samting insait long karamap na bihain em i givim long mi na Baibel tu wantaim. Mi amamas stret, olsem na mi givim em sampela galip em mama i salim long mi. Taim mi kisim dispela karamap, mi save olsem Jehova i no lusim tingting long mi. Em i helpim mi na tingim mi long ol samting bilong spirit.—Hibru 13:5.
Mi No Lusim Wok Autim Tok
Sampela mun bihain, mi kirap nogut long kisim wanpela pas long wanpela brata Kristen i stap long kalabus inap 400 kilomita longwe long mi. Em i askim mi long painim wanpela man i bin i gat laik long harim tok na ating em i stap nau long kalabus mi stap long en. I no gutpela long raitim kain pas olsem, long wanem, ol woda i save sekim olgeta pas bilong mipela. Mi no kirap nogut taim wanpela ofisa i singautim mi i go long ofis bilong em na tok strong long mi no ken autim tok. Orait em i tokim mi long sainim nem bilong mi long wanpela pepa i tokaut olsem mi bai i no inap tokim ol narapela long ol bilip bilong mi. Mi tokim em olsem mi no kliagut long as na mi mas sainim dispela pepa, long wanem, olgeta long kalabus i save pinis olsem mi wanpela Witnes Bilong Jehova. Mi tokim em olsem ol narapela long kalabus i laik save long as na mi stap long kalabus. Mi bai tok wanem long ol? (Aposel 4:20) Dispela ofisa i luksave olsem em i no inap pretim mi, olsem na em i tingting long rausim mi. Ol i salim mi i go long narapela haus kalabus.
Ol i salim mi i go long ples Vaya em longwe inap 200 kilomita. Long dispela ples, ol ofisa i rispektim bilip Kristen bilong mi na ol i makim mi long mekim ol wok i no insait long ol samting bilong pait—pastaim mi mekim wok kapenta, bihain wok elektrisen. Tasol ol dispela wok i gat hevi bilong en. Wanpela taim, ol i tokim mi long kisim ol tul bilong mi na i go long klap bilong ples. Taim mi go kamap, ol soldia i stap long klap i amamas long lukim mi. Ol i laik onim ol lait i bilasim ol plak samting tasol ol lait i no wok gut. Olsem na ol i laik bai mi helpim ol long stretim ol lait, long wanem, ol i wok long redim ol samting bilong wanpela bung (Red Army Day) ol i wokim long olgeta yia. Mi beten na mi tingting long wanem samting mi bai mekim, orait nau mi tokim ol olsem mi no inap mekim dispela wok. Mi givim tul bilong mi long ol na mi lusim ol. Ol i tokim namba tu bos bilong kalabus long dispela samting, na mi kirap nogut olsem taim em i harim tok bilong ol soldia em i tok: “Mi rispektim em long dispela samting. Em i man bilong bihainim ol stretpela stiatok.”
Gutpela Tok i Kam Long Rot Mi No Ting Bai Kam Long En
Long Jun 8, 1984, mi lusim kalabus bihain long mi bin kalabus inap 3-pela yia. Taim mi go bek long Yukren, mi mas go long ofis bilong ami na givim nem bilong mi olsem mi bin stap long kalabus. Ol i tokim mi olsem bihain long 6-pela mun ol bai kotim mi gen, olsem na i gutpela mi mas lusim dispela ples olgeta. Mi lusim Yukren na mi go long Latvia na painim wok long hap. Inap liklik haptaim mi autim tok na bung wantaim wanpela liklik grup bilong ol Witnes i stap long Riga, em biktaun bilong Latvia. Tasol bihain long wanpela yia, ol i singautim mi gen long insait long ami. Long ofis bilong ami, mi tokim ofisa olsem bipo mi bin tok nogat long insait long ami. Em singaut bikmaus long mi na i tok: “Yu save long samting yu mekim? Kam na yumi go lukim bikman bilong ami na yumi lukim bai yu tok wanem long em!”
Em i kisim mi i go long wanpela rum i stap long namba tu plua bilong dispela haus we bikman bilong ami i stap. Em i harim gut tok mi mekim long as na mi no laik insait long ami na em i tokim mi olsem mi gat haptaim i stap yet long senisim tingting bilong mi paslain long mi go long ai bilong komiti bilong kisim ol man long insait long ami. Taim mipela i lusim ofis na i go, dispela ofisa i bin krosim mi pastaim em i tok: “Nau mi save tru olsem yu gat bilip.” Taim mi kamap long ai bilong komiti bilong kisim ol man long insait long ami, mi mekim wankain tok long ol olsem mi bin mekim long bikman bilong ami, na ol i larim mi i go.
Long dispela taim mi stap long wanpela haus pasindia. Wanpela apinun, mi harim wanpela i paitim dua bilong mi. Mi opim dua na mi lukim wanpela man i bilas gut na i karim wanpela bek. Em i tok: “Mi wanpela bilong lain Polis Bilong Gavman. Mi save olsem yu gat hevi na ol bai kotim yu.” Mi tokim em: “Em stret.” Na em i tok moa: “Mipela inap helpim yu sapos yu orait long wok wantaim mipela.” Mi tokim em: “Nogat, mi no inap mekim olsem. Mi bai stap gut long ol bilip Kristen bilong mi.” Em i lusim mi na i go.
Go Bek Long Kalabus, Autim Tok Gen
Long Ogas 26, 1986, Nesenel Kot Bilong Riga i makim mi long i go kalabus 4-pela yia na mekim hatpela wok, na ol i kisim mi i go long haus kalabus long Riga. Ol i putim mi long wanpela bikpela sel wantaim 40 narapela kalabusman, na mi traim long autim tok long olgeta i stap insait long sel. Sampela i tok ol i bilip long God; ol narapela i tok bilas tasol. Mi luksave olsem ol man i wok long bung bung long ol grup, na bihain long tupela wik ol lida bilong olgeta wan wan grup i tokim mi olsem i tambu long mi long autim tok, long wanem, mi no bihainim ol lo bilong ol. Mi tokim ol olsem long dispela as tasol mi stap long kalabus—mi save bihainim ol narapela lo.
Mi was gut na autim tok yet, na taim mi painim sampela ol i gat laik long harim tok, mi stadi wantaim 4-pela bilong ol long Baibel. Long taim mipela i stadi, ol i save raitim ol bikpela as tok bilong Baibel long notbuk bilong ol. Sampela mun bihain, ol i salim mi i go long wanpela kem i kain olsem kalabus i stap long Valmiera, na long dispela hap mi wok olsem wanpela elektrisen. Mi stadi wantaim wanpela narapela elektrisen long Baibel long dispela hap, na 4-pela yia bihain em i kamap wanpela Witnes Bilong Jehova.
Long Mas 24, 1988, ol i putim mi long narapela kem. Dispela i gutpela, long wanem, mi stap fri moa long mekim ol samting. Ol i makim mi long wokim ol haus, na olgeta taim mi painim rot bilong autim tok. Planti taim mi no stap long kem, mi autim tok i go inap long tudak, tasol mi no bungim hevi taim mi go bek long kem.
Jehova i blesim hatwok bilong mi. I gat sampela Witnes i stap klostu long kem, tasol long taun i gat wanpela Witnes tasol, em Vilma Krūmin̗a—wanpela lapun sista. Mi na Sista Krūmin̗a i stadi wantaim planti yangpela manmeri long Baibel. Sampela taim, ol brata na sista long Riga i kam bilong autim tok, na sampela painia oltaim long Leningrad (nau St. Petersburg) i kam tu bilong autim tok wantaim mipela. Long rot bilong helpim i kam long Jehova, mipela i kirapim sampela Baibel stadi, na i no longtaim bihain mi insait long wok painia, mi lusim 90 aua long olgeta mun long autim tok.
Long Epril 7, 1990, ol i skelim mi gen long kot long Valmiera. Taim kot i kirap, mi luksave long ofisa bilong kot. Em wanpela yangpela man em bipo mi bin toktok wantaim em long Baibel! Em i luksave long mi na em i smail, tasol em i no mekim wanpela tok. Mi inap tingim yet tok jas i mekim long mi long dispela de: “Yurii, disisen em kot i bin mekim long yu i mas go kalabus inap 4-pela yia i no stret wantaim lo bilong gavman. I no stret ol i bin putim yu long kalabus.” Wantu tasol mi stap fri!
Soldia Bilong Krais
Long Jun 1990, mi mas go putim nem bilong mi gen long ofis bilong ami na bai mi ken kisim tok orait long stap long Riga. Mi go insait long dispela ofis we 4-pela yia i go pinis mi bin tokim bikman bilong ami olsem mi no inap insait long ami. Long dispela taim em i kirap sanap bilong tok gude long mi, na em i sekanim mi na i tok: “Sori tru long ol hevi yu bin karim. Mi sori olsem dispela samting i bin painim yu.”
Mi tok: “Mi soldia bilong Krais, na mi mas inapim wok bilong mi. Long rot bilong helpim i kam long Baibel, yu tu inap long kisim samting em Krais i bin tok promis long givim long ol disaipel bilong em—bai yu inap stap amamas na stap oltaim.” (2 Timoti 2:3, 4) Bikman bilong ami i tok: “I no longtaim i go pinis na mi baim wanpela Baibel, na nau mi wok long ritim.” Mi bin kisim buk Yu Inap i Stap Oltaim Long Paradais Long Graun i kam wantaim mi.a Olsem na mi opim buk long sapta i stori long ol mak bilong las de na soim em olsem wanem tok profet bilong Baibel i stori long taim bilong yumi. Em i pilim tru dispela tok na em i sekanim mi gen na em i mekim gutpela tok long wok mi mekim.
Long dispela taim teritori long Latvia i redi pinis bilong autim tok long en. (Jon 4:35) Long 1991, mi kirap mekim wok elda. I gat tupela elda tasol insait long kantri! Wanpela yia bihain, ol i brukim dispela wanpela kongrigesen i stap long Latvia i kamap tupela kongrigesen—wanpela long tok Latvia na narapela long tok Rasia. Mi amamas long mekim wok wantaim kongrigesen bilong tok Rasia. Namba bilong ol man i kam insait long tok i tru i wok long go bikpela hariap, olsem na long yia bihain ol i brukim kongrigesen bilong mipela na kamapim tripela kongrigesen! Taim mi tingting i go bek, mi luksave olsem Jehova yet i stiaim ol sipsip i kam long oganaisesen bilong em.
Long 1998, ol i makim mi long kamap painia salim long Jelgava, em wanpela taun i stap 40 kilomita long hap saut-wes bilong Riga. Long dispela yia yet, mi wanpela bilong namba wan lain long Latvia ol i singautim i go long Ministerial Trening Skul, em ol i mekim long tok Rasia long Solnechnoye, klostu long St. Petersburg, Rasia. Taim mi stap long skul, mi luksave olsem em i bikpela samting long yumi mas soim pasin laikim long ol man bambai wok bilong yumi long autim tok i ken kamap gutpela. Wanpela samting mi pilim tru, winim ol samting mipela i lainim long skul, em pasin laikim Betel famili na ol tisa i mekim long mipela.
Wanpela narapela bikpela samting i painim mi long 2001, mi maritim Karina, em wanpela gutpela meri Kristen. Karina i mekim wok painia salim wantaim mi, na olgeta wan wan de taim mi lukim pes bilong em i amamas taim em i kam bek long haus bihain long autim tok, dispela i save strongim mi. Tru tumas, wok bilong Jehova i givim bikpela amamas long man. Ol samting nogut i bin painim mi taim gavman Komiunis i bosim kantri i lainim mi long bilip olgeta long Jehova. Sapos yumi laik pas gut wantaim Jehova na helpim wok king bilong em, yumi redi long lusim planti samting bilong yumi. Wok bilong helpim ol narapela long kisim save long Jehova i mekim na laip bilong mi i gat as tru bilong en. Mi amamas tru long mi bin mekim wok bilong Jehova olsem “gutpela soldia bilong Krais.”—2 Timoti 2:3.
[Futnot]
a Ol Witnes Bilong Jehova i wokim, tasol nau ol i no wokim moa.
[Piksa long pes 11]
Ol i salim mi i go mekim wok kalabus inap 4-pela yia long haus kalabus long Riga
[Piksa long pes 12]
Mi na Karina i autim tok