Laip Stori

Mi Kisim ‘Ol Samting Mi Laikim Tru’

Stori bilong Dominique Morgou

Em nau, long Disemba 1998, mi stap pinis long Afrika! Samting mi gat bikpela laik long en taim mi pikinini yet, nau em i kamap tru. Oltaim mi bin amamas tru long tingting long bikpela hap graun bilong Afrika na ol animal bilong bus i save raun long en. Nau mi stap pinis long dispela hap! Na narapela samting tu mi bin i gat bikpela laik long en i kamap tru long nau. Mi autim gutnius fultaim long narapela kantri. Planti man inap ting dispela samting i no inap kamap. Klostu mi aipas, na mi save wokabaut long ol rot bilong ol liklik ples bilong Afrika na wanpela dok bilong soim rot long ol aipas i save helpim mi, em dok i bin lain long wokabaut long rot bilong ol biktaun bilong Yurop tasol. Orait nau mi laik stori long olsem wanem mi inap i kam na mekim wok autim tok long Afrika, na olsem wanem Jehova i givim mi ‘ol samting mi laikim tru.’​—⁠Song 37:⁠4.

MAMA i karim mi long Jun 9, 1966, long sauten Frans. Mi laspela bilong 7-pela pikinini​—⁠tupela man na 5-pela meri​—⁠na gutpela papamama bilong mipela i save lukautim gut mipela olgeta. Tasol taim mi yangpela yet, mi gat wanpela hevi. Olsem bubu meri, na mama, na wanpela susa bilong mi, mi gat wanpela sik bilong famili i save mekim man i kamap aipas isi isi.

Taim mi yangpela meri, mi mas karim hevi long pasin bilong bel nogut long narapela lain, na pasin bilong tupela maus, na dispela i mekim na mi bikhet. Long dispela taim, mipela i go sindaun long hap bilong Hérault. Long dispela hap, wanpela gutpela samting tru i kamap.

Long wanpela Sande moning, tupela Witnes Bilong Jehova i kam long haus bilong mipela. Mama i save long ol na em i singautim tupela i kam insait. Wanpela Witnes i tokim Mama olsem bipo Mama i bin promis long stadi long Baibel wantaim em. Mama i tok em i tingim yet, na em i askim meri: “Wanem taim bai yumi kirap mekim?” Tupela i pasim tok long bung long olgeta Sande moning, na long dispela rot Mama i kirap kisim save long “tok tru bilong gutnius.”​—⁠Galesia 2:⁠14.

Kisim Savetingting

Mama i wok strong tru long kisimgut na holim long tingting ol tok em i lainim. Em i aipas, olsem na em i mas putim gut olgeta tok long tingting. Ol Witnes i no les long lainim em. Tasol taim ol Witnes i kam long haus, mi save hait long rum bilong mi, na taim ol i go pinis mi save kam ausait. Tasol long wanpela apinun Eugénie, em wanpela Witnes, em i bungim mi na toktok wantaim mi. Em i tokim mi olsem Kingdom Bilong God bai pinisim olgeta pasin giaman olsem pasin bilong tupela maus, na pasin birua, na bel nogut long narapela lain. Em i tok: “God tasol inap stretim ol dispela samting.” Na em i askim mi: “Yu laik kisim sampela save moa?” Long de bihain, mi kirap stadi long Baibel.

Olgeta tok mi lainim i nupela long mi. Nau mi save pinis, i gat as na God i larim pasin nogut i stap liklik taim long graun. (Stat 3:15; Jon 3:16; Rom 9:17) Na mi kisim save olsem Jehova i no larim yumi i stap nating, nogat, i gat gutpela samting yumi ken wetim. Em i bin givim yumi gutpela tok promis bilong laip i stap gut oltaim long Paradais long graun. (Song 37:29; 96:​11, 12; Aisaia 35:​1, 2; 45:18) Nau ai bilong mi i wok long go tudak, tasol long dispela Paradais bai mi inap lukluk gen.​—⁠Aisaia 35:⁠5.

Fultaim Sevis

Long Disemba 12, 1985, mi kisim baptais long wara bilong makim olsem mi dediket pinis long Jehova. Susa bilong mi, Marie-Claire, i mekim pinis dispela samting. I no longtaim na brata bilong mi Jean-Pierre i kisim baptais, na gutpela mama bilong mi tu.

Long kongrigesen mi go long en i gat sampela painia oltaim, olsem lain bilong autim tok fultaim. Mi pilim tru amamas bilong ol long mekim dispela wok. Marie-Claire tu i go insait long fultaim sevis, maski em i gat wanpela sik bilong ai na wanpela lek i nogut. Long olgeta taim i kam inap long nau, pasin bilong em i wok long strongim mi long mekim wok bilong Jehova. Mi stap namel long ol painia insait long kongrigesen na insait long famili tu, na dispela i helpim mi long kisim bikpela laik long mekim wok autim tok fultaim. Olsem na long Novemba 1990, mi kirap mekim wok painia long Béziers.​—⁠Song 94:​17-19.

Sampela Taim Mi Bel Hevi

Ol narapela painia i helpim mi gut long mekim wok autim tok. Tasol sampela taim mi bel hevi, long wanem, mi laik mekim bikpela wok moa tasol mi no inap lukluk gut. Tasol long ol dispela taim bilong bel hevi Jehova i strongim mi. Mi skelim ol tok long buk Watch Tower Publications Index bilong painim sampela stori bilong ol painia em ol tu i no inap lukluk gut. Mi kirap nogut long mi painim planti stori olsem! Ol dispela stori i strongim bel bilong mi na i skulim mi long amamas long ol wok mi inap mekim na mi no ken bel hevi long ol samting mi no inap mekim.

Bilong lukautim mi yet long kaikai samting, mi klinim ol bikpela stua wantaim sampela Witnes. Wanpela taim mi lukim olsem ol wanwok bilong mi i go klinim gen ol hap mi bin klinim. Nau mi save, i gat sampela hap i doti em mi no bin lukim. Olsem na mi go long Valérie, em wanpela painia i bosim wok bilong mipela long klinim ples, na mi askim em long tokim mi stret olsem mi givim hatwok long ol wanwok o olsem wanem? Em i larim mi yet i makim wanem taim mi no inap mekim moa dispela wok. Orait long Mas 1994, mi lusim wok bilong klinim ol stua.

Em nau, mi bel hevi gen na pilim olsem mi no inap mekim gut wanpela wok. Mi beten strong long Jehova, na mi save em i harim beten bilong mi. Mi stadi strong long Baibel na ol buk Kristen na dispela i helpim mi tru. Ai bilong mi i wok long go tudak moa, tasol laik bilong mi long mekim wok bilong Jehova i kamap strong moa. Bai mi mekim wanem?

Putim Nem, Wokim Disisen Hariap

Mi putim nem bilong kisim trening long wanpela ples long Nîmes i bilong helpim ol aipas na ol lain i no inap lukluk gut. Mi wet i stap na bihain mi inap i stap 3-pela mun long hap. Dispela trening mi kisim i helpim mi gut. Nau mi save gut long ol samting mi no inap mekim, na mi lain long wok wantaim dispela hevi. Taim mi bung wantaim ol manmeri i gat kain kain sik na bagarap long skin, dispela i helpim mi long pilim tru gutpela samting mipela ol Kristen i bilip na wet long en. Mi gat mak mi laik winim na mi inap mekim gutpela wok. Na tu, mi lain long ritim brel, em rait bilong ol aipas, long tok Frans.

Taim mi go bek long haus, famili bilong mi i lukim olsem dispela trening mi kisim i bin helpim mi gut. Tasol i gat wanpela samting mi no laikim​—⁠em waitpela stik mi mas holim. Mi hatwok long stretim tingting bilong mi olsem mi mas mekim wok long dispela stik. I gutpela sapos mi gat narapela samting bilong helpim mi​—⁠olsem wanpela dok bilong ol aipas.

Mi putim aplikesen bilong kisim wanpela dok, tasol ol i tok planti man i bin putim nem na mi mas wet longpela taim. Na tu, lain bilong mekim dispela wok ol i laik painimaut ol samting long sindaun bilong mi. Ol i no save givim ol dispela kain dok long ol man nabaut. Wanpela taim wanpela meri i save mekim wok bilong wanpela asosiesen bilong ol aipas, em i tokim mi olsem wanpela klap bilong pilai tenis i laik givim nating wanpela dok olsem long wanpela aipas i stap long hap bilong mipela. Em i tok em i tingim mi. Em i laik save, mi laik kisim dispela dok o nogat? Mi pilim olsem Jehova i stiaim ol samting, olsem na mi tok yes long kisim dispela dok. Tasol mi mas wet pastaim bilong kisim dispela dok.

Mi Tingting Yet Long Afrika

Taim mi wet i stap, mi tingim narapela samting. Olsem pastaim mi bin tok, kirap long taim mi pikinini yet mi gat bikpela laik long save long Afrika. Maski ai bilong mi i wok long bagarap, dispela laik bilong mi i kamap strong moa, long wanem, mi harim olsem planti manmeri long Afrika i gat laik long harim tok bilong Baibel na mekim wok bilong Jehova. Paslain liklik mi bin tokim Valérie olsem mi gat laik long go na stap liklik long Afrika. Olsem wanem? Em bai i laik i go wantaim mi? Em i orait long dispela, na mitupela i raitim sampela pas i go long ol brens bilong ol Witnes Bilong Jehova long Afrika i save mekim tok Frans.

Brens ofis long Togo i bekim pas long mipela. Mi amamas nogut tru na mi askim Valérie long ritim pas long mi. Pas i strongim bel bilong mipela, olsem na Valérie tok: “Yumi go.” Mipela i salim pas i go i kam long ol brata long brens ofis, na ol i tokim mipela long salim pas i go long Sandra, em wanpela painia long Lomé, em biktaun bilong Togo. Mipela i lusim Frans long Disemba 1, 1998.

Man! Dispela hap i narapela kain, tasol em i naispela hap tru! Taim balus i pundaun long Lomé, mipela lusim balus na mipela i pilim stret hatpela san bilong Afrika. Sandra i kam bungim mipela. Em namba wan taim long mipela i bungim em, tasol wantu mipela i pilim olsem mipela i bin save long em inap longtaim pinis. Paslain liklik long mitupela i kam kamap, ol i bin makim Sandra wantaim poroman bilong em Christine long kamap painia salim long Tabligbo, em wanpela liklik taun insait long kantri. Nau mipela inap i go wantaim tupela long nupela ples wok bilong ol. Mitupela i stap wantaim ol inap tupela mun samting, na taim mipela i lusim ol, mi save bai mi kam bek.

Mi Amamas Long Go Bek

Long Frans, kwiktaim mi kirap stretim rot bilong go bek long Togo. Famili bilong mi i helpim mi, olsem na mi inap stretim rot bilong i stap 6-pela mun long dispela hap. Orait long Septemba 1999, mi stap gen long balus i go long Togo. Tasol nau mi go wanpis. Man! Famili i lukim mi wanpela i lusim Frans, maski ai bilong mi i nogut, na ol i wari stret! Tasol mi tokim papamama long ol i no ken tingting planti, long wanem, ol pren bilong mi em ol i kamap pinis olsem famili bilong mi, ol bai wetim mi long Lomé.

Mi amamas tru long kam bek long hap we planti manmeri i gat laik long harim tok bilong Baibel! Yu inap lukim ol man i sanap long rot na ritim Baibel. Long Tabligbo ol man i save singautim mipela long kam toktok wantaim ol long Baibel. Na em i gutpela tru long mi inap i stap wantaim tupela sista painia long liklik haus bilong ol! Mi kisim save long ol pasin bilong ol man bilong narapela ples, na long pasin bilong ol long skelim ol samting. Nambawan bikpela samting em mi lukim ol brata na sista Kristen long Afrika i putim ol wok bilong Kingdom i go pas long ol narapela samting. Olsem: Maski ol i mas wokabaut inap planti kilomita long go long Haus Kingdom, ol i no save lusim ol miting. Na pasin bilong ol long mekim gut long ol man na singautim ol i go long haus bilong ol i skulim mi gut.

Wanpela taim mi autim tok pinis na kam bek long haus na mi tokim Sandra olsem mi pret long go bek long Frans. Ai bilong mi i go tudak moa yet. Mi tingim ol rot bilong Béziers, ol man i pas pas na i gat planti pairap, na i gat ol step i go antap long ol flet, na planti samting moa i mekim na bai ol ai nogut olsem mi i hatwok tru. Tru, ol rot long Tabligbo i no gat kolta, tasol i no gat planti manmeri long rot na i no gat planti ka na pairap. Mi lain pinis long sindaun long Tabligbo, olsem na bai mi hatwok tru long stap long Frans.

Tupela de bihain Mama i ring na toksave olsem skul bilong ol dok bilong ol aipas i wetim mi i stap. Wanpela yangpela dok Labrador, nem bilong en Océane, i redi long kamap olsem “ai” bilong mi. Em nau, mi kisim gen ol samting mi mas kisim bilong helpim mi, olsem na mi no tingting planti. Bihain long mi bin autim tok long Tabligbo inap 6-pela mun, mi go bek long Frans bilong bungim Océane.

Mitupela Océane i kisim trening wantaim inap sampela mun, na nau ol i putim em long han bilong mi. Pastaim mipela i hatwok. Narapela i mas save gut long narapela. Tasol isi isi mi luksave olsem mi mas i gat Océane bilong helpim mi. Yu ting ol manmeri bilong Béziers i gat wanem tingting taim ol i lukim mi i kam wantaim wanpela dok long haus bilong ol? Ol i rispek long mi na mekim gutpela pasin tru long mi. Ol lain long dispela hap ol i laikim tru Océane. Planti man i save surik long ol aipas o lek nogut samting, tasol taim dok i stap, mi inap toktok gut wantaim ol man long dispela sik bilong mi. Ol man i stap bel isi na putim yau long tok bilong mi. Tru tumas, Océane em i gutpela rot tru bilong kirapim toktok wantaim ol man bilong haus.

Mi na Océane Long Afrika

Mi no bin lusim tingting long Afrika, na nau mi redim ol samting bilong mekim namba 3 raun bilong mi. Long dispela taim Océane i go wantaim mi. Na i gat tupela yangpela marit, em Anthony na Aurore, na pren bilong mi Caroline, ol tu i go wantaim mi, em olgeta i mekim wok painia olsem mi. Long Septemba 10, 2000, mipela i kamap long Lomé.

Pastaim planti man i pret long Océane. Ol i no bin lukim wanpela bikpela dok olsem em. Long Togo i gat ol liklik dok tasol. Taim ol i lukim ol let mi pasim long em, ol i ting em i dok nogut bilong kaikaim man na mi mas pasim em long ol let. Océane i kisim pasin bilong sambai long mi na redi long lukautim mi sapos em i ting birua i laik painim mi. Tasol i no longtaim na em i lain long i stap isi long nupela ples bilong en. Taim mi pasim ol let long em, em i redi long mekim wok bilong em​—⁠em i stap gut, tingim wok bilong em, na i stap klostu long mi. Taim mi rausim ol let, em i save pilai na kalap kalap. Mitupela i save kisim gutpela amamas long pilai wantaim.

Sandra na Christine i singautim mipela olgeta long i stap wantaim ol long Tabligbo. Bilong helpim ol brata na sista bilong dispela hap long lain long Océane, mipela i singautim ol i kam long haus na mipela i stori long wok bilong dok bilong ol aipas, na bilong wanem mi mas i gat kain dok olsem, na ol i mas mekim wanem taim ol i stap klostu long em. Ol elda i tok orait long Océane i ken kam wantaim mi long Haus Kingdom. Long Togo dispela em i narapela kain pasin tru, olsem na ol elda i mekim toksave long dispela samting long kongrigesen. Long wok bilong autim tok, Océane i kam wantaim mi taim mi go bek lukim sampela man o mekim Baibel stadi​—⁠em ol i save long as na dok i mas i stap wantaim mi.

Mi save kisim amamas yet long autim tok long dispela hap. Bel bilong mi i save pilim tru gutpela pasin bilong ol dispela lain i gat pasin isi na ol i mekim gut long mi, olsem kwiktaim ol i save givim sia long mi bilong sindaun. Long Oktoba 2001, Mama i kam wantaim mi long namba 4 raun bilong mi long Togo. Em i stap 3-pela wik na em i go bek long Frans, na bel bilong em i stap isi na em i amamas, long wanem, em i save mi stap orait tasol.

Mi tenkyu tru long Jehova long mi bin mekim wok autim tok long Togo. Mi bilip olsem Jehova bai wok yet long givim mi ‘ol samting mi laikim tru’ taim mi wok strong yet long mekim wok bilong em.a

[Futnot]

[Ol Piksa long pes 10]

Oltaim mi bin amamas tru long tingting long bikpela hap graun bilong Afrika na ol animal bilong bus i save raun long en

[Piksa long pes 10]

Océane i bin kam wantaim mi taim mi go bek lukim ol man

[Piksa long pes 11]

Ol elda i tok orait long mi kisim Océane i kam long ol miting