“Wanpela De Mi No Inap Lus Tingting Long En”

“PLANTI man i save bel hevi, na i luk olsem em i wanpela bikpela sik bilong tingting i save painim ol yangpela manmeri.” Dispela em i tok bilong wanpela lain (Beyondblue) long Australia em ol i save helpim ol lain i bel hevi. Ol ripot i kamapim olsem long olgeta yia, inap 100,000 yangpela bilong Australia i save kisim sik long pasin bilong bel hevi.

Ol yangpela Kristen tu i save bel hevi. Tasol pasin bilong bilip long Jehova i bin helpim planti bilong ol long daunim bel hevi na bai ol i ken stap amamas taim ol i stap yangpela. Taim ol i mekim olsem, ol narapela i lukim na i amamas long ol. Olsem wanem ol inap mekim?

Tingim ekspiriens bilong Claire em i gat 18 krismas. Claire na mama bilong em i save bung wantaim kongrigesen bilong ol Witnes Bilong Jehova long Melbourne. Taim papa bilong Claire i lusim famili, Claire i bel hevi tru. Tasol bilip bilong em long Papa bilong em long heven, Jehova, i stap strong yet. Wanpela taim, dokta bilong famili i kam long haus bilong lukim mama bilong Claire, em i sik. Bihain dokta i tok long kisim Claire i go long stua. Taim ol i draiv i go, dokta i askim Claire sapos em i gat boipren. Claire i stori gut long em olsem em i wanpela Witnes Bilong Jehova, na em i no save prenim nating ol mangi, bilong kisim amamas. Dokta i kirap nogut long harim dispela tok. Orait Claire i stori long olsem wanem Baibel i bin helpim em long mekim gutpela disisen long i stap bilong em. Na bihain em i tok long givim wanpela buk i kamapim tok bilong Baibel long dispela dokta. Em dispela buk i bin helpim tru em yet. Nem bilong dispela buk em Sampela Askim Bilong Ol Yangpela​—⁠Ol Gutpela Bekim.

Dispela dokta, nem bilong em Lydia, em i kisim dispela buk na tripela de bihain, em i ringim mama bilong Claire na i tokim em olsem em i amamas tru long ritim dispela buk. Na em i askim long kisim 6-pela buk moa bilong givim long ol wanwok bilong em. Taim Claire i go bilong givim em ol dispela buk, dokta i tokim Claire olsem em i kirap nogut long bilip bilong Claire. Claire i askim dokta sapos em i laik stadi long Baibel wantaim em, na dokta i orait long dispela.

Inap sampela mun, Claire i stadi wantaim dispela dokta long belo taim. Bihain Lydia i askim Claire long mekim tok long wanpela bung long bel hevi i save painim ol yangpela. Maski Claire i pret, em i orait long mekim. Winim 60 manmeri i kam long dispela bung. Fopela saveman bilong sik bilong tingting, ol i mekim tok long ol lain i kam bung. Orait bihain, em taim bilong Claire long toktok. Claire i tok em i bikpela samting tru long ol yangpela manmeri i pas gut wantaim God. Em i tok olsem God Jehova i save tingim tru ol yangpela manmeri na em i save helpim na givim bel isi long olgeta lain husat i go long em. Na tu, Claire i tokaut strong long bilip bilong em olsem klostu nau Jehova bai pinisim olgeta kain sik bilong skin na tingting. (Aisaia 33:24) Orait wanem samting i kamap?

Claire i tok: “Bihain long dispela bung, planti manmeri i kam long mi na ol i tok ol i amamas tru long harim wanpela yangpela i stori long God. Na mi tilim 23 buk Askim Bilong Ol Yangpela. Na 3-pela meri i givim telefon namba bilong ol long mi. Wanpela bilong ol nau i save stadi long Baibel. Dispela em i wanpela de mi no inap lus tingting long en.”