Pikinini Bilong Yu Bai Tok Wanem?

OL PAPAMAMA: Long Wastaua bilong Janueri 15, 2010, pes 16-20, mipela i bin stori long pasin bilong mekim prektis wantaim pikinini bilong yupela. Dispela stori i gat ol tok bilong helpim yupela long redim ol pikinini long winim ol traim bai painim ol long skul. Ating yupela i ken mekim prektis long taim bilong Famili Lotu bilong yupela.

OL PIKININI husat i Witnes Bilong Jehova ol i save bungim planti hevi. Sampela taim ol wanskul i askim ol long as na ol i no save insait long sampela samting, olsem salut long fleg, pati bilong betde, na wokim sampela piksa bilong Krismas samting. Sapos wanskul bilong pikinini i askim em long ol dispela samting, pikinini bilong yu bai tok wanem?

Sampela pikinini Kristen bai tok olsem: “Mi no inap mekim. Lotu bilong mi i tambuim dispela samting.” Yumi mas tok amamas long ol i sanap strong. Ating bekim bilong ol i mekim na wanskul i no givim sampela askim moa. Tasol Baibel i tok olsem, “sapos ol i askim yupela long as bilong dispela gutpela samting yupela i wetim i stap, orait yupela i mas redi oltaim long bekim tok long ol.” (1 Pi. 3:15) Bilong mekim olsem, i gat sampela samting moa yu mas mekim winim pasin bilong tok tasol olsem, “Mi no inap mekim.” Sampela bai i no wanbel long tok bilong yumi, tasol sampela bai gat laik long save long as na yumi no insait long sampela samting.

Planti yangpela Witnes ol i bin kamapim long ol wanskul ol stori bilong Baibel i stap long ol buk, olsem buk Kisim Skul Long Bikpela Tisa. Ating ol dispela stori inap helpim wanskul long save long as na ol pikinini Witnes i insait long sampela amamas samting na sampela nogat. Sampela sumatin i save putim gut yau long ol stori bilong Baibel, na planti Baibel stadi i bin kamap long dispela rot. Tasol ating sampela sumatin i hatwok long putim yau long wanpela stori olgeta bilong Baibel. Sampela stori bilong Baibel i hatwok long ol sumatin long kisimgut sapos pikinini i no kamapim gut moa dispela stori. Minhee, em i gat 11-pela krismas, na pren bilong em i singautim em long go long pati bilong betde bilong em, Minhee i tokim em: “Baibel i no tokim yumi long mekim pati bilong betde. Jon Bilong Baptais, em Baibel i stori long en, em ol i bin kilim em long wanpela pati bilong betde.” Minhee inap tingim bek olsem pren bilong em i no bin kliagut long tok bilong em.

Long sampela sumatin, i gutpela long soim wanpela piksa o stori i stap long wanpela buk bilong yumi. Olsem wanem sapos ol bos bilong skul i tok ol i no laik bai pikinini i soim ol buk bilong lotu long ol narapela sumatin? Yu ting ol pikinini inap autim gut tok sapos ol i no gat ol buk samting? Olsem wanem yu inap helpim pikinini bilong yu na em inap bekim tok long ol wanskul i gat askim?

Mekim Prektis Wantaim Ol

Bilong helpim pikinini, papamama i ken kamap olsem wanskul bilong pikinini na mekim prektis wantaim em long haus. Taim pikinini i bekim tok long wanskul i askim em long bilip bilong em, papamama i tok amamas long em na helpim em long mekim gut moa dispela wok na helpim em long save long as na i gutpela long mekim olsem. Ol i ken tokim pikinini long yusim ol wed em ol wanskul husat i gat wankain krismas long ol inap kliagut long en. Joshua, em mangi i gat 9-pela krismas, em i tok ol wanskul bilong em ol i no save long ol kain tok olsem “maus bilong bel” na “stap gut long.” Olsem na em i bin yusim ol wed em ol i save long en bambai em i ken toktok gut wantaim ol.​—1 Ko. 14:9.

Sampela wanskul i save les kwik long harim tok sapos bekim i longpela tumas. Olsem na taim pikinini Witnes i toktok wantaim ol na ol i kamapim askim samting, Witnes i stori gut long ol, na long dispela rot ating ol bai gat laik yet long harim tok. Haneul, em liklik meri i gat 10-pela krismas, em i tok: “Ol wanskul bilong mi i laik bai mipela i stori tasol, ol i no laik bai mi kamapim as bilong ol stori.” Bilong stori wantaim man, yumi mas mekim ol askim, na bihain putim gut yau taim man i kamapim tingting bilong em.

Ol tok i stap long blok i kamapim olsem wanem ol pikinini Kristen inap stori gut wantaim ol wanskul bilong ol. I no olsem ol i mas tingim tingim olgeta wan wan tok. Olgeta pikinini i no wankain, na ol samting i kamap i no wankain, olsem na bekim tu bai i no wankain. Olsem na pikinini Witnes i mas wokim tingting long olsem wanem em bai mekim tok, kamapim long toktok bilong em yet, na mekim tok long pasin i stret long samting i kamap na i stret long wanskul. Sapos yu gat ol pikinini i stap long skul, mekim prektis wantaim ol long dispela pasin bilong stori.

Bilong skulim ol pikinini, papamama i mas i lusim bikpela hap taim na strong long mekim olsem. Papamama Kristen i laik putim ol stiatok bilong Baibel long bel bilong ol pikinini na strongim ol long bihainim ol dispela stiatok long olgeta taim.​—Lo 6:7; 2 Ti. 3:14.

Long narapela taim yupela i mekim Famili Lotu, bihainim ol tok i stap long blok na mekim prektis wantaim ol pikinini long pasin bilong stori wantaim narapela. Na skelim olsem wanem dispela inap helpim ol. Tingim, i no gat wok long ol pikinini i tingim tingim olgeta wan wan bekim o tok em ol i mas mekim. Yupela i mas mekim soim long wanpela samting i bin kamap, kamapim narapela narapela bekim, na skelim olsem pikinini i kisim dispela pasin bilong bekim tok i stret long samting i kamap, o nogat. Taim ol i kamapim gut as bilong ol bilip bilong ol, helpim ol long kisim pasin bilong bihainim gutpela tingting na mekim gutpela pasin. Taim yu mekim olsem, yu inap skulim ol pikinini bilong yu long sambai long ol bilip bilong ol long ai bilong wanklas, ol neiba, na ol tisa.

[Blok/Ol Piksa long pes 4, 5]

PATI BILONG BETDE

Mary: Gude, Jon. Mi laik singautim yu kam long pati bilong betde bilong mi.

John: Mary, tenkyu long yu tingim mi. Mi laik askim yu, bilong wanem yu mekim pati bilong betde?

Mary: Mi laik amamas long de mama i karim mi. Olsem wanem? Yu no save amamas long de mama i karim yu?

John: Nogat, mi no save mekim.

Mary: Bilong wanem yu no mekim? Famili bilong mi i bin amamas taim mama i karim mi.

John: Famili bilong mi i wankain olsem famili bilong yu. Ol i bin amamas tu taim mama i karim mi. Tasol mi no ting dispela em as na mi mas mekim pati long olgeta yia. Long pati bilong ol betde bilong ol, planti man i ting ol i nambawan tru long ol narapela man. Tasol yumi save olsem God em i nambawan tru long olgeta man. Olsem na yumi mas tenkyu long em, long wanem, em i givim laip long yumi.

Mary: Ating yu laik tok olsem mi no ken mekim pati long betde bilong mi?

John: Mary, em samting bilong yu. Tasol tingim dispela. Planti man i laik kisim presen long taim bilong betde, tasol Baibel i tok man i givim samting, em i save amamas moa winim man i kisim samting. Yumi no ken tingim yumi yet tasol long taim bilong betde bilong yumi, nogat. Em i gutpela pasin long yumi tenkyu long God, tingim ol narapela, na mekim gut long ol.

Mary: Mi no bin tingim dispela. Tasol olsem wanem? Papamama bilong yu i save givim presen long yu tu?

John: Yes, mi save kisim presen. Tasol papamama i no save wet inap long betde bilong mi, nogat. Taim ol i laik givim presen long mi, ol bai mekim. Mary, yu laik save long olsem wanem pasin bilong mekim pati bilong betde i kirap?

Mary: Inap yu tokim mi?

John: Long tumora bai mi tokim yu long wanpela stori bilong betde i bin kamap long bipo tru.

SALUT LONG FLEG

Gail: Claire, bilong wanem yu no salut long fleg?

Claire: Gail, tenkyu long askim. Tasol pastaim mi laik askim yu, bilong wanem yu salut long fleg?

Gail: Mi mekim olsem, long wanem, mi laikim kantri bilong mi.

Claire: Gail, mi save yu laikim mama bilong yu. Tasol yu no save salut long mama bilong yu, laka?

Gail: Em stret. Tasol yu save, mi salut long fleg, long wanem, mi rispek long en. Olsem wanem? Yu no save rispek long fleg?

Claire: Mi save rispek long fleg. Tasol yumi no save salut long olgeta man na olgeta samting em yumi rispek long ol, laka?

Gail: Tru, mi save rispek long tisa bilong yumi, tasol mi no save salut long em. Ating mi no save long as na mi salut long fleg.

Claire: Gail, planti man i ting fleg em i makim kantri bilong ol. Pasin bilong salut long fleg i makim olsem ol bai mekim olgeta samting bilong helpim kantri bilong ol. Tasol mi no gat dispela tingting. Mi no inap givim laip bilong mi long kantri bilong mi, long wanem, God i givim laip long mi. Mi pasim tok pinis long givim laip bilong mi long God. Olsem na mi rispek long fleg, tasol mi no save salut long en.

Gail: Nau mi save.

Claire: Gail, mi amamas long yu kamapim dispela samting. Na sapos yu laik save long as na mi mekim sampela samting, o mi no mekim, yu ken askim mi. Baibel i tok, long bipo tru wanpela king bilong Babilon i tokim ol man long brukim skru long wanpela imis. Sampela i no bin brukim skru​— maski king inap kilim ol i dai.

Gail: Em tru? Wanem samting i kamap long ol?

Claire: Bai mi stori long yu long ol dispela man taim yumi kaikai long belo.

SKUL KEPTEN

Mike: Tim, yu ting husat i mas kamap skul kepten bilong yumi?

Tim: Mi no stap long sait bilong wanpela man.

Mike: Bilong wanem?

Tim: Mi gat wanpela gutpela lida pinis. Mi wanpela Kristen na mi bin promis long bihainim Jisas. Olsem na mi no inap makim narapela lida. Yu laik save bilong wanem mi ting em i nambawan Lida?

Mike: Nogat, na mi no bisi.

Tim: Em orait, tasol sapos yu laik save, mi bai amamas long tokim yu.

[Piksa]

“Gude Jon.

Mi laik singautim yu i kam long pati bilong betde bilong mi”

[Piksa long pes 3]

“Bilong wanem yu no save salut long fleg?”