God i Amamas Long Olgeta Pati o Nogat?

OLSEM WANEM? Yu save laikim ol pati?— Yu inap kisim bikpela amamas long ol pati. Yu ting Bikpela Tisa i laik bai yumi go long ol pati?— Em i bin go long wanpela pati bilong marit, na sampela disaipel bilong em i bin go wantaim em. Jehova em i ‘God bilong amamas,’ olsem na em i save amamas taim yumi kisim amamas long ol gutpela pati.—1 Timoti 1:11; Jon 2:1-11.

Pes 29 bilong dispela buk i tokim yumi olsem Jehova i bin brukim solwara Retsi i go tupela hap na larim ol Israel i go long hapsait bilong en. Yu inap tingim dispela stori?— Bihain, ol manmeri i bin singsing na danis na givim tenkyu long Jehova. Em i kain olsem wanpela pati. Ol manmeri i bin amamas tru, na yumi ken ting olsem God tu i bin amamas.—Kisim Bek 15:1, 20, 21.

Klostu 40 yia bihain, ol Israel i go long narapela bikpela pati. Tasol ol man i singautim ol i go long dispela pati ol i no lotuim Jehova. Ol i save brukim skru na lotuim ol narapela god, na ol i save slip wantaim ol arapela i no poroman marit bilong ol. Yu ting i stret long go long kain pati olsem?— Jehova i no bin amamas long dispela, na em i givim strafe long ol Israel.—Namba 25:1-9; 1 Korin 10:8.

Baibel i stori tu long tupela betde pati. Yu ting wanpela bilong ol dispela pati i bilong amamasim betde bilong Bikpela Tisa?— Nogat. Tupela pati wantaim i bilong ol man i no mekim wok bilong Jehova. Wanpela em betde pati bilong King Herot Antipas. Em i bin bosim distrik Galili taim Jisas i stap long graun.

King Herot i bin mekim planti pasin nogut. Em i pulim meri bilong brata bilong em na kisim olsem meri bilong em yet. Nem bilong dispela meri em Herodias. Wokman bilong God, em Jon Bilong Baptais, em i tokim Herot olsem i no stret long em i mekim dispela pasin. Herot i no amamas long dispela tok. Olsem na em i putim Jon long kalabus.—Luk 3:19, 20.

Jon i stap long kalabus na de i kamap bilong tingim betde bilong Herot. Herot i wokim bikpela pati. Em i singautim planti man i gat biknem long kam long dispela pati. Olgeta i kaikai na dring na ol i amamas tru. Orait nau pikinini meri bilong Herodias i kam na danis bilong amamasim ol. Olgeta man i laikim tru danis bilong em, olsem na King Herot i laik givim em wanpela gutpela presen. Em i tokim em: “Wanem samting yu askim long mi, em bai mi givim yu. Sapos yu tok long mi mas brukim kantri bilong mi long tupela hap na givim wanpela hap long yu, orait bai mi mekim.”

Dispela meri bai askim long wanem samting? Em bai askim long mani? ol naispela klos? wanpela haus kwin bilong em yet? Em i no save long em bai tok wanem. Olsem na em i go long mama bilong em, Herodias, na em i tok: “Bai mi tokim em long givim wanem samting long mi?”

Herodias i birua tru long Jon Bilong Baptais. Olsem na em i tokim pikinini meri bilong em long askim long kisim het bilong Jon Bilong Baptais. Pikinini meri i go bek long king na em i tok: “Nau tasol mi laik bai yu putim het bilong Jon Bilong Baptais long wanpela plet, na givim long mi.”

King Herot i no laik kilim i dai Jon, long wanem, em i save olsem Jon i gutpela man. Tasol Herot i bin mekim tok promis, na em i pret long ol arapela i stap long pati ol bai ting wanem long em sapos em i senisim tingting bilong em. Olsem na em i salim wanpela man i go long kalabus bilong katim nek bilong Jon. I no longtaim na dispela man i kam bek. Het bilong Jon i stap long wanpela plet na em i givim long dispela yangpela meri. Na meri ya i givim long mama bilong em.—Mak 6:17-29.

Narapela betde pati Baibel i stori long en, em tu i nogut. Dispela pati i bilong wanpela king bilong Isip. Long dispela pati tu, king i tok na ol i katim nek bilong wanpela man. Na bihain, ol i hangamapim bodi bilong dispela man na bai ol pisin i ken kam na kaikai! (Stat 40:19-22) Yu ting God i bin orait long dispela tupela pati?— Sapos yu bin stap long dispela taim, bai yu laik stap long ol dispela pati?—

Yumi save olsem olgeta tok i stap long Baibel i gat as bilong en. Baibel i tokim yumi long tupela betde pati tasol. Na long tupela pati wantaim, ol i bin mekim pasin nogut bilong amamas long dispela de. Olsem na yu ting God i laik mekim wanem tok long yumi long ol betde pati? Yu ting God i laik bai yumi mekim pati bilong tingim ol betde?—

Tru, long ol kain pati olsem long nau, ol i no save katim nek bilong ol man. Tasol ol man i no lotuim trupela God ol i bin kirapim dispela pasin bilong tingim betde. Wanpela buk (The Catholic Encyclopedia) i mekim dispela tok long ol bung bilong betde Baibel i stori long en: “Ol sinman tasol . . . i save mekim ol bikpela bung bilong amamas long de mama i bin karim ol.” Olsem wanem? Yumi laik bihainim pasin bilong ol?—

Olsem wanem long Bikpela Tisa? Em i bin wokim pati bilong tingim betde bilong em?— Nogat, Baibel i no mekim wanpela tok long betde pati bilong Jisas. Ol disaipel bilong Jisas long pastaim ol i no bin mekim bung bilong tingim betde bilong em. Yu save bilong wanem ol man i makim Disemba 25 bilong tingim betde bilong Jisas?—

Ol i makim dispela det, long wanem, “ol manmeri bilong Rom i bin makim dispela det bilong amamasim betde bilong san,” olsem wanpela buk (The World Book Encyclopedia) i tok. Olsem na ol man i makim de bilong tingim betde bilong Jisas long wanpela de ol haiden i bin makim olsem holide bilong ol!

Yu save bilong wanem yumi no inap tok olsem mama i bin karim Jisas long Disemba?— Long wanem, Baibel i tok taim mama i karim Jisas, ol wasman bilong sipsip i bin stap ausait long nait. (Luk 2:8-12) Long dispela hap, Disemba em taim bilong kol na ren, na ol wasman bilong sipsip i no inap stap ausait long dispela taim.

Planti man i save olsem Krismas i no betde bilong Jisas. Ol i save tu olsem long dispela de ol haiden i bin mekim wanpela bung em God i no bin amamas long en. Tasol planti man i save tingim yet Krismas. Ol i tingting tasol long mekim pati na ol i no laik painimaut tingting bilong God long dispela samting. Tasol yumi laik amamasim Jehova, a?—

Olsem na taim yumi mekim ol pati, yumi laik bai ol dispela pait i gutpela long ai bilong Jehova. Yumi ken mekim pati long wanem wanem taim yumi laik mekim long yia. Yumi no gat wok long wetim wanpela bikpela de. Yumi ken kaikai sampela gutpela kaikai na amamas long mekim sampela pilai. Yu laik mekim olsem?— Ating yu ken toktok wantaim papamama bilong yu na ol i ken helpim yu long stretim ol samting bilong mekim wanpela pati. Em bai gutpela, a?— Tasol paslain long yu stretim ol samting bilong mekim pati, yu mas skelim gut ol samting na bai God i ken orait long dispela pati.