Askim

Planti Witnes Bilong Jehova i save mekim kaikai bilong tingim de ol i bin marit. Betde em wanpela de i kain olsem​—⁠em i bilong tingim de mama i karim yu. Olsem na bilong wanem i orait long mekim kaikai samting bilong tingim de bilong marit, tasol i no orait long mekim betde?

I no olsem yumi mas mekim kaikai samting long ol dispela de. Tasol dispela i no makim olsem dispela tupela de i wankain, o ol Kristen i mas i gat wankain tingting long de ol i bin marit olsem ol i save tingim ol betde.

Olsem yumi tok pinis, yumi ken tok de bilong makim dispela tupela samting ol i save kamap long olgeta yia, kain olsem de bilong makim ol narapela samting i bin kamap. Yu inap tingim de bilong kain kain samting long olgeta yia​—⁠olsem de yu bin kisim hap bagarap long ka, ol taim yu bin lukim san i pasim ai bilong mun, o de yu bin i go waswas long nambis wantaim famili bilong yu, o ol kain samting olsem. Tasol olgeta de olsem, ol Kristen i no save tingim olsem wanpela bikpela de bilong yia o mekim kaikai samting bilong makim ol dispela de, nogat. Wan wan yet i mas skelim ol samting bilong ol kain de olsem na tingim wanem samting i stret long mekim.

Olsem: God i bin tok klia long ol Israel olsem long olgeta yia ol i mas tingim de ensel bilong em i bin kalapim haus bilong ol long Isip na bihain ol i ranawe long yia 1513 B.C.E. (Kisim Bek 12:14) Taim ol Juda, na Jisas tu, ol i bin tingim dispela de long olgeta wan wan yia, ol i bihainim tok bilong God na ol i mekim olsem, tasol ol i no bin wokim pati o givim presen long ol man long dispela de, nogat. Na ol Juda i tingim dispela de bilong dediketim gen haus bilong God olsem wanpela bikpela de. Tru, Baibel i no tok long tingim dispela de, tasol Jon 10:​22, 23 i makim olsem Jisas i no gat tok long dispela. Na long olgeta yia ol Kristen i save mekim wanpela bung bilong tingim dai bilong Jisas. Na ol i mekim olsem bilong bihainim wanpela tok i stap ples klia long Baibel.​—⁠Luk 22:​19, 20.

Tasol olsem wanem long tingim de ol i bin marit? Long sampela kantri, planti man na meri marit i save tingim de ol i bin marit, em God yet i as bilong marit. (Stat 2:​18-24; Matyu 19:​4-6) Em nau, Baibel i no tok marit em samting i no stret. Jisas i bin go long wanpela bung bilong marit, na em i givim sampela samting bilong mekim ol man i amamas long dispela bung.​—⁠Jon 2:​1-11.

Olsem na i no narapela kain samting sapos tupela marit i laik tingim de ol i bin marit na long dispela de long olgeta yia ol i tingim bikpela amamas ol i bin kisim long dispela de, na ol i tingim tok ol i bin pasim long bel olsem ol bai wok strong bambai marit bilong ol i ken kamap gutpela. Sapos tupela i laik bai ol yet i stap na tingim dispela de bilong amamas, o ol i laik singautim sampela wanblut o pren i kam, em samting bilong tupela yet long skelim. Tasol ol i no ken ting dispela i givim rot long ol long wokim bikpela bung i gat planti manmeri long en. Ol lo i save stiaim wokabaut bilong ol Kristen long olgeta wan wan de, yumi mas larim ol dispela lo i stiaim yumi long dispela de tu. Olsem na sapos sampela i laik mekim kaikai samting bilong tingim de ol i bin marit, o ol i no laik mekim, em samting bilong ol wan wan.​—⁠Rom 13:​13, 14.

Na olsem wanem long mekim betde? I gat sampela tok long Baibel i makim olsem yumi ken tingim dispela de?

Bipo, olsem long yia 1900 samting, ol Sumatin Bilong Baibel, nau ol i kolim ol olsem ol Witnes Bilong Jehova, ol i bin tingim ol betde. Planti ol i bin raitim dispela de long wanpela liklik buk ol i kolim Daily Heavenly Manna. Dispela buk i gat wanpela ves bilong Baibel bilong kaunim long olgeta de. Insait long dispela buk ol i save putim ol liklik piksa bilong ol wanlain bilong ol, em ol Sumatin Bilong Baibel, na ol i raitim betde bilong ol long en. Na Wastaua (tok Inglis) bilong Februeri 15, 1909, i stori long wanpela kibung i bin kamap long Jeksonvil long Florida, na ol i singautim Brata Russel, em presiden bilong Sosaiti long dispela taim, i kam antap long pletfom. Bilong wanem? Ol i laik toksave long em olsem ol brata i salim sampela swit muli na painap samting long em olsem presen bilong makim betde bilong em. Em pasin ol i bin mekim long bipo. Na long dispela taim bipo ol Sumatin Bilong Baibel i save tingim Disemba 25 em de mama i bin karim Jisas, olsem betde bilong em, na long Betel long Bruklin ol i bin wokim kaikai bilong krismas long dispela de.

Tasol bihain long dispela taim ol lain bilong God i wok long go bikpela long ol samting bilong spirit. Long 1925 samting, sampela lait moa bilong tok i tru i kamap na ol i kisim save olsem:

Mama i no bin karim Jisas long Disemba 25; dispela de em bikpela de bilong lotu haiden. Baibel i makim olsem yumi mas tingim de Jisas i dai​—⁠i no de mama i bin karim em o narapela man. Pasin bilong tingim dai bilong Jisas i stret wantaim tok bilong Saveman 7:1, olsem pasin bilong man long i stap gut long God i go inap long taim em i dai, dispela i bikpela samting moa, winim de mama i bin karim em. Long Baibel i no gat stori olsem wanpela man i stap gut long God em i bin mekim kaikai samting bilong betde bilong em. Baibel i stori tasol long ol pati bilong betde em ol haiden i bin wokim, na Baibel i stori long ol pasin nogut tru i bin kamap long ol dispela pati. Orait yumi ken kisim sampela save moa long ol dispela bung bilong betde.

Namba wan em dispela betde bilong Fero long taim bilong Josep. (Stat 40:​20-23) Wanpela buk bilong Hasting (Encyclopædia of Religion and Ethics) i stori long betde olsem: “Ol pasin, na ol de, na ol samting ol i save mekim long betde i wankain long sampela lo bilong ol lotu haiden.” Bihain, dispela buk i kamapim tok bilong Bikman J. Gardner Wilkinson, em wanpela man bilong raitim stori bilong ol Isip, em i tok olsem: “De na aua mama i karim ol em i bikpela samting tru long ol Isip; na olsem ol i bin mekim long Persia, ating olgeta wan wan man i save mekim bikpela bung em ol man bilong dispela ples i save mekim bilong amamas na ol i singautim ol pren i kam na tingim betde bilong ol, na ol i save wokim ol kain kain gutpela kaikai.”

Narapela bung bilong betde Baibel i kolim, em betde bilong Herot, em long dispela taim ol i katim nek bilong Jon Bilong Baptais. (Matyu 14:​6-10) Wanpela buk dikseneri bilong Baibel i stori gut olsem: “Ol Grik bilong bipo i save mekim betde bilong ol god na ol bikman. Genéthlia bilong ol Grik i makim ol dispela bung, na genésia i makim wanpela bung bilong betde bilong wanpela man i gat biknem na em i dai pinis. Long 2 Makabi 6:7 i gat stori bilong genéthlia bilong Antiokas Namba 4 em ol i save mekim long olgeta mun, na long dispela taim ol i wokim ol ofa na ol i subim ol Juda long ‘kaikai hap bilong ol dispela ofa.’ . . . Taim Herot i mekim bung bilong betde bilong em, em i bihainim dispela pasin bilong ol Grik long mekim bung; i no gat wanpela samting i makim olsem ol Israel i mekim betde paslain long taim bilong ol Grik.”​—⁠The International Standard Bible Encyclopedia.

Tru, i no wok bilong ol Kristen tru long nau long skelim skelim olgeta liklik samting ol man i mekim o pasin bilong ples ol i bihainim bilong save ol lotu bilong bipo i as bilong en o nogat, tasol ol i no save sakim ol tok bilong Baibel i makim olsem wanpela pasin i no stret long bihainim. Olsem: Baibel i stori tasol long betde bilong ol haiden, na long ol dispela bung ol i bin kilim i dai wanpela man. Olsem na Baibel i kamapim klia olsem i no stret yumi tingim betde, na ol gutpela Kristen i no save sakim dispela tok.

Olsem na em samting bilong olgeta wan wan Kristen yet sapos em i laik tingim de em i bin marit o nogat, tasol i gat gutpela as na ol strongpela Kristen i save abrusim pasin bilong mekim betde.