Askim

Pasin bilong mekim betde em pasin lotu bilong bipo na dispela em as na ol Witnes Bilong Jehova i no save mekim betde o olsem wanem?

Tru, bilip giaman na lotu giaman i as bilong pasin bilong mekim betde, tasol ol Witnes Bilong Jehova i no tingim dispela samting tasol na ol i klia long pasin bilong mekim betde, olsem pasin bilong mekim kaikai o pati bilong tingim de mama i karim man.

Sampela pasin, bipo ol i pasin bilong lotu, tasol nau long planti kantri ol i no samting bilong lotu. Olsem: Bipo pasin bilong putim ring bilong makim olsem man o meri i marit, dispela pasin i samting bilong lotu, tasol long planti kantri long nau ol i no tingim moa olsem ring i samting bilong lotu. Long dispela as na planti Kristen tru i save putim ring bilong makim olsem ol i marit. Olsem na taim yumi laik skelim wanpela pasin, bikpela samting em olsem: Long nau dispela pasin em samting bilong lotu giaman o nogat.​—⁠Lukim “Askim” long Wastaua bilong Februeri 1, 1973 na Oktoba 15, 1991.

Planti bikpela buk i kamapim klia olsem ol bilip giaman na lotu giaman i as bilong pasin bilong mekim betde. Wanpela buk olsem i tok: “Ol man bilong bipo long Isip na Grik na Rom na Persia ol i save mekim betde bilong ol god, na ol king, na ol hetman.” Tasol dispela buk i tok, “ol Israel bilong bipo i save raitim krismas bilong ol man long lain bilong ol, tasol i no gat wanpela samting i makim olsem ol i save mekim pati samting bilong tingim de mama i karim ol.”​—⁠Buk The Encyclopedia Americana, bilong 1991.

Sampela buk olsem i gat bikpela stori long as bilong pasin bilong mekim betde. Wanpela i stori olsem: ‘Pasin bilong wokim pati bilong betde i bin kirap long Yurop planti yia bipo. Ol man i bilip olsem i gat ol gutpela spirit na ol spirit nogut. Olgeta i pret long ol dispela spirit. Ol i ting ol dispela spirit inap mekim nogut long man long betde bilong em, olsem na ol famili na pren bilong em i save kam bung wantaim em long dispela de. Long dispela rot pasin bilong mekim bikpela kaikai o pati bilong betde i bin kamap. Pastaim ol i bin mekim dispela kain pasin bilong lukautim man bambai ol spirit nogut i no ken mekim nogut long em, na bilong helpim em bambai ol gutpela samting i ken painim em long dispela yia.’​—⁠Buk Birthday Parties Around the World, bilong 1967.

Dispela buk i stori tu long as bilong planti pasin ol man i save mekim long betde bilong man. Olsem: “Pasin bilong mekim wok long ol kandel long taim bilong betde, as bilong dispela pasin i olsem ol Grik na ol Rom bilong bipo i ting ol kandel i gat majik, olsem strong bilong helpim ol. Ol i save laitim kandel na mekim ol beten na kolim ol samting ol i laikim, na ol i ting lait bilong ol kandel i karim dispela i go antap long ol god, na bai ol god i salim ol blesing i kam daun na mekim ol samting olsem ol i bin beten askim ol god long en.” Bilong kisim sampela save moa long dispela, sapos yu save long tok Inglis, yu ken lukim pes 69 na 70 long buk Reasoning From the Scriptures, em Sosaiti Wastaua bilong Nu Yok i wokim.

Tasol yumi no ken tingim tasol olsem pasin bilong mekim betde long bipo na long nau em samting bilong lotu o nogat. Ol strongpela Kristen i save bihainim gutpela tingting​—⁠ol i save tingim olgeta liklik tok bilong Baibel em inap helpim ol long save long stretpela rot ol i mas bihainim.

Ol wokboi bilong God long bipo i bin raitim de na mun na yia mama i karim man, na bihain bai ol inap save em i gat hamas krismas. Baibel i tok: “Noa i gat 500 krismas na em i kamap papa bilong tripela pikinini man, nem bilong ol i olsem, Siem na Ham na Jafet.”​—⁠Stat 5:32; 7:11; 11:​10-26.

Lain bilong God long bipo ol i save amamas taim nupela pikinini i kamap. (Luk 1:​57, 58; 2:​9-14; Jon 16:⁠21) Tasol ol i no save mekim sampela samting bilong tingim de mama i karim em. Ol i gat ol bikpela de bilong tingim taim bipo, tasol ol i no save tingim betde. (Jon 10:​22, 23) Wanpela buk (Customs and Traditions of Israel) i tok: “Pasin bilong mekim betde em ol i bin kisim dispela pasin long ol narapela lain, long wanem, Baibel, na Buk Lo Bilong Ol Juda, na rait bilong ol Saveman i kamap bihain i no kamapim liklik tok i makim olsem dispela em i pasin bilong ol Juda. Nogat. Em pasin bilong ol Isip bilong bipo.”

Stori bilong Baibel long wanpela pati bilong betde i kamapim klia olsem, dispela em wanpela pasin bilong ol Isip bilong bipo, na em i no pasin bilong ol man i bihainim lotu i tru. Baibel i stori long king bilong Isip i mekim bikpela kaikai bilong tingim de mama i bin karim em, em dispela king i bosim Isip long taim Josep i stap long kalabus long Isip. Sampela bilong ol haiden i kam long dispela kaikai, ating ol i amamas long en, tasol long taim bilong dispela kaikai ol i bin katim nek bilong man i bosim haus bret bilong king.​—⁠Stat 40:​1-22.

Kain samting nogut olsem i bin kamap tu long taim Herot Antipas, em pikinini bilong King Herot, i wokim bikpela kaikai bilong tingim de mama i bin karim em. Baibel i no stori long dispela kaikai olsem em taim bilong amamas tasol. Nogat. Samting i bin kamap long dispela kaikai i as na ol i bin katim nek bilong Jon Bilong Baptais. Bihain “ol disaipel bilong Jon i kam kisim bodi bilong en na karim i go planim. Ol i planim pinis, na ol i go tokim Jisas,” na Jisas ‘i lusim dispela ples na i go long wanpela hap i no gat man.’ (Matyu 14:​6-13) Yu ting ol dispela disaipel o Jisas i amamas long pasin bilong mekim betde?

Ol Witnes Bilong Jehova i save long as bilong pasin bilong mekim betde, na bikpela samting moa em olsem: Ol i save Baibel i no mekim gutpela stori long ol pati o kaikai bilong betde, olsem na i gat as tru na ol i no save mekim betde. I no gat wok long ol i bihainim dispela pasin bilong ol lain bilong dispela graun, long wanem, ol i ken kaikai wantaim na amamas long wanem wanem taim long yia ol i laik mekim, na ol i save mekim olsem. Na taim ol i givim presen, i no olsem ol i mas givim, olsem long taim bilong pati bilong betde; nogat; ol i givim long wanem wanem taim ol i laik givim, na pasin bilong amamas bilong givim samting na pasin bilong laikim tru ol narapela i kirapim ol long givim.​—⁠Sindaun 17:8; Saveman 2:24; Luk 6:38; Aposel 9:​36, 39; 1 Korin 16:​2, 3.