Gutpela Pasin i Karim Kaikai
LONG wanpela liklik ailan i stap klostu long nambis bilong sauten Japan, wanpela mama na 3-pela pikinini bilong em i kirap stadi long Baibel wantaim ol Witnes Bilong Jehova. Taim ol manmeri bilong ailan i lukim dispela, ol i kirap pulim nus long dispela mama. Mama ya i tok: “Mi bel hevi taim ol i mekim olsem long mi, tasol mi bel hevi moa yet taim ol i pulim nus long man bilong mi na ol pikinini.” Maski i olsem, em i tokim ol pikinini bilong em olsem: “Yumi lain bilong Jehova, olsem na yumi mas wok yet long givim gude long ol neiba bilong yumi.”—Matyu 5:47, 48.
Long haus, em i save skulim ol pikinini long mekim gutpela pasin maski ol man i les long ol. Planti taim ol i save raun i go long hap bilong hatwara i kamap long graun, na taim ol i draiv yet i go, ol pikinini i save mekim traim long tok gude. Taim ol i kamap long dispela hap, ol pikinini i save amamas wantaim na tok, “Konnichiwa!” olsem “Gude!” Dispela famili i no les kwik, nogat, ol i wok yet long givim gude long ol man ol i bungim, maski ol man i pulim nus na i no laik bekim gude bilong ol. Tasol ol manmeri inap lukim yet gutpela pasin bilong ol pikinini.
Bihain, wan wan neiba i stat long bekim tok “Konnichiwa.” Tupela yia i lus pinis na nau klostu olgeta manmeri long taun i save bekim tok gude bilong ol. Na ol manmeri yet i stat long givim gude na mekim gutpela pasin moa long narapela narapela. Nambatu bikman bilong dispela taun i laik praisim ol dispela pikinini, long wanem, pasin bilong ol i mekim na dispela gutpela senis i kamap. Tasol mama bilong ol pikinini i tokim em olsem ol pikinini i mekim tasol ol pasin em ol Kristen i mas mekim. Sampela taim bihain, i bin i gat wanpela resis bilong mekim tok i kamap long ailan olgeta. Na pikinini man bilong dispela mama, em i stori long olsem wanem mama i bin skulim ol long mekim gutpela pasin na givim gude long ol narapela, maski ol i mekim wanem kain pasin long ol. Em i kisim namba wan prais long tok em i mekim, na ol i putim tok bilong em long niuspepa bilong dispela taun. Long nau, dispela famili i amamas tru olsem pasin bilong bihainim ol stiatok bilong Baibel i kamapim gutpela samting. Em i isi moa long autim gutnius long ol man i gat pasin pren, laka?