Dai—Em Samting Nogut Inap Painim Yumi Olgeta!

“KIRAP long taim mama i karim yumi, dai inap painim yumi wantu tasol,” em tok bilong Arnold Toynbee, wanpela saveman bilong Briten. Em i tok moa: “Na long wanpela taim bihain dispela samting bai painim yumi.” Taim wanpela long famili bilong yumi o wanpela gutpela pren i dai, bel bilong yumi i save bagarap stret!

Inap planti tausen yia pinis dai i bin painim ol man. Taim wanpela yumi laikim tumas em i dai, yumi pilim olsem yumi no inap mekim wanpela samting. I no gat wanpela man inap abrusim dai. Em i save painim olgeta man. Bel hevi i mekim na yumi save kamap olsem liklik pikinini​—yumi no inap mekim wanpela samting, yumi no inap stretim dispela hevi. Mani kago o biknem na strong i no inap mekim na man i kisim laip gen. Ol man i gat savetingting na bikpela save i no save long rot bilong stretim dispela hevi. Ol strongpela man i save krai, wankain olsem ol man i no gat strong.

Dispela hevi i bin painim King Devit long Israel bilong bipo taim pikinini man bilong em Apsalom i dai. Taim king i harim tok olsem Apsalom i dai, em i krai nogut tru na i tok: “O tarangu pikinini bilong mi, Apsalom. Pikinini bilong mi, pikinini bilong mi, Apsalom. I gutpela sapos mi bin senisim yu na mi bin i dai. O Apsalom, pikinini bilong mi, pikinini bilong mi.” (2 Samuel 18:33) Dispela king i gat bikpela strong na i bin daunim ol strongpela birua, em i no inap mekim wanpela samting bilong helpim Apsalom​—em i laik bai dispela “birua,” olsem “dai,” i ken painim em yet na i no pikinini bilong em.​—1 Korin 15:26.

Olsem wanem? I gat wanpela samting inap pinisim dai? Sapos i gat, orait i gat wanem gutpela samting bai painim ol man i dai pinis? Yumi inap lukim gen ol famili bilong yumi i dai pinis? Stori i kamap bihain long dispela bai kamapim ol tok bilong Baibel i bekim ol dispela askim.