‘Mipela i Mas Bihainim Tok Bilong God Tasol, Bilong Ol Man, Nogat’

‘Blut i Dia Tumas’ i Baim Bek Ol Man

NAMBAWAN bikpela samting Jehova i mekim i kamapim pasin laikim, em long salim Pikinini bilong em i kam bilong givim laip bilong em i gutpela olgeta olsem pe bilong baim bek ol man. Yumi gat sin, olsem na i mas i gat wanpela bilong kisim bek yumi, long wanem, i no gat wanpela man bilong graun “i ken baim bek em yet long mani. . . . Man i no inap baim God bai God i larim em i stap laip oltaim na em i no ken i dai.” (Song 49:​6-9) Yumi amamas tru olsem God ‘i givim dispela wanpela Pikinini. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim’!​​—Jon 3:16.

Olsem wanem pe bilong baim bek ol man i helpim yumi? Nau yumi ken skelim 4-pela rot we yumi inap lusim kalabus bilong sin, long wanem, Jehova i kamapim dispela bikpela pasin laikim bilong em long yumi.

Pe Bilong Baim Bek Ol Man

Namba wan, ofa bilong Jisas inap kisim bek yumi long sin yumi bin kisim long Adam. Taim mama i karim yumi, yumi gat sin pinis. Tru tumas, yumi gat sin pinis paslain long yumi inap brukim ol lo bilong Jehova. Bilong wanem i olsem? Rom 5:12 i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam.” Yumi ol tumbuna pikinini bilong sinman Adam, olsem na yumi kisim sin long em. Tasol pe bilong baim bek ol man i helpim yumi long lusim kalabus bilong sin. (Rom 5:16) Jisas i “kisim ples bilong olgeta manmeri na i dai,” na em i karim hevi bilong sin bilong olgeta tumbuna pikinini bilong Adam.​​—Hibru 2:9; 2 Korin 5:21; 1 Pita 2:24.

Namba tu, pe bilong baim bek ol man i kisim bek yumi long ol samting nogut sin i kamapim. “Sin i save givim pe long ol wokboi bilong en. Dispela pe em dai tasol.” (Rom 6:23) Long rot bilong ofa em i givim taim em i dai, Pikinini Bilong God i opim rot bilong ol man i bihainim tok bilong God long ol i ken kisim laip oltaim. Tru tumas, “man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini, em bai i no inap kisim laip. Nogat.”​​—Jon 3:36.

Tingim, yumi inap lusim kalabus bilong sin sapos yumi bilip long Pikinini Bilong God. Dispela i makim olsem yumi mas senisim ol pasin bilong yumi na mekim ol samting i stret wantaim laik bilong God. Yumi mas sakim ol pasin i no stret em yumi save bihainim na mekim ol samting em God i amamas long en. Aposel Pita i tok yumi mas ‘senisim tingting nogut bilong yumi, na tanim bel, na bai God i rausim ol sin bilong yumi.’​​—Aposel 3:19.

Namba tri, ofa Jisas i givim i mekim na bel bilong yumi i no kotim yumi. Olgeta man i dediket long Jehova na kisim baptais na kamap disaipel bilong Pikinini bilong em ol i stap bel isi. (Matyu 11:​28-30) Maski yumi gat sin, yumi amamas long mekim wok bilong God na bel bilong yumi i no gat tok. (1 Timoti 3:9; 1 Pita 3:21) Taim yumi autim ol sin bilong yumi na givim baksait long ol dispela sin, orait God bai marimari long yumi na bel bilong yumi i no gat tok.​​—Sindaun 28:13.

Yumi Kisim Helpim na Wetim Ol Gutpela Samting

Laspela samting, taim yumi bilip long pe bilong baim bek ol man, yumi no tingting planti long yumi stap olsem wanem long ai bilong God. Aposel Jon i tok: “Sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais.” (1 Jon 2:1) Aposel Pol i stori long wok bilong Jisas long helpim ol man, na em i tok: “Oltaim em inap tru long kisim bek ol manmeri i kam klostu long God long nem bilong em, long wanem, em i stap laip oltaim, na em i save beten long God long helpim ol.” (Hibru 7:25) Yumi gat sin, olsem na Hetpris Jisas Krais i mas helpim yumi na bai yumi inap i stap olsem stretpela man long ai bilong God. Olsem wanem Jisas i mekim wok olsem hetpris bilong helpim yumi?

Foti de bihain long taim Jisas i kirap bek long yia 33 C.E., em i go long heven, na em i givim ‘blut i dia tumas’ long God. Olsem na klostu nau Jisas bai tekewe sin na dai long skin bilong ol man i bihainim tok.a (1 Pita 1:​18, 19) I stret yumi laikim Jisas Krais na bihainim tok bilong em.

Na tu, i stret yumi mas laikim God Jehova na bihainim tok bilong em. Em i sori long yumi na em i wokim rot bilong “baim bek yumi.” (1 Korin 1:30) Yumi gat bikpela dinau tru long Jehova, em i bin givim laip long yumi, na tu, yumi gat rot long kisim laip oltaim oltaim long bihain. Olsem na i stret yumi mas ‘bihainim tok bilong God tasol, bilong ol man, nogat.’​​—Aposel 5:29.

[Futnot]

[Blok/Ol Piksa long pes 9]

YU SAVE LONG DISPELA?

• Jisas i stap long maunten Oliv na em i go antap long heven.​—Aposel 1:​9, 12.

• Ol gutpela aposel bilong Jisas tasol i lukim em i go antap.​—Aposel 1:​2, 11-13.