Taim i No Gat Sin Moa

“TRU yumi gat sin taim mama i karim yumi?” Wanpela sumatin i bin winim bikpela skul long Yunaitet Stets i tingting planti long dispela askim taim em i kirap stadi long Baibel. Em i go bikpela insait long lotu Hindu, olsem na dispela tingting olsem yumi bin kisim sin long papamama, dispela i narapela kain tru long em. Tasol em i tingting: Sapos tru yumi bin kisim sin long papamama, yumi no inap tok olsem dispela tok i no stret o yumi no laik tingim. Orait, olsem wanem yumi inap painim bekim bilong dispela askim?

Sapos tru yumi bin kisim sin long papamama, orait i mas i gat wanpela taim stret dispela sin i bin kirap pastaim. Olsem wanem? Namba wan man em i man nogut taim God i bin wokim em na nau em i givim ol pasin nogut bilong sin long ol pikinini bilong em? O em i bin kisim sin bihain long taim God i wokim em? Wanem taim tru sin i bin kirap? Tasol sapos sin em i wanpela pasin nogut tasol i save stap narapela na i no pas long skin bilong yumi, yu ting wanpela taim bai kamap na sin inap tekewe long yumi na bai yumi stap gutpela?

Ol Hindu i bilip olsem taim God i wokim yumi, pen na hevi na pasin nogut i stap long yumi. Wanpela saveman bilong ol Hindu em i tok: “Pen na hevi [olsem pasin nogut] i olsem sik i save kamap long ol bun, em i save lusim wanpela hap bilong skin na go long narapela hap, tasol yumi no inap pinisim tru dispela sik.” Tru tumas, pasin nogut i bin stap long dispela graun kirap long bipo yet na i kam inap nau. Na sapos sin i bin kamap taim ol man i no kirap yet long raitim stori bilong ol samting i bin kamap, orait, i gat wanpela tasol inap bekim dispela askim olsem sin i bin kamap olsem wanem​—⁠dispela Man em God tasol.​—⁠Song 36:⁠9.

God i Bin Wokim Man i No Gat Sin

Dispela saveman bilong ol Hindu, em Nikhilananda, em i tokaut olsem stori i stap long ol Veda long God i bin wokim man olsem wanem, em i olsem tok piksa tasol. Na i wankain tu long planti lotu bilong hap bilong Is​—⁠stori bilong ol long taim God i bin wokim man em i olsem stori nating bilong bipo tasol. Tasol i gat as na yumi ken bilip long stori bilong Baibel long God i bin wokim namba wan man, na dispela i stret wantaim gutpela tingting na tok bilong saiens tu.a Namba wan sapta bilong Baibel i tok: “God i wokim ol manmeri na ol i kamap olsem God yet. God i mekim ol i kamap man na meri.”​—⁠Stat 1:⁠27.

Olsem wanem God i wokim man i kamap “olsem God yet”? Em i olsem: God i wokim man i gat ol pasin olsem God yet​—⁠olsem stretpela pasin, gutpela tingting na save, pasin bilong laikim tru ol narapela​—⁠ol dispela pasin i mekim na ol man i narapela kain long ol animal. (Skelim wantaim Kolosi 3:​9, 10.) Ol dispela pasin i mekim na man yet inap skelim ol samting em i laik mekim​—⁠em bai mekim gutpela pasin o pasin nogut. Taim God i wokim namba wan man, i no gat sin i stap long skin bilong em, na i no gat wanpela pasin nogut o pen na hevi i stap long em, nogat.

God Jehova i givim wanpela lo long dispela man Adam, olsem: “Yu ken kaikai pikinini bilong olgeta diwai bilong dispela gaden. Tasol yu no ken kaikai pikinini bilong dispela diwai bilong givim gutpela save long wanem samting i gutpela na wanem samting i nogut. Sapos yu kaikai, wantu bai yu dai.” (Stat 2:​16, 17) Sapos Adam wantaim meri bilong em Iv ol i laik bihainim tok bilong God, long dispela rot ol bai litimapim nem bilong em na givim biknem long em, em Man bilong wokim ol, na ol bai i no gat sin. Tasol sapos tupela i bikhet long em, dispela bai makim olsem ol i no winim mak bilong ol stretpela lo God i bin putim long ol, na long dispela as bai ol i no gutpela olgeta moa​—⁠ol i sinman.

God i no wokim Adam na Iv i olsem ol god, nogat. Tasol tupela i gat sampela pasin bilong God na ol inap skelim ol pasin i stret ol i mas bihainim. God i bin wokim tupela, olsem na ol i no gat sin​—⁠olsem ol i gutpela olgeta. (Stat 1:​31; Lo 32:⁠4) Taim God i wokim tupela, dispela i no bagarapim gutpela pasin wanbel i stap namel long God na olgeta narapela samting i stap long heven inap planti tausen yia paslain long taim tupela i kamap. Orait yumi laik save, sin i bin kamap olsem wanem?

Taim Sin i Kamap

Sin i bin kamap pastaim long ples bilong ol spirit. Taim God i no wokim yet dispela graun na ol man, em i bin wokim ol spirit i gat tingting na save​—⁠em ol ensel. (Jop 1:6; 2:1; 38:​4-7; Kolosi 1:​15-​17) Wanpela bilong ol dispela ensel i hambak long gutpela skin na gutpela save bilong em. (Skelim wantaim Esekiel 28:​13-​15.) God i bin tokim Adam na Iv long kamapim ol pikinini, olsem na dispela ensel inap save olsem i no longtaim na bai ol stretpela manmeri i pulap long olgeta hap bilong graun, na olgeta i lotuim God. (Stat 1:​27, 28) Dispela ensel i laik bai ol i lotuim em yet. (Matyu 4:​9, 10) Em i wok long tingim dispela laik i stap long bel bilong em na dispela i kirapim em long bihainim rot i no stret.​—⁠Jems 1:​14, 15.

Dispela bikhet ensel i toktok long Iv long maus bilong wanpela snek na em i tok, taim God i tambuim em long kaikai pikinini bilong dispela diwai bilong givim save long wanem samting i gutpela na wanem samting i nogut, God i pasim dispela save Iv i mas kisim. (Stat 3:​1-5) Dispela tok bilong ensel em i wanpela tok giaman nogut tru​—⁠em wanpela sin. Taim em i mekim dispela tok giaman, em yet i mekim na em i kamap sinman. Olsem na em i kisim ol nem olsem man bilong bagarapim gutnem bilong man, na Satan, olsem birua bilong God.​—⁠KTH 12:⁠9.

Long dispela tok Satan i mekim, em i grisim gut Iv. Olsem na Iv i bilipim tok bilong dispela Man bilong traim em, na em i larim Satan i pulim em long kaikai pikinini bilong dispela diwai tambu. Bihain man bilong em, Adam, em tu i kaikai, olsem na tupela i kamap man na meri bilong mekim sin. (Stat 3:6; 1 Timoti 2:​14) Long laik bilong tupela yet ol i bikhet long God, olsem na dispela tupela tumbuna bilong yumi bilong pastaim tru i no winim mak bilong man i gutpela olgeta, na ol i kamap sinman.

Orait, olsem wanem long ol pikinini bilong Adam na Iv? Baibel i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:​12) Wanpela lo i kirap pinis long mekim wok long skin bilong tupela, olsem: Samting Adam yet i no holim, em i no inap givim long ol pikinini bilong em. (Jop 14:⁠4) Nau Adam na Iv i no gutpela olgeta, olsem na tupela i gat sin pinis taim ol pikinini bilong tupela i kamap long bel bilong Iv. Long dispela as yumi olgeta i bin kisim sin long tupela. (Song 51:5; Rom 3:​23) Na sin i kamapim pasin nogut na pen na hevi. Na tu, sin i mekim na yumi olgeta i save go lapun na yumi dai, long wanem, “sin i save givim pe long ol wokboi bilong en. Dispela pe em dai tasol.”​—⁠Rom 6:⁠23.

Bel i “Kotim” Ol o “Orait” Long Ol

Orait, tingim samting dispela sin i kirapim namba wan man na meri long mekim. Tupela i karamapim sampela hap bilong skin bilong tupela na ol i laik hait long God. (Stat 3:​7, 8) Em nau, sin i mekim na bel bilong tupela i gat tok, na tupela i bel hevi na sem. Na ol dispela samting i save painim yumi ol manmeri bilong nau tu.

Sampela taim yumi no bin mekim gutpela pasin long man i sot tru long ol samting na nau bel bilong yumi i gat tok, o yumi bel hevi long wanpela tok bilong yumi na i no stret yumi bin mekim dispela tok. Ating dispela samting i bin painim yumi olgeta, a? (Jems 4:​17) Orait, bilong wanem bel bilong yumi i gat tok? Aposel Pol i kamapim as bilong dispela na em i tok, i gat ‘lo God i bin raitim long bel bilong yumi.’ Sapos bel bilong yumi i no go strong olgeta, orait taim yumi brukim dispela lo, bel bilong yumi i gat tok. Olsem na maus bilong bel i “kotim” yumi o i “orait” long samting yumi mekim. (Rom 2:​15; 1 Timoti 4:2; Taitus 1:​15) Maski yumi save o nogat, bel bilong yumi i pilim olsem yumi gat rong, olsem yumi gat sin!

Pol i pilim tru dispela sin i stap long skin bilong em. Em i tokaut olsem: “Taim mi laik mekim gutpela pasin, pasin nogut i save pasim rot bilong mi.” Na em i tok moa olsem: “Tru, long tingting bilong mi, mi laikim tumas lo bilong God. Tasol mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.” Olsem na Pol i askim olsem: “Husat bai i helpim mi na mi lusim dispela bodi bilong i dai?”​—⁠Rom 7:​21-​24.

Olsem Wanem Bai Yumi Lusim Kalabus Bilong Sin?

Wanpela saveman i tok, ‘long bilip bilong ol Hindu, ol man i save kamap fri taim ol inap lusim pasin bilong kamap nupela gen long narapela bodi, na i dai gen, na kamap nupela gen long narapela bodi, i go i go olsem.’ Bilong lusim dispela hevi bilong kamap nupela gen na i dai gen, lotu Buda tu i bilip long Nevana​—⁠olsem olgeta tingting bilong man i pinis. Dispela tingting olsem yumi bin kisim sin long papamama, em i narapela kain tru long ol Hindu, olsem na lotu Hindu i tok, bilong i stap fri tru, bai yumi lusim kalabus bilong i stap laip na bai yumi no i stap moa.

Tasol long tok bilong Baibel, taim yumi lusim kalabus bilong sin na kamap fri, ol samting nogut bilong sin i tekewe long skin bilong yumi na i no stap moa long en. Taim Pol i askim olsem em inap lusim kalabus bilong sin olsem wanem, em yet i bekim olsem: “Mi tenkyu long God! Long han bilong Jisas Krais, Bikpela bilong yumi, em bai i helpim mi.” (Rom 7:25) Tru tumas, God, long rot bilong Krais Jisas, em tasol inap helpim yumi long lusim kalabus bilong sin.

Olsem Gutnius bilong Matyu i tok, “Pikinini Bilong Man,” em Krais Jisas, em i bin kam “bilong givim laip bilong em bilong baim bek planti manmeri.” (Matyu 20:28) Na long 1 Timoti 2:6, Pol i tok, “Krais i bin givim laip bilong em yet bilong baim bek olgeta manmeri.” Dispela tok “baim bek” i makim olsem em i givim pe bilong kisim bek ol manmeri i stap kalabus. Na tu, dispela pe i stret long lo bilong God i tok, pe i mas stret wantaim samting i bin lus. Orait, olsem wanem dai bilong wanpela man inap kamap olsem pe bilong baim bek ol man?

Adam i bin baim olgeta man​—⁠na yumi tu​—⁠i go kalabus long sin na dai. Pe em i givim, em nambawan gutpela laip bilong em bilong graun. Orait, bilong stretim dispela samting, narapela man bilong graun i nambawan olgeta em i mas givim laip bilong em olsem pe bilong baim bek ol man. (Kisim Bek 21:23; Lo 19:21; Rom 5:​18, 19) Wanpela man i gat sin em i no inap givim dispela pe bilong baim bek ol man, olsem na long gutpela tingting na save bilong em, God i wokim rot bilong stretim dispela samting. (Song 49:​6, 7) Em i kisim laip bilong dispela wanpela Pikinini tasol bilong em long heven na em i putim insait long bel bilong wanpela nupela meri long graun, na bai meri i ken karim em olsem wanpela man i gutpela olgeta.​—⁠Luk 1:​30-​38; Jon 3:​16-​18.

Bilong mekim dispela wok bilong kisim bek ol man, orait taim Jisas i stap long graun em i mas stap gut olgeta long God. Na em i bin mekim olsem. Orait bihain em i dai olsem wanpela ofa. Long dispela rot, skin bilong wanpela man i gutpela olgeta​—⁠em skin bilong Jisas yet​—⁠i olsem pe bilong baim bek ol man na bai sin i no ken kalabusim ol moa.​—⁠2 Korin 5:​14; 1 Pita 1:​18, 19.

Samting Ofa Bilong Krais Inap Mekim Bilong Helpim Yumi

Ofa bilong Jisas inap helpim yumi long nau tu. Sapos yumi bilip long dispela ofa, bai yumi stap klin long ai bilong God na Jehova bai mekim pasin sori long yumi na lukautim gut yumi. (Aposel 10:43; Rom 3:​21-​24) Olsem na bel bilong yumi i no bagarap olgeta long pilim asua bilong ol rong yumi bin mekim​—⁠dispela ofa bilong Jisas i mekim na yumi inap askim God long lusim tingting long ol dispela rong bilong yumi.​—⁠Aisaia 1:​18; Efesus 1:7; 1 Jon 2:​1, 2.

Bihain dispela ofa bai mekim na olgeta sik samting em sin i bin kamapim long ol man ol bai i pinis. Laspela buk bilong Baibel i stori long wanpela “wara bilong givim laip,” em i kamap long sia king bilong God na ran i go. Long arere bilong wara i gat ol diwai i karim planti kaikai, na lip bilong ol “i bilong mekim orait ol manmeri bilong olgeta lain.” (KTH 22:​1, 2) Dispela i makim ol gutpela samting tru God i bin mekim long rot bilong ofa bilong Jisas bilong helpim ol man long lusim sin na dai inap oltaim oltaim.

Ol tok profet i olsem driman long Buk Kamapim Tok Hait, klostu nau truim bilong ol bai kamap. (KTH 22:​6, 7) Em nau, long dispela taim olgeta manmeri i gat stretpela bel ol bai kamap gutpela olgeta, long wanem, God bai “i pinisim dispela kalabus bilong bagarap” nau ol i stap long en. (Rom 8:​20, 21) Dispela i mas kirapim yumi long kisim sampela save moa long God Jehova na dispela Pikinini bilong em i bin stap gut long em, em Krais Jisas, em i bin givim skin bilong em olsem pe bilong baim bek ol man.​—⁠Jon 17:⁠3.

[Futnot]

[Piksa long pes 6]

Adam i bin givim sin na dai long ol man

[Piksa long pes 7]

Ofa bilong Jisas bilong baim bek ol man i helpim ol long lusim kalabus bilong sin na dai