Askim

Jisas i tokim Nikodemus: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” Wanem insait bilong dispela tok bilong Jisas?​—Jon 3:13.

Taim Jisas i mekim dispela tok, em i stap long graun na em i no go antap yet, o go bek long heven. Tasol save bilong yumi long Jisas na long as na em i mekim dispela tok, dispela bai helpim yumi long kisimgut insait bilong tok bilong em.

Jisas i “lusim heven na i kam daun,” olsem: Pastaim em i bin i stap long heven wantaim Papa bilong em, tasol long taim God i bin makim, Em i kisim laip bilong Pikinini bilong em na putim long bel bilong Maria na Jisas i kamap man long graun. (Luk 1:​30-35; Galesia 4:4; Hibru 2:​9, 14, 17) Bihain long Jisas i dai, em bai kirap bek olsem wanpela spirit na go bek stap wantaim Jehova. Olsem na paslain liklik long ol i kilim em i dai, Jisas inap beten olsem: “Papa, taim graun i no kamap yet, mi stap wantaim yu na mi gat biknem. Nau mi laik bai yu givim dispela biknem long mi gen na bai mi stap wantaim yu.”​—Jon 17:5; Rom 6:​4, 9; Hibru 9:24; 1 Pita 3:18.

Taim Jisas i toktok wantaim Nikodemus, em wanpela Farisi na tisa long Israel, Jisas i no go bek yet long heven. I no gat wanpela man i bin dai na i go antap long heven, long ples bilong ol spirit. Jisas yet i tok Jon Bilong Baptais em i wanpela gutpela profet, tasol “man i stap liklik tru long kingdom bilong heven, em i winim Jon.” (Matyu 11:11) Na aposel Pita i tok gutpela King Devit tu i bin dai na em i stap yet long matmat, em i no bin i go long heven. (Aposel 2:​29, 34) I gat as na Devit, Jon Bilong Baptais, na ol narapela bilipman husat ol i bin dai paslain long Jisas ol i no bin go long heven. Ol i dai paslain long Jisas i bin opim rot long ol man i ken kirap bek na kisim laip long heven. Aposel Pol i tok Jisas i olsem wanpela man i go paslain long yumi, na i ‘opim nupela rot i gat laip’ i go long heven.​—Hibru 6:​19, 20; 9:24; 10:​19, 20.

Jisas i no bin dai na kirap bek yet, olsem na em tingim wanem samting taim em i tokim Nikodemus: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” (Jon 3:13) Skelim ol ves i stap klostu long dispela ves, o ol samting Jisas i bin toktok wantaim Nikodemus long en.

Taim dispela hetman bilong Juda i kam long Jisas long nait, Jisas i tokim em: “Tru tumas mi tokim yu, sapos man i no kamap nupela gen, em i no inap lukim kingdom bilong God.” (Jon 3:3) Nikodemus i askim em: ‘Olsem wanem na man inap long kamap nupela gen? Ating em inap i go insait gen long bel bilong mama na mama i karim em gen?’ Nikodemus i no kisimgut dispela tok Jisas i mekim long stap insait long Kingdom Bilong God. Olsem wanem? I gat rot bilong em i ken kisim save long dispela? Em i no inap kisim dispela save long rot bilong wanpela man; i no gat wanpela man inap skulim em long dispela, long wanem, i no gat wanpela man i bin stap long heven na inap long stori long em long samting man i mas mekim bilong go insait long Kingdom. Jisas wanpela tasol. Em inap long skulim Nikodemus na ol narapela, long wanem, Em i bin lusim heven na i kam daun na em inap tru long skulim ol man long ol dispela samting.

Askim i kamap long dispela skripsa i lainim yumi long wanpela bikpela poin long pasin bilong stadi long Tok Bilong God. Em i no savepasin long kisim kwik tupela tingting long wanpela ves, long wanem, yumi hatwok long kliagut long insait bilong en. Bilong save gut long insait bilong wanpela tok bilong Baibel, yumi mas skelim dispela tok wantaim ol narapela tok i stori long dispela samting. Na wanem samting i bin kamap na ol i mekim dispela tok, dispela tu inap helpim yumi long save gut long as na wanpela tok i bin kamap.