Pasin Hambak na Pasin Daun—Samting Yumi Lain Long En
SAMTING i kamap long laip bilong King Devit i kamapim klia olsem wanem pasin daun na pasin hambak i narapela narapela. Dispela samting i kamap bihain long taim Devit i winim pait na kisim Jerusalem na mekim i kamap biktaun bilong em. Devit i tingim Jehova olsem King tru bilong lain Israel, olsem na em i stretim rot long bringim Bokis Kontrak i kam long taun. Dispela Bokis Kontrak i makim olsem God i stap long dispela ples. Dispela em i bikpela samting tru long Devit, olsem na long ai bilong olgeta man em i soim amamas bilong em taim em i bihainim ol pris husat i karim dispela Bokis Kontrak. Ol manmeri bilong Jerusalem i lukim king bilong ol “i amamas” na “kalap kalap.”—1 Stori 15:15, 16, 29; 2 Samuel 6:11-16.
Tasol Mikal, meri bilong Devit, i no bin bung wantaim dispela lain i amamas i stap, nogat. Em i sanap long windo na lukluk long pasin Devit i mekim bilong litimapim nem bilong Jehova, na ‘i bel nogut long Devit.’ (2 Samuel 6:16) Bilong wanem Mikal i bel nogut? I luk olsem em i hambak long em i pikinini meri bilong namba wan king bilong Israel, Sol, na nau em i kamap meri bilong namba tu king bilong Israel. Ating em i kisim tingting olsem man bilong em, em i king, na em i no ken daunim em yet na kamap olsem ol man nating na bung wantaim ol long pasin bilong ol long amamas. Pasin hambak bilong Mikal i kamap ples klia long tok em i mekim taim Devit i kam bek long haus. Mikal i tok bilas long em na i tok olsem: “Man, king bilong Israel i soim biknem bilong en na i kalap gut tru. Na i larim ol wokmeri nating bilong ol ofisa bilong en i lukim sem bilong em. Yu mekim olsem ol man i no gat tingting i save mekim.”—2 Samuel 6:20.
Devit i mekim wanem long tok bilas bilong Mikal? Devit i krosim Mikal na i tokim em olsem Jehova i givim baksait pinis long papa bilong em, Sol, na makim em long kisim ples bilong Sol. Devit i tok moa olsem: “Bai mi daunim nem bilong mi moa yet na kamap samting nating long ai bilong mi. Tasol ol dispela wokmeri nau yu tok long ol, ol bai i givim biknem long mi.”—2 Samuel 6:21, 22.
Em nau, Devit i strong long mekim wok bilong Jehova long pasin daun. Pasin daun bilong Devit i helpim yumi long kliagut long as na Jehova i tok long Devit olsem, “bel bilong mi i laikim dispela man.” (Aposel 13:22; 1 Samuel 13:14) Tru tumas, Devit i bihainim nambawan gutpela piksa tru bilong pasin daun—em God Jehova yet. Dispela tok Devit i mekim taim em i tokim Mikal, ‘bai mi kamap samting nating,’ i kam long wanpela tok Hibru i makim tu tingting bilong God long ol manmeri. Maski Jehova em i nambawan Man long heven na graun, Song 113:6, 7 i tok long God olsem “em i save lukluk i kam daun [olsem lusim bikpela namba bilong em na i helpim man i stap aninit long em] na lukim heven na graun wantaim. Em i save helpim ol rabisman na ol i no i stap nogut moa. Ol i stap gut tasol. Em i save helpim ol man i sot long ol samting na ol i kisim inap.”
Jehova i gat pasin daun, olsem na yumi no kirap nogut long em i nolaik tru long man i gat “pasin bilong hambak.” (Sindaun 6:16, 17) Taim Mikal i mekim dispela pasin nogut na i no soim rispek long man God i makim olsem king, em i lus long gutpela samting, em i no inap karim wanpela pikinini man bilong Devit. I go inap long em i dai em i no karim wanpela pikinini. Yumi lainim wanpela bikpela samting tru, a? Olgeta man i laik bai God i ken orait long ol, ol i mas bihainim dispela tok: “Yupela olgeta i mas bihainim pasin bilong daunim yupela yet na i stap aninit long ol arapela manmeri bilong God. Yumi save, ‘God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.’ ”—1 Pita 5:5.