Rot Bilong i Go Klostu Long Man Bilong “Harim Beten”
“Yu save harim beten bilong mipela. Olsem na mipela olgeta manmeri i mas i go long yu.”—SONG 65:2.
1. Wanem samting i mekim na ol man i narapela kain long ol animal? Dispela i opim wanem rot long ol man?
LONG graun i gat ol man na planti tausen kain animal i stap, tasol ol man tasol i save lotuim Krieta bilong olgeta samting. Ol man tasol i luksave olsem ol i mas lotuim God na ol i gat laik long mekim olsem. Dispela i opim rot long yumi long pas gut wantaim Papa bilong yumi long heven, em wanpela gutpela samting tru.
2. Sin i mekim wanem samting nogut long pasin bilong man long pas gut wantaim Man Bilong Wokim em?
2 God i bin wokim man na Em i bin inapim em long toktok wantaim Man Bilong Wokim em. God i wokim Adam na Iv na ol i no gat sin. Olsem na ol inap toktok wantaim God kain olsem wanpela pikinini inap toktok wantaim papa bilong em. Tasol taim ol i mekim sin ol i no inap toktok wantaim Em moa. Adam na Iv i bikhet long God, olsem na ol i no pas gut wantaim em moa. (Stat 3:8-13, 17-24) Olsem wanem? Dispela i makim olsem ol tumbuna pikinini bilong Adam, em ol i gat sin, ol i no inap toktok moa wantaim God? Nogat. Jehova i larim ol i kam klostu long em na toktok wantaim em sapos ol i mekim sampela samting pastaim. Em wanem ol samting?
Ol Samting Man i Mas Mekim Bilong i Go Klostu Long God
3. Ol sinman i mas mekim wanem bilong i go klostu long God? Wanem stori i kamapim dispela samting?
3 Samting i painim tupela pikinini bilong Adam i helpim yumi long save long ol samting sinman i mas mekim na bai em inap i go klostu long God. Kein tupela Abel i laik i go klostu long God long rot bilong mekim ofa long em. God i orait long ofa bilong Abel, tasol em i no orait long ofa bilong Kein. (Stat 4:3-5) Wanem samting i mekim na God i orait long wanpela, tasol narapela nogat? Hibru 11:4 i tok: “Abel i bilip long God, na i mekim ofa long em. Na God i laikim ofa bilong Abel, tasol em i no laikim ofa bilong Kein. Abel i bilip, na long dispela as God i laikim ol presen Abel i givim em. Na dispela i soim yumi olsem God i kolim em stretpela man.” Olsem na i klia tru, bilong man i ken go klostu long God em i mas bilip long Em. Tok Jehova i givim long Kein i givim save long yumi long narapela samting man i mas mekim bilong i go klostu long God: “Sapos yu mekim gutpela pasin, orait bai yu amamas, long wanem, mi orait long ofa bilong yu.” Em nau, God bai orait long pasin bilong Kein long kam klostu long em sapos Kein i mekim gutpela pasin. Tasol Kein i sakim tok kaunsel bilong God, kilim i dai Abel, na em i kamap wanpela tripman. (Stat 4:7-12) Olsem na kirap long bipo yet, em i klia olsem bilong man i ken go klostu long God em i mas bilip long God na mekim gutpela pasin.
4. Yumi mas luksave long wanem samting taim yumi laik i go klostu long God?
4 Sapos yumi laik i go klostu long God yumi mas luksave olsem yumi sinman. Olgeta man i save mekim sin, na sin i save pasim rot bilong man long i go klostu long God. Profet Jeremaia i bin tok long Israel olsem: “Mipela i bin bikhet long yu na mekim sin . . . Yu belhat long mipela na yu pasim yau bilong yu. I olsem yu karamapim yu yet long bikpela klaut na ol prea bilong mipela i no inap i kamap long yu.” (Krai 3:42, 44) Kirap long bipo na i kam inap nau, maski ol man i gat sin, God i bin orait long ol prea bilong ol man i bilip long em na i holim stretpela tingting long bel, na ol i bihainim ol lo bilong em. (Song 119:145) Ol dispela man bilong bipo ol i husat? Yumi inap kisim wanem save long ol beten bilong ol?
5, 6. Yumi ken kisim wanem save long pasin bilong Abraham long i go klostu long God?
5 Wanpela man olsem em Abraham. Yumi save God i orait long pasin bilong Abraham long i go klostu long em, long wanem, God i kolim Abraham olsem “pren bilong mi.” (Aisaia 41:8) Yumi ken kisim wanem save long pasin bilong Abraham long i go klostu long God? Dispela gutpela man i bin toktok wantaim Jehova long husat bai kisim ol samting bilong em taim em i dai, em i tok: “Mi no gat pikinini bilong mi yet. Bai yu mekim wanem na mi kamap man i gat biknem?” (Stat 15:2, 3; 17:18) Long narapela taim, em i kamapim wari bilong em long God bai kisim bek husat taim Em i bagarapim ol man nogut long Sodom na Gomora. (Stat 18:23-33) Na tu, Abraham i bin beten askim God long helpim ol narapela man. (Stat 20:7, 17) Na wankain olsem Abel, sampela taim Abraham i save givim ofa long God taim em i laik toktok wantaim Em.—Stat 22:9-14.
6 Long ol dispela taim, Abraham i no pret long kamapim tingting bilong em long Jehova. Tasol taim em i mekim olsem, em i gat stretpela tingting long em i stap olsem wanem long ai bilong Man Bilong Wokim em. Tingim tok em i bin mekim long pasin daun, em i tok: “O Bikpela, yu no ken kros long planti toktok bilong mi. Mi man nating tasol. Mi no inap tok long wanpela samting.” (Stat 18:27, Jenesis) Dispela i makim gutpela pasin yumi ken bihainim!
7. Ol bilipman i bin prea long Jehova long wanem ol samting?
7 Ol bilipman i bin beten long kain kain samting, na Jehova i harim beten bilong ol. Jekop i bin mekim wanpela beten i olsem wanpela tok promis. Em i askim God long helpim em, na bihain em i mekim tok promis olsem: “Olgeta samting yu givim mi, bai mi tilim long 10-pela hap na givim wanpela hap long yu.” (Stat 28:20-22) Bihain, taim em i laik bungim brata bilong em, em i prea strong long Jehova i mas lukautim em, em i tok: “Mi prea long yu, bai yu ken sambai long mi, na bai brata bilong mi, Iso, i no ken i kam pait long mi. Mi pret, nogut em i kam pait long mipela.” (Stat 32:9-12) Bilipman Jop i bin beten long Jehova long famili bilong em, na em i mekim ol ofa long God bilong helpim ol. Taim 3-pela poroman bilong Jop i mekim sin long toktok ol i mekim, Jop i bin beten bilong helpim ol, na “Bikpela i harim prea bilong Jop.” (Jop 1:5; 42:7-9) Ol dispela stori i helpim yumi long save long ol samting yumi ken beten askim Jehova long en. Na tu, yumi luksave olsem Jehova i redi long harim prea bilong ol man husat i bihainim stretpela pasin bilong beten.
Aninit Long Kontrak Bilong Lo
8. Kontrak bilong Lo i makim wanem pasin bilong bihainim taim ol manmeri i laik i go klostu long Jehova?
8 Jehova i kisim bek lain Israel long Isip na bihain em i givim kontrak bilong Lo long ol. Lo i makim pasin bilong i go klostu long God long rot bilong ol lain pris God i bin makim. Sampela Livai i gat wok long stap pris bilong ol manmeri. Taim bikpela samting bilong kantri olgeta i kamap, i gat wanpela mausman—sampela taim wanpela king o profet—bilong toktok wantaim God long dispela samting long rot bilong beten. (1 Samuel 8:21, 22; 14:36-41; Jeremaia 42:1-3) Olsem: Taim ol i dediketim tempel, King Solomon i bin beten long Jehova. Jehova i soim olsem em i orait long beten bilong Solomon taim glori bilong Em i pulapim tempel na Em i tok: “Oltaim bai mi sambai na redi long harim ol beten yupela i mekim long dispela ples.”—2 Stori 6:12–7:3, 15.
9. Ol manmeri i mas mekim wanem bilong i go klostu long Jehova long haus lotu?
9 Long Lo God i givim long lain Israel, Jehova i makim pasin ol i mas bihainim taim ol i laik i kam long em long haus lotu. Em wanem pasin? Long olgeta moning na apinun hetpris i mas ofaim ol animal na tu em i mas kukim paura i gat gutpela smel long Jehova. Bihain, ol nambatu pris tu i mas mekim dispela wok, tasol ol i no mekim long Bikpela De Bilong God i Tekewe Sin Bilong Ol Manmeri. Sapos ol pris i no mekim olsem bilong soim rispek na ona, orait Jehova i no inap orait long wok lotu bilong ol.—Kisim Bek 30:7, 8; 2 Stori 13:11.
10, 11. Wanem samting i kamapim klia olsem Jehova i bin orait long ol prea bilong ol wan wan man?
10 Olsem wanem? Long Israel long bipo, ol man inap i go klostu long God long rot bilong ol man God i makim na em tasol? Nogat. Baibel i soim olsem Jehova i orait long harim ol beten bilong ol wan wan man. Long prea Solomon i mekim bilong dediketim tempel, em i singaut long Jehova olsem: “Sapos wanpela bilong mipela Israel, ol manmeri bilong yu . . . i litimapim han bilong en na i beten long yu, orait Bikpela, yu stap long ples bilong yu long heven na yu ken harim beten bilong en.” (2 Stori 6:29, 30) Luk i stori long taim Sekaraia, em papa bilong Jon Bilong Baptais, i stap insait long haus lotu na i mekim ofa long smok i gat gutpela smel, na ausait ol bikpela lain manmeri husat i no bilong lain pris ol i “beten i stap.” I luk olsem em i kamap pasin bilong ol manmeri long bung ausait long haus lotu na beten i stap taim ol pris i mekim ofa long smok i gat gutpela smel long Jehova long alta gol.—Luk 1:8-10.
11 Olsem na taim ol man i bihainim stretpela rot bilong i kam long Jehova, em i amamas long harim prea bilong ol man husat i makim maus bilong lain Israel olgeta na bilong ol wan wan man. Long nau yumi no aninit moa long kontrak bilong Lo. Tasol yumi inap kisim save long sampela bikpela samting long pasin bilong prea taim yumi skelim ol samting lain Israel bilong bipo i bin mekim bilong i go klostu long God.
Long Taim Bilong Kongrigesen Kristen
12. Ol Kristen i gat wanem rot bilong i go klostu long Jehova?
12 Long nau yumi bihainim ol pasin Krais Jisas i bin kamapim. Yumi no gat wanpela lain pris long wanpela tempel tru i makim maus bilong olgeta manmeri bilong God. Na i no gat wanpela tempel tru ol man inap lukluk long en taim ol i laik prea long God. Tasol Jehova i kamapim rot we yumi inap kam yet long em. Dispela rot em i wanem samting? Long 29 C.E., taim God i makim Jisas na em i kamap Hetpris, long dispela taim wanpela tempel spirit i kamap na i wok i stap.a Dispela tempel spirit em i nupela rot long i go long Jehova na lotu long em long rot bilong sakrifais bilong Jisas Krais.—Hibru 9:11, 12.
13. Wanem wanpela samting bilong beten i wankain long tempel long Jerusalem na long tempel spirit?
13 Planti samting bilong tempel long Jerusalem i makim stret sampela samting bilong tempel spirit, na beten em i wanpela bilong ol dispela samting. (Hibru 9:1-10) Olsem: Paura ol i kukim long moning na apinun long alta bilong smok i gat gutpela smel long Rum Tambu insait long tempel i makim wanem samting? Buk Kamapim Tok Hait i tok, “smok i gat gutpela smel . . . i makim ol beten bilong ol manmeri bilong God.” (KTH 5:8; 8:3, 4) Holi spirit i kirapim Devit long tok: “Mi laik yu kisim prea bilong mi olsem smok i gat gutpela smel i go long yu.” (Song 141:2) Olsem na insait long pasin Krais i bin kamapim, smok i gat gutpela smel i makim ol prea na ol tok bilong litimapim nem bilong God em Jehova yet i orait long en.—1 Tesalonaika 3:10.
14, 15. Yumi ken tok wanem long pasin bilong i go klostu long Jehova (a) em ol Kristen God i bin makim i save bihainim? (b) em ol “arapela sipsip” i save bihainim?
14 Husat inap i go klostu long God long tempel spirit? Long tempel long Jerusalem, ol pris na lain Livai inap mekim wok insait long namba 2 banis, tasol ol pris tasol inap i go insait long Rum Tambu. Long ol Kristen God i bin makim, em ol bai kisim laip long heven, namba tu banis na Rum Tambu i makim i stap bilong ol long ol samting bilong spirit i narapela kain, na i mekim na ol inap mekim ol prea long God na ol tok bilong litimapim nem bilong em.
15 Olsem wanem long ol “arapela sipsip” husat bai kisim laip hia long graun? (Jon 10:16) Profet Aisaia i bin tok olsem ol manmeri bilong olgeta hap bai kam na lotuim Jehova long “taim bai kamap bihain.” (Aisaia 2:2, 3) Na tu em i tok, “ol manmeri bilong ol arapela kantri” bai i stap wantaim Jehova. Bilong soim olsem God i amamas long pasin bilong ol long i kam long em, em i tok: “Bai mi bringim ol i go long Saion . . . na bai ol i amamas long i stap long haus bilong mi . . . na beten long mi.” (Aisaia 56:6, 7) Kamapim Tok Hait 7:9-15 i stori moa, na i tok long “planti manmeri tru” ol i “bilong olgeta kantri” na ol i bung bilong lotu na beten long God long san na long nait taim ol i sanap i stap long bikpela ples bung bilong tempel spirit. Olgeta wokman bilong God long nau ol i stap fri long i go klostu long God na ol i save olsem God bai harim prea bilong ol, na dispela i save mekim gut bel bilong ol!
God i Save Harim Wanem Kain Beten?
16. Yumi ken kisim wanem save long beten taim yumi skelim ol beten bilong ol Kristen bilong bipo?
16 Ol Kristen bilong bipo ol i manmeri bilong beten. Ol i bin prea long wanem samting? Ol elda Kristen i bin askim God long stiaim ol taim ol i makim ol man bilong holim sampela wok insait long kongrigesen Kristen. (Aposel 1:24, 25; 6:5, 6) Epafras i bin prea bilong helpim ol wanbilip. (Kolosi 4:12) Ol manmeri insait long kongrigesen bilong Jerusalem i bin beten long helpim Pita taim em i stap long kalabus. (Aposel 12:5) Ol Kristen bilong pastaim i bin askim God long strongim ol na bai ol i no pret taim ol man i mekim nogut long ol, ol i tok: “Orait Bikpela, yu mas tingting nau long olgeta tok ol i mekim bilong pretim mipela, na yu mas helpim mipela ol wokboi bilong yu. Olsem na bai mipela i ken strong tru long autim tok bilong yu, na mipela i no ken pret.” (Aposel 4:23-30) Disaipel Jems i tokim ol Kristen long beten askim God long givim savetingting long ol taim ol traim i painim ol. (Jems 1:5) Olsem wanem? Yu save beten long Jehova long ol kain samting olsem?
17. Jehova i save orait long ol beten bilong husat?
17 God i no orait long olgeta beten. Olsem na yumi ken mekim wanem na bai God i orait long ol beten bilong yumi? Ol gutpela manmeri bilong bipo em God i bin harim beten bilong ol, ol i bin kamapim tru tingting bilong ol na ol i gat stretpela tingting long bel. Ol i bilip na ol i kamapim bilip bilong ol long ol gutpela wok ol i mekim. Yumi ken bilip tru olsem Jehova bai harim prea bilong ol man husat i bihainim wankain pasin bilong prea long nau.
18. Bilong God i ken harim beten bilong ol Kristen, ol i mas mekim wanem?
18 I gat narapela samting ol i mas mekim. Aposel Pol i bin stori long dispela samting taim em i tok: “Krais . . . i opim rot bilong yumi ken kamap long Papa.” (Efesus 2:13, 18) Tru tumas, yumi inap i go long Papa long rot bilong Krais tasol.—Jon 14:6; 15:16; 16:23, 24.
19. (a) Wanem taim ofa bilong smok i gat gutpela smel em i samting nogut tru long ai bilong Jehova? (b) Yumi ken mekim wanem na bai ol prea bilong yumi i olsem smok i gat gutpela smel long Jehova?
19 Olsem yumi stori pinis, smok i gat gutpela smel ol pris bilong Israel i bin kukim i makim ol beten God i orait long en, em ol beten bilong ol gutpela wokman bilong God. Tasol sampela taim smok i gat gutpela smel ol Israel i kukim i samting nogut tru long ai bilong Jehova. Olsem taim ol Israel i kamapim smok i gat gutpela smel na long seim taim ol i brukim skru long ol imis. (Esekiel 8:10, 11) Na i wankain long nau, ol beten bilong ol man husat i tok ol i lotuim Jehova tasol long seim taim ol i mekim ol samting i no stret wantaim lo bilong em, beten bilong ol i smel nogut tru long em. (Sindaun 15:8) Olsem na yumi laik bai olgeta samting long laip bilong yumi i stap klin na bai ol prea bilong yumi i olsem smok i gat gutpela smel long God. Jehova i amamas long harim ol beten bilong ol man husat i bihainim ol stretpela tok bilong em. (Jon 9:31) Tasol i gat sampela askim yet i stap. Yumi mas beten olsem wanem? Yumi ken prea long wanem samting? Na God i save bekim ol beten bilong yumi long wanem rot? Stadi i kamap bihain long dispela bai bekim ol dispela askim na sampela askim moa.
[Futnot]
a Lukim Wastaua, Me 15, 2001, pes 27.
Yu Inap Stori Long Dispela?
• Olsem wanem ol sinman i ken i go klostu long God long pasin em i laikim?
• Taim yumi beten, olsem wanem yumi ken bihainim pasin bilong ol bilipman bilong bipo?
• Yumi kisim wanem save long ol prea bilong ol Kristen bilong bipo?
• Long wanem taim ol beten bilong yumi i olsem smok i gat gutpela smel long God?
[Piksa long pes 23]
Bilong wanem God i orait long ofa bilong Abel tasol bilong Kein nogat?
[Piksa long pes 24]
“Mi man nating tasol”
[Piksa long pes 25]
“Bai mi tilim long 10-pela hap na givim wanpela hap long yu”
[Piksa long pes 26]
Olsem wanem? Ol prea bilong yu i olsem smok i gat gutpela smel long Jehova?