“Taim Bilong Las De” Em Wanem Samting?

SAMPELA taim yu save tingting olsem, ‘Wanem samting bai painim mi na ol wanblut na ol pren bilong mi long bihain?’ Planti man i save lukim ol niuspepa na TV samting na bai ol i ken save long ol samting i kamap long graun na dispela inap mekim wanem long i stap bilong ol. Tasol Baibel inap helpim yumi long save tru long as bilong ol samting i kamap. Dispela i olsem, long wanem, bipo yet Baibel i bin tokaut long ol samting i kamap long nau, na tu, long ol samting bai kamap bihain.

Taim Jisas Krais i stap long graun, planti taim em i stori long Kingdom Bilong God. (Luk 4:​43) Ol man i harim tok bilong em ol i laik save long wanem taim tru dispela gutpela Kingdom bai kamap. Tripela de paslain long ol man i kilim Jisas i dai, ol disaipel i askim em: “Wanem mak bai i kamap pastaim, na mipela i ken save, yu laik i kam bek [bilong bosim Kingdom] na dispela graun i laik pinis?” (Matyu 24:3) Jisas i tok God Jehova tasol i save long wanem taim stret Kingdom bai kirap bosim tru graun. (Matyu 24:36; Mak 13:32) Tasol Jisas na sampela man moa i tok profet long ol samting bai kamap long graun na bai i stap olsem mak bilong soim olsem Krais i stap King pinis long Kingdom.

Paslain long yumi skelim ol samting i soim olsem yumi stap long “taim bilong las de” bilong pasin nogut bilong dispela graun, yumi ken stori liklik long wanpela bikpela samting i bin kamap long heven. (2 Timoti 3:1) Jisas Krais i kamap King long heven long yia 1914.a (Daniel 7:​13, 14) Bihain stret long em i kirap bosim Kingdom, Jisas i kirap mekim wanpela wok. Baibel i tok: “Maikel wantaim ol ensel bilong en ol i pait long dispela traipela snek. Na snek wantaim ol ensel bilong en ol i bekim pait long ol.” (KTH 12:7) “Namba wan ensel Maikel” em Jisas Krais taim em i stap long heven.b (Jut 9; 1 Tesalonaika 4:​16) Snek em Satan. Olsem wanem long Satan na ol ensel nogut bilong em long dispela pait? Ol i lus long pait na ol ensel bilong God i “tromoi” ol i kam daun long graun. (KTH 12:9) Olsem na “heven, na . . . olgeta lain i stap long heven,” em ol gutpela pikinini spirit bilong God, ol i amamas. Tasol ol manmeri long graun, ol i no amamas. Baibel i tok profet, “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”​​—KTH 12:12.

Satan i belhat nogut tru na em i bin kamapim bikpela hevi long ol man i stap long graun. Tasol dispela hevi i bilong i stap “sotpela taim tasol.” Baibel i kolim dispela haptaim olsem “taim bilong las de.” Yumi ken amamas olsem klostu nau strong bilong Satan long bosim graun bai pinis olgeta. Tasol wanem samting i soim olsem yumi stap long taim bilong las de?

[Ol Futnot]

[Ol Piksa Kredit Lain long pes 2]

COVER: Foreground: © Chris Stowers/​Panos Pictures; background: FAROOQ NAEEM/​AFP/​Getty Images