‘Ol i Singautim Ol Kaunsil i Kam Bung’

HETPRIS na ol hetman bilong ol Juda i tingting planti. Ol bai mekim wanem bilong pinisim planti toktok ol man i mekim long Jisas Krais? Ol i bin kilim em i dai, tasol nau ol disaipel bilong Jisas i go nabaut long olgeta hap bilong Jerusalem na autim tok long Jisas i kirap bek pinis. Olsem wanem ol inap pasim maus bilong ol disaipel? Bilong skelim dispela samting, hetpris wantaim ol poroman bilong em “i singautim ol kaunsil,” em nambawan kot bilong ol Juda.​—Aposel 5:21.

Long Israel long dispela taim bipo, Gavena Pontius Pailat bilong Rom i stap nambawan bos. Tasol olsem wanem ol kaunsel i wok wantaim Pailat? Ol i bosim wanem ol samting? Kaunsil i gat wanem ol lain long en? Na em i wok olsem wanem?

Kaunsil i Kamap Olsem Wanem?

Tok Grik ol i tanim olsem “ol kaunsil,” mining bilong en i olsem “sindaun wantaim.” Ol i kolim dispela nem long ol bung o miting. Long ol Juda bipo, dispela tok i makim wanpela lain bilong lotu i save harim kot.

Ol lain bilong raitim buk Talmut em ol i bin bungim sampela handet yia bihain long Jerusalem i bagarap long 70 C.E., ol i tok kaunsil bilong ol Juda i bin kirap long bipo tru. Ol i ting ol saveman i bin insait long kaunsil na ol i save bung bilong toktok long ol samting bilong lo bilong ol Juda, na ol i tok em i bin kirap long taim Moses i bin bungim 70 hetman bilong helpim em long bosim lain Israel. (Namba 11:​16, 17) Tasol ol saveman bilong ol samting i bin kamap bipo ol i sakim dispela tingting. Ol i tok, kain samting olsem kaunsil bilong ol Juda long taim bilong ol aposel i bin kirap long taim ol Persia i bosim Israel. Na ol i ting ol lain saveman bilong Talmut ol i no dispela lain kaunsil bilong ol Juda. I luk olsem ol i bilong lain tisa bilong lotu i bin kirap long 200 C.E. samting. Orait kaunsil bilong ol Juda i bin kirap long wanem taim?

Baibel i soim olsem ol lain i bin lusim kalabus long Babilon na kam bek long Juda long 537 B.C.E. ol i gat wanpela lain olsem gavman bilong bosim ol. Nehemia na Esra i bin stori long ol lida, ol hetman, na ol ofisa bilong ol Juda​—ating dispela i as bilong lain kaunsil i bin kamap bihain.​—Esra 10:8; Nehemia 5:7.

Taim ol i pinis long raitim Ol Skripsa Hibru na i kam inap long taim Matyu i raitim Gutnius bilong em, ol dispela yia em taim nogut bilong ol Juda. Long 332 B.C.E., Bikpela King Aleksander i kirap bosim Judia. Taim Aleksander i dai pinis, tupela gavman Grik bilong em​—pastaim lain king bilong Tolemi na bihain lain king bilong Selukus​—​ol i bosim Judia. Long ol stori bilong lain king bilong Selukus i bosim Judia, kirap long 198 B.C.E., em namba wan taim i gat stori bilong lain kaunsil bilong ol Juda. Ating ol i no gat strong long bosim planti samting, tasol ol Juda i pilim olsem ol yet i bosim kantri bilong ol.

Long 167 B.C.E., King Antiokus Namba 4 (Epifanes) bilong lain king bilong Selukus i strong long ol Juda i mas bihainim pasin bilong ol Grik. Em i mekim tempel i kamap doti long rot bilong kukim wanpela pik long alta bilong tempel long Jerusalem bilong mekim ofa long god Sus. Dispela i kirapim bel bilong ol Juda, na ol Makabi i pait na rausim gavman bilong lain king bilong Selukus, na ol i kamapim lain gavman bilong Hasmon.a Long dispela taim, ol saveman bilong lo na ol Farisi​—em ol lida bilong ol manmeri i helpim dispela pait, ol i kisim strong bilong bosim ples na dispela i daunim strong bilong lain pris.

Dispela kaunsil Ol Skripsa Grik i stori long en i wok long kamap long dispela taim. Em bai kamap olsem nesenel gavman na bosim nambawan kot bilong kamapim mining bilong lo bilong ol Juda.

Wok Bilong Bosim Kantri

Long taim bilong ol aposel, Rom i bosim Judia. Tasol ol Juda i stap fri long sampela samting. Em pasin bilong Rom long larim ol kantri i stap aninit long en i bosim ol yet long sampela samting, olsem makim wanem kain gavman bai bosim ol. Olsem na ol ofisa bilong Rom i larim ol kot bilong ol provins i mekim wok bilong ol, na ol i tingim pasin bilong ol dispela lain i narapela kain long ol Rom, na ol i no laik mekim ol samting i kamapim hevi o kros samting. Rom i tingting long kamapim bel isi insait long ol provins em i bosim, na ol i ken i stap gut long Rom, na bilong mekim olsem em i larim ol i bihainim ol pasin na lo bilong ples na bosim provins bilong ol yet. Rom i no mekim planti samting long bosim ol​—em i save makim na tekewe namba bilong hetpris, em presiden bilong kaunsil, na makim takis ol man i mas tromoi. Tasol sapos sampela provins i bikhet long Rom na i laik kirapim kros pait, Rom bai kirap mekim sampela samting. Olsem kot bilong Jisas i makim, i luk olsem Rom i holimpas strong bilong en long kilim i dai ol man i mekim rong.​—Jon 18:31.

Olsem na ol kaunsil i bosim klostu olgeta samting long sindaun bilong ol Juda. Ol i gat ol ofisa olsem plisman bilong holimpas ol man. (Jon 7:32) Ol liklik kot bilong ples i save harim kot bilong ol liklik rong, na sampela samting bilong ples yet, na Rom i no insait long en. Taim ol liklik kot i no inap wanbel na pasim tok long wanpela samting, orait ol kaunsil i mas harim dispela kot, na ol man i no inap senisim tok ol i pasim.

Bilong holim strong bilong bosim ol kot samting, ol kaunsil i mas stap bel isi long provins bilong ol na aninit long ol lo bilong Rom. Tasol sapos ol Rom i ting ol lain politik i mekim sampela pasin bikhet, ol bai kirap mekim ol samting ol yet i laik mekim. Kain samting olsem i bin kamap taim ol soldia bilong Rom i holimpas aposel Pol.​—Aposel 21:​31-40.

Ol Lain Insait Long Kaunsil

Kaunsil i gat 71 man insait long en​—hetpris wantaim 70 bikman bilong ol Juda. Long taim bilong ol Rom, kaunsil i gat ol bikman bilong lain pris (planti ol i Sadyusi), ol lain i gat biknem, na ol saveman bilong lo bilong lain Farisi. Ol bikman bilong lain pris, na sampela man i no pris tasol ol i gat nem, ol i gat strong insait long kaunsil.b Ol Sadyusi i strong long bihainim ol lo, tasol ol Farisi i no strong tumas long mekim olsem, na planti i bilong ol lain nating i gat strong long stiaim tingting bilong ol man. Man bilong raitim stori bilong ol samting bilong bipo, em Josifas, em i tok, ol Sadyusi i bihainim tok bilong ol Farisi, maski ol i no amamas long mekim olsem. Pol i save long pasin bilong tupela lain hia, em narapela i resis long winim narapela, na bilip bilong ol i narapela narapela, na em i mekim wok long dispela taim em i kot long ai bilong kaunsil.​—Aposel 23:​6-9.

Klostu olgeta insait long kaunsil i bilong ol lain i gat biknem, olsem na yumi ken ting ol i save holim dispela wok inap long olgeta taim, na sapos wanpela i dai o ol i rausim em long dispela wok, ol kaunsil yet i save makim husat i kisim ples bilong em. Buk Misna i tok, ol i mas kisim ol nupela memba namel long ol lain “pris, ol Livai, na ol Israel em pikinini meri bilong ol inap maritim ol pris,” em ol Juda husat inap kamapim stret nem bilong ol tumbuna bilong ol bilong kamapim klia olsem ol i no gat hap blut bilong ol narapela lain. Nambawan kot i bosim olgeta haus kot bilong kantri, olsem na yumi ken ting ol man i kisim nem insait long ol liklik kot bilong ples ol i kamap memba insait long kaunsil.

Ol Hap Ol i Bosim na Strong Bilong Ol

Ol Juda i rispek tru long ol kaunsil, na ol jas bilong ol liklik kot i mas orait long olgeta tok kaunsil i pasim, sapos nogat, ol i mas i dai. Bikpela wok bilong ol kaunsil em bilong skelim husat i winim mak bilong i stap pris, na ol samting bilong Jerusalem, na tempel, na lotu ol i mekim long tempel. Ol kaunsil i save bosim Judia tasol. Tasol ol i ting kaunsil i stap nambawan long kamapim insait bilong Lo, olsem na em i holim strong bilong bosim ol komiuniti bilong ol Juda i stap long olgeta hap na makim wanem pasin i stret ol i mas bihainim na wanem pasin i no stret. Olsem: Hetpris wantaim lain kaunsil i givim tok long ol hetman bilong ol haus lotu bilong ol Juda long Damaskus long ol i mas wok gut wantaim long holimpas ol disaipel bilong Krais. (Aposel 9:​1, 2; 22:​4, 5; 26:12) Na olsem tasol, ol Juda i bin kam long Jerusalem bilong mekim bung bilong ol bikpela de bilong lotu, ating ol i kisim ol tok kaunsil i pasim na kisim i go long ol Juda.

Buk Misna i tok, ol kaunsil i bosim olgeta bikpela samting i kamap long Judia, na skelim long kot ol jas i bikhet long tok kaunsil i bin pasim, na kotim ol profet giaman. Kot i sutim tok long Jisas na Stiven long ol i bin tok bilas long God, na long Pita na Jon long ol i laik daunim gavman, na long Pol i bin mekim tempel i kamap doti.​—Mak 14:64; Aposel 4:​15-17; 6:11; 23:1; 24:6.

Kot Bilong Jisas na Ol Disaipel

Long olgeta de ol kaunsil i save harim kot kirap long taim ol i mekim ofa bilong moningtaim i go inap long ofa bilong apinun, tasol long Sabat na ol de holi ol i no wok. Ol i harim kot long san tasol. Taim kot i pasim tok long kilim man i dai, ol i save tokaut long en long de bihain long kot, olsem na ol i no ken mekim dispela kain kot long de paslain long Sabat o bikpela de bilong lotu. Ol man i stap witnes long kot ol i kisim strongpela tok olsem em i bikpela rong tru long kapsaitim blut bilong ol man i no gat asua. Olsem na kot bilong Jisas ol i mekim long nait long haus bilong Kaiafas na pasim tok long kilim em i dai, ol i bin mekim long nait paslain long bikpela de bilong lotu na dispela i kalapim lo na i no stret. Na bikpela rong moa, ol jas yet i wok long painim ol witnes bilong autim tok giaman long kot na ol i kirapim Pailat long tokaut olsem ol i mas kilim Jisas i dai.​—Matyu 26:​57-59; Jon 11:​47-53; 19:31.

Buk Talmut i tok, ol jas i harim kot bilong ol bikpela rong tru, ol i traim long helpim man na ol i no hariap long mekim kot bilong em. Tasol ol jas i no mekim dispela kain kot long Jisas na Stiven. Taim Stiven i sanap long ai bilong kaunsil na autim tok bilong em, bikpela lain i tromoi ston long em na kilim em i dai. Na sapos ol Rom i no bin pasim ol Juda, ol bai i mekim wankain pasin long aposel Pol na kilim em i dai. Ol jas bilong kaunsil i bin pasim tok wantaim long kilim em i dai.​—Aposel 6:12; 7:58; 23:​6-15.

Wan wan jas bilong kaunsil i gat stretpela tingting. Wanpela yangpela hetman i bin toktok wantaim Jisas, ating em i wanpela bilong dispela kaunsil. Tru, em i maniman na dispela i pasim em, tasol ating em i gat ol gutpela pasin, long wanem, Jisas i tokim em long kamap disaipel bilong Em.​—Matyu 19:​16-22; Luk 18:​18, 22.

Nikodemus em i “wanpela hetman bilong ol Juda,” tasol ating em i pret long ol wanwok jas, olsem na em i kam lukim Jisas long nait. Tasol taim Jisas i kot long ai bilong kaunsil, Nikodemus i helpim em long kot na i tokim ol: “Ating lo bilong yumi em i tok long yumi ken kotim nating wanpela man? Nogat. Yumi mas harim tok bilong en pastaim, na bai yumi ken save gut long samting em i bin mekim.” Bihain Nikodemus i bringim “sampela sanda i gat gutpela smel, ol i bin wokim long blut bilong tupela kain diwai,” bilong redim bodi bilong Jisas bilong planim.​—Jon 3:​1, 2; 7:​51, 52; 19:39.

Josep bilong Arimatea, em tu i wanpela bilong kaunsil, em i strongim bel na askim Pailat long em i ken kisim bodi bilong Jisas na em i planim long nupela matmat bilong em yet. Josep i “wet long lukim kingdom bilong God,” tasol em i pret long ol Juda, olsem na em i no laik kamapim long ples klia olsem em i wanpela disaipel bilong Jisas. Tasol Josep i mekim gutpela pasin, olsem em i no vot bilong helpim ol kaunsil long pasim tok long kilim i dai Jisas.​—Mak 15:​42-46; Matyu 27:​57-60; Luk 23:​50-53; Jon 19:38.

Wanpela memba bilong kaunsil, Gamaliel, i gat savetingting na em i tokim ol wanwok jas long larim ol disaipel bilong Jisas i stap. Em i tok: “Nogut yupela i pait long God!” (Aposel 5:​34-39) Wanem samting i pasim ol kaunsil na ol i no luksave olsem God yet i helpim Jisas wantaim ol disaipel bilong em? Ol kaunsil i no laik tokaut olsem Jisas i bin wokim ol mirakel, ol i tok: “Bai yumi mekim wanem? Dispela man i save wokim planti mirakel. Sapos yumi larim em i mekim dispela kain pasin, orait bai olgeta manmeri bai i bilip long em. Na ol Rom bai i kam na bagarapim tempel bilong yumi wantaim ol lain bilong yumi.” (Jon 11:​47, 48) Ol dispela jas bilong nambawan kot i gat strongpela laik long bosim ol man, na ol i no mekim stretpela kot. Na ol bikman bilong lotu i no amamas taim ol disaipel bilong Jisas i mekim orait ol sikman, “ol i bel nogut tru” long ol. (Aposel 5:17) Ol i stap jas, olsem na ol i mas pret long God na mekim pasin i stret, tasol planti bilong ol i paulim kot na mekim pasin giaman.​—Kisim Bek 18:21; Lo 16:​18-20.

Kot Bilong God

Lain Israel i no bihainim Lo Bilong God na ol i sakim Mesaia, olsem na bihain Jehova i rausim ol na ol i no stap moa olsem lain bilong em yet. Long 70 C.E. ol Rom i kam bagarapim Jerusalem wantaim tempel bilong en, na ol i pinisim olgeta lo na pasin ol Juda i stap aninit long en na bihain pinisim kaunsil tu.

Jisas Krais, em Jas Jehova i makim, em bai skelim olsem sampela man bilong kaunsil long taim bilong ol aposel ol inap long kirap bek o nogat, na husat namel long ol i bin mekim sin long holi spirit. (Mak 3:29; Jon 5:22) Yumi ken bilip tru olsem, taim Jisas i skelim ol long kot, em bai mekim long pasin i stret olgeta.​—Aisaia 11:​3-5.

[Ol Futnot]