Askim

Olsem wanem? Ating aposel Pol i surik na lusim bilip Kristen bilong em taim em i tokim ol kaunsil: “Mi man bilong lain Farisi”?

Bilong kisimgut dispela tok bilong Pol long Aposel 23:​6, yumi mas skelim ol tok i stap klostu long en.

Long Jerusalem ol Juda i kam bung na paitim Pol, na bihain Pol i givim tok long dispela lain, olsem: “Mi kamap bikpela long dispela taun hia [Jerusalem]. Mi sumatin bilong Gamaliel, na em i bin skulim mi gut tru long olgeta lo bilong ol tumbuna bilong yumi.” Pastaim ol manmeri i putim yau long tok bilong Pol, tasol bihain ol i belhat long em, olsem na namba wan ofisa bilong ol soldia i kisim Pol i go long haus bilong ol soldia. Taim ol i redi long wipim em, em i tok: “Ating lo i tok long yupela i ken mekim dispela pasin long man bilong kantri Rom, o nogat? Yupela i wipim mi long taim yupela i no kotim mi yet, ating dispela pasin i orait, a?”​—Aposel 21:27–22:29.

Long de bihain, namba wan ofisa i bringim Pol i go long nambawan kot bilong ol Juda. Pol i lukluk strong long ol na em i lukim olsem sampela man bilong kaunsil ol i bilong lain Sadyusi na sampela i bilong lain Farisi. Orait nau em i tok: “Ol brata, mi man bilong lain Farisi, na mi pikinini bilong ol Farisi. Mi bilip olsem, ol man i dai pinis ol bai i kirap bek, na long dispela as tasol nau ol i kotim mi.” Em nau, tok pait i kamap namel long ol Farisi na ol Sadyusi, long wanem, “ol Sadyusi i save tok olsem, ol man i no inap kirap bek long matmat, na i no gat ol ensel na ol spirit i stap. Tasol ol Farisi i bilip long ol dispela samting.” Sampela bilong lain Farisi ol i kros na tok strong olsem: “Mipela i lukim dispela man i no gat rong.”​—Aposel 23:​6-10.

Pol i gat nem olsem Kristen i save wok strong tru, olsem na em i no inap kirapim ol kaunsil long bilip olsem em i wanpela Farisi. Ol Farisi i stap long haus kot ol i no inap orait long wanpela Farisi i lusim bilip liklik o i no bilip long olgeta tok na pasin bilong ol. Olsem na dispela tok bilong Pol olsem em i man bilong lain Farisi, i no makim olsem Pol em i wanpela Farisi tru. Na yumi ken ting ol Farisi i stap long lain kaunsil ol i save na ol i kliagut long tok bilong Pol.

Taim Pol i tok em i bilip olsem ol man i dai pinis ol bai i kirap bek na long dispela as tasol ol i kotim em, Pol i laik tok, long dispela samting tasol em i wankain olsem ol Farisi. Taim i gat tok pait long ol man i dai pinis bai i kirap bek, Pol i laik bai ol man i tingim bilip bilong em i wankain olsem bilong ol Farisi na i no olsem ol Sadyusi, em ol i no bilip long ol man i dai pinis bai kirap bek.

Ol bilip bilong Pol olsem Kristen, i no pait wantaim bilip bilong ol Farisi long ol samting olsem kirap bek long matmat, na ol ensel, na sampela hap bilong Lo. (Filipai 3:5) Olsem na long ol dispela samting Pol inap tok em i man bilong lain Farisi, na ol man insait long lain kaunsil ol i save long as bilong dispela tok bilong em. Em nau, Pol i tokaut long em i bin kamap insait long lain Farisi, long wanem, em i save nambawan kot bilong ol Juda i tingting nogut long em.

Tasol bikpela samting tru na yumi ken save Pol i no lusim bilip liklik, em i olsem: Bihain long dispela Jehova i wok yet long orait long Pol. Long nait bihain long taim Pol i bin mekim dispela tok, “mi man bilong lain Farisi,” Jisas i tokim em: “Yu mas sanap strong, na yu no ken pret. Yu bin autim strong tok bilong mi long Jerusalem, na long wankain pasin yu mas autim tok bilong mi long Rom.” God i orait long Pol, olsem na yumi mas ting olsem Pol i no bin surik na lusim bilip Kristen bilong em, nogat.​—Aposel 23:11.