Yu Inap i Stap Oltaim

KLOSTU olgeta man i bilip long lotu ol i wet long kisim wanpela kain laip bilong i stap oltaim. Tru, ol lotu i gat ol narapela narapela tingting long laip oltaim ol i wet long kisim, tasol astingting bilong ol i wankain​—ol i laik i stap amamas na i gat gutpela sindaun na dai i no ken painim ol. Ating yu tu i laikim olsem, a? Olsem wanem yumi ken save ol dispela bilip i gat as bilong en o nogat? Na bihain ol man bai kisim tru dispela laip oltaim ol i wet long en?

Baibel i soim olsem God i bin putim laik bilong i stap oltaim oltaim long bel bilong namba wan man na meri taim em i wokim tupela. “[God] i putim tingting bilong laip i stap oltaim long bel bilong ol man.”​—Saveman 3:​11, NW.

Tasol bilong inapim laik bilong i stap oltaim oltaim, namba wan man na meri i mas larim God yet i makim wanem samting i stret na wanem samting i no stret. Sapos tupela i bin mekim olsem, Jehova bai tok ol inap kisim laip “i stap oltaim oltaim” long ples em i bin redim bilong tupela, em gaden Iden.​—Stat 2:8; 3:22.

Laip i Stap Oltaim i Lus

Baibel i tok, long dispela gaden God i bin planim “diwai bilong givim gutpela save long wanem samting i gutpela na wanem samting i nogut,” na em i tambuim Adam na Iv long kaikai pikinini bilong en, sapos ol i kaikai, ol i mas i dai. (Stat 2:​9, 17) Sapos Adam na Iv i no kaikai pikinini bilong dispela diwai, dispela bai soim God olsem tupela i daun long wok bos bilong em. Tasol sapos tupela i kaikai, dispela bai makim olsem tupela i sakim wok bos bilong God. Orait Adam na Iv i bikhet long tok bilong Jehova na tupela i helpim Satan, em wanpela ensel i bin bikhet long God. Olsem na i stret God i ting Adam na Iv i no gutpela bilong i stap oltaim oltaim.​—Stat 3:​1-6.

God i bin makim tupela samting bilong Adam na Iv, em laip o indai​—olsem ol i ken stap o ol i no ken i stap. Sapos tupela i bikhet, orait tupela bai i dai na pinis olgeta. Tupela wantaim ol pikinini bilong tupela i no inap i stap oltaim oltaim long rot bilong wanpela majik marasin o wanpela spirit i no save dai.a

Olgeta pikinini bilong Adam i bin kisim hevi long pasin bikhet bilong em. Aposel Pol i stori long samting i kamap long dispela pasin bikhet, em i tok: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.”​—Rom 5:12.

Ol Inap Kisim Bek Laip Oltaim

Aposel Pol i tok piksa olsem ol pikinini bilong Adam i kain olsem ol wokboi nating i bin stap long taim bilong ol aposel. Ol pikinini bilong Adam na Iv i bin kisim sin long tupela, olsem na taim mama i karim ol, ol i kamap “wokboi bilong sin” na ol i bilong i dai tasol. (Rom 5:12; 6:​16, 17) Ol i no gat rot long lusim, tasol Jehova i bin mekim wanpela samting i stret long lo bilong em bilong baim bek ol na bai ol i no ken i stap moa olsem wokboi bilong sin. Pol i tok: “Wanpela man [Adam] i bin kalapim lo, na long dispela sin God i kotim yumi olgeta manmeri. Olsem tasol, wanpela man i mekim stretpela pasin, na God i ting long dispela na i kolim yumi olgeta stretpela man, na yumi stap laip.” Jisas i bin “mekim stretpela pasin” na em i givim nambawan laip bilong em olsem ofa “bilong baim bek olgeta manmeri.” Jehova i tingim dispela ofa bilong Jisas i gat strong long lusim ol man long dispela ‘kot’ i bin tok ol man i gat sin na “ol i mas bagarap olgeta.”​—Rom 5:​16, 18, 19; 1 Timoti 2:​5, 6.

Long dispela as ol saientis i no inap painim rot bilong i stap oltaim oltaim insait long ol jin​—yumi mas painim long narapela rot. Baibel i soim yumi olsem, as tru na ol man i save dai, em samting bilong stretpela pasin na stretpela kot, na i no wanpela jin i stap insait long skin bilong ol. Na samting bilong kamapim bek laip i stap oltaim​—em ofa bilong Jisas bilong baim bek ol man​—em tu i samting bilong lo. Na tu, ofa bilong baim bek ol man em i kamapim klia stretpela pasin na gutpela-pasin-sori bilong God. Orait dispela ofa bai helpim husat na bai ol i ken kisim laip i stap oltaim oltaim?

Ol i No Inap Dai Moa

God Jehova i bin i stap “oltaim oltaim . . . long bipo na long bihain tu.” Em i no save dai. (Song 90:2) Namba wan man em Jehova i bin givim em laip bilong i stap oltaim na em i no inap i dai, em Jisas Krais. Aposel Pol i tok: “Krais i kirap bek pinis long matmat, olsem na bai em i no ken i dai moa. Dai i no gat strong moa bilong daunim em.” (Rom 6:9) Pol i tok long Jisas taim em i kirap bek pinis olsem em i narapela kain tru long ol king bilong graun; Jisas wanpela tasol namel long ol i gat dispela kain laip i no inap pinis. Jisas bai “i stap oltaim oltaim.” Em i gat “strong bilong laip i stap oltaim oltaim” na i no inap bagarap.​—Hibru 7:​15-17, 23-25; 1 Timoti 6:​15, 16.

I no Jisas tasol i kisim dispela gutpela prais. Ol Kristen God i bin makim na ol i bilong i stap king long heven, ol i kisim dispela kain laip taim ol i kirap bek long matmat, wankain olsem Jisas i bin kisim. (Rom 6:5) Aposel Jon i soim yumi olsem God i givim dispela gutpela samting long 144,000 manmeri. (KTH 14:1) Ol tu i kisim laip i stap oltaim oltaim na i no inap pinis. Pol i stori long taim ol i kirap bek olsem: “Man bilong dispela graun em i no inap i go insait long kingdom bilong God . . . Biugel bai i krai, na ol man i dai pinis bai i kirap, na ol i no inap bagarap moa. . . . Dispela bodi i save bagarap, em i mas senis na i stap gut oltaim. Dispela bodi i save dai, em i mas senis na i stap laip oltaim.” Dai i no gat strong moa bilong daunim dispela lain.​—1 Korin 15:​50-53; KTH 20:6.

Dispela tok hait em God i kamapim long ples klia i narapela kain tru. Taim God i bin wokim ol ensel, ol i no kisim dispela kain laip i no inap pinis, maski ol i spirit. Yumi inap save long dispela, long wanem, ol ensel i bihainim Satan long bikhet long God, ol bai i bagarap olgeta. (Matyu 25:41) Tasol ol lain i stap king wantaim Jisas ol i kisim laip oltaim na ol i no inap i dai moa, na dispela i kamapim klia olsem Jehova i bilip tru long ol bai i stap gut long em.

Tasol dispela lain 144,000 em i liklik lain tru taim yumi skelim wantaim planti milion milion manmeri i bin i stap long graun. Orait yumi laik save, 144,000 tasol bai i stap oltaim oltaim? Nogat. Nau yumi ken stori long as na mipela i tok olsem.

Stap Oltaim Long Paradais Long Graun

Buk Kamapim Tok Hait long Baibel i mekim gutpela tok tru long wanpela bikpela lain moa yet i kisim laip i stap oltaim long Paradais long graun. Sampela lain namel long ol, em ol man i bin i dai, tasol ol bai kirap bek na ol i kamap yangpela gen na ol i gat strong. (KTH 7:9; 20:​12, 13; 21:​3, 4) God i bringim ol i go long “wanpela . . . wara bilong givim laip, na em i lait tumas olsem glas. Dispela wara i kamap long sia king bilong God.” Long arere bilong wara i gat ol “diwai bilong givim laip . . . na ol lip bilong diwai ol i bilong mekim orait ol manmeri bilong olgeta lain.” God Jehova i mekim gutpela singaut olsem: “Wanem man nek bilong en i drai, em i mas kam. Man i laik dring, em i mas kam na kisim wara bilong givim laip, em i olsem presen bilong God.”​—KTH 22:​1, 2, 17.

Ol dispela diwai na wara i no gat sampela kain marasin bilong givim laip long man, o samting bilong mekim man i kamap yangpela gen, em sampela man bilong bipo i wok long painim. Ol i makim ol samting God i bin mekim long rot bilong Jisas Krais bambai ol man i ken kamap gutpela olgeta olsem bilong pastaim tru.

God i no bin senisim tingting bilong em long givim laip oltaim long ol man i bihainim tok bilong em. Dispela samting God i tingting pinis long mekim, em bai kamap tru, long wanem, Jehova i save bihainim tok bilong em. Song 37:29 i tok: “Ol stretpela man bai i kisim graun God i givim ol, na bai ol i stap oltaim long en.” Dispela tok promis i kirapim yumi wantaim lain bilong kisim laip long heven long tokaut olsem: “Bikpela, yu God I Gat Olgeta Strong, yu save mekim ol narakain strongpela wok, na taim mipela i lukim mipela i save kirap nogut tru. King bilong olgeta lain manmeri, ol pasin bilong yu ol i stret na i tru olgeta. Bikpela, yu wanpela tasol yu stap holi. Olsem na olgeta manmeri ol i mas pret long yu na litimapim nem bilong yu.”​—KTH 15:​3, 4.

Olsem wanem? Yu laik kisim dispela gutpela prais olsem laip i stap oltaim oltaim? Sapos olsem, orait yu mas i stap gut long King bilong oltaim na bihainim tok bilong em. Yu mas kisim save long Jehova na dispela man em rot bilong kisim dispela laip, em Jisas Krais. Olgeta man i laik bihainim ol lo bilong God long wanem samting i stret na wanem samting i no stret, ol bai kisim dispela prais olsem “laip bilong i stap gut oltaim.”​—Jon 17:3.

[Futnot]

[Blok/Piksa long pes 5]

Wanpela Laik Bilong i Stap Longtaim

Stori bilong Gilgames bilong Babilon, ol man i ting em i bin kamap olsem 2,000 yia paslain long Krais, em i stori long wanpela man i wok long painim rot bilong i stap yangpela inap oltaim oltaim. Ol Isip bilong bipo i bin putim olkain marasin long bodi bilong man i dai pinis na bai bodi i no ken bagarap, long wanem, ol i bilip olsem man i gat wanpela spirit i no save dai, na bihain dispela spirit inap i go insait gen long bodi. Olsem na sampela matmat bilong ol Isip i gat planti samting ol i ting man bai i gat wok long en long laip em i kisim bihain long em i dai.

Sampela Saina i save wokim olkain marasin bilong helpim ol long i stap oltaim. Ol i bilip olsem man i gat wanpela spirit i no save dai, na i luk olsem ol i bin holim dispela bilip kirap long 800 B.C.E. samting; na dispela tingting olsem ol inap i stap oltaim long rot bilong ol majik marasin, em i bin kirap long 400 B.C.E. samting. Sampela handet yia i go pinis, ol man bilong wokim ol dispela kain marasin long Yurop na Arebia ol i wok strong long painim na wokim ol marasin bilong ol yet bilong givim laip oltaim long man. Sampela marasin ol i wokim i gat ol gip nogut long en, olsem asenik, mekuri, na salfa. Yumi no save hamas man i bin i dai taim ol i dring dispela marasin!

Na long bipo i gat ol stori tumbuna long wanpela wara i save kamap long graun na man i dring long en bai i kamap strong gen.

[Blok/Ol Piksa long pes 7]

Laip i Stap Oltaim​—Bai Yumi Les Long En?

Sampela i tok, sapos yumi stap oltaim oltaim bai yumi les tru, olsem yumi mekim nating tasol i go i go na bihain yumi mekim gen ol wankain samting. Ating ol i tingting olsem em bai i wankain olsem i stap na wok bilong ol long nau, planti ol bai les long en na ting i no gat as bilong en. Tasol long Paradais God bai kamapim bek, em i tok promis olsem ol manmeri “bai i sindaun gutpela tumas na amamas i stap.” (Song 37:11) Dispela kain laip bai i opim rot long ol man long kisim save long ol samting Jehova i bin wokim na makim haptaim bilong lain long mekim ol kain kain gutpela wok, na stadi long ol samting, na mekim olkain wok nau yumi gat laik tru long mekim tasol yumi no inap.

Dokta Aubrey de Grey, bilong Cambridge Yunivesiti, em i gat wok long painim rot bilong skruim sampela yia moa long laip bilong ol man, na em i tok: “Ol man i bin skul gut na ol i gat taim bilong mekim wok long ol dispela save, ol i no save les long i stap bilong ol, na ol i ting i no gat pinis bilong ol nupela nupela samting ol i laik mekim.” Tasol maski i olsem, Baibel i tok ol man bai “i no inap save long olgeta samting God tru i mekim long bipo yet i go inap long bihain tru.”​—Saveman 3:​11, NW.