Jehova Bai “Helpim Ol”
“Ol manmeri God i bin makim bilong em yet, na ol i wok long krai long em long olgeta de na long olgeta nait, ating God bai i no helpim ol, a? . . . Nogat tru.”—LUK 18:7.
1. Husat ol i strongim bel bilong yu, na bilong wanem yu tok olsem?
NAMEL long ol Witnes Bilong Jehova long olgeta hap i gat ol man na meri Kristen i bin stap gut long wok bilong Jehova inap planti yia pinis. Olsem wanem? Yu yet i save long sampela bilong ol? Ating yu tingim wanpela lapun sista, em planti yia i go pinis em i kisim baptais na em i save kam yet long olgeta miting. O ating yu tingim wanpela lapun brata em i save sapotim ol bung bilong kongrigesen bilong autim tok long olgeta wik na em i bin mekim olsem inap planti yia pinis. Tru, planti bilong ol i bin ting olsem Armagedon i mas kamap longtaim pinis. Tasol maski pasin nogut bilong dispela graun i stap yet, ol i no bin larim dispela i mekim na ol i lusim bilip, nogat, ol i bilip strong yet long ol promis bilong Jehova na ol i tingting strong yet long “stap strong inap long las de.” (Matyu 24:13) Strongpela bilip bilong ol dispela gutpela wokman bilong Jehova i save strongim bel bilong kongrigesen olgeta.—Song 147:11.
2. Yumi save bel hevi long wanem samting?
2 Tasol sampela taim yumi lukim narapela kain samting i kamap. Sampela Witnes i bin autim tok inap planti yia, tasol bihain, isi isi bilip bilong ol long Jehova i go slek, na ol i no bung moa wantaim kongrigesen Kristen. Yumi bel hevi long ol i bin lusim Jehova, na yumi gat bikpela laik long helpim olgeta wan wan “sipsip i lus” long kam bek long lain bilong em. (Song 119:176; Rom 15:1) Tasol i gat sampela askim olsem: Wanem samting i mekim na planti Witnes i save holimpas bilip bilong ol long ol promis bilong God, tasol i gat sampela ol i lusim bilip na ol i no bung moa wantaim kongrigesen? Yumi yet i ken mekim wanem na bai bilip bilong yumi long “bikpela de bilong Jehova” i kam klostu i ken stap strong yet? (Sefanaia 1:14, NW) Yumi ken tingim wanpela tok piksa i stap long Gutnius bilong Luk.
Wanpela Tok Lukaut Bilong Ol Man i Stap Long “Taim Pikinini Bilong Man i Kam”
3. Tok piksa bilong meri wanpis na jas i stret moa yet long husat? Olsem wanem yumi save long dispela?
3 Luk sapta 18 i stori long tok piksa bilong Jisas long wanpela meri, man bilong em i dai pinis, na wanpela jas. Dispela tok piksa i wankain liklik long tok piksa bilong man i singaut planti taim, em yumi bin stori long en long stadi paslain long dispela. (Luk 11:5-13) Tasol ol ves klostu long tok piksa bilong meri wanpis na jas i soim olsem dispela tok piksa i stret moa yet long ol man i stap long “taim Pikinini Bilong Man i kam” olsem King bilong Kingdom, em haptaim i bin kirap long 1914.—Luk 18:8.a
4. Jisas i stori long wanem samting paslain long em i kamapim dispela tok piksa i stap long Luk sapta 18?
4 Paslain long Jisas i mekim dispela tok piksa, em i tok mak bilong soim olsem em i kam i stap olsem King bilong Kingdom, dispela bai stap ples klia long olgeta hap, wankain olsem “klaut i lait” i “sut i go long olgeta hap bilong skai” i stap ples klia. (Luk 17:24; 21:10, 29-33) Tasol planti man i stap long “taim bilong las de” bai ol i no tingim dispela mak. (Daniel 12:4) Bilong wanem ol i no tingim? Long wankain as na ol man long taim bilong Noa na bilong Lot i no bin tingim ol tok lukaut bilong Jehova. Long dispela taim bipo, ol man i save ‘kaikai na dring, ol man i maritim ol meri, baim na salim ol samting, planim ol gaden, wokim ol haus, i go inap long taim ol i bagarap.’ (Luk 17:26-29) Ol i dai, long wanem, ol i tingim ol dispela samting tasol na ol i no tingim laik bilong God. (Matyu 24:39) Long nau tu, ol man i save tingim tasol ol samting ol i mas mekim long olgeta de na ol i no luksave long dispela mak i soim olsem pinis bilong ol pasin nogut bilong dispela graun i klostu.—Luk 17:30.
5. (a) Jisas i givim tok lukaut long husat? Bilong wanem em i mekim olsem? (b) Wanem samting i mekim na sampela i bin lusim bilip bilong ol?
5 Jisas i bin wari olsem ol disaipel bilong em, ol tu bai larim ol samting bilong graun bilong Satan i pulim ol na ol i “go bek” long ol samting ol i bin lusim. (Luk 17:22, 31) Na tru tumas, dispela samting i bin painim sampela Kristen. Inap planti yia ol i bin wetim dispela de bilong Jehova i pinisim ol pasin nogut bilong dispela graun. Tasol taim Armagedon i no kamap long taim ol i ting em bai kamap, ol i bel hevi. Ol i no tingim moa olsem de bilong Jehova long mekim kot i kam klostu pinis. Ol i no strong moa long autim tok na isi isi ol i insait gen long ol samting bilong dispela graun na nau ol i no gat taim bilong tingim ol samting bilong spirit. (Luk 8:11, 13, 14) Bihain ol i “go bek” long ol samting ol i lusim pinis. Sori tru!
Mas “Beten Oltaim”
6-8. (a) Stori long tok piksa bilong meri wanpis na jas. (b) Jisas i kamapim wanem mining bilong dispela tok piksa?
6 Yumi ken mekim wanem na bai strongpela bilip bilong yumi long truim bilong ol tok bilong Jehova i no ken i go slek? (Hibru 3:14) Jisas i bekim dispela askim bihain stret long em i tokim ol disaipel long ol i no ken go bek long ol samting nogut bilong dispela graun bilong Satan.
7 Luk i stori long Jisas i “givim wanpela tok piksa long ol, bilong lainim ol long ol i mas beten long olgeta taim, na ol i no ken les.” Jisas i tok: “Long wanpela taun, wanpela jas i stap. Dispela jas i no save pret long God, na em i no save tingting tumas long ol man tu. Na wanpela meri, man bilong en i dai pinis, em i stap long dispela taun. Oltaim em i save kam long dispela jas na i tokim em, ‘Birua bilong mi em i laik bagarapim mi. Yu mas helpim mi long kot.’ Pastaim dispela jas i no laik helpim em. Tasol bihain em i ting olsem, ‘Mi no pret long God, na mi no tingting tumas long ol man. Tasol dispela meri, . . . oltaim em i save givim hevi long mi. Ating mobeta mi mas helpim em long kot. Nogut em i wok long kam oltaim oltaim, na bihain mi les olgeta long harim toktok bilong en.’ ”
8 Orait nau Jisas i kamapim mining bilong dispela tok piksa. Em i tok: “Yupela i harim dispela tok bilong dispela jas nogut. Orait olsem wanem? Ol manmeri God i bin makim bilong em yet, na ol i wok long krai long em long olgeta de na long olgeta nait, ating God bai . . . i no helpim ol kwik, a? Nogat tru. . . . Em bai i helpim ol kwiktaim. Tasol taim Pikinini Bilong Man i kam, em bai i lukim ol manmeri i stap long graun ol i bilip, o nogat?” —Luk 18:1-8.
“Helpim Mi Long Kot”
9. Wanem bikpela samting bilong tok piksa bilong meri wanpis na jas i stap ples klia?
9 Bikpela samting bilong dispela tok piksa i stap ples klia. Meri wanpis, jas, na Jisas tu, i kamapim dispela samting. Meri i tok. “Yu mas helpim mi long kot.” Jas i tok: “Ating mobeta mi mas helpim em long kot.” Jisas i askim: “Orait olsem wanem? . . . Ating God bai i no helpim ol, a? . . . Nogat tru.” Na Jisas i tok long Jehova olsem: “Em bai i helpim ol kwiktaim.” (Luk 18:3, 5, 7, 8) Long wanem taim tru bai God i mekim dispela wok?
10. (a) Long taim bilong ol aposel, wok bilong bekim rong i bin kamap long wanem taim? (b) Wok bilong mekim stretpela kot na helpim ol wokboi bilong God long nau, dispela bai kamap olsem wanem na long wanem taim?
10 Long taim bilong ol aposel, “taim bilong God i bekim rong” na mekim stretpela kot, i bin kamap long 70 C.E. taim Jerusalem na tempel bilong en i bagarap. (Luk 21:22) Long lain bilong God long nau, wok bilong mekim stretpela kot na helpim ol, dispela bai kamap long “bikpela de bilong Jehova.” (Sefanaia 1:14, NW; Matyu 24:21) Long dispela taim, Jehova “bai i bekim hevi long ol man i save givim hevi” long ol manmeri bilong em, na “[Jisas Krais] bai i mekim save long ol man i no laik save long God na i no bihainim gutnius bilong Jisas, Bikpela bilong yumi.”—2 Tesalonaika 1:6-8; Rom 12:19.
11. Olsem wanem Jehova bai helpim yumi “kwiktaim”?
11 Tasol wanem mining bilong dispela tok bilong Jisas olsem Jehova bai helpim yumi “kwiktaim”? Baibel i soim olsem maski Jehova i stap isi na “wet wet,” em bai kirap kwiktaim na helpim yumi long taim stret bilong mekim olsem. (Luk 18:7, 8; 2 Pita 3:9, 10) Long taim bilong Noa, taim Bikpela Tait i kamap, Jehova i no wet moa, kwiktaim ol man nogut i bagarap. Na olsem tasol, long taim bilong Lot, taim paia i kam daun long heven, ol man nogut i bagarap. Jisas i tok: “Wankain pasin tasol bai i kamap long de Pikinini Bilong Man i kamap ples klia.” (Luk 17:27-30) Long dispela taim, “wantu tasol samting bilong bagarapim” ol man nogut bai i kamap long ol. (1 Tesalonaika 5:2, 3) Tru tumas, yumi ken bilip strong olsem God i no ken abrusim dispela taim em i bin makim bilong bagarapim dispela graun bilong Satan, nogat.
“Helpim” Yumi
12, 13. (a) Long tok piksa bilong meri wanpis na jas, Jisas i kamapim klia wanem samting na dispela i skulim yumi long sampela pasin bilong Jehova? (b) Bilong wanem yumi ken bilip strong olsem Jehova bai harim ol beten bilong yumi na helpim yumi?
12 I gat sampela bikpela tok i tru moa em tok piksa bilong Jisas long meri wanpis na jas i kamapim. Taim Jisas i kamapim insait bilong dispela tok piksa, em i tok: “Yupela i harim dispela tok bilong dispela jas nogut. Orait olsem wanem? Ol manmeri God i bin makim bilong em yet, . . . ating God bai i no helpim ol, a? . . . Nogat tru.” Tasol Jisas i no tok Jehova i wankain long jas long pasin Em i mekim long ol bilipman, nogat. Jisas i kamapim klia olsem God i narapela kain long jas, na long dispela rot Jisas i skulim ol disaipel long sampela pasin bilong Jehova. Wanem sampela pasin bilong Jehova na Jas i narapela narapela?
13 Jas long tok piksa bilong Jisas em i “jas nogut,” tasol “God em i gutpela jas na em i save mekim stretpela kot.” (Song 7:11; 33:5) Dispela jas i no tingim dispela meri wanpis, tasol Jehova i save tingim olgeta man wan wan. (2 Stori 6:29, 30) Jas i no laik helpim meri wanpis, tasol Jehova i amamas—yes, em i gat bikpela laik—long helpim ol man i mekim wok bilong Em. (Aisaia 30:18, 19) Yumi kisim wanem skul long dispela? Sapos jas nogut i harim singaut bilong meri wanpis na i helpim em long kot, yumi ken bilip strong olsem Jehova bai harim beten bilong ol manmeri bilong em na helpim ol.—Sindaun 15:29.
14. Bilong wanem yumi no ken lusim bilip long de bilong God long mekim kot i kam klostu pinis?
14 Olsem na ol man husat i no bilip moa olsem de bilong God long mekim kot i kam klostu, ol i mekim pasin kranki stret. Bilong wanem yumi tok olsem? Taim ol i lusim bilip long “bikpela de bilong Jehova” i kam klostu, i olsem ol i no bilip moa long Jehova bai truim ol tok promis bilong em. Tasol i no gat wanpela man inap tru long tok olsem God i no save bihainim tok bilong em, nogat. (Jop 9:12) Wanpela gutpela askim i olsem: Bai yumi yet i stap gut long God na holimpas pasin bilong bilip? Dispela em wanpela askim Jisas i kamapim long pinis bilong tok piksa bilong meri wanpis na jas.
‘Em Bai i Lukim Ol Manmeri i Stap Long Graun Ol i Gat Dispela Bilip, o Nogat?’
15. (a) Jisas i kamapim wanem askim? Bilong wanem em i kamapim dispela askim? (b) Yumi mas givim wanem askim long yumi yet?
15 Jisas i kamapim askim olsem: “Taim Pikinini Bilong Man i kam, em bai i lukim ol manmeri i stap long graun ol i [“gat dispela,” NW] bilip, o nogat?” (Luk 18:8) Taim Jisas i tok long ‘dispela bilip,’ em i makim bilip i kain olsem bilong dispela meri wanpis. Jisas i no bekim dispela askim bilong em. Em i kamapim dispela askim na bai ol disaipel bilong em i ken tingim bilip bilong ol yet i wanem kain. Olsem wanem? Bilip bilong ol i wok long go slek na ol i laik go bek long ol samting bilong dispela graun ol i lusim pinis? O bilip bilong ol i kain olsem bilip bilong dispela meri wanpis? Long nau, yumi tu i mas askim yumi yet, ‘Wanem kain bilip “Pikinini Bilong Man” i save lukim long bel bilong mi?’
16. Meri wanpis i gat wanem kain bilip?
16 Bilong yumi ken stap namel long ol man em Jehova bai helpim ol, yumi mas bihainim pasin bilong dispela meri wanpis. Em i gat wanem kain bilip? Em i kamapim bilip bilong em long rot bilong go planti taim “long dispela jas na i tokim em, ‘Birua bilong mi em i laik bagarapim mi. Yu mas helpim mi long kot.’ ” Dispela meri wanpis i bin wok long singaut planti taim bambai dispela jas nogut i ken helpim em. Na olsem tasol, ol wokboi bilong God long nau i ken bilip strong olsem Jehova bai helpim ol—maski i olsem ol i bin wet longtaim tru, winim taim ol i bin ting ol i mas wet long en. Na ol i soim olsem ol i bilip strong long ol tok promis bilong God long rot bilong beten oltaim—“ol i wok long krai long em long olgeta de na long olgeta nait.” (Luk 18:7) Tru tumas, sapos wanpela Kristen i lusim pasin bilong beten askim Jehova long mekim stretpela kot, em bai kamapim olsem em i no bilip moa olsem Jehova bai kirap na mekim wok bilong helpim ol wokboi bilong em.
17. Wanem sampela as na oltaim yumi mas beten na bilip strong olsem de bilong Jehova long mekim kot bai kamap?
17 Stori bilong dispela meri wanpis i kamapim sampela as moa na yumi mas beten oltaim. Tingim olsem wanem yumi narapela kain long dispela meri: Meri i go planti taim long jas, maski i no gat wanpela i strongim em long mekim olsem, tasol yumi gat Tok Bilong God bilong strongim yumi long “beten long olgeta taim.” (Rom 12:12) Meri i no save jas bai helpim em o nogat, tasol Jehova i promis pinis olsem em bai helpim yumi. Long maus bilong profet bilong em, Jehova i tok: “Yu ting bai em i no inap kamap kwik, tasol yu mas wet liklik na em bai i kamap.” (Habakuk 2:3; Song 97:10) Meri wanpis i no gat wanpela bilong helpim em long askim jas. Tasol yumi gat wanpela strongpela helpim, em Jisas, “em i stap long han sut bilong God, na em i save askim God long helpim yumi.” (Rom 8:34; Hibru 7:25) Olsem na sapos meri wanpis i bin wok long askim askim na em i bilip olsem jas bai helpim em, orait yumi tu i mas bilip yet olsem de bilong Jehova long mekim kot bai kamap tru!
18. Olsem wanem beten bai strongim bilip bilong yumi na helpim yumi long de bilong Jehova long mekim kot?
18 Tok piksa bilong meri wanpis i lainim yumi olsem pasin bilong beten em i insait long pasin bilong bilip, na tu, pasin bilong beten oltaim inap helpim yumi long winim ol samting em inap daunim bilip bilong yumi. Tasol dispela i no makim olsem sapos yumi mekim planti beten nating long ai bilong ol man, dispela bai mekim na yumi no lusim bilip, nogat. (Matyu 6:7, 8) Taim bel i kirapim yumi long beten, long wanem, yumi luksave olsem yumi mas bilip na wet long God long helpim yumi, orait nau beten i helpim yumi long go klostu long God na i strongim bilip bilong yumi. Na tu, yumi mas i gat bilip na bai God i ken kisim bek yumi, olsem na Jisas i strongim ol disaipel long ol i mas “beten long olgeta taim, na ol i no ken les”! (Luk 18:1; 2 Tesalonaika 3:13) Tru, “bikpela de bilong Jehova” bai kamap, maski yumi beten long en o nogat. Tasol bilong yumi wan wan yet i ken kisim helpim na abrusim bagarap long pait bilong God, yumi mas bilip strong, bihainim stretpela pasin, na beten.
19. Yumi save mekim wanem bilong kamapim olsem yumi bilip strong long God bai mekim wok bilong “helpim” yumi?
19 Olsem yumi stori pinis, Jisas i askim: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?” Wanem bekim bilong dispela askim? Bekim bilong dispela askim i olsem: Yumi ken amamas olsem long olgeta hap bilong graun long nau, planti milion gutpela wokboi bilong Jehova i save beten, stap isi, na i no les kwik, na long dispela rot ol i kamapim klia olsem ol i gat dispela kain bilip! Tru tumas, maski dispela graun bilong Satan i putim hevi long yumi, yumi save bilip strong olsem God bai ‘helpim ol manmeri God i bin makim bilong em yet.’
[Futnot]
a Bilong kisimgut insait bilong dispela tok piksa, ritim Luk 17:22-33. Tingim olsem wanem dispela tok “Pikinini Bilong Man” long Luk 17:22, 24, 30 i helpim yumi long bekim askim em Luk 18:8 i kamapim.
Yu Inap Tingim?
• Wanem samting i mekim na sampela Kristen i bin lusim bilip?
• I gat wanem as na yumi ken bilip strong olsem de bilong Jehova bilong mekim kot i kam klostu pinis?
• I gat wanem as na yumi mas beten oltaim?
• Olsem wanem pasin bilong beten oltaim bai helpim yumi na yumi no lusim bilip?
[Piksa long pes 26]
Tok piksa bilong meri wanpis na jas i lainim yumi long wanem samting?
[Ol Piksa long pes 29]
Planti milion manmeri long nau ol i bilip strong olsem God bai “helpim ol”