‘Kirap Bek Bilong Namba Wan Taim’ i Wok Long Kamap Nau!

“Ol man i bilip long Jisas na i dai pinis, ol bai i kirap bek pastaim.”​—1 TESALONAIKA 4:16.

1, 2. (a) Wanem gutpela samting bai painim ol man i dai pinis? (b) I gat wanem as na yu bilip long kirap bek? (Lukim sta.)

“OL man i gat laip . . . i save bai ol i dai.” Kirap long taim Adam i bin mekim sin, dispela samting i save painim ol man. Kirap long bipo na i kam inap long nau, olgeta manmeri i save olsem bihain bai ol i dai, na planti i save tingting: ‘Wanem samting i kamap bihain long dispela? Ol man i dai pinis ol i stap olsem wanem?’ Baibel i tok: “Ol man i dai pinis, ol i no inap save long wanpela samting.”​—Saveman 9:​4, 5.

² Olsem wanem? Gutpela samting inap painim ol man i dai pinis? Yes. Bilong laik bilong God long pastaim tru i ken kamap, gutpela samting i mas painim ol man i dai pinis. Insait long planti handet yia, ol gutpela wokman bilong God i bilip long tok promis bilong Jehova long wanpela Pikinini bai kamap husat bai bagarapim Satan na pinisim ol samting nogut em i bin kamapim. (Stat 3:15) Planti bilong ol dispela gutpela man ol i dai pinis. Ol i mas kirap bek bambai ol i ken lukim truim bilong dispela tok promis na ol narapela tok promis Jehova i bin mekim. (Hibru 11:13) Olsem wanem? Dispela samting inap kamap? Yes, em inap kamap. Aposel Pol i tok: “God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Pol i kirapim bek wanpela yangpela man, nem bilong em Yutikus, em i bin pundaun long windo bilong namba 3 plua i go daun na “em i dai pinis.” Dispela em i laspela bilong 9-pela man i kirap bek em Baibel i stori long en.​—Aposel 20:​7-​12.a

3. Taim yu ritim tok bilong Jisas long Jon 5:​28, 29, olsem wanem dispela i mekim gut bel bilong yu yet? Bilong wanem yu tok olsem?

³ Dispela 9-pela stori bilong kirap bek i kamapim as na yumi ken bilip long tok bilong Pol. Na tu, ol i strongim yumi long bilip long tok bilong Jisas: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:​28, 29) Dispela tok i mekim gut bel bilong yumi, a? Na dispela tok i mekim gut bel bilong planti milion manmeri em wanpela long famili bilong ol i dai pinis!

4, 5. Baibel i tok long wanem narapela narapela kirap bek? Dispela stadi bai skelim wanem kirap bek?

⁴ Klostu olgeta man i kirap bek, ol bai kirap bek long graun i gat bel isi long en aninit long Kingdom Bilong God. (Song 37:​10, 11, 29; Aisaia 11:​6-9; 35:​5, 6; 65:​21-​23) Tasol sampela narapela man i mas kirap bek paslain long dispela. Pastaim Jisas Krais i mas kirap bek bilong givim pe bilong ofa bilong em long God. Jisas i dai na kirap bek long 33 C.E.

⁵ Bihain long dispela, “lain Israel tru bilong God” em God i bin makim long holi spirit, ol i mas bung wantaim Bikpela Jisas Krais long heven we ol bai “stap wantaim Bikpela oltaim oltaim.” (Galesia 6:16; 1 Tesalonaika 4:17) Baibel i kolim dispela olsem “kirap bek i kamap pastaim” o ‘kirap bek bilong namba wan taim.’ (Filipai 3:​10, 11, NW; KTH 20:6) Taim dispela kirap bek bilong namba wan taim i pinis, em i taim bilong planti milion manmeri long kirap bek long graun na kisim laip oltaim long Paradais. Olsem na maski yumi wet long kisim laip long heven o long graun, yumi laik save long ‘kirap bek bilong namba wan taim.’ Em i wanem kain kirap bek? Em i kamap long wanem taim?

“Bai Ol i Gat Wanem Kain Bodi?”

6, 7. (a) Paslain long ol Kristen God i bin makim i ken i go long heven, wanem samting i mas kamap? (b) Taim ol i kirap bek, ol bai kisim wanem kain bodi?

⁶ Long namba 1 pas Pol i bin raitim long ol Korin, em i kamapim wanpela askim long kirap bek bilong namba wan taim. Em i tok: “Ol man i dai pinis, bai ol i kirap bek olsem wanem? Bai ol i gat wanem kain bodi taim ol i kirap bek?” Em i bekim ol dispela askim na tok: “Taim yu planim pikinini bilong wit samting, dispela pikinini i mas i dai pastaim, na bai em i kisim laip. . . . Na long laik bilong em yet, God i save givim han na skin na ol lip samting long olgeta kain pikinini kaikai na gras na diwai samting. . . . Bilas bilong ol samting bilong skai [“heven,” NW] em i wanpela kain, na bilas bilong ol samting bilong graun em i narapela kain.”​—1 Korin 15:​35-​40.

⁷ Ol tok bilong Pol i soim olsem ol Kristen God i bin makim ol long holi spirit, ol i mas i dai pastaim na bai ol i ken kisim laip long heven. Taim ol i dai, bodi bilong graun i tanim i kamap graun gen. (Stat 3:19) Long taim God i makim, ol bai kirap bek na kisim bodi i stret long i stap bilong ol long heven. (1 Jon 3:2) God i givim laip oltaim long ol na ol i no inap i dai. Dispela i no samting ol i kisim taim mama i karim ol, kain olsem ol i kisim wanpela spirit i no save dai, nogat. Pol i tok: “Dispela bodi i save dai, em i mas senis na i stap laip oltaim.” Laip i no inap pinis em i presen i kam long God, na ol man i insait long kirap bek bilong namba wan taim ol i kisim dispela laip.​—1 Korin 15:​50, 53; Stat 2:7; 2 Korin 5:​1, 2, 8.

8. Olsem wanem yumi save God i no makim lain 144,000 long narapela narapela lotu?

⁸ I gat 144,000 manmeri tasol i insait long kirap bek bilong namba wan taim. Jehova i kirap makim ol long Pentikos bilong yia 33 C.E., bihain liklik long em i kirapim bek Jisas. Olgeta bilong ol i gat “nem bilong Pikinini Sipsip na nem bilong Papa bilong en, dispela nem God i bin raitim long pes bilong ol.” (KTH 14:​1, 3) Olsem na God i no makim ol long planti narapela narapela lotu. Olgeta ol i Kristen, na ol i amamas long holim nem bilong Papa​—em Jehova. Taim ol i kirap bek, ol i kisim wok long heven. Ol i amamas tru long ol i ken wok klostu long God.

Em i Wok Long Kamap Long Nau?

9. Olsem wanem Kamapim Tok Hait 12:7 na 17:14 i helpim yumi long save long taim kirap bek bilong namba wan taim i stat?

⁹ Dispela namba wan kirap bek i kamap long wanem taim? I gat sampela samting i kamapim klia tru olsem em i wok long kamap long nau. Olsem, skelim tupela sapta bilong Buk Kamapim Tok Hait. Pastaim lukim Kamapim Tok Hait sapta 12. Long dispela sapta yumi ritim olsem taim Jisas Krais i kamap king, em wantaim ol ensel holi bilong em, ol i pait long Satan na ol spirit nogut bilong em. (KTH 12:​7-9) Olsem nius Wastaua i bin kamapim planti taim, dispela pait i kirap long 1914.b Tasol dispela sapta i no tok olsem ol Kristen God i bin makim i helpim Jisas long dispela pait i kamap long heven. Nau lukim Kamapim Tok Hait sapta 17. Dispela sapta i tok, taim ‘Bikpela Babilon’ i bagarap pinis, Pikinini Sipsip bai i daunim ol lain man. Na em i tok moa: “Ol lain em i bin singautim ol na em i bin makim ol bilong em yet na ol i save bihainim tru tok bilong em, ol dispela man bai i win wantaim Pikinini Sipsip long dispela pait.” (KTH 17:​5, 14) Sapos ol manmeri bilong ‘lain em i bin singautim na makim’ i stap wantaim Jisas taim em i bagarapim tru graun bilong Satan, orait yumi save olsem ol i mas kirap bek pinis na i stap. Olsem na ol Kristen God i bin makim, em ol i dai paslain long Armagedon, ol i kirap bek namel long 1914 na Armagedon.

10, 11. (a) Lain 24 hetman ol i husat? Wanpela bilong ol i tok wanem long Jon? (b) Dispela i givim wanem save long yumi?

¹⁰ Olsem wanem? Yumi inap makim taim dispela kirap bek bilong namba wan taim i stat? Buk Kamapim Tok Hait 7:​9-​15 i givim sampela save long yumi. Long ol dispela ves aposel Jon i tok long samting olsem driman em i lukim “planti manmeri tru ol i bung i stap, na i no inap man i kaunim namba bilong ol.” Wanpela bilong 24 hetman i tokim Jon long dispela planti manmeri tru ol i husat, na ol dispela hetman ol i makim lain 144,000 i wok king wantaim Krais long heven.c (Luk 22:​28-​30; KTH 4:4) Jon bai kisim laip long heven, tasol taim dispela hetman i toktok long em, em i stap yet long graun, olsem na long dispela samting olsem driman, Jon i makim ol Kristen God i bin makim ol long holi spirit na ol i stap yet long graun na ol i no kisim yet laip long heven.

¹¹ Wanpela bilong 24 hetman i toksave long Jon long bikpela lain manmeri ol i husat, orait dispela i givim wanem save long yumi? I luk olsem ol dispela Kristen insait long lain 24 hetman husat i kirap bek pinis, ol i insait long wok bilong kamapim ol tok i tru bilong God long nau. Bilong wanem dispela em i bikpela samting? Long wanem, long 1935 ol Kristen God i bin makim i kisim save long bikpela lain manmeri ol i husat tru. Sapos wanpela bilong 24 hetman i kamapim dispela bikpela tok i tru, em i mas kirap bek na i stap long heven paslain long 1935. Dispela i makim olsem kirap bek bilong namba wan taim i stat long kamap namel long 1914 na 1935. Tasol olsem wanem? Yumi inap kolim wanpela yia stret em dispela samting i bin kamap?

12. Stori long as na yumi ken ting Epril samting bilong 1918 em taim kirap bek bilong namba wan taim i bin stat.

¹² Ating nau em i gutpela long skelim narapela samting long Baibel i kain olsem dispela. Long Oktoba samting bilong 29 C.E., God i makim Jisas Krais long kamap King long Kingdom Bilong God. Inap 3 na hap yia bihain, long Epril samting bilong 33 C.E., em i kirap bek olsem wanpela strongpela spirit. Orait olsem wanem? Jisas i kamap King long Oktoba samting bilong 1914, olsem na yumi inap ting kirap bek bilong ol gutpela disaipel bilong em i stat long 3 na hap yia bihain, em long Epril samting bilong 1918? Em wanpela samting bilong tingting long en, a? Tru, yumi no inap kamapim klia dispela samting long rot bilong Baibel, tasol dispela i no pait wantaim ol narapela skripsa i soim olsem kirap bek bilong namba wan taim i bin stat bihain liklik long Krais i kam i stap.

13. Olsem wanem 1 Tesalonaika 4:​15-​17 i soim olsem kirap bek bilong namba wan taim i stat long kirap bilong taim Krais i kam i stap?

¹³ Olsem: Pol i tok: “Taim Bikpela i kam bek, yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat. God bai i tok strong, na namba wan ensel bai i singaut, na biugel bilong God bai i krai. Na Bikpela bai i lusim heven na i kam daun. Na ol man i bilip long Jisas na i dai pinis, ol bai i kirap bek pastaim. Long dispela taim yumi manmeri i gat laip na i stap yet, yumi bai i go antap long klaut wantaim ol dispela manmeri, na yumi olgeta bai i bungim Bikpela. Na yumi bai i stap wantaim Bikpela oltaim oltaim.” (1 Tesalonaika 4:​15-​17) Tok Grik ol i tanim olsem “taim Bikpela i kam bek,” mining tru bilong en i olsem “taim Bikpela i kam i stap.” Tasol Pol i no toktok long samting i kamap long pinis bilong taim Krais i kam i stap. Olsem na ol Kristen God i bin makim, em ol i dai paslain long Krais i kam i stap, ol i kirap bek long heven paslain long lain husat i stap laip yet taim Krais i kam i stap. Dispela i makim olsem kirap bek bilong namba wan taim i mas stat long kirap bilong taim Krais i kam i stap, na i wok long kamap yet. (1 Korin 15:23) Ol man i kirap bek long namba wan taim ol i no kirap bek long wankain taim, nogat, kirap bek bilong ol i wok long kamap insait long wanpela haptaim.

‘Ol i Givim Waitpela Klos Long Olgeta Wan Wan’

14. (a) Truim bilong ol samting Buk Kamapim Tok Hait sapta 6 i stori long en i kamap long wanem taim? (b) Kamapim Tok Hait 6:9 i stori long wanem samting?

¹⁴ Tingim tu ol tok i stap long Buk Kamapim Tok Hait sapta 6. Jisas i sindaun long hos olsem King i winim pait. (KTH 6:2) Ol lain man i insait long ol bikpela pait tru. (KTH 6:4) Long planti hap i gat bikpela hangre. (KTH 6:​5, 6) Ol bikpela sik i bagarapim ol manmeri. (KTH 6:8) Olgeta dispela tok profet i makim stret ol samting i kamap long graun kirap long 1914. Tasol wanpela narapela samting tu i kamap. KTH Sapta 6 i stori long wanpela alta bilong wokim ofa long en. Long as bilong alta i gat “tewel [“laip,” NW] bilong ol manmeri i dai pinis . . . Bipo ol dispela manmeri i bin holim strong tok bilong God, na ol i autim dispela tok na ol birua i kilim ol i dai.” (KTH 6:9) “Blut i save givim laip long olgeta man na animal,” olsem na samting i stap long as bilong alta i makim blut bilong ol gutpela wokboi bilong Jisas em ol man i bin kilim ol i dai, long wanem, ol i givim bel long wok autim tok na i no pret.​—Wok Pris 17:11.

15, 16. Bilong wanem ol tok bilong Kamapim Tok Hait 6:​10, 11 i makim kirap bek bilong namba wan taim?

¹⁵ Olsem blut bilong stretpela man Abel i bin mekim, blut bilong ol dispela Kristen i bin dai, i krai long God bilong em i ken bekim rong. (Stat 4:10) ‘Ol i singaut strong olsem, “Bikpela King bilong olgeta samting, yu save mekim gutpela na stretpela pasin oltaim. Yu stap holi, na pasin bilong yu em i tru olgeta. Hamas taim bai mipela i wet, na bai yu mekim kot long ol manmeri i stap long graun, na yu bekim blut bilong mipela long ol?” ’ Wanem samting i kamap bihain long dispela? “Ol i givim longpela waitpela klos long dispela ol manmeri wan wan, na ol i tokim ol olsem, ‘Yupela i mas malolo liklik pastaim. Ol birua bai i kilim i dai ol wanwok bilong yupela na ol brata bilong yupela, olsem ol i bin kilim yupela yet.’ ”​—KTH 6:​10, 11.

¹⁶ Olsem wanem? Ol i givim ol dispela longpela waitpela klos long blut i stap long as bilong alta? Nogat! Ol i givim ol waitpela klos long ol man em olsem blut bilong ol i kapsait long dispela alta. Ol i dai long nem bilong Jisas na nau ol i kirap bek pinis olsem ol spirit. Olsem wanem yumi save long dispela? Narapela hap bilong Buk Kamapim Tok Hait i tok: “Man i winim pait, orait mi bai putim dispela kain waitpela klos long em, na mi bai i no inap rausim nem bilong em long buk bilong laip.” Tingim tu olsem ol 24 hetman i “putim longpela waitpela klos, na ol i gat ol hat gol olsem ol hat king i stap long het bilong ol.” (KTH 3:5; 4:4) Olsem na bihain long pait, hangre, na bikpela sik i kirap bagarapim ol man, orait lain 144,000 i dai pinis​—em blut i stap long as bilong alta i makim ol​—ol i kirap bek long heven na i olsem ol i pasim ol longpela waitpela klos.

17. Lain i kisim longpela waitpela klos, olsem wanem ol i mas “malolo liklik”?

¹⁷ Ol dispela lain i kirap bek pastaim, ol i mas “malolo liklik.” Ol i mas wet long de bilong God long bekim pe nogut. “Ol wanwok” bilong ol​—ol Kristen God i bin makim na ol i stap yet long graun​—ol i mas stap gut long God taim traim i painim ol. Taim God i bekim pe nogut, dispela taim bilong “malolo” bai pinis. (KTH 7:3) Long dispela taim, ol lain i kirap bek pinis, ol wantaim Bikpela Jisas Krais bai bagarapim ol man nogut na ol man i bin kapsaitim blut bilong ol Kristen i no gat asua.​—2 Tesalonaika 1:​7-​10.

Dispela i Makim Wanem Samting Long Yumi?

18, 19. (a) Olsem wanem yu inap tok kirap bek bilong namba wan taim i wok long kamap long nau? (b) Taim yu kliagut long kirap bek bilong namba wan taim, yu pilim olsem wanem?

¹⁸ Baibel i no kolim wanpela de stret bilong kirap bek bilong namba wan taim, tasol em i soim olsem dispela samting i kamap insait long wanpela haptaim, long taim Krais i kam i stap. Namba wan lain i kirap bek, em ol Kristen God i bin makim na ol i dai paslain long Krais i kam i stap. Insait long dispela haptaim, taim ol gutpela Kristen God i bin makim ol i dai, ol i senis “wantu tasol” na kamap strongpela spirit. (1 Korin 15:52) Olsem wanem? Olgeta Kristen God i bin makim bai kisim laip long heven paslain long pait bilong Armagedon? Yumi no save long dispela. Tasol yumi save olsem long taim God i makim, olgeta bilong lain 144,000 bai sanap i stap long maunten Saion bilong heven.

¹⁹ Yumi save tu olsem bikpela hap bilong lain 144,000 i stap pinis wantaim Krais. Liklik lain tasol i stap yet long graun. Dispela i kamapim klia olsem taim bilong God long kotim ol man i wok long i kam klostu hariap! Klostu nau dispela graun olgeta em Satan i bosim bai bagarap. Satan yet bai kalabus. Bihain long dispela, ol narapela man bai kirap bek, na long rot bilong ofa bilong Krais long baim bek ol man, ol gutpela man inap kamap gutpela olgeta olsem Adam i bin stap pastaim. Truim bilong tok profet bilong Jehova long Stat 3:15 i wok long kamap. Em i wanpela gutpela samting tru long yumi ken i stap long dispela taim!

[Ol Futnot]

Yu Inap Stori Long Dispela?

Olsem wanem ol dispela skripsa i helpim yumi long save long taim ‘kirap bek bilong namba wan taim’ i kamap?

• Kamapim Tok Hait 12:7; 17:14

• Kamapim Tok Hait 7:​13, 14

• 1 Korin 15:23; 1 Tesalonaika 4:​15-​17

• Kamapim Tok Hait 6:​2, 9-​11

[Ol Piksa long pes 26]

Wanem ol kirap bek i kamap paslain long kirap bek bilong bikpela lain manmeri?

[Piksa long pes 29]

Wanem mining bilong dispela tok ol i givim longpela waitpela klos long sampela husat i slip long matmat?