Askim

Noa i bin kisim hamas klinpela animal i go insait long sip​—7-pela 7-pela bilong ol klinpela animal o 7-pela man na 7-pela meri bilong ol klinpela animal?

Taim Noa i pinisim wok bilong wokim sip, Jehova i tokim em: “Mi lukim yu wanpela tasol yu stap stretpela man namel long olgeta manmeri bilong graun. Olsem na yu wantaim olgeta lain famili bilong yu i mas i go insait long sip. Yu mas kisim 7-pela man na 7-pela meri bilong olgeta kain animal i klin long ai bilong mi. Tasol long ol animal i no klin yu mas kisim wanpela man na wanpela meri tasol.” (Stat 7:​1, 2) Sampela Baibel moa i tanim ol dispela ves wankain olsem Buk Baibel na kolim olsem “7-pela man na 7-pela meri,” olsem The New English Bible, The New Jerusalem Bible, na Tanakh​​—The Holy Scriptures.

Long Baibel ol i bin raitim pastaim long tok Hibru, ol i raitim tok long dispela Stat 7 ves 2 em mining bilong en i olsem “7-pela 7-pela.” (Stat 7:2) Tasol long tok Hibru, taim ol i kolim wanpela namba tupela taim olsem, dispela i no makim olsem yumi mas bungim tupela namba wantaim. Olsem: 2 Samuel 21:20 i stori long wanpela man em “longpela bun tru” na “wanpela wanpela han bilong en i gat 6-pela pinga na ol lek bilong en tu i olsem.” Long tok Hibru, ol i kolim dispela namba “6-pela” inap tupela taim. Tasol dispela i no makim olsem dispela traipela man i gat 12-pela pinga long wan wan han, na 12-pela pinga long wan wan lek, nogat. Em i bilong makim olsem em i gat 6-pela pinga long wan wan han na 6-pela pinga long wan wan lek.

Olsem na dispela tok Hibru olsem “7-pela 7-pela” i no makim 7-pela animal man na 7-pela animal meri, olsem 14 olgeta, nogat; na i wankain tu long tok Hibru bilong Stat 7:​9, 15, em i tok long “tupela tupela,” dispela i no makim tupela man na tupela meri, olsem fopela, bilong olgeta kain animal samting. Olsem na Noa i kisim “7-pela 7-pela” bilong olgeta klinpela animal i go insait long sip, tasol long ol animal i no klin em i kisim “wanpela man na wanpela meri tasol.”

Tasol olsem wanem long tok bilong Stat 7:2, long tok Hibru i tok long “kisim 7-pela 7-pela klinpela animal, em man na meri bilong en”? Dispela tok i mekim na sampela man i ting God i bin tokim Noa long kisim 7-pela man na 7-pela meri bilong olgeta kain animal i klin. Tasol Noa i no kisim ol dispela klinpela animal bilong mekim wanpela wok tasol, olsem kamapim pikinini, nogat. Stat 8:20 i tok, taim Noa i lusim sip na kam ausait, “[em] i wokim wanpela alta bilong lotu long Bikpela. Na em i kisim wanpela wanpela long olgeta kain animal na pisin i klin long ai bilong Bikpela, na em i kilim ol bilong mekim ofa. Na em i kukim ol antap long alta.” Em nau, i gat dispela namba 7 animal bilong ol klinpela animal i stap bambai Noa i ken kilim na mekim ofa long en, na i gat 3-pela man na 3-pela meri bilong ol dispela kain animal i stap yet bilong kamapim ol pikinini na ol i ken i stap long graun.