Yu Tingim Yet?

Olsem wanem? Yu bin amamas long ritim ol tok bilong ol nupela Wastaua? Orait, yu ken traim bekim ol dispela askim i stap daunbilo:

• Tok piksa bilong Jisas long man i singaut planti taim i givim wanem skul long yumi? (Luk 11:​5-​10)

Dispela tok piksa i makim pasin yumi mas bihainim taim yumi beten. Yumi mas singaut planti taim, o wok long askim askim, long ol samting, na moa yet yumi mas askim long kisim holi spirit bilong God. (Luk 11:​11-​13)​—12/15, pes 20-2.

• Tok piksa bilong Jisas long jas na meri wanpis i lainim yumi long wanem samting? (Luk 18:​1-8)

Em i soim olsem em i bikpela samting long yumi mas beten. Dispela jas i no tingim dispela meri wanpis, tasol Jehova i mekim stretpela pasin na em i gat bikpela laik long helpim yumi. Na tu, yumi mas i gat wankain bilip olsem bilong dispela meri wanpis long tok piksa.​—12/15, pes 26-8.

• Bilong wanem aposel Pol i tokim ol Kristen long Korin long ol i mas laikim moa yet ol arapela? (2 Korin 6:​11-​13)

I luk olsem sampela long kongrigesen Korin i no tingim tru ol wanbilip bilong ol na ol i no laikim ol. Yumi mas wok strong long tingim tru ol wanbilip na wok strong bilong kisim sampela nupela pren.​—1/1, pes 9-​11.

• Tok bilong Kamapim Tok Hait 7:​3, i toktok long putim mak i makim wanem samting?

Taim God i makim ol Kristen long holi spirit, ol i kisim namba wan mak. Tasol Kamapim Tok Hait 7:3 i toktok long laspela mak, taim ol dispela Kristen God i bin makim i kamapim klia pinis olsem ol i stap gut long God.​—1/1, pes 30-1.

• Ol papamama inap lainim wanem samting long stori bilong Samuel long Baibel?

Wanpela samting papamama i mas mekim, em ol i mas skulim ol pikinini bilong ol long tok bilong God, olsem papamama bilong Samuel i bin mekim. Na tu, ol i mas kirapim ol pikinini bilong ol long mekim wok bilong Jehova fultaim.​—1/15, pes 16.

• Olsem wanem yumi ken soim olsem yumi amamas long wetim Jehova?

Yumi “wetim De bilong God i kamap.” Yumi wetim taim bilong kisim malolo long ol hevi taim Jehova i bagarapim olgeta man i givim baksait long em. (2 Pita 3:​7, 12) Jehova yet i amamas long pinisim olgeta pasin nogut, tasol em i wet i stap bambai em i ken kisim bek ol Kristen long wanpela rot we bai i litimapim nem bilong em. Yumi mas bilip olsem Jehova i save long taim stret bilong mekim ol samting, na taim yumi wet long dispela samting i kamap, yumi mas givim bel olgeta long litimapim nem bilong em. (Song 71:​14, 15)​—3/1, pes 17-​18.

• Noa i kisim i go insait long sip 7-pela 7-pela bilong ol klinpela animal o 7-pela man na 7-pela meri bilong ol klinpela animal?

Jehova i tokim Noa long kisim “7-pela man na 7-pela meri” bilong olgeta animal i klin. (Stat 7:​1, 2) Long tok Hibru, ol i raitim tok long dispela ves em mining bilong en i olsem “7-pela 7-pela.” Dispela i no makim 7-pela animal man na 7-pela animal meri, olsem 14 olgeta, olsem ol narapela ves bilong Baibel i kamapim. Noa i kisim 7-pela bilong olgeta klinpela animal i go insait long sip, olsem 3-pela man na 3-pela meri na em i kisim wanpela animal moa bambai em i ken kilim na mekim ofa long en. (Stat 8:20)​—3/15, pes 31.

• Bilong wanem ol Kristen i mas “tingting” long bilip bilong ol elda, em ol i lida bilong sios?

Pol i kirapim yumi long “tingting” long pasin ol elda i bin wokabaut long en na bihainim pasin bilong bilip bilong ol. (Hibru 13:7) Yumi mekim olsem, long wanem, Baibel i tokim yumi long mekim. Na tu, yumi bilip olsem ol elda i tingim tru ol samting bilong Kingdom na ol samting bilong helpim gut yumi.​—4/1, pes 28.