Pasin Bilong Katim Skin​—Em Mak Bilong Man Tru?

LONG planti hap, taim nupela pikinini man i kamap ol i save katim skin long sem bilong em na bai sampela kain sik i no ken kisim em. Na long sampela hap, ol i no save katim skin bilong ol pikinini man, na ol i stap olsem inap long taim ol i dai. Sampela lain, olsem ol Juda na Muslim, ol i no tingim sik inap painim pikinini man na ol i katim skin bilong em, nogat, ol i mekim olsem bilong bihainim wanpela pasin bilong lotu.

Tasol long sampela kantri, taim pikinini man i bikpela mangi pinis, ol i save bihainim narakain pasin bilong katim skin bilong em. Bilong mekim olsem, pastaim ol i save salim mangi i go long wanpela kain skul bilong lainim em long ol pasin bilong ples, na long dispela hap ol i katim skin bilong em, na em i no ken i stap wantaim ol wanples i go inap sampela wik, inap long taim em i kamap orait gen. Insait long ol dispela wik em i mas mekim sampela kain pasin bilong ples na ol i skulim em long kamap olsem man tru. Tasol yu ting mangi i mas bihainim dispela kain pasin bilong katim skin bilong soim olsem em i kamap man tru? Orait, yumi ken skelim ol tok bilong Baibel i kamapim tingting bilong God long dispela samting.​—Sindaun 3:​5, 6.

Tingting Bilong God Long Katim Skin

Sampela lain bilong bipo tru, olsem ol Isip, ol i bin katim skin long sem bilong man. Tasol Abraham i no bin kamap insait long lain i gat dispela pasin. Ol i no bin katim skin bilong em i go inap long taim em i lapun. Tasol insait long ol dispela planti yia em i kamapim klia olsem em i strongpela man bilong pait. Em i kisim liklik lain tasol na em i ranim ol ami bilong 4-pela king na em i winim pait na i kisim bek Lot, pikinini bilong brata bilong em, ol birua i bin karim em i go. (Stat 14:​8-​16) Inap 14 yia samting bihain, God i tokim Abraham long ol i mas katim skin bilong em, na em i mas katim skin bilong olgeta man ol i wanhaus bilong em. Bilong wanem God i mekim olsem?

Em i no bilong makim olsem nau Abraham i lusim pasin bilong mangi na em i kamap man pinis, nogat. Long dispela taim Abraham i gat 99 krismas pinis! (Stat 17:​1, 26, 27) God i kamapim as na em i putim dispela lo, olsem: “Yupela i mas katim skin bilong olgeta pikinini man . . . long haus bilong yupela . . . Dispela pasin bai i stap olsem mak bilong kontrak mi mekim wantaim yupela.” (Stat 17:​11, 12) Dispela kontrak God i bin mekim wantaim Abraham i gat wanpela tok promis long en, olsem: Long rot bilong Abraham, God bai mekim gut tru long “olgeta lain manmeri bilong graun.” (Stat 12:​2, 3) Olsem na long ai bilong God, pasin bilong katim skin i no mak bilong wanpela man tru. Ol i mekim bilong makim olsem ol i bilong lain Israel, em Abraham i tumbuna bilong ol, na “God i bin givim tok bilong en long ol Juda [olsem ol Israel] bilong lukautim.”​—Rom 3:​1, 2.

Bihain ol Israel i sakim Pikinini i kamap long lain bilong Abraham, em Jisas Krais, na ol i no inap i stap moa olsem lain bilong God. Olsem na God i rausim ol, na maski ol i bin stap olsem lain bilong katim skin, God i no tingim moa dispela samting. Tasol sampela Kristen long taim bilong ol aposel ol i strong long tok olsem pasin bilong katim skin em i stap yet olsem wanpela lo bilong God. (Aposel 11:​2, 3; 15:5) Olsem na aposel Pol i salim Taitus i go bilong “stretim olgeta hap wok i no stret yet” insait long sampela kongrigesen. Pol i tokim Taitus long wanpela pasin bilong stretim, olsem: “Long ol sios bilong Krit i gat planti man bilong sakim tok. Ol i save mekim planti toktok nating na giamanim tingting bilong ol man . . . em . . . ol lain i save strong long katim skin bilong ol man. Ol dispela man i laik mekim pasin nogut na pulim ol mani samting bilong ol manmeri, olsem na ol i save skulim ol long mekim ol pasin i no inap long yumi mekim. Long dispela pasin ol i save bagarapim bilip bilong sampela manmeri.”​—Taitus 1:​5, 10, 11.

Tok kaunsel bilong Pol i stret yet long bihainim long nau. Sapos wanpela Kristen tru i strong long ol i mas katim skin bilong pikinini bilong narapela man, dispela i no stret wantaim tok bilong Baibel. Nogut Kristen i “paulim wok bilong ol arapela,” em i mas larim papamama yet i tingim samting ol bai mekim long pikinini bilong ol. (1 Pita 4:15) Na tu, holi spirit i kirapim Pol long raitim tok long pasin bilong katim skin aninit long Lo Bilong Moses: “Sapos ol i bin katim pinis skin bilong sem bilong wanpela man, na God i singautim em, orait em i no ken stretim bek skin bilong en gen . . . Na sapos wanpela man i no bin katim skin long taim God i singautim em, orait em i no ken katim skin. Pasin bilong katim skin, em i samting nating. Na pasin bilong man i no katim skin, em tu i samting nating. Tasol pasin bilong bihainim lo bilong God, em i samting tru. Wanem kain laip yumi bin i stap long en long taim God i singautim yumi, orait yumi mas i stap yet long dispela kain laip.”​—1 Korin 7:​18-​20.

‘Ol Skul Bilong Katim Skin’

Olsem wanem sapos sampela papamama Kristen i tingting pinis long katim skin bilong pikinini man bilong ol? Yu ting i stret wantaim lo bilong Baibel long salim ol dispela pikinini man long ol skul bilong katim skin, em yumi stori pinis long en? Long ol dispela skul, ol i no save mekim wok tasol long katim skin bilong sem bilong mangi, nogat. Inap sampela wik em bai bung na poroman wantaim ol mangi na tisa ol i no save lotuim Jehova. Long ol dispela skul, planti samting ol i save skulim ol mangi long en i no stret wantaim ol lo bilong Baibel long stretpela pasin yumi mas bihainim. Baibel i toksave olsem: “Sapos yumi poroman wantaim ol man nogut, bai ol i bagarapim gutpela pasin bilong yumi.”​—1 Korin 15:33.

Na ol mangi long ol dispela skul ol inap kisim bagarap long skin tu. Long 2003 wanpela nius bilong ol dokta, South African Medical Journal, i tok lukaut olsem: “Long dispela yia tu i gat ol samting nogut tru i kamap long pasin bilong katim skin, na ol nius long televisen samting i kamapim ripot i tok sampela ol i bin dai na sampela ol i kisim bagarap nogut long skin. . . . Yumi ken tok, planti skul bilong pasin bilong katim skin ol i giaman tasol, na ol inap long bagarapim ol mangi.”

Na i no skin bilong mangi tasol ol inap bagarapim long dispela pasin​—em inap kisim bagarap long ol samting bilong spirit tu. Ol tok na pasin bilong katim skin ol i save skul long en i gat wok bilong ol spirit nogut insait long en na pasin bilong lotuim ol tumbuna i dai pinis. Olsem: Taim ol i katim skin long sem bilong sampela mangi na ol i kisim bagarap long en, planti ol i no laik tokaut olsem ol dispela man ol i kolim dokta i no bin mekim stret dispela wok. Ol i bilip olsem sampela i mekim posin long ol mangi o ol tumbuna i dai pinis ol i kros long ol na ol dispela bagarap i painim ol. Baibel i tok strong long pasin bilong bung wantaim lotu giaman, olsem: “Ol haiden ol i narakain, olsem na yupela i no ken pas wantaim ol na wok bung wantaim ol. Olsem wanem, stretpela pasin na pasin bilong sakim lo tupela i ken wok bung wantaim? Olsem wanem, lait i ken bung wantaim tudak? . . . ‘Yupela i mas lusim ol, na i go i stap long narapela hap. Na yupela i mas lukaut gut, nogut yupela i pas long ol samting i no klin long ai bilong God.’ ” (2 Korin 6:​14-​17) Olsem na i no gutpela long papamama Kristen i salim ol pikinini man bilong ol i go long ol skul bilong katim skin.

Kristen i Stap Man Tru Olsem Wanem?

Maski man Kristen i katim skin pinis o nogat, dispela i no makim olsem em i man tru o nogat. Namba wan tingting bilong ol Kristen tru i olsem, ol i laik bai God i amamas long ol, na ol i no laik “kisim biknem long ai bilong ol arapela man.”​—Galesia 6:12.

Tasol bilong God i ken amamas long Kristen, em i mas “senisim tingting na i kamap nupela” na ‘bel bilong em i stap klin.’ (Lo 10:16; 30:6; Matyu 5:8) Bilong mekim olsem, Kristen i mas sakim ol laik nogut i kamap long bel na ol tingting i gat pasin hambak long en, olsem dispela bilip olsem man i katim skin pinis em i winim ol narapela man. Long rot bilong karim hevi na “sanap strong long bilip,” Kristen i ken kamapim olsem em i man tru, maski em i bin katim skin o nogat.​—1 Korin 16:13; Jems 1:12.