Yu Bin Mekim Sin Long Holi Spirit?
“I gat kain sin em inap mekim man i dai.”—1 JON 5:16.
1, 2. Olsem wanem yumi save man inap mekim sin long holi spirit bilong God?
“MI WOK long tingting planti tru olsem nogut mi bin mekim sin long holi spirit.” Wanpela meri long Jemani i tok olsem, maski em i mekim wok bilong God. Yu ting wanpela Kristen inap mekim sin long holi spirit, olsem strong bilong God?
2 Yes, man inap mekim sin long holi spirit bilong Jehova. Jisas Krais i tok: “God bai i lusim olgeta sin na olgeta tok nogut ol manmeri i mekim. Tasol man i mekim tok nogut long Holi Spirit, God bai i no inap lusim sin bilong dispela man.” (Matyu 12:31) Baibel i gat tok lukaut olsem: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin. Nogat. Bai yumi pret nogut tru na wetim de bilong bikpela kot.” (Hibru 10:26, 27) Na aposel Jon i tok: “I gat kain sin em inap mekim man i dai.” (1 Jon 5:16) Tasol yu ting em samting bilong man husat i mekim bikpela sin long makim olsem em i mekim “kain sin em inap mekim man i dai”?
God i Lusim Rong Bilong Man i Tanim Bel
3. Sapos yumi bel hevi tru long sin yumi bin mekim, ating dispela i makim wanem samting?
3 Jehova em i Man bilong skelim ol sinman. Olgeta man i mas tokim God long olgeta samting ol i mekim, na God i save bihainim stretpela pasin long olgeta taim. (Stat 18:25; Rom 14:12) Jehova yet bai makim em inap fogivim sin yumi bin mekim o nogat, na em inap rausim spirit bilong em long yumi. (Song 51:11) Tasol sapos yumi bel hevi tru long sin yumi bin mekim, ating dispela i makim olsem yumi tanim bel tru. Tasol wanem samting i makim olsem man i tanim bel tru?
4. (a) Wanem samting i makim olsem man i tanim bel? (b) Wanem tok bilong Song 103:10-14 i mekim gut bel bilong yumi?
4 Pasin bilong tanim bel i makim olsem yumi senisim tingting long rong yumi bin mekim o long rong yumi tingting long mekim, na yumi bel hevi na givim baksait long pasin bilong bihainim sin. Sapos yumi bin mekim bikpela sin, tasol yumi bin mekim ol samting i soim olsem yumi bin tanim bel tru, orait tok bilong man bilong raitim song i ken mekim gut bel bilong yumi, em i tok: “Yumi inap kisim pe nogut bilong sin bilong yumi, tasol em i no save givim dispela pe nogut long yumi. Yumi bin mekim planti pasin nogut, na em inap bekim bikpela hevi long yumi, tasol em i no save mekim olsem. Em i save laikim tru ol manmeri i save pret long em. Em i gat bikpela laik tru long ol, olsem skai i antap tru long graun. Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.”—Song 103:10-14.
5, 6. Kamapim bikpela poin bilong 1 Jon 3:19-22, na eksplenim mining bilong tok bilong aposel Jon.
5 Na aposel Jon tu i kamapim tok bilong mekim gut bel, em i tok: “Long ai bilong God, yumi ken bilip tru long bel bilong yumi olsem em i orait long yumi na long dispela rot yumi bai save olsem yumi stap long sait bilong tok i tru. Olsem na maski bel bilong yumi i kotim yumi long wanpela samting, God i winim tru bel bilong yumi na em i save long olgeta samting. Ol pren tru, sapos bel bilong yumi i no kotim yumi, orait yumi no surik long toktok wantaim God. Na wanem wanem samting yumi askim em long en, em i save givim long yumi, long wanem, yumi save bihainim ol lo bilong em na yumi mekim ol samting em i laikim.”—1 Jon 3:19-22, NW.
6 Yumi “save olsem yumi stap long sait bilong tok i tru,” long wanem, yumi kamapim pasin bilong laikim tru ol brata na yumi no bihainim pasin bilong mekim sin. (Song 119:11) Sapos bel i kotim yumi, orait gutpela long tingim olsem “God i winim tru bel bilong yumi na em i save long olgeta samting.” Jehova i save marimari long yumi bikos em i save long pasin bilong yumi long laikim tru ol wanbilip, hatwok yumi save mekim bilong daunim sin, na ol samting yumi mekim bilong bihainim laik bilong em. (1 Pita 1:22) Bel i no inap “kotim yumi” sapos yumi bilip long Jehova, laikim tru ol brata, na yumi no bikhet na mekim sin. Bai yumi “no surik long toktok wantaim God” long rot bilong beten, na em bai bekim ol beten bilong yumi, long wanem, yumi save bihainim ol lo bilong em.
Ol i Bin Mekim Sin Long Holi Spirit
7. God bai skelim wanem ol samting bilong save em inap fogivim man o nogat?
7 God i no save fogivim wanem ol sin? Bilong bekim dispela askim yumi ken skelim sampela stori bilong Baibel. Sapos yumi tanim bel long bikpela rong yumi bin mekim, tasol yumi pilim yet bikpela bel hevi, ol dispela stori bai mekim gut bel bilong yumi. Bai yumi luksave olsem man i mekim wanem kain sin dispela i no bikpela samting, nogat, bikpela samting em wanem samting i kirapim em long mekim sin, wanem tingting i stap long bel, na em i laik mekim dispela sin na em i orait long mekim. God bai skelim ol dispela samting bilong save em inap fogivim man o nogat.
8. Olsem wanem sampela hetman bilong lotu Juda long taim bilong Jisas i bin mekim sin long holi spirit?
8 Ol hetman bilong lotu Juda long taim bilong Jisas ol i bin birua tru long Jisas Krais, ol i mekim sin long holi spirit. Ol i lukim holi spirit bilong God i wok long Jisas taim em i wokim ol mirakel i givim biknem long Jehova. Tasol ol dispela birua bilong Krais i tok em i mekim ol dispela samting long pawa bilong Satan. Jisas i tok, ol man husat i bin tok bilas olsem long holi spirit bilong God, ol i mekim sin em God bai i no inap lusim long “nau na long taim bihain tu.”—Matyu 12:22-32.
9. Tok bilas nogut em wanem samting? Jisas i bin tok wanem long dispela pasin?
9 Tok bilas nogut i makim pasin bilong tok giaman, na mekim tok i bagarapim arapela. God em i As bilong holi spirit, olsem na taim man i tok bilas long holi spirit i olsem em i tok bilas long Jehova. Man i mekim kain tok olsem na i no tanim bel, God i no inap fogivim em. Tok Jisas i mekim long dispela kain sin i kamapim klia olsem, Jisas i stori long ol man em long laik bilong ol yet ol i sakim wok bilong holi spirit bilong God. Holi spirit bilong Jehova i wok long Jisas, tasol ol birua i tok em pawa bilong Satan, olsem na ol i mekim sin na tok bilas long holi spirit. Jisas i tokaut olsem: “Sapos man i mekim tok nogut long Holi Spirit, God bai i no inap lusim dispela sin bilong en, nau na bihain tu. Nogat. Asua bilong dispela sin bai i stap long em oltaim oltaim.”—Mak 3:20-29.
10. Bilong wanem Jisas i kolim Judas olsem “man bilong lus”?
10 Tingim tu stori bilong Judas Iskariot. Em i bihainim pasin bilong giaman, na em i stilim mani long bokis mani em wok bilong em long bosim. (Jon 12:5, 6) Bihain Judas i bin go long ol hetman bilong ol Juda na stretim tok long putim Jisas long han bilong ol na ol bai givim em 30 mani silva. Tru, Judas i pilim bel hevi long samting em i mekim, tasol em i no bin tanim bel. Olsem na Judas i no inap kirap bek, na Jisas i kolim em “man bilong lus.”—Jon 17:12; Matyu 26:14-16.
Ol i No Bin Mekim Sin Long Holi Spirit
11-13. King Devit i mekim wanem sin long ol samting em i mekim long Batseba? Olsem wanem pasin God i mekim long ol inap mekim gut bel bilong yumi?
11 Sampela taim sampela Kristen husat i bin mekim bikpela rong na ol i tokaut pinis long samting ol i mekim na ol elda bilong kongrigesen i helpim ol long pas gut gen wantaim Jehova, tasol bel i kotim ol yet long ol lo bilong God ol i bin brukim. (Jems 5:14) Sapos yumi gat dispela kain hevi, ating yumi bai kisim helpim long rot bilong skelim tok Baibel i mekim long ol man em God i bin fogivim sin bilong ol.
12 King Devit i bin mekim bikpela sin long ol samting em i mekim long Batseba, meri bilong Uria. Devit i stap antap na i lukluk i go daun na em i lukim dispela maritmeri i gat naispela skin i waswas i stap, na Devit i salim sampela man i go bringim meri i kam na em i slip wantaim em. Bihain Devit i kisim save olsem meri i gat bel, na em i wokim wanpela plen we man bilong Batseba, em Uria, bai kam na slip wantaim meri bilong em na dispela bai haitim pasin pamuk ol i bin mekim. Tasol taim dispela plen i no wok, king i stretim rot bilong Uria i ken dai long pait. Bihain, Batseba i kamap meri bilong Devit na em i karim pikinini na dispela pikinini i dai.—2 Samuel 11:1-27.
13 Jehova i bin stretim dispela hevi bilong Devit na Batseba. God i fogivim Devit. Em i tingim pasin bilong Devit long tanim bel na em i tingim kontrak bilong Kingdom em i bin mekim wantaim Devit. (2 Samuel 7:11-16; 12:7-14) I luk olsem Batseba i tanim bel, long wanem, em i kamap mama bilong King Solomon na tumbuna mama bilong Jisas Krais. (Matyu 1:1, 6, 16) Sapos yumi bin mekim sin, em i gutpela long tingim olsem Jehova i luksave long pasin bilong yumi long tanim bel.
14. Olsem wanem samting i painim King Manase inap helpim yumi long luksave olsem pasin bilong Jehova long fogivim sin em i bikpela tru?
14 Samting i painim King Manase bilong Juda inap helpim yumi long luksave olsem pasin bilong Jehova long fogivim sin i bikpela tru. Manase i mekim ol samting i nogut tru long ai bilong Jehova. Em i bin wokim ol alta bilong god Bal, em i “save lotuim ol sta antap,” na em i wokim ol alta bilong ol god giaman long tupela ples bung i stap insait long tempel. Em i kukim ol pikinini man bilong em long paia, kirapim ol man long mekim wok bilong ol spirit nogut, na em i pulim ol Juda na Jerusalem long “mekim planti pasin nogut moa. Dispela pasin nogut bilong ol i winim pasin nogut bilong ol manmeri i bin i stap bipo long dispela graun na Bikpela i bin rausim ol.” Em i no bihainim ol tok lukaut ol profet bilong God i bin autim. Bihain, king bilong Asiria i pait na holimpas Manase. Taim em i kalabus i stap, Manase i bin tanim bel na long pasin daun em i wok long beten long God. God i fogivim em na mekim em i kamap king gen long Jerusalem, we em i wok long strongim lotu i tru.—2 Stori 33:2-17.
15. Wanem samting i bin kamap long Pita i soim olsem Jehova i save ‘marimari moa yet na lusim sin’ bilong man?
15 Planti handet yia bihain, aposel Pita i mekim bikpela sin taim em i tok em i no save long Jisas. (Mak 14:30, 66-72) Tasol Jehova i “marimari moa yet” na “lusim sin” bilong Pita. (Aisaia 55:7) Bilong wanem em i mekim olsem? Bikos Pita i tanim bel tru. (Luk 22:62) Samting i kamap 50 de bihain, long de Pentikos, i kamapim long ples klia olsem God i bin fogivim Pita. Long dispela taim Pita i autim tok bilong Jisas na em i no pret. (Aposel 2:14-36) Yumi save, long nau tu, God bai fogivim ol Kristen em ol i tanim bel tru. Man bilong raitim song i tok: “Sapos yu kaunim olgeta sin bilong mipela bai husat inap long winim kot bilong yu? Tasol yu save rausim ol sin bilong mipela.”—Song 130:3, 4.
Daunim Pasin Bilong Tingting Planti
16. Jehova i save fogivim sin bilong husat?
16 Ol dispela stori yumi skelim pinis i helpim yumi long daunim pasin bilong tingting planti olsem yumi bin mekim sin long holi spirit o nogat. Ol i soim olsem Jehova i save fogivim ol man em ol i tanim bel. Pasin bilong beten strong long God em i bikpela samting tru. Taim yumi mekim sin, yumi inap askim God long tingim sakrifais Jisas i givim bilong baim bek ol man, marimari bilong Jehova, sin yumi kisim long Adam, na ol gutpela wok yumi bin mekim, na long ol dispela as em i ken fogivim yumi. Yumi save long bikpela pasin helpim bilong Jehova, na long dispela as yumi ken askim God long fogivim yumi na yumi save em bai mekim.—Efesus 1:7.
17. Yumi mas mekim wanem sapos yumi bin mekim sin na yumi mas kisim helpim bilong pas gut wantaim Jehova?
17 Tasol olsem wanem sapos yumi bin mekim sin na dispela i bagarapim pasin bilong yumi long pas gut wantaim Jehova na yumi pilim olsem yumi no inap prea long em? Disaipel Jems i bin stori long dispela olsem: “Em [man i mekim sin] i mas singautim ol hetman bilong sios i kam long em. Na long nem bilong Bikpela ol i mas putim wel long bodi bilong em, na ol i mas prea long God i ken mekim em i kamap orait gen. Sapos ol i bilip long God na ol i prea, orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.”—Jems 5:14, 15.
18. Sapos man i raus long kongrigesen, bilong wanem dispela i no makim olsem em i bin mekim sin em God i no inap fogivim?
18 Sapos man i bin mekim sin i no tanim bel na em i raus long kongrigesen, dispela i no makim olsem God i no inap fogivim em. Pol i bin stori long wanpela rausman long kongrigesen Korin, em wanpela Kristen God i bin makim long holi spirit, em i tok: “Dispela pe nogut bikpela lain bilong yupela i bin tok long dispela man i mas kisim, em inap long em. Olsem na mobeta yupela i mekim narapela pasin nau. Mobeta yupela i lusim sin bilong em na mekim isi bel bilong en. Nogut bikpela bel hevi moa i daunim tru dispela man.” (2 Korin 2:6-8; 1 Korin 5:1-5) Tasol bilong pas gut gen wantaim Jehova ol man i mekim sin i mas bihainim ol tok bilong Baibel em ol elda Kristen i givim ol, na ol i mas soim olsem ol i tanim bel tru. Ol i mas kamapim ol ‘pasin i soim olsem ol i tanim bel pinis.’—Luk 3:8.
19. Wanem samting inap helpim yumi long “save gut long tok tru bilong God”?
19 Wanem samting inap mekim na yumi pilim olsem yumi bin mekim sin long holi spirit? Ating skin na tingting bilong yumi i no strong tumas o yumi ting olsem olgeta samting yumi mekim i mas nambawan na no ken popaia liklik. Sapos olsem ating pasin bilong beten na kisim malolo bai helpim yu. Bikpela samting, yumi no ken larim Satan i mekim yumi bel hevi na yumi no mekim wok bilong God moa. Jehova i no amamas taim man nogut i dai, olsem na yumi save em i no amamas liklik taim wanpela wokboi bilong em i lus. Olsem na sapos yumi wari olsem yumi bin mekim sin long holi spirit, orait yumi mas wok yet long ritim na tingim Tok Bilong God, sampela bilong ol dispela tok i save mekim gut bel, em ol tok bilong Buk Song. Yumi mas wok yet long i go long ol miting bilong kongrigesen na insait long wok bilong autim tok bilong Kingdom. Taim yumi mekim olsem, dispela bai helpim yumi long “save gut long tok tru bilong God” na bai yumi no wari olsem yumi mekim sin God i no inap lusim o nogat.—Taitus 2:2.
20. Man i ken skelim wanem ol askim na dispela inap helpim em long save olsem em i no bin mekim sin long holi spirit?
20 Ol manmeri i tingting planti olsem ol i bin mekim sin long holi spirit o nogat ol i ken askim ol yet olsem: ‘Mi bin tok bilas long holi spirit? Mi tanim bel tru long sin mi bin mekim? Mi bilip long pasin bilong God long fogivim sin? Mi wanpela apostet i no laik tanim bel na mi givim baksait long lotu i tru?’ Ol kain manmeri olsem bai luksave olsem ol i no bin tok bilas long holi spirit bilong God, na ol i no bin kamap apostet. Ol i bin tanim bel, na ol i bilip long pasin bilong Jehova long fogivim sin. Sapos olsem, ol i no bin mekim sin long holi spirit bilong Jehova.
21. Stadi i kamap bihain long dispela bai skelim wanem ol askim?
21 Bel bilong yumi i ken stap isi tru taim yumi save olsem yumi no bin mekim sin long holi spirit! Taim yumi stori long holi spirit, i gat sampela askim yumi laik skelim long stadi i kamap bihain long dispela. Yumi ken askim yumi yet olsem: Tru tru holi spirit bilong God i save stiaim wokabaut bilong mi? Ol gutpela pasin holi spirit i save kamapim i stap ples klia long laip bilong mi?
Wanem Bekim Bilong Yu?
• Bilong wanem yumi ken tok man inap mekim sin long holi spirit?
• Pasin bilong tanim bel em i wanem samting?
• Husat i bin mekim sin long holi spirit taim Jisas i stap long graun?
• Olsem wanem yumi ken lusim pasin bilong tingting planti olsem yumi bin mekim sin God i no inap fogivim o nogat?
[Piksa long pes 17]
Ol man i bin tok Jisas i yusim pawa bilong Satan bilong wokim ol mirakel, ol i mekim sin long holi spirit bilong God
[Piksa long pes 18]
Tru Pita i bin tok em i no save long Jisas, tasol dispela i no makim olsem Pita i bin mekim sin God i no inap lusim