Jehova i Save Lusim Rong Bilong Man

“Ol manmeri bilong mekim ol pasin nogut i mas lusim . . . na ol i no ken tingting moa long mekim . . . Na ol i mas kam bek long [Jehova]. . . . Em i save marimari moa yet long ol.”​—⁠AISAIA 55:⁠7.

1. Olsem wanem long ol man em Jehova i marimari long ol?

OL MAN i bin mekim rong, sapos ol i tanim bel Jehova bai marimari long ol na lusim rong bilong ol, na ol inap i stap bel isi na kisim ol gutpela samting bilong spirit. Ol i stretim pasin bilong ol na mekim olsem Jehova i tok: “Nau Bikpela i stap klostu long yupela na i wetim yupela, olsem na nau em i taim bilong yupela i mas beten long em na i go klostu long em. Ol manmeri bilong mekim ol pasin nogut i mas lusim ol pasin nogut bilong ol na ol i no ken tingting moa long mekim ol dispela pasin. Na ol i mas kam bek long God, Bikpela bilong yumi. Em i save marimari moa yet long ol manmeri i kam bek long em, na em i save lusim sin bilong olgeta dispela lain.”​—⁠Aisaia 55:​6, 7.

2. (a) Bilong wanem man i ken “go klostu long” God na “kam bek long God” olsem Aisaia 55:​6, 7 i tok em i mas mekim? (b) Bilong wanem ol Juda long Babilon i mas go bek gen long Babilon? Wanem samting i painim sampela?

² Bilong man i ken “go klostu long” God na “kam bek long God,” em i mas lusim pasin nogut na lusim tingting nogut long narapela man. Dispela tok, “kam bek long God,” i makim olsem bipo em i bin stap gut long God, tasol bihain em i lusim God. Lain Juda i bin mekim olsem. Ol i bin bikhet long God, na bihain ol i kalabus long Babilon. Sapos ol i laik lusim kalabus na go bek gen long ples bilong ol, ol i mas tanim bel na go bek gen long Jehova. Ol i mas lusim pasin nogut ol i bin mekim na long dispela as Jehova i bin larim ol i kalabus inap 70 yia. Long yia 537 paslain long Krais, hap lain bilong ol i lusim Babilon na ol i go bek long ples bilong ol. (Esra 1:​1-8; Daniel 9:​1-4) Ol i pilim ples bilong ol i swit tru olsem Paradais long Iden.​—⁠Esekiel 36:​33-36.

3. Ol samting i bin painim lain Israel bilong spirit, olsem wanem i wankain olsem ol samting i bin painim ol Juda long bipo?

³ Samting i bin painim lain Israel bilong spirit i wankain olsem samting i bin painim ol Juda long bipo, taim ol i lusim Babilon. (Galesia 6:16) Bihain long Namba Wan Pait lain remnan bilong Israel bilong spirit i bin senisim pasin na tingting bilong ol i no stret, na God i laikim ol gen, na ol i lusim Bikpela Babilon, em ol lotu giaman. Ol i bin pret long ol man na ol i bin lusim wok bilong Jehova, tasol nau ol i tanim bel na Jehova i helpim ol long lusim kalabus bilong Bikpela Babilon na ol i kisim bek gutpela wok bilong ol bilong spirit na ol i kirap gen long autim gutpela tok bilong Kingdom. Kirap long dispela taim, wanpela gutpela paradais bilong spirit i kamap namel long lain bilong God, na dispela i litimapim nem holi bilong God. (Aisaia 55:​8-13) Sapos yumi tingim dispela samting i bin kamap long bipo na samting i bin kamap long nau, yumi ken save Jehova i Man bilong lusim rong bilong ol man i tanim bel na em i save mekim gut long ol.

4. Sampela bilong lain bilong Jehova i hevi long wanem samting?

⁴ Olsem na lain bilong Jehova long nau ol i ken bilip tru olsem Jehova bai i marimari long ol. Tasol sampela i tingim rong ol i bin mekim long bipo na ol i hevi long dispela. Ol i ting ol i no gutpela man inap long ol i ken i stap long paradais bilong spirit. Sampela i ting ol i bin mekim bikpela rong tumas na i no inap Jehova i lusim tingting long dispela.

Sampela Rong God i No Inap Lusim Tingting Long En

5. Wanem kain rong em God i no inap lusim tingting long en?

⁵ I gat sampela rong em God i no inap lusim tingting long en. Jisas i tok: “God bai i lusim olgeta sin na olgeta tok nogut ol manmeri i mekim. Tasol man i mekim tok nogut long Holi Spirit, God bai i no inap lusim sin bilong dispela man.” (Matyu 12⁠:31) Sapos man i mekim tok nogut long spirit holi bilong God, God i no inap lusim dispela. Aposel Pol i bin tingim dispela samting taim em i tok: “Sampela man ol i kisim pinis lait bilong God. . . . Orait sapos dispela kain man i pundaun na i givim baksait long God, i no gat rot tru bilong em i kam bek na tanim bel gen. Nogat. Long dispela pasin em i mekim, i olsem em yet i nilim Pikinini Bilong God long diwai . . . gen. I olsem em i hangamapim em gen long diwai . . . , bai ol man i ken tok bilas long em.”​—⁠Hibru 6⁠:​4-6.

6. Olsem wanem yumi ken save, God inap lusim rong bilong man o nogat?

⁶ God tasol i save, man i bin mekim dispela kain rong o nogat. Tasol Pol i givim sampela save long yumi long dispela kain rong taim em i tok: “Sapos yumi kisim save pinis long tok tru bilong Krais, na bihain, long laik bilong yumi yet yumi wokabaut long pasin bilong sin, orait i no gat narapela ofa moa i stap bilong tekewe dispela sin. Nogat. Bai yumi pret nogut tru na wetim de bilong bikpela kot.” (Hibru 10:​26, 27) Sampela man i strong long bihainim tingting na laik bilong ol yet na ol i no laik harim o bihainim tok. Sapos man i save pinis long tok i tru, tasol em i mekim ol samting i no stret long tok i tru, God i no ken sori long dispela kain man. Rong em i mekim, i no dispela tasol i no stret. Tingting nogut long bel bilong em, em dispela i bikpela samting. Sapos em i givim bel long mekim dispela rong na em i orait long mekim, God i no inap lusim dispela kain rong. Tasol sapos Kristen i gat bikpela hevi long rong em i bin mekim, ating God inap sori long em na marimari long em na lusim tingting long rong em i bin mekim.

God i No Inap Lusim Rong Bilong Ol

7. Sampela bikman bilong lotu i bin biruaim Jisas, na olsem wanem yumi ken save God i no inap lusim tingting long rong ol i bin mekim?

⁷ Sampela bikman bilong lotu Juda ol i bin biruaim Jisas, na God i no ken lusim dispela rong bilong ol. Ol i bin lukim wok bilong spirit holi em Jisas i bin mekim bilong helpim ol man na wokim ol mirakel samting, tasol ol dispela bikman i tok, em i bin mekim long strong bilong Belsebul, olsem Satan. Ol i lukim pinis na ol i save pinis em wok bilong spirit holi. I no olsem ol i longlong. Olsem na ol i mekim bikpela rong em God i no inap lusim tingting long en. Jisas i tok: “Man i mekim tok nogut long Holi Spirit, God bai i no lusim dispela sin bilong em nau na long taim bihain tu.”​—⁠Matyu 12⁠:​22-32.

8. Olsem wanem God i no inap lusim tingting long rong bilong Judas?

⁸ God i no inap lusim tingting long rong Judas Iskariot i bin mekim. Em i bin givim bel long kamapim Jisas long ol birua. Em i bin bihainim pasin giaman inap longtaim. Taim em i bin lukim Maria i kapsaitim wel long lek bilong Jisas em i tok: “Bilong wanem yumi no larim ol man i baim dispela sanda na yumi kisim 300 mani silva long en, na yumi givim long ol rabisman?” Na Baibel i tok: “Judas i no wari long ol rabisman na em i tok olsem. Nogat. Em i stilman. Em i gat wok bilong bosim bokis mani bilong ol lain bilong Jisas, na em i save stilim mani ol i putim long en.” Bihain liklik em i kamapim Jisas long ol birua na bai em i ken kisim 30 mani silva. (Jon 12:​1-6; Matyu 26:​6-16) Tru, bihain em i no amamas long samting em i mekim, olsem na em i kilim i dai skin bilong em yet. (Matyu 27:​1-5) Tasol God i no sori long em, long wanem, em i givim bel long ol dispela samting em i bin mekim, na em i mekim pasin nogut tru na rongim spirit holi. Olsem na i stret Jisas i kolim em “man bilong lus.”​—⁠Jon 17:12; Mak 3:29; 14:⁠21.

God i Lusim Tingting Long Rong Bilong Ol

9. Olsem wanem na God i lusim tingting long rong em Devit i mekim long Batseba?

⁹ Tasol i gat sampela rong God inap lusim tingting long en. Wanpela taim King Devit bilong Israel i mekim pasin pamuk wantaim Batseba, em meri bilong Uria, na Devit i tokim Joap long mekim ol samting na bai Uria i dai long pait. (2 Samuel 11:​1-27) Olsem wanem na God i marimari long Devit? Em i mekim, long wanem, em i tingim kontrak bilong Kingdom, na em i tingim Devit i tanim bel tru na em i hevi long rong em i bin mekim.​—⁠1 Samuel 24:​4-7; 2 Samuel 7:12; 12:⁠13.

10. Pita i mekim bikpela rong, tasol bilong wanem God i lusim tingting long dispela?

¹⁰ Na yumi ken tingim aposel Pita tu. Em i mekim bikpela rong taim em i tok em i no save long Jisas. Tasol God i lusim rong bilong Pita, long wanem, dispela rong i no olsem bilong Judas Iskariot. Pita i no bin giaman long mekim wok bilong God na Krais. Em i mekim rong, long wanem, long dispela taim em i no gat strong, na em i hevi tru long dispela samting, na em i tanim bel na em i “krai nogut tru.”​—⁠Matyu 26:​69-75.

11. Tanim bel, em wanem samting? Sapos man i tanim bel tru em i mas mekim wanem?

¹¹ Olsem na yumi save God Jehova inap sori long man i bin mekim rong, maski rong i bikpela. Tasol Kristen i mas tanim bel tru na bai God i ken mekim olsem. Tanim bel i olsem: Man i hevi long rong em i bin mekim, na em i givim baksait long en na em i no ken tru mekim moa. Sapos man i tanim bel tru em i mas pilim tru asua bilong em na em i mas bel hevi long rong em i mekim long nem bilong Jehova na oganaisesen bilong em. Na em i mas bihainim pasin i makim olsem em i tanim bel tru. (Matyu 3:8; Aposel 26:20) Sapos em i bin rongim wanpela man, em i mas mekim ol samting bilong stretim dispela rong. (Luk 19:⁠8) Olsem na i gat sampela as na em i ken bilip olsem Jehova bai sori long em. Wanem ol as?

Sampela As na Bai God i Ken Sori Long Man

12. Song 25:11 i makim wanem samting i olsem as na bai man i tanim bel em i ken askim God long marimari long em?

¹² Sapos man i bin mekim rong na em i tanim bel, em i mas beten askim Jehova long lusim rong bilong em, na em i ken ting Jehova bai mekim olsem. Devit i bin krai long Jehova olsem: “God, bihainim promis bilong yu, na tekewe planti sin mi bin mekim. Yu ken tekewe olgeta rong bilong mi na bai mi litimapim nem bilong yu.” (Song 25⁠:11) Sapos man i beten olsem na em i tanim bel na i hevi long rong em i bin mekim long nem bilong God, dispela bai helpim em long givim baksait long ol pasin nogut long bihain.

13. Olsem wanem beten inap helpim yumi na God i ken lusim rong bilong yumi?

¹³ Sapos wokman bilong God Jehova i mekim rong na i tanim bel na em i givim bel long askim God long lusim dispela rong, God bai mekim olsem. Taim Devit i trabel wantaim Batseba, na em i pilim bikpela rong em i mekim, na em i givim bel long beten, Jehova i harim beten bilong em. Em i beten olsem: “God, yu as bilong sori, yu ken marimari long mi. Yu gat bikpela marimari tru, olsem na mi laik yu rausim olgeta pasin nogut bilong mi. Yu wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin. Orait God, mi daunim mi yet na mi stap aninit long yu. Dispela em i ofa bilong mi. Mi save, yu no givim baksait long man i pilim hevi long sin na i daunim em yet.”​—⁠Song 51:​1, 2, 17.

14. Baibel i tok wanem na yumi ken save God bai lusim rong bilong man i bilip long ofa bilong Jisas?

¹⁴ Sapos man i bilip long ofa Jisas i bin mekim, God bai lusim rong bilong em. Pol i tok: “Krais i dai pinis bilong baim bek yumi, na long blut bilong en, God i lusim olgeta sin bilong yumi.” (Efesus 1⁠:⁠7) Na aposel Jon i tok: “Ol liklik pikinini bilong mi, mi raitim dispela tok long yupela, bai yupela i no ken mekim sin. Na sapos wanpela man i mekim sin, orait yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta. Em yet i bin mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.”​—⁠1 Jon 2⁠:​1, 2.

15. Bilong God i ken marimari yet long man i bin tanim bel, man i mas mekim wanem?

¹⁵ Jehova em i Man bilong marimari, olsem na sapos yumi tanim bel yumi ken tingting long em bai lusim rong bilong yumi. Nehemia i tok: “God, yu save lusim sin bilong mipela manmeri bilong graun. Na yu save laikim mipela na mekim gut long mipela. Na yu no save belhat kwik. Nogat. Yu save marimari moa yet.” (Nehemia 9:17; lukim tu Kisim Bek 34:​6, 7.) Tasol yumi mas bihainim yet tok bilong God na bai em i ken marimari yet long yumi. Baibel i tok: “Yu ken sori long mi nau, na bai mi kisim laip, long wanem, mi laikim tru lo bilong yu. Bikpela, marimari bilong yu i bikpela moa. Yu pasim tok pinis long kisim bek mi, orait nau mi laik yu mekim olsem.”​—⁠Song 119⁠:​77, 156.

16. Jehova i save yumi sinman, na olsem wanem yumi ken amamas long em i tingim dispela?

¹⁶ Jehova i save yumi sinman tasol, olsem na taim wanpela man i mekim rong na em i tanim bel tru, em i ken strongim bel na beten askim Jehova long lusim rong bilong em, na em i ken bilip tru olsem Jehova bai i mekim. (Song 51:5; 5:12) Devit i tok: “Yumi inap kisim pe nogut bilong sin bilong yumi, tasol [God Jehova] i no save givim dispela pe nogut long yumi. Yumi bin mekim planti pasin nogut, na em inap bekim bikpela hevi long yumi, tasol em i no save mekim olsem. Em i save laikim tru ol manmeri i save pret long em. Em i gat bikpela laik tru long ol, olsem skai i antap tru long graun. Hap bilong sankamap em i no klostu long hap bilong san i go daun. Em i longwe tru. Olsem tasol God i save tekewe sin bilong yumi na sin i stap longwe tumas. Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.” (Song 103⁠:​10-14) Papa bilong yumi long heven em i Man bilong pasin sori na marimari, winim papa tru bilong yumi long graun.

17. Ol gutpela wok man i bin mekim, olsem wanem dispela inap helpim em taim em i askim God long lusim rong bilong em?

¹⁷ Sapos man i tanim bel na askim Jehova long lusim rong bilong em, em i ken save Jehova bai tingim yet ol gutpela wok bipo em i bin mekim. Nehemia i save long dispela samting, olsem na em i bin beten olsem: “God, yu ken tingim olgeta dispela pasin mi bin mekim na yu ken mekim gut long mi.” (Nehemia 13:31) Kristen i tanim bel em i ken amamas long tok bilong Pol olsem: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God.”​—⁠Hibru 6:⁠10.

Ol Elda Inap Helpim Yumi

18. Sapos Kristen i pilim olsem rong bilong em i nogutim em long ol samting bilong spirit, em i ken mekim wanem?

¹⁸ Sapos Kristen i pilim olsem em i bin mekim rong na nau em i no inap i stap insait long paradais bilong spirit o em i no inap beten, em i ken mekim wanem? Jems i tok: “Em i mas singautim ol hetman bilong [kongrigesen] i kam long em. Na long nem bilong Bikpela ol i mas putim wel long bodi bilong em, na ol i mas [beten] long God i ken mekim em i kamap orait gen. Sapos ol i bilip long God na ol i [beten], orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.” Bilipman i gat rong na i tanim bel, ol elda i ken beten wantaim em bilong helpim em long kamap strong gen long spirit.​—⁠Jems 5:​14-16.

19. Rauspela man i mas mekim wanem na bai God i ken sori long em na ol i ken kisim em bek?

¹⁹ Sapos komiti bilong harim kot ol i rausim sinman i no tanim bel, i no olsem God i no inap lusim rong bilong em. Sapos em i laik bai God i ken marimari long em na kongrigesen i ken kisim em bek, em i mas bihainim ol lo bilong God na bihainim pasin bilong man i bin tanim bel, na askim ol elda long kisim em bek. Bipo ol i bin rausim wanpela pamukman long kongrigesen long Korin, na bihain Pol i tok: “Dispela pe nogut bikpela lain bilong yupela i bin tok long dispela man i mas kisim, em inap long em. Olsem na mobeta yupela i mekim narapela pasin nau. Mobeta yupela i lusim sin bilong em na mekim isi bel bilong en. Nogut bikpela bel hevi moa i daunim tru dispela man. Olsem na mi laik bai yupela i soim em olsem yupela i laikim em yet.”​—⁠2 Korin 2:​6-8; 1 Korin 5:​1-13.

God i Save Strongim Yumi

20, 21. Sapos man i ting em i bin mekim bikpela rong tumas na God i no inap lusim tingting long en, em i ken mekim wanem?

²⁰ Sapos yu gat sik o yu bel hevi na dispela i daunim yu na yu ting yu bin mekim bikpela rong tumas na God i no inap sori long yu, gutpela yu ken malolo na slip, na ating dispela bai helpim yu. Na yu ken tingim tok bilong Pita, em i tok: “God i save wari long yupela. Olsem na olgeta hevi yupela i karim, yupela i mas putim long han bilong en.” No ken larim Satan i mekim yu i bel hevi. Pita i tok: “Yupela i mas stap redi na was gut. Satan, dispela birua bilong yupela, em i olsem wanpela laion i singaut strong. Oltaim em i save raun bilong painim ol manmeri bilong kaikai. Tasol yupela i mas i stap strong long bilip na sakim em. Yupela i save, ol arapela manmeri bilong God, ol i stap long olgeta hap bilong graun, ol tu i save karim wankain pen olsem yupela. God em i as bilong olgeta marimari. . . . Bai yupela i karim pen sotpela taim tasol, na bihain bai em yet i mekim yupela i orait gen, na strongim bilip bilong yupela na mekim yupela i sanap strong oltaim.”​—⁠1 Pita 5:​6-10.

²¹ Sapos yu hevi long rong yu bin mekim na yu ting God i no inap marimari long yu na lusim rong bilong yu, yu ken tingim pasin bilong God, em i Man bilong bihainim gutpela tingting na mekim pasin i stret na pasin sori. Olsem na yu ken bilip long God na beten long em. Stadi oltaim long ol samting bilong spirit yumi kisim long “wokboi i gat gutpela tingting.” (Matyu 24:​45-47) Bung wantaim ol wanbilip, na oltaim autim tok bilong Kingdom. Dispela bai strongim bilip bilong yu na bai yu no ken pret na ting God i no bin lusim tingting long rong yu bin mekim.

22. Bihain bai yumi stadi long wanem samting?

²² Lain bilong paradais bilong spirit i ken amamas long save olsem Jehova i Man bilong lusim rong, na dispela i mekim gut bel bilong ol. Tasol sampela hevi i save painim ol tu long nau, olsem wanpela wanlain bilong ol i dai, o pren bilong ol i sik, o ol i gat narapela hevi. Bihain bai yumi stadi long olsem wanem Jehova i helpim na lukautim lain bilong em long rot bilong spirit holi.

Bai Yu Bekim Olsem Wanem?

◻ Olsem wanem yumi save Jehova i bin lusim rong bilong sampela man?

◻ Wanem kain rong Jehova i no inap lusim tingting long en?

◻ Wanem kain rong Jehova inap lusim tingting long en?

◻ Man i mekim rong na em i tanim bel, olsem wanem em i ken ting God bai sori long em?

◻ Sapos man i mekim rong na em i tanim bel, husat i ken helpim em?

[Piksa long pes 10]

Olsem wanem God i lusim rong bilong Devit na Pita, tasol em i no mekim olsem long Judas Iskariot?

[Piksa long pes 12]

Ol elda inap helpim Kristen long ol samting bilong spirit