Bilip Bilong Mama i Win Long Taim Bilong Bikpela Hevi

“Sapos yupela i ritim dispela pas, em i makim olsem mi dai taim ol dokta i katim mi na mi no stap moa wantaim yupela.”

DISPELA tok i stap long kirap bilong pas wanpela mama Kristen, nem bilong em Carmen, i bin raitim long tripela pikinini meri bilong em. Krismas bilong ol em 25, 19, na 16. Sori tru, dispela operesen Carmen i kisim i no helpim em, na em i dai.

Sapos wanpela i mas lusim tripela pikinini meri bilong em long kain rot olsem, bel bilong em bai bagarap tru. Tasol pasin bilong dispela mama long bilip strong long Jehova na ol tok promis bilong em, dispela i win tru long taim bilong bikpela hevi. Bilip bilong em i mekim na em i stap bel isi, olsem gutpela pas bilong em i kamapim. Tingim ol tok em i mekim long ol pikinini meri bilong em.

“Namba wan samting, mi laik tokim yupela olsem mi laikim yupela long bel olgeta bilong mi. . . . Yupela i nambawan gutpela pikinini meri bilong mi na mi amamas tru long yupela.

“Mi bin i gat laik long i stap wantaim yupela i go inap long nupela taim God i tok promis long kamapim . . . , tasol dispela samting i no inap kamap, olsem na mi bin askim God long helpim yupela bambai yupela i ken stap gut long em, olsem yupela i bin mekim. Yumi bin karim planti hevi wantaim, na Jehova i no bin lusim yumi. . . . Olsem na wok yet long bilip long ol tok em i givim long rot bilong oganaisesen bilong em bilong stiaim lain bilong em, na wok yet long sapotim kongrigesen na ol elda. Autim tok planti taim inap tru long skel bilong yupela, na laikim tru olgeta bratasista.

“Inap sotpela taim tasol bai yumi no inap i stap wantaim. . . . Mi askim yupela long lusim tingting long olgeta popaia mi bin mekim, na long taim mi no bin pilim tingting bilong yupela na tokim yupela olsem mi laikim tru yupela. . . . Mi save yupela olgeta wan wan i gat ol samting yupela i mas kisim. Jehova i save gut long ol dispela samting winim yupela yet, na em bai givim yupela olgeta samting yupela i mas kisim. Na em bai praisim yupela long pasin bilong yupela long sanap strong na karim ol hevi.

“No ken lusim tingting long mak yupela i laik winim​—em bilong kisim laip long nupela taim​—na wok strong long winim dispela mak. Jehova i ken blesim na strongim yupela na bai yupela i stap gut long em i go inap long pinis. . . . Ol gutpela pikinini meri bilong mi, yupela i no ken bel hevi. Mi laikim tru yupela!”

Bikpela hevi inap kamap long yumi olgeta long taim yumi no ting em bai kamap. King Solomon bilong bipo i tok: “Taim nogut i save painim yumi olgeta.” (Saveman 9:11) Tasol ol man i bilip strong long God, ol i ken i gat wankain bilip olsem aposel Pol, em i tok: “Mi bilip tru olsem, i no gat wanpela samting inap pasim laik bilong God i kamap long yumi. Dai o laip, . . . o ol arapela samting i stap nabaut, dispela olgeta i no inap pasim laik bilong God, em dispela laik em i givim yumi long Krais Jisas, Bikpela bilong yumi.”​—Rom 8:​38, 39; Hibru 6:10.