Strong Bilong Jehova i Mekim Gut Bel Bilong Ol

WANPELA MAN LONG SPEN I RAITIM DISPELA STORI BILONG KIRAP!

LONG Februeri bilong dispela yia, planti manmeri bilong Kongrigesen Bailen bilong ol Witnes Bilong Jehova long Spen, ol i bin amamas long raun long ol maunten Siera Nevada i stap klostu. Tasol taim bas i kam klostu long ples bilong ol yet olsem 5-pela kilomita samting, wanpela ka i lusim hap rot bilong en na kam long hap rot bas i ran long en. Em nau, ka i bam long poret bilong bas. Bikpela pairap i kamap na bihain paia i kukim bas. Sampela man inap lusim bas, tasol planti i sindaun long baksait bilong bas, nogat. Smok nogut i mekim na ol i dai.

Bagarap i painim 26 Witnes. Fopela bilong ol, ol i Witnes bilong autim tok long olgeta de, na sampela bilong ol, em ol pikinini​—⁠klostu 25 pesen bilong ol manmeri i stap insait long Kongrigesen Bailen. King bilong Spen, em Juan Carlos, i kamapim tingting bilong planti man long Spen taim em i salim wanpela telegram i go long nambawan kaunsil bilong Bailen. Em i tok: “Mipela i kirap nogut long dispela bagarap. Mipela i laik tok sori. Plis, yu mas tokim famili bilong ol dispela man i dai, olsem mipela i salim bikpela sori na mipela i tingim ol long taim bilong dispela bikpela hevi.”

Planti tausen man i bung bilong planim ol dispela man na sampela bilong ol i gat askim olsem: Bilong wanem kain hevi olsem i save kamap? Yumi save “taim nogut i save painim yumi olgeta,” olsem na sampela taim bagarap bai painim sampela long lain bilong Jehova tu olsem em i save painim ol narapela man. (Saveman 9:​11, 12) Tasol Jehova i tok promis, klostu nau ol kain hevi olsem bai pinis.​—⁠KTH 21:​4, 5.

Planti long famili bilong Betel bilong ol Witnes Bilong Jehova long Spen, na planti tausen Witnes bilong ol narapela hap bilong Spen, ol i bin go long Bailen bilong strongim na mekim gut bel bilong ol brata long dispela hap. Ol manmeri na bikman bilong Bailen, ol tu i bel hevi wantaim ol Witnes, em sampela wanfamili bilong ol i bin dai. Planti man i kirap nogut long strongpela bel bilong ol dispela famili Witnes.

Nambawan kaunsil bilong Bailen em Antonio Gómez na em i tok: “Inap planti yia mi bin save long ol Witnes. Maski mi no save God i stap o nogat, mi litimapim lotu bilong yupela. Taim dispela bagarap i kamap, wantu mi ting lotu bilong yupela na pasin bilong yupela long i stap wanbel bai helpim yupela long daunim dispela hevi, winim samting ol narapela lain bai mekim sapos wankain hevi i painim ol. Mi save olgeta man bilong taun i bin sambai long ol famili, em dispela hevi i bin painim ol. Ating bipo, sampela man i gat tingting kranki long yupela, tasol mi amamas long tok, nau ol i no ting olsem. Yupela i gat strongpela bel, na man i no Witnes, em i hatwok long save long dispela kain strong.”

José Borrell, em i wanpela bikman long gavman na em i kam long dispela bung olsem mausman bilong gavman bilong Spen, em i tok: “Mi ken tok wanem long ol man em klostu olgeta insait long famili bilong ol i bagarap wantu tasol? Lotu bilong ol i kamapim pinis ol gutpela tok bilong mekim gut bel bilong ol, na mi no inap kamapim wanpela tok i winim dispela. . . . Yupela i gat gutpela bilip.”

“Givim Gutpela Tok Long Ol Arapela”

“Lotu bilong ol” i helpim ol olsem wanem? Bikpela samting tru em Jehova. Em i mekim gut bel bilong ol, long wanem, em i “God bilong mekim isi bel bilong olgeta man i gat hevi.” (2 Korin 1:​3, 4) Maski ol Witnes i krai sori, taim narapela i mekim gut long narapela dispela i strongim ol, long wanem, ol i pilim tru tok bilong Pol long ol Tesalonaika: “Yupela wan wan i mas givim gutpela tok long ol arapela manmeri bilong God na strongim bel bilong ol, olsem nau yupela i save mekim.”​—⁠1 Tesalonaika 5:⁠11.

Em i narapela kain samting tru long lukim ol brata sista Kristen, em sampela bilong ol i bin lusim 8-pela wanblut long dispela bagarap, tasol ol i go lukim ol narapela insait long kongrigesen bilong mekim gut bel bilong ol, long wanem, hevi i painim ol tu. Francisco Saez, em wasman siaman bilong kongrigesen, na tupela pikinini bilong em i dai, em i tok: “Taim narapela i lukim narapela, mipela i krai wantaim. Tasol maski mipela i krai, mipela i toktok long tok promis bilong Baibel long ol bai kirap bek, na dispela i mekim bel bilong mipela i stap isi.”

Francisco i tok moa: “Mipela i no lusim wok autim tok, na mipela i bin wok strong long go lukim ol wanblut bilong ol man i dai na ol i no Witnes, na mekim wok long liklik buklet Taim Wanpela Long Famili i Dai. Mi yet mi laik autim tok, long wanem, mi save taim mi autim tok long ol narapela dispela bai helpim mi. Na tru tumas, mi krai taim mi lusim haus, tasol taim mi kam bek, bel bilong mi i stap isi.”

Taim ol Witnes i go autim tok, ol manmeri long Bailen i givim bel tru long harim tok. Tupela pikinini meri na 4-pela tumbuna pikinini bilong Encarna i bin kisim bagarap. Wanpela wik bihain long dispela hevi, Encarna i go lukim wanpela nupela Baibel-stadi bilong em. Man bilong dispela meri i bin dai 4-pela mun paslain na Encarna i bin givim sampela tok bilong Baibel bilong mekim isi bel bilong meri. Taim tupela i stadi yet long liklik buklet Taim Wanpela Long Famili i Dai, Encarna i tokim meri olsem: “Nau narapela i mas mekim gut bel bilong narapela.”

Na wantu tasol lain brata i stap long olgeta hap, ol tu i mekim sampela samting bilong kamapim sori bilong ol. Francisco Capilla, em kuskus bilong kongrigesen, em i tok: “Planti tausen pas na telegram i kamap na dispela i bin strongim bel bilong olgeta insait long kongrigesen. Long olgeta de, posofis i mas salim wanpela liklik bas i kam stret long haus bilong mi bilong bringim ol pas samting i kam. Mipela i amamas tru ol brata i tingim tru mipela.”

Gutpela Samting i Kamap Long Samting Nogut

Olsem wanem? Gutpela samting inap kamap long dispela kain hevi? King Solomon i tok: “Sapos yu gat gutpela tingting, bai yu laik i stap wantaim ol man i krai long man i dai pinis.” (Saveman 7:⁠4) Olsem dispela tok i makim, taim bagarap i bin kamap long Bailen, dispela i kirapim sampela manmeri long tingting gut long ol i stap olsem wanem wantaim God. Faustino em i no wanpela Witnes, na tupela bilong 6-pela pikinini bilong em i bin dai long dispela bas. Faustino i tokim meri bilong em Dolores olsem: “Mi laik tokim yu long wanpela gutpela samting. Mi bai kirap na stadi long Baibel, long wanem, mi laik lukim ol pikinini bilong mi long nupela taim.”

Tru, bel hevi bilong ol brata sista bilong yumi long Bailen i no ken pinis hariap, tasol ol i wok long mekim isi bel bilong ol narapela man na dispela i mekim gut bel bilong ol yet. Long rot bilong spirit bilong em, Jehova i wok long strongim ol, na planti gutpela brata sista i sambai long ol. Yumi beten yet long Papa bilong yumi long heven bilong em i ken helpim ol.

[Ol Piksa long pes 24]

Fopela Witnes em bagarap i bin painim ol