As na Ol i Wok Long Pasim Ol Haus Lotu

INAP 50 yia i go pinis ol man inap save ol i stap long ol ples daun bilong Saut Wels, long wanem, i gat ol haus lotu, ol lain bilong mekim singsing long ol haus lotu, na wanpela kain ston long graun ol i save kolim kol. I olsem long olgeta 90 mita 90 mita samting i gat haus lotu bilong ol Baptis, em ol i save mekim lotu long tok Inglis na tok Wels, na i gat ol haus lotu bilong ol Metodis, Kalvin Metodis, Kongrigesenal, Presbitirian, na sampela moa. Bipo planti man long Wels i save toktok long tok ples bilong ol yet, olsem na klostu olgeta misin i gat haus lotu bilong wan wan tok ples. Tasol inap 50 yia nau, televisen na pasin na tingting bilong ol man i senisim dispela samting.

Islwyn Jones bilong Wels, em i save sindaun long Blainklidak long ples daun Ronda, na inap sampela yia em i bin raitim ol ripot long ol samting i painim planti haus lotu long Ronda. Nius Rhondda Leader i kamapim ripot bilong em long klostu 100 haus lotu na nau ol dispela haus lotu i stap olsem wanem. Planti bilong ol dispela haus lotu ol i bin wokim bihain long yia 1800 samting. Ripot i tok: “Bipo taim ol man i mekim bikpela wok insait long ol main bilong kisim kol, ol dispela nambawan haus lotu i bikpela samting tru long ol man bilong Ronda, na i olsem i go inap long taim tupela samting [em lotu na kol], i no bikpela samting moa long i stap bilong ol man bilong ol ples daun.”

Dispela ripot i kamapim klia olsem lotu i no gat strong moa long i stap bilong ol man long Wels na long planti hap bilong Yurop. Ripot i tok, ol i “brukim pinis” 68 haus lotu, na ol i save mekim ol narapela kain wok long 19 haus lotu moa, olsem: “Klap bilong kung-fu samting,” “ples slip olsem ol flet,” “bakstua,” “ples stua,” “haus marasin.” Ripot i no tokaut long wanpela haus lotu long Penigraig. Dispela haus lotu i kamap Haus Kingdom bilong ol Witnes Bilong Jehova bilong Kongrigesen Ronda, na planti man i kam bung wantaim ol.

Olsem Baibel i tok profet long ‘Bikpela Babilon,’ em olgeta lotu giaman, ol bikpela wara bilong en olsem ol manmeri, ol i wok long drai long planti hap bilong graun. Klostu nau ol gavman bai birua na bagarapim olgeta lotu giaman, long wanem, “God yet i givim tingting” long ol long mekim olsem. Long olgeta hap ol lotu giaman i bin bagarapim nem bilong God Jehova na tok giaman long laik bilong em.​—⁠KTH 17:​5, 15-17.a

[Futnot]