Raun na Lukim Ol Gutpela Diwai
WANPELA MAN LONG BRITEN I RAITIM DISPELA STORI BILONG KIRAP!
WESTONBET em wanpela liklik taun long ples maunten Kotswold long Inglan. Wanpela bikpela hap graun olsem pak i mekim na Westonbet i gat nem. I no gat planti kain pak olsem dispela pak—em i bikpela tru, na em i bin stap longtaim, na em i gat kain kain gutpela gutpela diwai na purpur. Orait, yumi ken raun gut na lukim dispela pak.
Naispela na Nambawan Tru
Man bilong lukautim pak em Hugh Angus, na em i tok: “Olgeta man i kam raun i save kirap nogut long ol gutpela gutpela diwai na purpur i stap.” Na ating tok bilong em i stret, long wanem, ol man i save kam planti taim bilong raun na lukim.
Inap 18,000 diwai na purpur i stap long dispela pak—em klostu 50 pesen bilong 9,000 kain diwai na purpur i save kamap long ol ples hat. Bikpela bilong pak i olsem 240 hekta na ol man inap raun long laik bilong ol yet. Tasol bilong helpim ol long amamas moa yet long lukim pak, wanpela liklik buk bilong pak i stori olsem: “Mipela i bin brukim pak long 4-pela hap na tokaut long wanem taim i gutpela long kam bilong lukim wan wan hap bilong en.” Na tu, i gat sampela narapela kain samting bilong lukim olsem diwai Otem Kala Trel, ol diwai Hilier Seri, na ol diwai bilong ples yet. I gat mep na arere long ol rot i gat toksave bilong helpim ol man long painim ol dispela kain diwai.
Ol Gutpela Samting Long Taim Bilong En
Long hap bilong Not i gutpela tru long lukim taim bilong ol diwai na purpur. Long taim bilong san na long taim bilong kol—olgeta i gutpela taim bilong lukim sampela samting long dispela pak. Taim bilong kol i gutpela taim bilong lukim kain kain diwai konefe, na bilong lukim gutpela mak na kala kala bilong ol diwai i lusim pinis lip bilong ol. Na bihain, long taim bilong san i laik kamap, ol purpur na liklik diwai olsem ol aselea, kamilia, magnolia, rododendren, seri—olgeta i save putim gutpela gutpela plaua, na i gat kain kain naispela plaua bilong bus i gat kala kala na i karamapim graun olgeta.
Long taim bilong san ol diwai i save putim lip. Bihain, taim bilong kol i laik kamap na nau olgeta samting long pak i save kamapim kain kain gutpela gutpela kala bilong en. Dispela i mekim na Westonbet i gat nem, olsem na long mun Oktoba inap olsem 90,000 manmeri i save kam bilong lukim dispela gutpela samting tru bilong ol diwai na purpur. Tasol wanpela diwai planti man i amamas tru long lukim, em ol kain kain diwai mepel bilong Japan, em ol diwai i gat retpela kala tru.
Ol i ting planti bilong ol olpela diwai mepel bilong Japan long Westonbet ol i bin bringim i kam long yia 1603 i go inap yia 1867. Tasol sori tru, i no gat wanpela pepa i stap bilong tokim yumi long nem tru bilong ol dispela olpela diwai long tok Japan. Liklik taim bihain long ol man i bringim dispela kain diwai i kam long Yurop, ol Japan i no bin planim planti bilong en. Olsem na i no gat rot bilong skelim ol olpela diwai mepel long Westonbet wantaim ol diwai mepel i stap nabaut yet long Japan o long ol ples didiman long Japan. Ol olpela diwai mepel bilong Japan i wok long pinis, olsem na ol man i wok long planim ol yangpela diwai mepel. Lip bilong klostu olgeta diwai wan wan i gat narapela kain mak na kala. Ol i bin kisim pikinini bilong ol olpela diwai mepel em lip bilong en i save kamapim ol gutpela kala tru, na planim pikinini bilong en. Ol i save planim ol pikinini diwai mepel namel long ol bikpela diwai yar na konefe, em nau, win na san samting i no inap bagarapim ol. Lip bilong ol i yelopela na grinpela, na taim lait bilong san i kam em i save holim lip bilong ol diwai mepel na ol i lait moa yet.
Ol Saveman i Lukautim
Bipo long 1829 wanpela man i bin kirapim dispela pak long Westonbet olsem samting bilong em yet i ken amamas long en, na long 1956 lain British Forestry Commission i kisim. Wanpela wok bilong dispela pak em bilong givim ples ol man i ken kam raun na amamas long en. Tasol bikpela wok tru bilong en em wanpela kain wok saiens—wok bilong kamapim ol diwai i stret long ples bilong en yet. Olsem na ol saveman i stadi na kisim save long rot bilong kamapim sampela diwai na purpur moa. Ol samting i kamap long dispela wok—maski em i kamap gutpela o nogat—ol i toktok long ol dispela samting wantaim ol man i save lukautim ol narapela pak na gaden plaua samting.
Westonbet i go pas long mekim wok bilong putim olgeta samting bilong wan wan diwai na purpur long kompyuta—olsem diwai i kam we, ol samting bilong en taim em i pikinini i go inap long taim em i bikpela, sik i painim diwai o nogat, ol i bin mekim wanem bilong stretim sik, na wanem as na diwai i dai. Narapela bikpela wok bilong pak em bilong kamapim sampela kain diwai ol i no planti o ol i narapela kain tru, na sampela bilong ol i wok long pinis long ples tru bilong en na ol i stap long lista bilong wanpela lain didiman (International Union for Conservation of Nature and Natural Resources). Ol i kisim tasol pikinini bilong ol diwai ol i save em pikinini tru tru bilong en. Ol i mekim olsem na bai ol i no ken kisim pikinini bilong wanpela diwai i bin kamap narapela kain liklik, nogut pikinini i kamap olsem dispela. Na ol i save givim pikinini bilong ol diwai na purpur long ol narapela pak na ples didiman.
Westonbet em wanpela kain skul tu. Sampela program i bilong skulim ol man long save em wanem wanem kain diwai, na ol i save kamapim sampela tok long pasin bilong ol man long katim na rausim bikbus, na ol i save kisim ol man i raun long pak na stori long ol samting i stap, na ol man inap lukim piksa slait tu. Long sampela taim bilong yia ol i save kamapim ol tok wantaim ol piksa bilong helpim ol skulmanki i kam lukim pak.
Sori, nau yumi mas lusim dispela pak. Yumi lukim planti gutpela samting na yumi no inap lusim tingting long en. Yumi mas kam bek gen na lukim dispela pak long ol narapela kain taim. Taim yumi raun na lukim ol gutpela diwai, em i helpim yumi long save ol diwai na purpur i no samting nating, ol i nambawan tru na ol i mekim bikpela wok long helpim ol narapela samting bilong graun.
[Ol Piksa long pes 21]
Antap: Ol Saiprus bilong Loson
Namel: Mepel bilong Japan
Daunbilo: Sida bilong Lebanon