Askim

Taim Devit i kilim i dai Goliat, King Sol i askim em, “Yangpela man, yu pikinini man bilong husat?” Bilong wanem Sol i askim olsem, maski pastaim em i bin salim tok long Devit i mas i kam na stap wokman bilong em?​—1 Samuel 16:22; 17:58.

Wanpela bekim i olsem, Sol i bin lusim tingting long Devit em i pikinini bilong husat, long wanem, taim Sol i bungim Devit long namba wan taim, em i no bin toktok longpela taim wantaim Devit. Tasol ating dispela bekim i no stret, long wanem, stori i stap long 1 Samuel 16:​18-​23 i soim yumi olsem King Sol i bin salim tok long Devit i mas i kam, na Sol i laikim tumas Devit na i makim em long karim ol spia samting bilong em. Olsem na yumi ken ting Sol i save gut long Devit.

Sampela saveman bilong Baibel i ting ol tok long 1 Samuel 17:​12-​31 na 17:55–​18:5 em ol hap tok ol man i bin skruim long Baibel bihain, long wanem, em i no stap long sampela kopi bilong Baibel Grik Septuagint bilong Ol Skripsa Hibru em ol i bin tanim wan handet yia samting paslain long Krais. Tasol i no gutpela long yumi skelim dispela samting wantaim ol dispela kopi bilong Baibel Septuagint tasol, long wanem, ol dispela ves i stap long planti narapela rait bilong Ol Skripsa Hibru i gat nem.a

Pastaim Sol i givim askim long Apner na bihain em i givim long Devit yet, olsem na yumi ken ting Sol i no laik save tasol long nem bilong papa bilong Devit, nogat. Devit i bin winim Goliat long pait na nau Sol i lukim narapela pasin bilong Devit pastaim em i no bin save long en, olsem Devit em i man bilong bilip strong na em i gat strongpela bel. Olsem na Sol i laik save, wanem kain man i bin mekim bikpela long kain mangi olsem. Ating Sol i gat tingting long kisim papa bilong Devit, em Jesi, o ol brata bilong em, bilong kamap soldia long ami bilong em, long wanem, em i ting ol tu i gat strongpela bel olsem Devit.

Tru, 1 Samuel 17:58 i kamapim liklik bekim tasol bilong Devit, em i tok, “Mi pikinini bilong Jesi, wanpela man bilong taun Betlehem.” Tasol tok i kamap bihain long en i makim olsem tupela i bin mekim sampela tok moa. Yumi ken tingim tok bilong sampela saveman, em C. F. Keil na F. Delitzsch, i mekim long dispela, ol i tok: “Dispela tok long [1 Samuel 18:1], ‘Sol wantaim Devit i toktok pinis,’ i kamapim klia olsem Sol i bin toktok yet wantaim Devit long ol samting bilong famili bilong Devit, long wanem, dispela ves i makim olsem tupela i bin toktok longpela taim liklik.”

Olsem na yumi ken kisim tingting olsem, taim King Sol i askim olsem, “Yangpela man, yu pikinini man bilong husat?” em i no laik save Devit em i husat tru, long wanem, em i save pinis, tasol em i laik save long ol samting bilong sindaun bilong em.

[Futnot]

[Piksa long pes 31]

Bilong wanem Sol i askim Devit long em i pikinini bilong husat?