Askim

Wanem mining bilong tok bilong Jisas taim em i tok gutpela wokboi bilong em bai i gat “gutpela tingting”?

Jisas i kamapim askim olsem: “Wanem wokboi i gat gutpela tingting, na i save mekim gutpela wok oltaim? Bikman i save makim dispela kain wokboi bilong bosim ol arapela wokboi bilong en, na bilong skelim kaikai long ol long taim bikman i makim.” (Matyu 24:45) Dispela “wokboi” i save givim “kaikai,” olsem save i helpim yumi long pas gut wantaim God, em lain Kristen God i bin makim long holi spirit. Olsem wanem na Jisas i tok ol i gat gutpela tingting?a

Yumi inap save long dispela sapos yumi skelim ol tok bilong Jisas yet. Olsem: Taim em i toktok long “wokboi i gat gutpela tingting,” em i mekim tok piksa long 10-pela yangpela meri i was i stap na wetim man i marit nupela em i kamap. Ol dispela yangpela meri i kirapim yumi long tingim ol Kristen God i bin makim, em ol i stap paslain long 1914 na ol i amamas long wetim bikpela Man i marit nupela i kamap, em Jisas Krais. Long dispela 10-pela yangpela meri, 5-pela i no gat wel long lam bilong ol long taim man i marit nupela em i kamap, olsem na ol i no inap i go long kaikai bilong marit. Faipela narapela meri i gat gutpela tingting. Ol i bin baim planti wel na lam bilong ol i lait i stap yet long taim man i marit nupela i kamap, na ol inap i go insait long kaikai bilong marit.​—Matyu 25:​10-​12.

Taim Jisas i kirap long bosim Kingdom long 1914, planti namel long ol Kristen God i bin makim ol i ting wantu tasol ol bai go antap na bungim em long heven. Tasol i gat planti wok moa bilong ol long mekim long graun, na sampela i no redi long mekim dispela wok. Ol i wankain olsem ol yangpela kranki meri long tok piksa, na ol i no redi long i stap olsem lain bilong givim lait long ol man. Tasol planti ol i bihainim gutpela tingting​—ol i gat savetingting na pasin bilong skelim ol samting inap kamap bihain​—na ol i pas gut wantaim God. Taim ol i kisim save olsem i gat sampela wok moa ol i mas mekim, ol i amamas na i kirap long mekim dispela wok. Olsem na ol i kamapim klia olsem dispela “wokboi i gat gutpela tingting” i makim ol yet.

Na long Matyu 7:24 Jisas i kolim gen dispela tok “gutpela tingting.” Em i tok: “Man i harim dispela tok bilong mi na i bihainim, em i olsem wanpela man i gat gutpela tingting, na em i wokim haus bilong en antap long ples ston.” Man i gat gutpela tingting em i save wokim strongpela haus, nogut bihain bikpela ren na tait wara i kamap. Tasol longlong man em i wokim haus antap long wesan na haus i pundaun olgeta. Olsem na man i bihainim Jisas na i gat gutpela tingting, em i save long ol samting nogut bai kamap long pasin bilong bihainim savetingting bilong ol man bilong dispela graun. Pasin bilong em long skelim gut ol samting i mekim na ol tok Jisas i bin skulim ol man long en i stap olsem as bilong bilip na pasin, na ol tok em i bihainim. Na dispela “wokboi i gat gutpela tingting” em tu i save mekim olsem.

Na yumi ken tingim Ol Skripsa Hibru i kolim dispela tok em yumi tanim olsem “gutpela tingting.” Olsem: King bilong Isip i bin makim Josep long bosim ol kaikai bilong Isip. Em wanpela rot Jehova yet i bin stretim na bai lain bilong em ol inap kisim kaikai. Bilong wanem king i makim Josep? King i tokim em: “I no gat narapela man i gat gutpela tingting na save olsem yu.” (Stat 41:​33-​39; 45:5) Na Baibel i tok Abigel i gat “gutpela tingting na save.” Em i givim kaikai long Devit, em man God i bin makim, na lain bilong em. (1 Samuel 25:​3, 11, 18) Yumi inap tok Josep na Abigel i gat gutpela tingting, long wanem, ol i pilim tru laik bilong God na ol i skelim gut ol samting i stret long mekim na nau ol i mekim olsem.

Olsem na taim Jisas i tok long wanpela wokboi i gat gutpela tingting, em i laik soim olsem dispela lain em wokboi i makim, ol bai i gat pasin bilong skelim gut ol samting, na tingim ol samting bai kamap bihain, long wanem, tok i tru bilong Baibel i as bilong bilip na pasin bilong ol na ol tok ol i skulim ol man long en.

[Futnot]