Papa Bilong Yumi i Save Marimari
“Yupela i mas sori long ol man, olsem Papa bilong yupela em i save sori long ol.”—LUK 6:36.
1, 2. Olsem wanem tok Jisas i mekim long ol saveman bilong lo na ol Farisi na ol disaipel bilong em i soim olsem pasin marimari em i wanpela gutpela pasin?
LO God i givim long ol Israel long han bilong Moses i gat olsem 600 lo. Tru ol Israel i mas bihainim olgeta lo insait long Lo Bilong Moses, tasol em i bikpela samting tu long ol i mas marimari long ol arapela. Tingim tok Jisas i mekim long ol Farisi em ol i no save marimari long ol arapela. Tupela taim em i krosim ol na i kamapim tok bilong God olsem: “Mi no laikim ol ofa nating yupela i save mekim. Mi laikim tumas bai yupela i mekim gutpela pasin long ol arapela.” (Matyu 9:10-13; 12:1-7; Hosea 6:6) Klostu long pinis bilong wok bilong em, Jisas i tok: “Yupela saveman bilong lo na yupela Farisi, yupela lukaut. Yupela i man bilong tupela maus. Olgeta liklik sayor samting bilong gaden em yupela i save tilim long 10-pela hap na givim wanpela hap long God. Tasol yupela i lusim pinis olgeta bikpela hap tok bilong lo, olsem tok bilong stretpela pasin bilong skelim man na pasin bilong marimari na pasin bilong bilip.”—Matyu 23:23.
2 Tru tumas, Jisas i tingim pasin marimari em i bikpela samting. Em i tokim ol disaipel bilong em: “Yupela i mas sori [“marimari,” NW] long ol man, olsem Papa bilong yupela em i save sori [“marimari,” NW] long ol.” (Luk 6:36) Tasol bilong ‘bihainim pasin bilong God’ long dispela samting, yumi mas save long mining tru bilong pasin marimari. (Efesus 5:1) Na tu, taim yumi kliagut long ol gutpela samting bilong pasin marimari dispela bai kirapim yumi long marimari long ol arapela.
Marimari Long Ol Man i Gat Hevi
3. Bilong wanem yumi mas lukluk long Jehova bilong kisim save long pasin marimari em i wanem samting?
3 Man bilong raitim song i tok: “Bikpela i save laikim yumi tumas na i save marimari long yumi. Em i no save kros kwiktaim na oltaim em i save sori long yumi. Em i save mekim gutpela pasin long olgeta manmeri na em i save marimari long olgeta samting em i bin wokim.” (Song 145:8, 9) Jehova em i “Papa bilong yumi, na em i as bilong olgeta pasin marimari na pasin sori. Em i God bilong mekim isi bel bilong olgeta man i gat hevi.” (2 Korin 1:3) Man i gat pasin marimari em i save mekim pasin sori long narapela. Dispela pasin em i wanpela bikpela pasin bilong God. Pasin na ol tok bilong em inap skulim yumi long pasin marimari em i wanem kain pasin.
4. Aisaia 49:15 i skulim yumi long wanem samting bilong pasin marimari?
4 Long Aisaia 49:15, Jehova i tok: “Ating wanpela mama inap lusim tingting long pikinini em yet i bin karim na em i no sori long dispela pikinini em i bin givim susu long en, a?” Long dispela ves hap tok Hibru ol i tanim i klostu wankain olsem “sori,” long Song 145:8, 9 ol i tanim olsem marimari. Samting Jehova i pilim long bel na i kirapim em long kamapim pasin marimari i wankain long samting mama i save pilim long bebi bilong em. Ating bebi i hangre na mama i mas givim kaikai long em o lukautim em long ol narapela samting. Pasin sori i kirapim mama long mekim ol samting bilong lukautim bebi bilong em. Jehova tu i save pilim olsem long ol man em i marimari long ol.
5. Olsem wanem Jehova i soim olsem em i “marimari” long ol Israel?
5 Em i gutpela long pilim sori long ol arapela, tasol em i gutpela moa long mekim sampela samting bilong helpim ol man i gat hevi. Tingim samting Jehova i mekim taim lain i lotuim em i stap kalabus long Isip inap 3,500 yia i go pinis. Em i tokim Moses: “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i karim. Olsem na mi kam daun bilong kisim bek ol long han bilong ol Isip na bilong bringim ol i go long wanpela bikpela graun i gat planti gris na ol kaikai i save kamap gutpela tumas.” (Kisim Bek 3:7, 8) Inap olsem 500 yia bihain long ol Israel i lusim kalabus long Isip, Jehova i tokim ol: “[Mi] i bin kisim yupela long Isip na bringim yupela i kam. [Mi] i bin kisim bek yupela long han bilong ol Isip na bilong ol arapela lain pipel i bin wok long mekim nogut long yupela.” (1 Samuel 10:18) Ol Israel i no bihainim ol stretpela lo bilong God, olsem na planti taim hevi i painim ol. Maski ol i mekim olsem, Jehova i sori long ol na planti taim em i save helpim ol. (Hetman 2:11-16; 2 Stori 36:15) Dispela i kamapim klia pasin God i save mekim bilong helpim ol man i sot long ol samting o i gat hevi. “Marimari bilong God em i pulap tru.”—Efesus 2:4.
6. Olsem wanem Jisas Krais i bihainim pasin bilong Papa bilong em long kamapim pasin marimari?
6 Taim Jisas i stap long graun, em i bihainim pasin bilong Papa bilong em long kamapim pasin marimari. Jisas i mekim wanem taim tupela aipas i singaut long em olsem: “Yu Pikinini Bilong Devit, yu mas sori long mitupela”? Ol i askim Jisas long wokim mirakel na opim ai bilong tupela. Jisas i pilim hevi bilong tupela na em i oraitim tupela. Baibel i tok: “Jisas i sori long tupela, na em i putim han long ai bilong tupela, na wantu tasol ai bilong tupela i orait na tupela i lukluk gen.” (Matyu 20:30-34) Pasin sori i kirapim Jisas long wokim planti mirakel i helpim ol aipas, ol man i gat spirit nogut, ol man i gat sik lepra, na ol papamama em pikinini bilong ol i gat sik samting.—Matyu 9:27; 15:22; 17:15; Mak 5:18, 19; Luk 17:12, 13.
7. Pasin bilong God Jehova na Pikinini Man bilong em i skulim yumi long wanem samting long pasin marimari?
7 Pasin bilong God Jehova na Jisas Krais i soim olsem pasin marimari i gat tupela hap bilong en—sori long ol man i stap nogut na mekim sampela samting bilong helpim ol. Bilong mekim pasin marimari man i mas mekim dispela tupela samting. Long Baibel, pasin marimari i makim gutpela pasin man i mekim long narapela i gat hevi. Tasol olsem wanem long ol samting bilong kot? Sapos man i no givim strafe long man i gat asua, yu ting dispela tu i insait long pasin marimari?
Marimari Long Ol Man i Mekim Rong
8, 9. Wanem samting i insait long pasin marimari em God i mekim long Devit bihain long em i mekim pasin pamuk wantaim Batseba?
8 Tingim samting i bin kamap taim profet Natan i go tokim King Devit bilong Israel long bipo long Devit i bin mekim pasin pamuk wantaim Batseba. Devit i bel hevi tru na i beten olsem: “God, yu as bilong sori, yu ken marimari long mi. Yu gat bikpela marimari tru, olsem na mi laik bai yu rausim olgeta pasin nogut bilong mi. Yu mas wasim mi olgeta, na bai pasin nogut i no i stap moa long mi. Rausim sin bilong mi na mi ken kamap klin. Mi save mi mekim rong pinis. Mi no inap lusim tingting long sin bilong mi. Mi mekim sin long yu wanpela tasol. Mi mekim pasin nogut long ai bilong yu.”—Song 51:1-4.
9 Devit i bel hevi tru long rong em i bin mekim. Jehova i lusim rong bilong Devit na i no givim strafe long em na Batseba olsem Lo i makim. Sapos em ol jas i bin skelim ol, ating ol dispela jas i mas bihainim Lo Bilong Moses na kilim tupela i dai. (Lo 22:22) Tasol maski tupela i no dai, ol i no abrusim olgeta hevi bilong sin bilong ol. (2 Samuel 12:13) Pasin bilong lusim rong i insait long pasin marimari bilong God. Tasol long taim i stret long mekim, em i save givim strafe long man i gat asua.
10. Jehova i save marimari taim em i skelim man, tasol bilong wanem yumi no ken ting maski yumi mekim wanem God bai marimari long yumi?
10 Indai bai painim olgeta man, long wanem, “wanpela man i bin mekim sin, na long dispela pasin sin i kamap long graun. Na sin i bringim dai i kam.” (Rom 5:12; 6:23) Yumi ken amamas tru olsem Jehova i save marimari long yumi taim em i skelim yumi! Tasol yumi no ken ting maski yumi mekim wanem God bai marimari long yumi, nogat. Lo 32:4 i tok: “Pasin bilong [God] i gutpela na stretpela tasol.” Taim God i laik mekim pasin marimari, em i save bihainim stretpela pasin bilong em.
11. Olsem wanem Jehova i mekim stretpela kot taim em i skelim rong Devit na Batseba i mekim?
11 Bilong Devit na Batseba i no ken i dai, olsem pe bilong sin bilong ol, Jehova i mas lusim rong bilong tupela. Jehova i no givim namba long ol jas bilong Israel long lusim rong bilong tupela. Sapos God Jehova i bin larim ol man i skelim kot bilong Devit na Batseba, kot bai tok long tupela i mas i dai. Lo i tok olsem man i slip wantaim meri bilong narapela man em i mas i dai. Tasol Jehova i tingim kontrak em i bin wokim wantaim Devit, olsem na em i laik save olsem i gat as na em i ken lusim rong bilong Devit o nogat. (2 Samuel 7:12-16) Olsem na God Jehova, em “Jas bilong olgeta graun,” na em i “save traim bel bilong olgeta man,” em yet i skelim dispela samting. (Stat 18:25; 1 Stori 29:17) God inap lukim bel na tingting bilong Devit, na skelim olsem em i tanim bel tru o nogat, na em i ken lusim sin bilong Devit.
12. Ol sinman i mas mekim wanem na bai God i ken marimari long ol?
12 Jehova i marimari long yumi taim em i opim rot long lusim pe bilong sin yumi bin kisim long Adam, na dispela i stret wantaim stretpela pasin bilong em. Bilong lusim sin bilong yumi na i no brukim ol stretpela lo bilong em, Jehova i givim Pikinini bilong em, Jisas Krais olsem ofa—em nambawan bikpela pasin marimari em i bin mekim. (Matyu 20:28; Rom 6:22, 23) Bilong God i ken marimari long yumi, na yumi no ken kisim pe bilong sin em yumi bin kisim long rot bilong Adam, yumi mas “bilip long Pikinini.”—Jon 3:16, 36.
God Bilong Mekim Pasin Marimari na Stretpela Pasin
13, 14. Olsem wanem? Pasin marimari bilong Jehova i save daunim stretpela pasin bilong em? Stori long dispela.
13 Pasin marimari bilong Jehova i no save brukim ol stretpela lo bilong em. Tasol olsem wanem? Pasin bilong em long marimari i save daunim strong bilong ol stretpela lo bilong em? Nogat tru.
14 Long rot bilong profet Hosea, Jehova i tokim ol Israel: “Bai mi mekim yu i kamap olsem meri bilong mi, na bai yu stap olsem oltaim oltaim. Bai mi mekim stretpela pasin long yu na bai mi no ken lusim yu. Na bai mi laikim yu tru oltaim, na marimari long yu oltaim.” (Hosea 2:19) Dispela tok i kamapim klia olsem oltaim pasin marimari bilong Jehova i wok gut wantaim ol narapela pasin bilong em, na stretpela pasin tu. God Jehova em i ‘as bilong marimari na sori na em i save lusim ol kain kain sin, tasol em i save mekim save long ol man i gat asua.’ (Kisim Bek 34:6, 7) Jehova em i God bilong mekim pasin marimari na stretpela pasin. Baibel i tok long em olsem: “Em i olsem wanpela bikpela strongpela ston i no save senis. Oltaim em i save bihainim tok bilong en. Na pasin bilong en i gutpela na stretpela tasol.” (Lo 32:4) Stretpela pasin bilong God i gutpela olgeta, wankain olsem pasin marimari bilong em. Narapela i no winim narapela, na narapela i no daunim narapela. Dispela tupela pasin i wok gut wantaim.
15, 16. (a) Wanem samting i soim olsem Jehova i no save mekim hatpela kot? (b) Taim Jehova i bagarapim ol man nogut bilong dispela graun, ol man i lotu long em i ken bilip tru long wanem samting?
15 Kot bilong Jehova i no hatpela kot. Tru, Jehova i save givim strafe long ol man i mekim rong na i stret ol i mas kisim strafe. Tasol taim em i mekim olsem, em i save kisim bek ol gutpela man. Olsem: Taim ol man nogut long Sodom na Gomora i kisim bagarap, God i kisim bek Lot na 2-pela pikinini meri bilong em.—Stat 19:12-26.
16 Yumi ken bilip tru olsem taim Jehova i bagarapim ol man nogut bilong dispela graun, “planti manmeri” i save lotu tru long Jehova, em ol i “bin wasim ol klos bilong ol long blut bilong Pikinini Sipsip, na ol klos i kamap waitpela,” ol bai abrusim bagarap. Ol bai winim taim bilong “bikpela hevi” tru.—KTH 7:9-14.
Bilong Wanem Yumi Mas Marimari?
17. Wanem wanpela bikpela as na yumi mas mekim pasin marimari?
17 Pasin bilong Jehova na Jisas Krais i skulim yumi long mining tru bilong pasin marimari. Sindaun 19:17 i kamapim wanpela bikpela as na yumi mas kamapim pasin marimari, em i tok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” (Sindaun 19:17) Jehova i amamas taim yumi bihainim pasin bilong em na Pikinini bilong em long marimari taim yumi mekim ol samting wantaim ol arapela. (1 Korin 11:1) Na taim yumi marimari long ol arapela dispela bai kirapim ol long marimari long yumi tu.—Luk 6:38.
18. Bilong wanem yumi mas marimari long ol arapela?
18 Insait long pasin marimari i gat planti narapela gutpela pasin, olsem pasin laikim, pasin bilong helpim na mekim gutpela pasin long ol arapela. Pasin sori i save kirapim man long marimari long narapela. Taim God i mekim pasin marimari dispela i no daunim stretpela pasin bilong em; Jehova i no save belhat kwik na em i save isi na wet i stap long ol man nogut i ken tanim bel. (2 Pita 3:9, 10) Pasin bilong marimari i wok gut wantaim pasin bilong i no les kwik. Planti narapela pasin i insait long pasin marimari—na tu sampela pasin bilong holi spirit i insait long en—olsem na pasin marimari inap helpim yumi long kisim ol dispela gutpela pasin bilong holi spirit. (Galesia 5:22, 23) Em i bikpela samting long yumi mas marimari long ol arapela!
“Ol Manmeri i Save Marimari Long Ol Arapela Ol i Ken Amamas”
19, 20. Olsem wanem man i marimari long narapela em bai winim kot?
19 Disaipel Jems i tokim yumi long as na yumi mas marimari long ol arapela. Em i tok: “Man i save sori [“marimari,” NW] long ol arapela man, em bai i winim kot.” (Jems 2:13b) Jems i toktok long pasin marimari em man i lotuim Jehova i save mekim long ol arapela. Taim man i mas ‘tokim God long as bilong olgeta pasin em i bin mekim,’ Jehova bai tingim pasin bilong em long marimari na em bai lusim rong bilong em long rot bilong ofa bilong Pikinini Man bilong em. (Rom 14:12) Olsem na wanpela as na God i marimari long Devit long sin em i mekim wantaim Batseba, em long wanem Devit i man bilong marimari long ol arapela. (1 Samuel 24:4-7) Tasol “sapos wanpela man i no bin sori [“marimari,” NW] long ol arapela man, orait taim God i skelim em long kot, God bai i no sori [“marimari,” NW] liklik long em.” (Jems 2:13a) Olsem na ol man i “no save sori [“marimari,” NW] long ol arapela man” ol i stap long lista bilong ol man em God i tok ol “i mas i dai”!—Rom 1:31, 32.
20 Long Bikpela Tok Long Maunten, Jisas i tok: “Ol manmeri i save marimari long ol arapela, em ol i ken amamas. Bai God i marimari long ol.” (Matyu 5:7) Dispela tok i kamapim klia olsem ol man i laik bai God i ken marimari long ol, ol i mas marimari long ol arapela! Stadi i kamap bihain long dispela bai stori long olsem wanem yumi ken kamapim pasin marimari long i stap bilong yumi.
Yu Lainim Wanem Samting?
• Pasin marimari em wanem samting?
• Wanem sampela rot bilong soim pasin marimari?
• Olsem wanem Jehova em i God bilong mekim pasin marimari na stretpela pasin?
• Bilong wanem yumi mas marimari long ol arapela?
[Piksa long pes 21]
Pasin sori bilong Jehova long ol man i gat hevi i kain olsem pasin em mama i mekim long bebi bilong em
[Piksa long pes 23]
Long ol mirakel Jisas i bin wokim, yumi inap kisim wanem save long pasin bilong marimari?
[Piksa long pes 24]
Olsem wanem? Jehova i brukim stretpela lo bilong em taim em i marimari long Devit?
[Piksa long pes 25]
Pasin marimari bilong God long ol sinman em i stret wantaim stretpela lo bilong em