Yumi Mekim Wok Bilong God Em Pasin “Marimari i Pulap” Long Em

1. Man i gat pasin marimari em i gat wanem ol pasin?

TAIM yumi tingim man i gat pasin marimari, yumi inap tingim man i gat ol pasin olsem gutpela pasin, pasin pren, pasin sori, na pasin bilong givim samting. Dispela i kirapim yumi long tingim stori Jisas i mekim long man Samaria. Dispela man bilong narapela kantri i “mekim pasin marimari long” wanpela man Juda husat i kisim bagarap long han bilong ol raskol. Man Samaria “i sori tru” long dispela man Juda i kisim bagarap, na long pasin laikim em i stretim rot long dispela man long kisim helpim. (Luk 10:29-37) Dispela tok piksa i kamapim klia wanpela naispela pasin bilong God—em pasin marimari. Dispela pasin em hap bilong pasin laikim bilong God na em i soim dispela pasin long olgeta de long ol pasin em i mekim long yumi.

2. Wanem narapela rot bilong soim pasin marimari?

² I gat narapela rot bilong soim pasin marimari. Em i makim olsem man i holim bek strafe na em i no givim strafe long man i gat asua taim i gat as long mekim olsem. Jehova i bin mekim kain pasin marimari olsem long yumi olgeta. Man bilong raitim song i tok: “I stret em i mekim save long yumi long ol sin bilong yumi, tasol em i no save mekim olsem.” (Sng. 103:10) Tasol long ol narapela taim, Jehova i save givim strafe long man i mekim sin.

3. Bai yumi skelim wanem ol askim?

³ Long dispela atikol, yumi bai stori long 3-pela askim: I gat wanem as na Jehova i save mekim pasin marimari? Yu ting pasin bilong stretim man i gat pasin marimari long en? Na wanem samting inap helpim yumi long mekim pasin marimari? Yumi ken skelim tok Baibel i mekim bilong bekim ol dispela askim.

AS NA JEHOVA I SAVE MEKIM PASIN MARIMARI

4. I gat wanem as na Jehova i save mekim pasin marimari?

⁴ Jehova i save amamas long mekim pasin marimari. Aposel Pol i raitim dispela tok olsem pasin “marimari i pulap” long God. Long dispela ves, Pol i tok God i gat pasin marimari taim em i anointim ol man—maski ol i no gutpela olgeta—long kisim laip long heven. (Efe. 2:4-7) Tasol Jehova i mekim pasin marimari long ol Kristen em i anointim na long ol narapela tu. Devit em man bilong raitim song, em i tok: “Jehova i save mekim gutpela pasin long olgeta manmeri, na olgeta samting em i mekim i kamapim klia pasin marimari bilong em.” (Sng. 145:9) Jehova i save laikim ol manmeri, olsem na em i save mekim pasin marimari taim em i lukim olsem i gat as long mekim olsem.

5. Jisas i kisim wanem skul long pasin marimari bilong Jehova?

⁵ Jisas i save gut moa long Jehova winim olgeta narapela man na em i save olsem Jehova i save amamas long mekim pasin marimari. Jehova na Jisas i bin stap wantaim long heven inap planti tausen yia paslain long Jisas i kam long graun. (Prov. 8:30, 31) So inap planti taim tru Jisas i lukim Papa bilong em i mekim pasin marimari long ol sinman long graun. (Sng. 78:37-42) Taim Jisas i skulim ol manmeri, planti taim em i save stori long dispela gutpela pasin bilong Papa bilong em.

6. Jisas i stori long wanem samting bilong helpim yumi long kliagut long pasin marimari bilong Papa bilong em?

⁶ Long atikol i go pinis, yumi bin skelim tok piksa bilong Jisas long pikinini man i lusim papa. Em bilong helpim yumi long kliagut long hau Jehova i save amamas long mekim pasin marimari. Pikinini man i bin lusim papa, na “em i mekim ol kain kain hambak pasin na westim ol samting bilong em.” (Luk 15:13) Bihain em i tanim bel long pasin nogut em i mekim, daunim em yet, na kam bek long papa. Papa i mekim wanem? Yangpela man i no wet longpela taim bilong save long dispela. Jisas i tok: “Taim [pikinini man] i stap longwe yet, papa i lukim em na i sori tru long em, na em i ran i go na holimpasim em na givim kis long em.” Dispela papa i no semim pikinini man bilong em, nogat. Em i marimari na fogivim dispela yangpela man na welkamim em bek long famili. Pikinini man i bin mekim bikpela sin, tasol em i tanim bel, olsem na papa i fogivim em. Long dispela tok piksa, dispela papa i gat pasin marimari i makim Jehova. Jisas i mekim dispela tok piksa bilong helpim yumi long kliagut long pasin bilong Papa bilong em long redi long fogivim ol sinman husat i tanim bel tru tru.​—Luk 15:17-24.

7. Olsem wanem pasin marimari bilong Jehova i soim olsem em i gat bikpela savetingting?

⁷ Jehova i mekim pasin marimari bikos em i gat bikpela savetingting. Jehova i gat savetingting na em i save mekim ol disisen bilong helpim ol samting em i wokim. Baibel i tok: “Savetingting i kam long heven” i save mekim man i “marimari tru long narapela na kamapim ol gutpela pasin.” (Jems 3:17) Wankain olsem wanpela gutpela papa i save mekim, Jehova i save mekim pasin marimari long lain bilong em na dispela i helpim ol. (Sng. 103:13; Ais. 49:15) Maski ol i sinman, pasin marimari bilong God i opim rot long ol i wetim ol gutpela samting i kamap bihain. So Jehova i gat bikpela savetingting tru, na dispela i kirapim em long marimari taim em i lukim olsem i gat as long mekim olsem. Long wankain taim, Jehova i save skelim gut wanem taim stret em i ken marimari long man. Em i gat savetingting, so em i no save marimari nating long man taim em i lukim olsem man i mas kisim strafe long rong em i mekim.

8. Man i mekim sin i mas kisim wanem strafe, na bilong wanem?

⁸ Sapos wanpela wokman bilong God, long laik bilong em yet, em i wok long mekim pasin pamuk. Yumi mas mekim wanem? Holi spirit i kirapim Pol long raitim tok olsem: “Lusim pasin bilong poroman” wantaim em. (1 Kor. 5:11) Man i mekim sin na i no tanim bel, ol i mas rausim em long kongrigesen. Ol i mekim olsem bilong lukautim ol bratasista long kongrigesen, na tu, long kamapim klia olsem ol pasin bilong Jehova i holi. Tasol ating sampela inap pilim olsem, taim ol i rausim man long kongrigesen, dispela i makim olsem God i no marimari long em. Yu ting dispela em tru? Yumi ken skelim.

YU TING EM PASIN MARIMARI LONG RAUSIM MAN?

9-10. Olsem Hibru 12:5, 6 i kamapim, wai na pasin bilong rausim man i kamapim klia pasin marimari? Stori long tok piksa.

⁹ Taim yumi harim toksave i kamap long wanpela miting Kristen olsem wanpela yumi save long em na laikim em tru “i no stap moa olsem wanem Witnes Bilong Jehova,” yumi save pilim bikpela bel sori tru. Na ating yumi save tingting, i stret long ol i rausim dispela man o meri yumi save laikim? Yu ting em pasin marimari long rausim man? Yes, dispela i soim pasin marimari. Sapos man i mekim wanpela bikpela rong, tasol ol i no stretim em, dispela em i no savetingting, na em i no kamapim klia pasin marimari na pasin laikim bilong God. (Prov. 13:24) Taim man i raus, yu ting dispela inap helpim em long tanim bel na senisim ol pasin bilong em? Yes, dispela inap helpim em long mekim olsem. Planti em ol i bin pundaun na mekim bikpela sin, ol i bin pilim olsem pasin bilong ol elda long sanap strong long tok bilong Baibel na givim strafe long ol, dispela i bin helpim ol long wokim gut tingting, senisim pasin bilong ol, na kam bek long Jehova.​—Ritim Hibru 12:5, 6.

¹⁰ Tingim dispela tok piksa. Wasman bilong sipsip i luksave olsem wanpela sipsip bilong em i sik. Em i save olsem bilong helpim dispela sipsip long kamap orait, em i mas putim em i stap wanpis long wanpela hap, na em i no ken bungim em wantaim ol narapela sipsip. Tasol ol sipsip i gat pasin bilong bung na stap wantaim. So em i gat laik long stap wantaim ol narapela sipsip, na em i no amamas taim wasman i rausim em i go stap em yet. Yu ting wasman i mekim hatpela pasin taim em i rausim dispela sipsip i gat sik i go stap em yet? Nogat tru. Em i save olsem sapos dispela sipsip i gat sik i stap wantaim ol narapela sipsip, em inap givim sik long ol narapela. Taim em i rausim sik sipsip i go stap em yet, dispela i lukautim gut ol narapela sipsip.​—Skelim Wok Pris 13:3, 4.

11. (a) Long wanem ol rot, rausman i olsem wanpela sik sipsip? (b) I gat wanem ol samting i stap bilong helpim ol rausman long kam bek?

¹¹ Taim wanpela Kristen i raus long kongrigesen, yumi ken tingim em olsem wanpela sipsip i sik. Em i bagarapim pasin pren bilong em wantaim God na i olsem em i sik. (Jems 5:14) Olsem sik i save kalap i go long ol narapela, man husat i bagarapim pasin pren bilong em yet wantaim Jehova, em inap kirapim ol narapela long mekim ol pasin nogut wankain olsem em. So em i bikpela samting long ol i rausim man i mekim bikpela sin long kongrigesen. Dispela pasin bilong stretim man i kamapim klia pasin bilong Jehova long laikim tru ol man i stap gut long em, na dispela inap helpim man i mekim sin long pilim tru rong bilong em na tanim bel. Taim man i raus, em i ken kam yet long ol kongrigesen miting bilong harim tok bilong Baibel na strongim gen bilip bilong em. Em i ken kisim ol litresa bilong em yet i ken yusim na em i ken watsim JW Broadcasting^®. Na tu, ol elda bai skelim ol senis em i mekim na ating sampela taim ol bai givim ol tok bilong helpim em na stiaim em long strongim gen pasin pren bilong em wantaim Jehova. Na long dispela rot em i ken kam bek long kongrigesen olsem wanpela Witnes Bilong Jehova.b

12. Ol elda i mekim pasin laikim na pasin marimari taim ol i mekim wanem long sinman husat i no tanim bel?

¹² Em i bikpela samting long tingim olsem sinman husat i no tanim bel em ol i save rausim em long kongrigesen. Ol elda i save olsem dispela em wanpela siries disisen, olsem na ol i save skelim gut paslain long ol i rausim man. Ol i save olsem Jehova i save stretim man “inap long mak i stret” long man. (Jer. 30:11) Ol i laikim tru olgeta bratasista bilong ol, na ol i no inap mekim wanpela samting we bai bagarapim pasin pren bilong ol wantaim Jehova. Tasol sampela taim, ol elda i mekim pasin laikim na pasin marimari taim ol i rausim sinman husat i no tanim bel long kongrigesen inap sampela haptaim.

13. Wai na wanpela Kristen i mas raus long kongrigesen long Korin?

¹³ Skelim pasin aposel Pol i mekim long wanpela sinman husat i no tanim bel long taim bilong ol aposel. Wanpela Kristen long Korin i wok long mekim pasin pamuk wantaim meri bilong papa bilong em. Em samting nogut tru! Long kain samting olsem, Jehova i bin tokim lain Israel bilong bipo olsem: “Sapos wanpela man i slip wantaim meri bilong papa bilong em, orait em i semim papa bilong em. Olsem na yupela i mas kilim i dai dispela man na dispela meri.” (Wkp. 20:11) Tru Pol i no tok long ol i mas kilim i dai dispela man. Tasol em i tok long ol Korin i mas rausim dispela man long kongrigesen. Pasin pamuk em dispela man i mekim i nogutim ol narapela insait long kongrigesen, na sampela i pilim olsem pasin em i mekim i no bikpela rong tumas.​—1 Kor. 5:1, 2, 13.

14. Olsem wanem Pol i soim pasin marimari long dispela rausman long Korin, na bilong wanem? (2 Korin 2:5-8, 11)

¹⁴ Inap sampela haptaim bihain, Pol i kisim save olsem dispela man i mekim ol bikpela senis. Dispela sinman i bin tanim bel tru! Maski pasin bilong dispela man i bin semim kongrigesen, Pol i tokim ol elda olsem em i “no laik mekim strongpela tok tumas.” Na em i tokim ol olsem: “Redi long fogivim em na mekim isi bel bilong em.” Skelim as na Pol i mekim dispela tok, em i tok: “Nogut em i bel hevi tru na dispela i daunim em olgeta.” Pol i pilim sori long dispela man husat i bin tanim bel tru. Aposel Pol i no laik bai bel hevi i daunim tru dispela man long sin em i bin mekim bipo, na nau em inap pilim hatwok long askim God long fogivim.​—Ritim 2 Korin 2:5-8, 11.

15. Olsem wanem ol elda i ken mekim stretpela kot bilong God na long wankain taim mekim pasin marimari?

¹⁵ Wankain olsem Jehova, ol elda i amamas long mekim pasin marimari. Ol i strong long mekim stretpela kot bilong God taim i gat as tru long mekim olsem, tasol long wankain taim, ol i mekim pasin marimari taim rot i op long mekim olsem. Sapos ol elda i no stretim sinman, dispela em i no pasin marimari, dispela i olsem ol i orait long sin em i mekim. Tasol olsem wanem? Ol elda tasol i gat wok long soim pasin marimari?

WANEM SAMTING I KEN HELPIM YUMI OLGETA LONG MEKIM PASIN MARIMARI?

16. Olsem Provep 21:13 i kamapim, Jehova i save mekim wanem long ol man em ol i no save mekim pasin marimari?

¹⁶ Olgeta Kristen i save wok strong long bihainim pasin bilong Jehova long mekim pasin marimari. Bilong wanem? Wanpela as em olsem, Jehova i no save harim beten bilong ol man em ol i no save mekim pasin marimari long ol narapela. (Ritim Provep 21:13.) Yumi olgeta i laik bai Jehova i harim ol beten bilong yumi, olsem na yumi wok strong long kisim pasin marimari na sakim hatpela pasin. Yumi no laik sakim ol wanbilip Kristen em ol i karim ol pen na hevi, nogat. Oltaim yumi mas redi long harim “krai bilong ol taranguman.” So yumi laik bihainim tok bilong Baibel olsem: “Sapos man i no bihainim pasin bilong marimari long ol arapela, orait jas bai i no marimari long em taim em i skelim em.” (Jems 2:13) Sapos yumi daunim yumi yet na tingim olsem yumi nidim tru pasin marimari bilong ol narapela, orait yumi bai redi long mekim pasin marimari. Na moa yet, yumi laik marimari tru long sinman husat i tanim bel na kam bek long kongrigesen.

17. Olsem wanem King Devit i soim olsem em i gat pasin bilong marimari tru?

¹⁷ Ol gutpela stori bilong Baibel i ken helpim yumi long kisim pasin marimari na abrusim hatpela pasin. Eksampel, tingim stori bilong King Devit. Planti taim em i save mekim pasin marimari tru. Maski Sol i laik kilim em i dai, Devit i mekim pasin marimari long dispela king em God i makim na em i no bekim rong o mekim ol samting bilong bagarapim em.​—1 Sml. 24:9-12, 18, 19.

18-19. Long wanem tupela taim Devit i no bin mekim pasin marimari?

¹⁸ Sampela taim Devit i no bin mekim pasin marimari. Olsem, tingim taim hatpela man Nabal i mekim ol tok i no stret na em i tok nogat long givim kaikai long Devit na ol man i kam wantaim em. Long dispela taim, Devit i belhat nogut tru na em i go bilong kilim i dai Nabal na olgeta man long haus bilong em. Tasol gutpela meri bilong Nabal em Abigel, em i hariap tasol long bringim ol kaikai i kam long Devit so Devit i no gat asua long blut bilong Nabal na ol man long haus bilong em.​—1 Sml. 25:9-22, 32-35.

¹⁹ Long narapela taim, profet Natan i stori long Devit long wanpela maniman i stilim sipsip bilong wanpela rabisman. Devit i belhat nogut tru na em i tok: “Mi tok tru antap long Jehova husat i stap laip, man i mekim dispela kain pasin em i mas i dai!” (2 Sml. 12:1-6) Devit i save long Lo Bilong Moses. Sapos wanpela stilman i stilim wanpela sipsip, orait em i mas bekim 4-pela sipsip i go bek long papa bilong sipsip. (Kis. 22:1) Tasol bilong kilim i dai man em narakain samting! Dispela em hatpela pasin tru. Dispela stori em i no samting i kamap tru tru. Natan i mekim dispela stori olsem tok piksa bilong kirapim Devit long tingim sampela bikpela hevi i bin kamap—em ol sin we Devit yet i bin mekim! Na Jehova i soim klia olsem em i mekim bikpela pasin marimari moa long Devit, winim pasin Devit i laik mekim long dispela man i stilim sipsip long stori bilong Natan!​—2 Sml. 12:7-13.

20. Yumi inap kisim wanem skul long stori bilong Devit?

²⁰ Tingim, Devit i bin belhat nogut tru taim em i tok long kilim i dai Nabal na ol man long haus bilong em. Na bihain, Devit i tok olsem i stret ol i kilim i dai maniman long stori bilong Natan. Long stori bilong Natan, ating bai yumi tingting, wai na wanpela gutpela man i tingting long mekim hatpela pasin olsem kilim man i dai. Skelim ol samting Devit i bin pilim. Long dispela taim, maus bilong bel bilong Devit i gat tok long ol samting em i bin mekim. Sapos man i mekim hatpela pasin long skelim narapela man, dispela i makim olsem em i no gat gutpela pasin pren wantaim God, nogat. Jisas i givim strongpela tok lukaut long ol disaipel bilong em olsem: “Yupela i mas lusim pasin bilong skelim ol arapela olsem jas, nogut ol i skelim yupela tu. Dispela skel yupela i skelim ol arapela long en olsem jas, long dispela wankain skel tasol ol bai skelim yupela tu.” (Mat. 7:1, 2) So yumi mas wok strong long sakim hatpela pasin, na larim pasin “marimari i pulap” long yumi wankain olsem God bilong yumi.

21-22. Wanem sampela rot yumi ken mekim pasin marimari?

²¹ Pasin marimari em i no samting yumi pilim tasol long bel, nogat. Mining bilong dispela tok marimari em “mekim ol samting bilong soim pasin sori.” Yumi olgeta i ken mekim ol samting bilong helpim ol lain i nidim helpim olsem insait long famili, long kongrigesen, na long komiuniti. I gat planti rot bilong mekim pasin marimari! Yu ting wanpela i nidim ol tok bilong mekim gut bel bilong em? O yumi ken helpim long sait bilong kaikai o ol narapela samting? Yu ting yumi ken stap gutpela pren bilong wanpela Kristen em kongrigesen i kisim em bek? Yumi inap autim gutnius bilong mekim isi bel bilong ol narapela? Dispela em wanpela gutpela rot bilong mekim pasin marimari long olgeta man yumi bungim.​—Jop 29:12, 13; Rom 10:14, 15; Jems 1:27.

²² Taim yumi redi long helpim ol narapela, yumi bai luksave olsem i gat planti rot bilong mekim pasin marimari. Taim yumi mekim pasin marimari, yumi amamasim Papa bilong yumi long heven, em God we pasin “marimari i pulap” long em.