Ol Rot Yu Inap Makim Bilong Stap Amamas
“WAI na mi no laik wokim narapela disisen.” Ating planti taim yu bin mekim kain tok olsem long yu yet, a? Yumi olgeta i laik wokim ol disisen em bihain yumi no ken bel hevi long en, na moa yet long ol disisen em inap mekim sampela samting long i stap bilong yumi long bihain. Tasol olsem wanem yumi inap makim ol rot bilong helpim yumi long stap amamas?
Namba wan samting, i mas i gat ol lo yumi inap bilip tru long en. Olsem wanem? I gat ol kain lo olsem? Planti man i no ting olsem. Long wanpela wok painimaut long Amerika, ol i kisim save olsem 75 pesen bilong ol haiskul sumatin i bilip olsem i no gat wanpela pasin em man inap tok em i stret o i no stret. Na ol i bilip olsem, wanem pasin i gutpela na wanem pasin i no gutpela, dispela em samting bilong “wan wan man yet na ol wan wan lain i ken skelim.”
Tasol olsem wanem? I stret long ting olsem ol lo bilong stretpela pasin em samting wan wan yet i ken makim o yumi ken larim tingting bilong planti man i makim? Nogat, i no stret long ting olsem. Ol samting bai paul nabaut sapos ol man i stap fri long mekim wanem wanem samting ol i laikim. Ating i no gat wanpela bilong yumi i laik stap long wanpela hap we i no gat ol lo o kot o polis, a? Na yumi save, sampela taim tingting bilong yumi i no save stiaim gut yumi. Taim yumi makim rot yumi ting i stret long bihainim, bihain yumi kisim save olsem yumi bin popaia. Tru tumas, ol samting i bin kamap bipo na i kam inap nau em i kamapim olsem dispela stiatok bilong Baibel em i tru: “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Orait yumi inap kisim we ol tok bilong stiaim yumi taim yumi wokim ol disisen long ol bikpela samting long laip bilong yumi?
Yangpela man i gat namba em yumi bin stori long em long stori i kamap paslain, em i bihainim gutpela tingting na em i go lukim Jisas. Bilong bekim askim bilong dispela man, Jisas i stori long Lo bilong God. Jisas i luksave olsem God Jehova em i As bilong olgeta save na savetingting na Em i save wanem samting inap helpim tru ol man Em i bin wokim. Olsem na Jisas i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.” (Jon 7:16) Tru tumas, Tok Bilong God inap helpim yumi long wokim ol gutpela disisen long laip bilong yumi. Orait nau yumi ken tingim sampela stiatok bilong Baibel, em sapos yumi bihainim, amamas bilong yumi bai go bikpela moa.
Pasin Yumi Mas Mekim Long Ol Arapela
Long Bikpela Tok Long Maunten, Jisas i kamapim wanpela stiatok em inap helpim yumi long wokim ol gutpela disisen long ol samting yumi mekim long ol arapela. Em i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”—Matyu 7:12.
Sampela man i kolim wanpela tok i narakain liklik: “Pasin yu no laik bai ol narapela i mekim long yu, yu tu i no ken mekim long ol.” Bilong helpim yumi long tingim olsem wanem dispela tok i narapela kain liklik long tok bilong Jisas, yumi ken tingim tok piksa bilong Jisas long gutpela man Samaria. Olsem: Ol stilman i paitim wanpela man Juda nogut tru. Em i hap indai na slip long rot. Wanpela pris na wanpela Livai i lukim dispela man na ol i abrusim em. Ol i no mekim wanpela samting bilong helpim em, i olsem ol i bihainim dispela tok i kolim samting man i no ken mekim. Tasol wanpela man Samaria i wokabaut i kam na i helpim dispela man. Em i pasim ol sua bilong em na bringim em i go long wanpela haus pasindia. Pasin em i mekim long dispela man Juda em pasin em i laik bai narapela i mekim long em yet—em gutpela disisen em i bin wokim.—Luk 10:30-37.
I gat kain kain samting yumi ken mekim bilong bihainim dispela stiatok na dispela inap kamapim amamas. Tingim samting yu ken mekim sapos wanpela famili i kam nupela long hap bilong yu. I gutpela sapos yu go na sekanim ol, a? Ating yu ken toksave long ol long ol samting bilong dispela hap ol i mas save long en na bekim ol askim bilong ol. Sapos yu yet i kirap na mekim gutpela pasin olsem, dispela bai helpim yu long sindaun gut wantaim ol dispela nupela neiba bilong yu. Na tu, yu bai belgut long save olsem samting yu mekim em samting God i laikim. Em i gutpela disisen, a?
Ol Rot Yumi Makim Long Bihainim Long Wanem Yumi Laikim Ol Arapela
I gat ol narapela stiatok tu em Jisas i kamapim bilong helpim yu long wokim ol gutpela disisen. Taim wanpela man i askim Jisas long wanem lo insait long Lo Bilong Moses i nambawan na i winim olgeta arapela lo, Jisas i tok: “ ‘Yupela i mas laikim God, Bikpela bilong yumi. Yupela i mas laikim em tru long bel bilong yupela na long spirit bilong yupela na long tingting bilong yupela.’ Dispela lo em i bikpela, na em i namba wan tru. Na namba 2 lo em i wankain olsem dispela. Em i olsem, ‘Yu mas laikim ol wantok olsem yu laikim yu yet.’ Dispela tupela lo i as bilong olgeta tok bilong lo na bilong ol profet.” —Matyu 22:36-40.
Long apinun paslain long Jisas i dai, em i givim wanpela “nupela lo” long ol disaipel bilong em—em narapela i mas laikim tru narapela. (Jon 13:34) Bilong wanem em i tok dispela lo i nupela? Em i bin tokim ol disaipel olsem lo bilong laikim ol wantok em i wanpela bilong tupela lo na dispela tupela lo i as bilong olgeta tok bilong Lo. Aninit long Lo Bilong Moses, ol Israel i bihainim lo olsem: “Yu mas laikim tru ol wantok olsem yu laikim yu yet.” (Wok Pris 19:18) Tasol nau Jisas i tokim ol disaipel long mekim sampela samting moa. Long dispela apinun yet, Jisas i tokim ol disaipel long em bai lusim laip bilong em bilong helpim ol. Na bihain em i tokim ol: “Lo bilong mi em i olsem. Yupela wan wan i mas laikim tru ol arapela, long wankain pasin olsem mi bin laikim yupela. Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.” (Jon 15:12, 13) Yes, dispela lo i nupela, long wanem, nau ol i mas putim laik bilong ol arapela i go pas long laik bilong ol yet.
I gat planti samting yumi ken mekim bilong tingim ol arapela na kamapim pasin laikim. Olsem: Sapos yu sindaun long haus na yu laik harim musik long mak bilong volium yu laikim, tasol yu save dispela bai bagarapim bel bilong neiba bilong yu, orait yu bai mekim wanem? Bai yu redi long daunim laik bilong yu na bai dispela neiba i ken stap bel isi? Bai yu putim laik bilong neiba bilong yu i go pas long laik bilong yu yet?
Nau tingim narapela stori. Long Kanada, long taim bilong bikpela kol na planti sno, ol Witnes Bilong Jehova i bungim wanpela lapun man. Ol i toktok wantaim lapun i go na em i tok em i gat sik long klok na dispela i bin pasim em long rausim ol sno i hip i stap long fran bilong haus. Wanpela aua bihain, em i harim pairap bilong savol i wok long rausim sno. Tupela Witnes i bin kam bek bilong rausim sno long rot na ol step i go kamap long haus. Lapun i raitim pas long brens ofis bilong ol Witnes Bilong Jehova long Kanada, na pas i tok: “Tude mi lukim pasin tru bilong ol Kristen long laikim narapela. Planti taim mi save bel hevi, tasol dispela pasin sori i mekim na mi belgut na mi rispek moa long bikpela wok yupela i save mekim long olgeta hap.” Yes, taim yumi tingting long helpim narapela, maski long liklik samting tasol, dispela inap kamapim amamas. Tru tumas, bikpela amamas inap kamap taim yumi daunim laik bilong yumi yet na helpim ol arapela!
Ol Rot Yumi Makim Long Wanem Yumi Laikim God
Narapela samting yumi mas tingim taim yumi makim ol rot yumi laik bihainim, em samting Jisas i tok em i namba wan bikpela lo—yumi mas laikim tru God. Dispela tok bilong Jisas i go long ol Juda, em ol i bilong wanpela lain i dediket pinis long Jehova. Tasol ol wan wan yet i mas makim wanem rot ol i laik bihainim, bai ol i laikim God na mekim wok bilong em long bel olgeta na long strong olgeta bilong ol o nogat.—Lo 30:15, 16.
Na olsem tasol, ol samting yu makim long mekim, ol dispela samting i save kamapim klia yu gat wanem tingting long God. Olsem: Taim yu wok long kisim save long olsem wanem Baibel inap helpim yu, yu tu i mas makim rot yu laik bihainim. Olsem wanem? Yu redi long stadi long Baibel na bihainim Jisas? Sapos yu mekim olsem, dispela bai givim amamas long yu, long wanem, Jisas i tok: “Ol manmeri i save, ol i stap rabis tru long ol samting bilong God, em ol i ken amamas.”—Matyu 5:3.
Yumi no save dispela yangpela man i gat biknem em i bel hevi long disisen bilong em o nogat. Tasol yumi save long aposel Pita i bin pilim olsem wanem taim em i bihainim Jisas Krais inap planti yia. Long 64 C.E. samting, klostu long taim Pita i dai, Pita i strongim ol wanbilip olsem: “Yupela i mas wok strong long mekim yupela yet i stap klin long ai bilong God na yupela i no gat asua long wanpela samting. Na yupela i mas i stap wanbel wantaim God.” (2 Pita 1:14; 3:14) Em i klia tru olsem Pita i no bel hevi long disisen em i bin mekim 30 yia i go pinis, na em i strongim ol narapela long bihainim yet disisen ol i bin mekim.
Bilong bihainim dispela tok bilong Pita, yumi mas kirap mekim ol wok ol disaipel bilong Jisas i save mekim na bihainim ol lo bilong God. (Luk 9:23; 1 Jon 5:3) Dispela inap luk olsem hatwok, tasol yumi ken tingim gutpela tok promis bilong Jisas: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Yupela kisim save long mi, long wanem, mi save mekim pasin isi long ol man . . . Plang mi putim long nek bilong yupela, em i isi long karim, na samting mi givim yupela bilong karim, em i no hevi.”—Matyu 11:28-30.
Tingim stori bilong Arthur. Taim Arthur i gat 10-pela krismas, em i kirap long lain long pilaim vailin, em i laik mekim dispela i kamap olsem wok mani bilong em long bihain. Taim em i gat 14 krismas, em i kamap hapman bilong pilaim vailin. Tasol em i no amamas. Oltaim papa bilong em i gat ol askim, em i laik save i gat wanem as na yumi stap na em i save singautim ol tisa bilong lotu i kam long haus; tasol em i no amamas long ol bekim bilong ol. Famili olgeta i save toktok wantaim, ol i laik save, God i stap tru o nogat, na i gat wanem as na em i larim pasin nogut i stap. Bihain papa bilong Arthur i toktok wantaim ol Witnes Bilong Jehova. Papa bilong Arthur i amamas long ol tok em i harim, na famili olgeta i kirap stadi long Baibel.
Arthur i stadi long Baibel na bihain em i kisim save long as na God i larim pasin nogut i stap, na yumi stap bilong mekim wanem. Arthur i wokim wanpela disisen em i no bin bel hevi long en. Em i dediketim laip bilong em long Jehova. Tripela narapela long famili bilong em ol tu i mekim olsem. Arthur i tok: “Mi amamas tru Jehova i bin helpim mi long kisim save long tok i tru na helpim mi long lusim pasin bilong resis wantaim ol narapela em yumi inap lukim namel long ol lain bilong musik em ol i save mekim dispela wok olsem wok mani bilong ol. Bilong kisim biknem, ol man i save redi long mekim kain kain samting.”
Arthur i save amamas long pilaim yet vailin bilong amamasim ol pren bilong em, tasol pasin bilong pilaim vailin i no stap nambawan bikpela samting long laip bilong em. Nau em i mekim wok bilong God. Em i wok long wanpela brens ofis bilong ol Witnes Bilong Jehova. Olsem Arthur na planti milion manmeri moa—tasol i no olsem dispela yangpela maniman i gat namba—yu tu i ken makim rot em inap givim bikpela amamas tru long yu. Em rot bilong harim singaut bilong Jisas long bihainim em.
[Piksa long pes 6]
Disisen bilong yu inap mekim bikpela samting long laip bilong ol arapela
[Piksa long pes 7]
Bai yu stadi long Baibel na bihainim Jisas?