Baibel i Tok Wanem?
Olsem Wanem Yumi Ken Makim Ol Samting Yumi Laik Mekim?
GOD i wokim namba wan man na meri, Adam na Iv, na em inapim tupela long makim wanem samting ol i laik mekim. Em i makim Adam long lukautim gaden Iden. Adam i gat wok bilong givim nem long ol animal. (Stat 2:15, 19) Na bikpela samting moa, Adam na Iv inap skelim olsem ol bai bihainim tok bilong God o nogat.—Stat 2:17, 18.
Kirap long dispela taim na i kam, inap planti bilion taim ol man yet i bin makim wanem rot ol i laik bihainim—planti rot i gutpela, sampela i no gutpela tumas, na sampela i nogut stret. Sampela rot nogut ol man i bin makim i kamapim ol samting nogut tru. Maski i olsem, God i no save pasim rot bilong yumi long makim wanem rot yumi laik bihainim. Olsem wanpela gutpela Papa, long rot bilong Baibel God i helpim yumi long makim wanem rot i gutpela long bihainim. Na tu, em i save givim tok lukaut long yumi long wanem samting inap painim yumi sapos yumi makim ol rot nogut long bihainim. Baibel i tok samting yumi planim em dispela samting tasol bai yumi kamautim.—Galesia 6:7.
Ol Samting Bilong Yumi Yet
Long sampela samting God i save kamapim stret laik bilong em, na em i save tokim yumi long wanem rot stret yumi mas bihainim. Tasol long planti samting bilong yumi yet, Baibel i no putim ol lo yumi mas bihainim, nogat. Em i kamapim tasol ol stiatok na bai ol wan wan man yet i ken skelim wanem samting ol laik mekim. Tingim tok Baibel i mekim long ol samting bilong amamas.
Baibel i tok long Jehova olsem “em i as bilong pasin tru bilong amamas.” (1 Timoti 1:11) Tok bilong em i kamapim olsem i gat “taim bilong lap” na “taim bilong singsing.” (Saveman 3:1, 4) Baibel i tokim yumi olsem King Devit i bin pilaim musik bilong amamasim ol narapela. (1 Samuel 16:16-18, 23) Jisas i bin go long wanpela bung bilong marit, na em i tanim wara i kamap wain.—Jon 2:1-10.
Tasol Baibel i mekim tok lukaut olsem: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) “Tok pilai nogut” na pasin pamuk samting i save mekim nogut bel bilong God na ol dispela kain pasin inap bagarapim pasin bilong yumi long pas gut wantaim em. (Efesus 5:3-5) Sapos long ol pati i no gat sampela tambu long bia samting, ol bikpela hevi inap kamap. (Sindaun 23:29-35; Aisaia 5:11, 12) Na tu, God Jehova i no laikim tru pasin bilong kros pait.—Song 11:5; Sindaun 3:31.
Ol dispela ves bilong Baibel i helpim yumi long kisim wankain tingting olsem God long ol samting bilong amamas. Taim ol Kristen i laik makim ol samting ol i laik mekim, ol i mas tingim ol tok bilong Baibel. Yumi olgeta bai kisim gutpela samting o samting nogut long ol samting yumi makim long mekim.—Galesia 6:7-10.
Olsem tasol, long ol samting bilong klos, marit, lukautim pikinini, na wok bisnis, ol Kristen i mas bihainim gutpela tingting long makim ol samting ol i laik mekim na i stret wantaim ol stiatok bilong Baibel. Em ol samting Baibel i no kolim stret ol lo bilong en, tasol i gat ol stiatok i stap long Baibel bilong helpim ol Kristen long makim ol samting ol i laik mekim na i stret wantaim maus bilong bel bilong ol. (Rom 2:14, 15) Ol Kristen i mas bihainim wanpela lo long olgeta samting ol i makim long mekim, em olsem: “Sapos yupela i kaikai na dring o yupela i mekim narapela samting, yupela i mas mekim dispela olgeta samting bilong givim biknem long God.”—1 Korin 10:31.
Na tu, long dispela samting i gutpela yumi mas tingim stiatok olsem yumi mas ‘mekim wok bilong yumi yet.’ (1 Tesalonaika 4:11) Planti taim ol Kristen i mas makim sampela samting ol i mas mekim na dispela i no pait wantaim laik bilong God. Olsem na ol samting wanpela Kristen i makim long mekim ating em bai i no wankain long narapela Kristen. God bai i no amamas sapos ol wokman bilong em i skelim pasin bilong ol narapela. (Jems 4:11, 12) Baibel i givim gutpela tok olsem: “Yupela i mas lukaut, nogut ol i givim pen long yupela, long wanem, . . . yupela i bin paulim wok bilong ol arapela.”—1 Pita 4:15.
Mekim Wok Bilong God
Baibel i soim olsem pasin bilong bihainim tok bilong God i save kamapim gutpela samting. Tasol God i no save subim ol man long lotuim em, nogat. Em i save singautim olgeta man em i wokim long lotuim em. Baibel i tok: “Yupela kam, yumi daunim het na lotu long em. Bikpela i bin wokim yumi. Orait yumi go klostu long em na brukim skru.”—Song 95:6.
Kain singaut olsem i bin go long ol Israel bilong bipo. Winim 3,500 yia i go pinis, lain Israel i sanap klostu long maunten Sainai, na God i soim rot long ol long lotu tru long em na em i givim Lo Bilong Moses long ol dispela planti milion manmeri. Orait nau ol i mas makim wanem samting ol i laik mekim: Ol bai lotuim God o nogat? Ol i tok wanem? Olgeta i wanbel wantaim na ol i tok: “Mipela bai bihainim stret olgeta tok bilong Bikpela.” (Kisim Bek 24:7) Long laik bilong ol yet ol i makim olsem ol i laik lotuim Jehova.
Long taim bilong ol aposel, Jisas i kirapim wok bilong autim gutnius bilong Kingdom bilong God. (Matyu 4:17; 24:14) Em i no subim wanpela man long mekim dispela wok, nogat. Long gutpela pasin em i singautim ol narapela: “Kam bihainim mi.” (Mak 2:14; 10:21) Planti i amamas long bihainim em na kirap autim tok wantaim em. (Luk 10:1-9) Bihain, long laik bilong ol yet sampela i lusim Jisas. Long laik bilong em yet Judas i kamapim Jisas long ol birua. (Jon 6:66; Aposel 1:25) Ol aposel i helpim planti man moa long kamap disaipel bilong Jisas, na i no olsem wanpela i pretim ol na nau ol i kamap disaipel, nogat, long laik bilong ol yet ol i makim dispela rot long bihainim. “Bel bilong ol i gutpela tru” na ol i “bilip.” (Aposel 13:48; 17:34) Long nau tu, long laik bilong ol yet ol trupela Kristen i bihainim tok bilong God na ol tok Jisas i skulim ol man long en.
Tru tumas, God i laik bai yumi mekim wok long pasin bilong i stap fri long tingim ol samting yumi laik mekim. Na tu, em i givim ol tok i stap long Baibel bilong helpim yumi long bihainim gutpela tingting taim yumi laik makim wanem rot long bihainim. (Song 25:12) Taim yumi makim ol samting bilong yumi yet, olgeta wan wan Kristen i mas tingim gut ol stiatok bilong God. Long dispela rot tasol yumi inap long mekim “wok bilong God . . . wantaim stretpela tingting.”—Rom 12:1, NW.